#معذبتي
❤البارت 13❤
رائد....
شروق تكون بنت خالتلي... المشكله أول مرا نسمع بيها
جاني خالي قاسم وقالي بنت خالتك تطلقت ولازم تتزوجها... يعني القصه ومافيها عن الناس لا تتكلم علينا
بدر شريكي الجديد بالمشروع... وصاني قريبي وقالي شغله ممتاز... وحبيت نتاجر معاه
اليوم الصبح لما طلع من عندي بالطريقه السريعه هذي... تخلي الواحد يشك.. بس هوا وظرفه
وتوا العشيه كلمني خالي منصور يبيني نمر عليه
طلعت من الحوش وركبت سيارتي ومشيت حوش خالي منصور
درست ورا سيارة ونزلت... مع كنت بنخش طلعت بنت... شبحتلها يما شاء الله عليها... معقوله هذي شروق... يحظي فيها... بس السؤال يرجع ليش تطلقت
مشت للسيارتها ووقفت تشوف في سيارتي وراها وكانت محتاره
قلتلها:.. تفضلي... فيه مشكله
شبحتلي وقالت:.. وأنت شن دخلك
صدمتني الصراحه... عندها الحق شن دخلني
لفيت بنخش بس جاني فضول نشوفها كيف بدير
ركبت سيارتها وكان فيه سياره قدامها... يعني حصلت بالنص
ابتسمت لما لمحتها متضايقه... شغلت سيارتها وحاولت كيف تطلع ماقدرت
نزلت وبدت تتكلم وتمتم... ههههه واضحه أنها تسب
قربت ورجعت سألتها:.. فيه مشكله
انخلعت ولفت بسرعه... شكلها نست إني كنت قريب منها
لمحت دمعه بعينها فقلتلها:.. معليش خوفتك.. بس انتهبهت إنك في مشكله
قالت بصوت باكي:.. ماقدرت نطلعها
ضحكت ولا قدرت نسكت:.. هههههه
تضايقة وطاحت دمعتها:.. ماتضحك عليا... توني متعلمه السواقه
كسرت خاطري على أنها زعلانه عشان ما قدرت تطلعها... قلتلها:.. اسف مش قصدي... اعطيني نطلعها ليك
قالت وهي متضايقه وعاقده حواجبها:.. يعني في كل مرا نحصل هكي بتجي تطلعها ليا
ابتسمت وقلتلها:.. به نوريك كيف اديري.. مشان ما تحتاجي حد
ابتسمتلي وقالت:.. هكي تمام
اعطتني المفتاح وركبت وخليت الباب مفتوح عشان تشوفني شن ندير
وبحكم السنين الطويله طلعتها ليها
وطلعت من السيارة
قلتلها:.. شفتي كيف طلعت
قالت:.. إيه ساهله عليك بس
ضحكت وبعدت عنها عشان تركب... ومشت بطريقها وأنا مشيت لحوش خالي طقيت الباب وفتحولي
استقبلني خالي بالمربوعه... هدرزت معاه في مواضيع واجده
بعدها قلتله:.. وين طلعت شروق
استغرب وقالي:.. كيف وين.. اهيا داخل
قلتله:.. توها طالعا بالسيارة وأنا خاش
ضحك وقال:.. ههه لالا هذي صاحبتها... شروق ماتعرف تسوق
صاحبتها... خساره بصراحه... توا عجبتني صاحبتها... كيف موقعي أنا
قالي:.. تكلمت مع خالك قاسم وقالي تبي تتزوج شروق
توترت ومش عارف علاش... أمس لما قالولي كان وضعي عادي
قلتله:.. لازم يخالي أنا نتزوجها
قالي:.. أنت حر... بس لو عليا نفضل إنك تتزوجها
قلتله:.. به مايمكن راجلها يردها
قالي:... مانبي يكون فيه أي علاقه تربطنا بالعيلة هذي... ومانبيها ترجعله
شكيت في الوضع وسألته:.. هيا ماتبيه أو هوا مايبيها
قالي:.. توا تطلقت وخلاص... مافي داعي تفتح قصه قديمه
ووقف خالي وقالي:.. توا نرجعلك
خش لداخل وأنا احترت... نخاف نرتبط بيها وهي مغصوبه عليا... ومع صاحبتها يلي طلعت في وجهي... عقلي خش وطلع في بعضه
♡
♡♡♡♡♡♡♡♡
شروق...
