نـــيـــران الـــعـــشـــق

الجزء الخامس

#نـــيـــران الـــعـــشـــق

الجزء الخامس.....

فاطمة:مرت الايام عادية ماكو شي
اني بصفحة وقائد بصفحة ابد ميجمعنة
شي بس سقف الغرفة هو ينام بالكاع
واني ع الجرباية ابد ميخليني ادخل
بأي شي يخصه اكله،شربه حتى ملابسه
ممنوع ادخل بشي يخصه اذا راد
شي يطلبه من زينة والبنية خطية متكول
شي بس ملابسه عمتي تغسلهن
لحد هسة اذكر من حجة وياية بيوم
العرس،،،
جنت كاعدة بالغرفة وحدي ع السرير
ومراية الكنتور كبالي صافنة ع روحي
بالبدلة شكد حلوة علية والتسريحة
والمكياج بس ماكو اي شي حلووو
غير هالمظاهر مخنوكة والخنكة تجرح
بلعومي والدمعة عاندتني مترضى
تنزل،،،،
سمعت اصوات عالية وضحك وصوت
خطوات ع الدرج الخوف تملكني وظليت
افرك بيدي هاي الحركة ملازمتني
من ارتبك واخاف انفتحت الباب
ودخلت عمة خلود وزينب وزينة
يضحكون باستني عمة وضحكت
خلود:حبيبتي ادري كلشي صار
بسرعة واحتمال انحبرتي بس يابنتي
صبري وشوفي بعينج قائد وردة
والله مو لان ابني بس صدكيني هاي
زينة تحجيلج عنه بس هو الي صار
وياه مو شوية وانتي سباعية وان
شاءالله ع ايدج يتغير ويرجع مثل
قبل
فاطمة:مجرد ابتسامة طلعت مني
طبعا شريد اكول يعني هو شي انفرض
علية وخلص اي شي اكوله لايقدم
ولايأخر،،،،ظلواوشوية يمي يحجون
وياية ان ما اخاف واسايره حتى
لا اتأذه وهو يعصب عليه،،والله
ما ادري شلون يفكرون،،
طلعوا كلهم ورجعت لوحدتي مدري
شكد مر من الوقت محسيت غير ع
فتحة الباب وقائد واكف قريب من
الجرباية وشكله ضايج وعصبي

