#معذبتي
❤البارت 10❤
بدر....
بعد ما فطرنا حوش العم(أبو مروة) طلعنا بالسيارة
شروق:.. حبيبي خذلي حاجها نتسلا بيها بالطريق
لفيت عليها وأنا مفنص فيها:.. وأنا ماتقدري تتسلي بيا
ضحكت وقالت:.. هههه نخاف طعمك مر... وبعدين لو كليتك من بيوصلني
ابتسمت وكملت سواقه:.. كويس فكرتي من بيوصلك... يعني نرتاح إنك مش حتاكليني
قالت:.. إيه ارتاح... بس وقف على محل وخذلي دوار الشمس أو فوشار أو اي شي يقرمش
قلتلها:.. أن شاء الله.... امممم نبي نقولك على شي
شروق:.. شن هوا
ابتسمت وقلت:.. شن رايك تنقلي دباشك لداري وخلاص... وبلا جو الحفله والحنه ومش عارف شن ثاني
سكتت ولا قالت شي
لفيت عليها:.. شن رايك
قالت:.. أنا خاطري فيهم... ونبي اندير فرح حته لو خفيف
حسيت من صوتها زعلت:.. به مش مشكله... انديرها ليك... بس من اليوم بتكوني في داري
قالت:.. خلينا تحت بجنب جدي أحسن... شفت يومها تعب والحمد لله كنت قريبه منه
أهو معاها الحق بخصوص جدي بس داري أكبر وأوسع:.. مش مشكله... أهم شي راحتك
وقعدنا ساكتين مدة... وصلت لمحل ونزلت ليه عشان نشري يلي في خاطرها
♡
♡♡♡♡♡♡♡♡
أنس....
وصلت قدام محل وكان منصور بالسيارة ورايا... كنت بننزل نشري كم حاجه بس لمحت بدر وهوا ينزل من السيارة
وشبحت شروق قعده... ابتسمت على الصدفه هذي... ورفعت تلفوني ضربت على منصور
رد عليا:.. ايوا أنس
قلتله:.. بنت اختك بالسيارة البيضة... واقفه بجنب الرصيف من جيهتي
قالي:.. اها شفتها... بننزلها توا
قلتله:.. هيا ليك... وتذكر هي المسكينه ماعندها حد غيركم... واولاد عمها كلهم طامعين فيها... نحساب بنمشيك لمنطقتنا بس طلعت في نفس منطقتكم
قالي:.. شكرا مرا ثانيا... مع السلام
قلتله:.. سلام
وقفلت الخط وأنا مبتسم من يلي بيصير توا... مانكون أنس لو خليتك ترتاح يبدر
♡
♡♡♡♡♡♡♡♡
شروق....
قعده نراجي في بدر بالسيارة... مشكلته تأخر... أكيد قاعد ياخذ في المحل كله.... يحبي ليه... مايخلي حاجه بخاطري
فجاة انفتح الباب يلي جنبي وانسحبت لبرا
انصدمت براجل بكبر اعمامي بس مش عجوز يعني
خفت من الطريقه يلي سحبني بيها وقلت:.. بعد عني... خيرك انت
كان واضح عليه أنه معصب وقال:.. شن اديري بالسيارة هذي... ومع من تصيعي بالوقت هذا
أنا مصدومه منه ومن كلامه صرخت فيه:.. مادخلك... وامشي في طريقك وبعد عني
قال:.. يقليلة الأدب... ومازال تعلي في صوتك
خفت وناديت بصوت عالي:... بدرررر
بس هوا صكرلي فمي وقال:.. اسكتي بلا فضايح وامشي... حسابك بالحوش
وسحبني معاه... كنت خايفه ونبكي... المشكله أنه الوقت بدري ومافي حركه.... وبدر ماسمعني... ونقالي وكل شي بالسيارة... قعدت نشبح في روحي كيف نبعد عن سيارة بدر وأنا نبي نمشيلها... حطني بالسيارة وصكر عليا... لما كنت بنفتح الباب لقيته قفله... ومشى ركب قدام ومشى بالسيارة قلتله وأنا نبكي:.. يا ¥¥¥¥ رجعني يا ¥¥¥¥
علا صوته فيا وقال:.. اسكتي وشدي لسانك... أنا خالك
جمدت مكاني من يلي سمعته... كيف خالي... منين طلع
قلتله:.. كيف تبيني نصدقك... أنا مابعمري شفتك ولا سمعت عنك
قالي:.. اسمي منصور... وأمك خديجة... تعرفي إسم أمك بالكامل ولا
رديت عليه:.. إيه نعرفه طبعا مايبيلها سؤال
مدلي بطاقته وقال:.. شوفي اسمي وتصدقي وقتها
خذيتها وشبحتلها... فعلا هذا اخو ماما... رجعتها ليه وهديت شوي... مستحيل خالي يديرلي شي... ابتسمت على الكلمه هذي
قلتله:.. بهي يخالي وين رافعني وليش بالشكل هذا وكأنك خاطفني
قال:.. مع من كنتي