طلعت مروة من عندي بعد ما حسيت روحي أحسن شوي... بس مع ذلك نحس بتعب شوي
جا لعندي حسن أو أنه حسين.. هههه مانعرفهم
حسن:.. شروق تعالي نوريك شن درت برا
وقفت معاه وقلتله:.. أنت حسن أو حسين
قالي:.. اااف ديما تسألي فينا... ليش ما تحفظي... أنا حسن... اشحي شعري طويل... وحسين شعره قصير
ضحكت وقلتله:.. هههه به مش حننسه... شن درت
مسكني من يدي وسحبني لبرا
لقيته لاعب بالطين وباني شبه سور قلعه
ابتسمتله وسألته:.. شن هذي
قالي:.. أنا درت قلعه بس ماعرفت نرفعها فوق زي التلفزيون
ضحكت وقلتله:.. هههه بالتلفزيون على البحر صح
هزلي راسه:.. إيه
ابتسمت وقعدت تحت وقلتله:.. عشان التراب تبع البحر مش نفسه هذا... لازم يرفعنا ابوك للبحر في يوم
جا حسين وسحب حسن:.. حسن اجري... باتمان بتبدا
قام يجري معاه وانا ننادي فيه:.. والقلعه يحسن لمن
بس مارد عليا وكمل طريقه داخل
وأنا كنت بنمشي بس عجبتني ريحة الطين وقعدت نلعب فيه شوي
حسيت حد يمشي ورايا وتوقعته خالي وقلت:.. يخالي ملينا ولازم تاخذنا للبحر... حرام صغارك يبو الرمل والبحر
قالي:.. أكيد انتي شروق
انخلعت ولفيت بسرعه... ماعرفته ووقفت بنخش لداخل بس وقفني وقال:.. أنا رائد ولد خالتك خولة... وانا يلي بنتزوجك
وقفت مصدومه ولفيت بسرعه عليه:.. تتتزوج من
قالي:.. ليش انصدمتي... مش إنتي موافقه وقلتلي بعد العده طول
كنت مصدومه بكل معنى للكلمة:.. شن تقول أنت
قرب وهوا مستغرب:.. يعني إنتي مش موافقه
قلتله:.. بس أنا متزوجه
قالي:.. كنتي متزوجه... إنتي مطلقه
دمعت عيوني وخفت... مانبي حد يعرف أنه بدر رجعني فقلتله:.. ولو تطلقت مستحيل نتزوج ثاني... مانعيش مع غير بدر
قالي وهوا مستغرب:.. بس ليش خالي قال إنك موافقه
قلتله:.. اصلا هما خلوه يطلقني غصب... لا أنا نبي ننفصل عنه ولا هوا يبي
نزل عيونه يفكر شوي... بعدها قال:.. يعني إنتي تبي ترجعي لراجلك
هزيت براسي ونحس أنه الشخص يلي بيساعدني:.. أكيد
قالي:.. به اكتبيلي رقمك... وصدقيني أنا مش حنضرك بشي... ونساعدك ترجعي لراجلك
شبحتله بشك وقلتله:.. وليش بتساعدني
ابتسم وقال:.. انا كنت رافض فكرة الزواج هذا... بس لأنك قريبتي وافقت... بس لما عرفت إنك تبي ترجعي لراجلك... ارتحت... والطريقه الوحيده إني نساعدك ترجعي عشان نطلع أنا منها
ابتسمت وقلتله:.. شكرا
طلع تلفونه عشان يمده ليا
خذيته وسجلت رقمي... بعدها قلتله:.. نكتبلك حته رقم راجلي
قالي:.. يكون أحسن
سجلت الرقم... بس تستغربت أنه طلع مسجل وقلتله:.. اسمه محفوظ عندك
استغرب وخذا تلفونه وشافه
وضحت الصدمه بوجها وقالي:.. راجلك بدر يلي يشتغل بالمشاريع الزراعية
قلتله:.. إيه هوا
قام يضحك:.. هههههه.... هههههه.... عليك صدفه... هههههه
استغربت وسألته:.. شن فيك
قالي:.. تصدقي اليوم كنت معاه وبنشتغل معاه
تفاجأة:.. بالحق... كيف صار
ابتسم وقال:.. شكلها الصدفة جمعتنا... على العموم لما يسألك أي حد من خوالي... قولي إنك موافقه عليا... عشان مايشكو فينا تمام... وأنا نحاول نتلاقه مع بدر ونخبره بكل شي
ابتسمت براحه وقلته:.. أن شاء الله
وخشيت لداخل... يربي يكون صادق وفعلا يبي يساعدني
♡
♡
♡♡♡♡♡♡♡♡
بدر....