قائد:ورة مخلصتةالزفة والعالم راحت
بقوا بس اهلي امي والبنات صعدوا
يم فاطمة وزيد اجاني
زيد:خوية الي صار انساه وذبه
ورة ظهرك فاطمة خوش بنية لاتأذيهة
وتحملهة ذنب اختهة
قائد:زيد شدتحجي تدري اني صاير نار
وكاره حتى روحي مدري شلون
سايرتكم ومشيت هالزواجة شلون
انسى الي صار واختهة كبال عيني
شلون اكدر امشي حياتي بصورة
طبيعية واساسا الي صار وياية مو طبيعي
زيد:ادري حقك شما تكول بس
خلي ابالك مثل ما انت انجبرت هي
هم انجبرت وصارت ضحية افعال
اختهة،،شوف اني مراح اكلك اخذهة
واعتبرهة زوجتك من هالليلة لان
ادري صعبة عليك بس ع الاقل لا
تأذيها ولا تجرحهة والايام كفيلة يا
خوية تنسيك ماضيك واطيب جرحك
قائد:سايرتهة وظليت استمعله لان
الي اني بيه محد حاسه ولا يكدر
يوصل لاحساسي صعب والله
صعب ياناس يعني المفروض اليوم
ليلتي وية الانسانة الي حبيتهة
وكلبي اختارهة بس هي شسوت
خانتني وبكل عين صلفة عايشة وحياتهة
ماشية واني الي من لحظة خيانتهة
كلشي بحياتي توقف وهسة اختهة
براسي استغفرالله،،،
امي وبيت زيد راحوا وية زينب
لبيتهة والله بطرانين ديفرغون البيت
للعرسان همة ميدرون اني كاره حتى
روحي ولعبانة نفسي من الدنيا
وامي كل عقلهة تمشي وتوصي بيه
ديربالك عليهة وصغيرة ولاتأذيهة
مصدكت طلعوا وقفلت الباب وراهم
طبيت للبيت كعدت بالهول مخنوك
ياربي وين اروح،،،يا الهي ضاكت
بية دنيتك الوسيعة،،مددت ع التخم
وغفيت حسيت ع صوت التليفون
زيد داك علية،،،خيييير ياربي دكيت
علية هاااا زيد خما اكو شي
خلود:يمة اني موزيد دك عليك
قائد:خييير يمة
خلود:ماكو شي حبيبي سلامتك بس
خابرت اطمن عليكم تعشيتوا???
قائد:هااااا ااييي ايييي تعشينة
خلود:قائد لسه مصاعد لبطة مووو???
لك ابني ليش هيج تفت افادي حبيبي
البنية خطية بلا اكل من الصبح
كوم امي الله يرضى عليك شوف شبيهة
مابيهة شمحتاجة،،،جوعانة لااااا
قائد:صار يوم،،،
خلود:الله يرضى عليك حبيبي،،يلة
يوم تصبح ع خير
قائد:وانتي من اهلهة حبيبتي،،باوعت
الساعة ب12:30حيييييل صارلي
شكد نايم من ال9:30استغفرالله
كمت صعدت للغرفة دكيت الباب
ماكو صوت فتحته ع كيف شفتهة
نايمة ع الجرباية بالبدلة اففففف بلة
هاي شكلهة هسة،،تقربت منهة احمممم
فاطمة،،،فاطمة،،،فتحت عيونهة بالكوة
وكعدت يمكن مثلي متدري بروحهة
نايمة،،كتلهة،،،ليش نايمة بالبدلة بس
جنت احجي وياها بنترة،،،كووومي
بدلي ونزلي تعشي امي خابرت وكالت
من الصبح مماكلة شي
فاطمة:حزت بنفسي طريقة كلامه وياية
يلة بطة شمتوقعة قابل ياخذج
بالاحضان ع فعلة اختج
كمت من مكاني وسحبت الجنطة
مالتي جنت خالة بيهة ملابسي وغراضي
ابد محبيت استخدم الغراض والملابس
الي جابهم لسارة
قائد:شفتهة طلعت ملابس الهة من الجنطة
لييييش هذا مو الكنتور مليان هدوم
فاطمة:هااااااا،،لااااا مووو ذني ملاتي
متعودة عليهن
قائد:ع العموم ساررة اريد....
فاطمة:صفنت بوجهة ااااا فاطمة،،،
قائد:بعدم فهم ومعصب شنووووو???
فاطمة:فاطمة اسمي فاطمة،،،
قائد:ليييييش واني شكلت???
فاطمة:حجيت واني مدنجة راسي
وافرك بيدي،،ساررررة
قائد:صرت ناااااارررر،،،وشنوووو يعني
انتي كاعدتلي ع الزلة
فاطمة:خفت منه كام يصيح وصار
وجه احمر ظليت مدنجة راسي وسكتت
قائد:المهم شوفي من هاللحظة انتي
بحالج واني بحالي عليج بنفسج وبس
وكلام امي يمشي ع الكل فاهمة اكلي
شربي اي شي يخصني متدخلين بيه
ابد مااااشي،،حتى ملابسي متمدين
ايدج ع اييي شي راجع اليييي مفهووووم??
فاطمة:تجمعت الدموع بعيني وهزيت
راسي موافقة
قائد:صحت بيهة مو احجي وياج
مفهوووم???
فاطمة:ايييي،،،اييييي،،،مفهووم
قائد:وهاااااا انتي نامي ع الجرباية
واني افرش بالكاع واي واحد يسألج
ع اي يخصنة او اي شي يصير داخل
الغرفة منوع يطلع حرف،،،وعفتهة وطلعت
فاطمة:واخيرا طلع ونزلت دموعي
ياترى شنو المضموملج فاطمة وشراح
تشوفين بعد ع ايد قائد يلة الله كريم
اخذت دشداشة قصيرة جوة الركبة
خفيفة مال نوم ذبيت البدلة وطبيت
للحمام سبحت وطلعت نشفت شعري
وعفته مفتوح ونزلت كلش جوعانة
مديت راسي شفته بغرفة عمة امدد
ع الجرباية ويدخن عفته ورحت للمطبخ
جان اكو بالفرن اكل مسلفن مشاوي
حميتهن وسويتلي جاي رحت عليه
دكيت الباب،،قائد حضرت الاكل تعال
تعشة مشفت غير صار كبالي وجرني
من ايدي حيييل
قائد:نزلت جوة واني مجمر ظليت
اسب بسارة لج بعد كل سوايتج واسمج
بلساني خرب بيج وساعة السودة
الي حبيتج بيهة ظليت بس ادخن
حسيت عليهة نزلت وراحت للمطبخ
ورة شوية جتني،،،مدري ليش كمت
عليهة واني ناااار ردت بس افرغ
عصبيتي وقهري جريتهة من ايديهة
حيييل،،،ولللج اني شكتلج مو كتلج
مالج اي دخل بيهة شنووو انتي
مالج ايييي دخل بية
فاطمة :يصيح ويعت بية يمنة ويسرى
والله مووو قصدي شييي بسسس
كلت اخاااف جووعان
قائد:ولججج مااااالج دخلللل عسى
ما اموووت امشي ولي من كدامي
دفعتهة وركعت الباب وراها حييييل
فاطمة:كلبي ظل يدك سريع من الخوف
رجعت للمطبخ غسلت وجهي وشوية
استرخيت بعد لويموت مالي دخل بيه
رجعت حميت الجاي واكلت لان جنت
كلش جوعانة بعدني اكل وشفته
اجة للمطبخ كمت لحيلي حتى اصعد
خفت ليرجع علية بس صاح بيه
قائد:طلعت لان كلش جعت شفتهة
بعدهة بالمطبخ مت شافتني رادت
تكوم صحت بيهة،،رجعي كملي اكلج
هي يمكن خافت ورجعت كعدت
صبيتلي جاي وسويتلي لفة وطلعت
من المطبخ
فاطمة:همزين طلع رجعت اكل براحتي
كملت غسلت الاماعين وصعدت
نمت،،،،،،وهيج مرت الايام نفس الروتين