شهقت لأني تذكرت مشيت بدون ما يعرف بدر
قالي:.. خيرك
نزلن دموعي وعارفه بدر بيخاف عليا:.. خالي اعطيني نتصل ببدر... هذا راجلي
استغرب وقال:... شن راجلك... متزوجه قصدك
قلتله:.. إيه... وانا كنت معاه
عصب وقال:.. ماتقولي واحد من أولاد عمك
استغربت عصبيته وخفت:.. ايييه... وولد عمي ناصر
ضرب المقود بيده وقالي:.. هذوم وصلو ليك يعني... بس لا تقولي أنه خش عليك
تحشمت كيف يسألني هكي... بس لما شفت عصبيته قلتله:.. درنا العقد من اسبوع والفرح بيتحدد بعد كم يوم
شبحتله تنهد واسترخا... بلعت ريقي بخوف... هذا عرف إنه عاقد عليا بس وعصب... لو عرف إنه من كم يوم وأنا معاه زي اي زوجين شن دار
قلتله:.. ليش عصبت
قالي:.. جاني خبر أنه أولاد عمك يتعاركو عليك وكل واحد يبيك... وبالاخر زوجوك واحد منهم غصب عشان ماتمشي وتخليهم
كنت نسمع في القصه الغريبه يلي يحكي فيها ونضحك في خاطري
حاولت مانضحك وقلتله:.. كيف غصبوني يعني
قالي:.. مش كنت بتتزوجي واحد تقريبا اسمه أنس... بعدين وليتي زوجت بدر... واضحه مابيخلوك تطلعي... بس هيا فتره ويطلقك... على بالهم إحنا مابنحموك ولا بنهتمو بيك... همهم بس فلوسك
كنت نسمع فيه ومش فاهمه
♡
♡♡♡♡♡♡♡
بدر....
طلعت من المحل وأنا رافع الأكياس... اخترتلها من كل نوع
وصلت للسيارة واستغربت الباب مفتوح... مشيت من جيهته ولا حصلت شروق
خش الخوف لقلبي... وين مشت
رفعت تلفوني واتصلت عليها بس كان تلفونها بالسيارة
ماعرفت شن اندير... يمكن خشت لمحل قريب... بس ليش تخلي الباب مفتوح... وينك
صكرت الباب ومشيت الجيهة الثانية ركبت ورفعت تلفوني
على من بنضرب... من
♡
♡♡♡♡♡♡♡♡
عادل....
توا على الظهر احسن وقت نمشي مع جدي.... أنا توا كلمته وقلتله بنمر عليه
طلعت بنمشي لسيارتي شفت أنس كيف خاش وقفت نشوفه
نزل وكان بيفوتني بس ناديته:.. أنس
وقف ولف شبحلي
قلتله:.. بهي سلم على الأقل
قالي:.. لو كلامك فاضي زيك خلني نمشي أحسن
استغربت وقربت ليه:.. شن فيك عليا... هذا كله عشان بنت عمك أو عشان شن
رفع حاجب وقال:.. من كنه كلاك فاضي زيك
ومشا خلاني.... لحقته وسألته:.. وين كنت مسافر
وقف فجأة ولف:.. قصدي ماوراك شي ثاني غيري... اليوم تبي تنكدلي جوي وخلاص يعني
قلتله:.. أنا نسأل بس يعني
قطع كلامي اتصال تلفوني.... وشفته كان بدر
مشيت عن أنس ورديت:.. الو
كان صوته مخنوق:.. عادل أنا مضيع شروق
انصدمت:.. شن مضيعها... لعبه هي أو عيل... كيف مضيعها
بدر:.. ماني عارف شي... نزلت من السيارة شوي ورجعت مالقيتها... كل شي قاعد بس هيا لا... والله مش عارف شن اندير... ليها فوق ال6 ساعات مختفيا... دورت في كل مكان قريب بس مافي شي مالقيتها... وحته صاحبتها ماتعرف وينها
كنت نسمع فيه ومصدوم... أنا خفت عليها... هوا كيف بيكون شعوره
قالي:.. وين أنس
فهمت أنه يبي يقول ممكن أنس خاطفها
فقلتله:.. بالحوش قاعد... أنا طالع شفته
تنهد وقالي:.. وينها... مش عارف وين نمشي
قلتله:.. وين انت حاليا... رجعت للمنطقه هنا
قالي:.. لا ما رجعت ولا بنرجع بدونها بنقعد هنا
ركبت بالسيارة وقلتله:.. شن نقول لجدي
قالي بدر:.. قوله يلي صار... إني ماعرفت نحافظ عليها... بكبرها هذا وضيعتها... شكلي مش قد حمل مسؤولية
عرفت أنه وصل لمرحله يشكك في روحه فحاولت نكون معاه دكتور بمعنا:.. بدر شوف... هي كبيرة ولا ضاعت منك... يمكن لقت حد تعرفه ومشت معاه ماتستعجل بتفكير سيئ
تنهد وقال:.. أن شاء الله خير... بنرجع لحوش أهلها يمكن ترجع ليه