كنت بنواجه رائد ونقوله أنا راجلها بس مش عارف شن صار ... ليش انربط لساني مش عارف
رجعت امس من سفرتي ولا حكيت شي لي حد
توا طالع من الحوش وماشي لعادل زي ما اتفقت معاه... نكون يوم كامل نساعده... وبعدها نفضا لشروق وخوالها
وصلت لعنده وطلع معايا بالسيارة ومشينا
عادل:.. وين سرحان... تصدق خايف تقلب بينا السيارة
ابتسمت وقلتله:.. ماتخافش... منتبه ومركز في الطريق
قال عادل:.. يريت لو كان فرحنا في نفس اليوم
تنهدت وقلتله:.. مانبي فرح ولا شي... نبيها عندي وبس... تعبت وأنا نجيها من كل طريق... وتتسكر بوجهي
عادل:.. أصبر وتحمل... والاخير مرادها ليك
♡
♡
♡♡♡♡♡♡♡♡
بعد اسبوع
بدر....
بعد ما كملنا من فرح عادل... توا لازم نفضا لموضوعي... لازم نشوف حل
رجعت للحوش ناخذ دباش ليا وناوي إني نمشي لشروق... والمرا هذي بنرجعها معايا بدون اي تردد... ولو خطفتها
طلعت بالشنطه وحطيتها بالسيارة ومشيت بطريقي
بعد الخمس ساعات كنت بجنب حوش خالها منصور
نزلت وطقيت الباب وطلعلي أحمد
ابتسملي وقال:.. أهلا بدر... كيفك
رديتله الابتسامه:.. الحمد لله... وأنت اخبارك
قالي:.. الحمد لله
قلتله:.. ابوك قاعد
فتح الباب وقالي تفضل... قاعد بالمربوعه
خشيت وراه وخليته يعطي ابوه خبر إني جيته وقالي تفضل
سلمت عليه وقعدت
قال خالها منصور:.. تفضل يبدر
قلتله:.. جاي نرجع مراتي لعندي
ابتسم على جنب وقال:.. أي مراه تقصد
قلتله:.. ليش عندكم غير شروق
قالي:.. بس هي ماتبيك... واتفقتو على الشي هذا... أو كيف
رديت عليه:.. خلها تقولها ليا الكلمه ثاني... ووجه لوجه
قالي خالها:.. تقدملها ولد خالتها ووافقت... نراجو العده تتم ونزوجها ليه
قلتله بعد ما عصبت:.. بس هي مراتي... وأنا رجعتها لذمتي
عقد حواجبه وقال:.. مش بكيفك الموضوع... ولو تمت المده ولا كانت عندك فخلاص... وبما إنك هنا... حنخليك تسمع موافقتها على رائد
وقف طلع وأنا قعدت على نار... أنا خبرتها إني رجعتها لذمتي... وأكيد هي مستحيل توافق على غيري
بعد كم دقائق خش خالها ووقف جنب الباب وقال:.. يبنتي شروق موافقه على رائد يكون زوجك بعد تكملي العدة
قالت:.. إيه موافقه عليه يخالي
انصدمت من يلي سمعته... انا ماشفتها بس هذا صوتها... ايه صوتها
قاللها خالها:.. ارجعي لداخل
وجا لعندي وقال:.. سمعتها صح
قلتله:.. ليش ما خليتها تخش تشوفني
قالي:.. لأنك المفروض محرم عليها توا
وقفت معصب وقلتله:.. صدقني مش حتكون لغيري
طلعت وأنا معصب والنار والعه فيا
شغلت سيارتي ومشيت طول لحوش رائد
طقيت الباب بسرعه وبفوضوية... وطلعلي رائد بوجهي وهوا مستغرب:.. بدر شن فيه
وأنا بدون أي مقدمات نزلت ضرب فيه
يتبع....