قلتله:.. تمام هذا التفكير الصح... وأنا توا نسأل جدي من عندها حد يمكن تمشيله
قالي:.. اسئله عن عائلة أمها... أنا مانعرفهم
رديت عليه:.. تمام... سلام
قفلت الخط منه وشغلت سيارتي ومشيت لجدي
مسافت الطريق ووصلت لجدي وكنت معاه بالمربوعه... ماحبيت نقوله أنها مختفيا فسألته:... جدي تعرف عن عائلة أمها لشروق
عقد حواجبه وقالي:.. شن فيهم
قلتله:.. ولا شي بس استغربت ليش ماشفنا حد منهم
قالي:.. هما قاطعين الصلة بينا... على قولتهم مش من نفس القبيلة
قلتله:.. معقوله فيه ناس تفكر هكي... ماحنا كلنا من نفس البلاد
قال جدي:.. بعد توفى جدها وقعدو خوالها رفضوهم... كان جدها كويس ومتقبل محمد ولدي ويحبه بس عشان بعض النفوس المريضه ماكان على تواصل معاهم... وبعد توفى انقطع خبرهم
قلتله:.. به تعرف عناوينهم يعني
استغرب وقال:.. ليش
قلتله:.. يمكن يرحبو بي بنتهم شروق... لأنها الوحيده من اختهم
قالي:.. فيه الخال الكبير واسمه منصور.... يعيش بنفس منطقت حوش شروق... بس يمكن يكون رحل
فرحت وحسيت بأمل:.. به اعطيني العنوان
♡
♡♡♡♡♡♡♡♡
شروق....
خشيت لحوش خالي منصور.... في نفس الوقت نفكر في كلامه... معقوله زواجي من بدر ليه سبب... يعني معقوله يكون لنفس سبب أنس
كنت بالصالة وكانت مرت خالي تحط في صفرة الغذاء
قالتلي:.. تفضلي
هزيتلها راسي بالرفض
ابتسمتلي وقالت:.. ما شاء الله عليك تشبهي أمك الله يرحمها
شبحتلها وسألتها:.. تعرفيها أمي
قالتلي:.. صاحبتي من وإحنا صغار... ماتفارقنا إلا لما..
وسكتت
قربت لعندها وعندي فضول:.. إلا شن
قالتلي:.. تغذي معايا ونحكيلك بعدين
صغرت عيوني وشبحتلها:.. هذي طريقتك مع صغارك يعني... تخلي عندهم فضول وتجبريهم على شي
ضحكت وقالت:.. ههههه عليك نور... هيا سمي بالله وابدي
سلمت امري لله وبديت ناكل معاها
والحق كنت بنموت من جوعي... بس كان لازم اندير روحي زعلانه
بعد الغذاء جاء خالي وقعد معانا
قال خالي:.. أن شاء الله مرتاحه... لأنه هنا بتعيشي
انخلعت وقلتله:.. بس أنا متزوجه يخالي
عصب وقالي:.. قلتلك أنسي إنك متزوجه... علاش ماتفهمي
دمعت عيوني وحزت بخاطري:.. علاش يخالي هذي حياتي... وأنا اخترتها خلاص
قالي:.. تبيها من الاخر صح
عقدت حواجبي وقلتله:.. أكيد يخالي
قالي :.. اسمعي معناها.... صح أنا مانعرف لو بدر يبيك فعلا أو لا .. بس يلي نعرفه إنك بتقعدي عندي... وبالمقابل لازم يطلقك ولد عمك هذا
استغربت:.. ليش
قال:.. لانه مش مناسب ليك و
قطع علينا واحد من اولاده يناديه
ولد:.. يبوي فيه راجل برا يبيك
قاله:.. ماعرفته من
الولد:.. لا
وقف وقالي:.. توا نرجعلك
وقعدت مستغربه شن يبي خالي وليش يبيني نطلق
♡
♡♡♡♡♡♡♡♡
بدر...
طلعلي عيل صغير بعد ما دزيت الولد الكبير ينادي ابوه
نزلت لمستواه وكان شكله بعمر 6 تقريبا
مدلي يده وقالي:.. أنت تبي خالتي شروق
حسيت بفرح لما قال شروق... الحمد لله يعني هيا هنا... بس كيف
وقفت لما شفت راجل كبير وصل لعندي
قالي:.. السلام عليكم... تفضل
قلتله:.. وعليك السلام... أنا بدر راجل شروق
قالي:.. من شروق
قلتله:.. بنت اختك خديجه... أنا نكون ولد عمها
خش بيصكر الباب بس قلتله:.. لحظه شوي
قالي:.. أنا مانعرف لا خديجه ولا شروق... ولانبي حد من جيهتم يقربلي
استغربت وقلتله:.. بس
قاطع عليا وقال:.. أنا من سنين مش سامع عنهم... وقلتلك مانبي نعرف شي
وخش صكر الباب وراه
انا وقفت مصدوم ومش فاهم شي... يعني هيا عندهم أو لا... وشن قصده الولد لما قال بترفع خالتي شروق... معقوله يكون تشابه أو شن
يتبع...
