جبورت ال يسار

#جبروت_ال_يسار

#بارت7

اني شفتهم بهالوضع واني نار شبت بصدري مو غيره لا
بس احس كرامتي انهانت
تباوعلي وما اهتم بقه يكمل سوالف وياها صدك ضجت لا اكدر اروح واسحله من يمها لان هسه عباله كاتله روحي عليه ولا اكدر اعوفه الها فسويت نفسي داصيحله عندي شغله وياه

.. يسار ممكن تجي شويه

هزلي راسه بمعنى جاي صعدت قبله واني افكر شأكوله يا ربي شورطت روحي وصحتله سمعت دخل وراي وسد الباب وسألني
.. ها .شردتي مني ؟
هسه شنو اكوله بله ! ما ردت اكوله عليها حته لا ينغر وعباله كاتلتني الغيره
..اني بعدني لا متغديه ولا متعشيه ومنتظرتك ناكل سوه
.. ومنو كلج اني ما تغديت ولا تعشيت ( كان ينزع بالدشداشه ) قابل ابقى منتظر حضرتج
اني احس كمت اغلي من القهر
.. واني ما سألت عني تغديت؟ اكلت؟ لو بس همك نفسك
.. والله الياكل بضرسه ينفع نفسه
لبست تراك نيلي وكعد ع الجربايه تباوعلي ابتسم وكعد يقلب بالنقال
بقيت اتباوعله والنار تاكل بقلبي من القهر بعدلساني ما يسيطر ع الكلام كتله :
.. طبعا حضرتك ما همك اني ..اهم شي ست نسرين
رفع عينه وتباوعلي بصدمه
.. ونسرين شجابها بالنص ؟
.. مو حضرتك عاجبتك نسرين وكاعد تدك فج وياها .. مو ع اساس عدكم المره عيب تبوس الرجال لان حرام شمعنى نسرين حلال ؟
.. بنت عمتي وبوستني تباركلي ادفعها لو اطردها علمود حضرة جنابج
جنت اطلع بملابسي واحجي من القهر
.. لا طبعا شنو اني فد مندله ... من يوم الاخذتني لسه ما معتبرني مره وعندها كرامه.. اذا اني ما عاجبتك ورايد ست نسرين ليش اخذتني شنو تريدلك جاريه ببيتك حته تروح تلعب بذيلك من وراها و...
ما احس بيه غير كمز من السرير ولزم شفتي الجوه بيه اصابيعه بقوه وجرهن باصابيعه وحجه بصوت حاد وهامس
.. انلصمي وسدي حلكج لا افركه من اجيتي لسه بس تتجاوزين واعبر بس لهنا وكافي يمكن جنت غلطان بيوم الاختارتيج.. اني رجال واذا اريد اسوي شي ما انتظر اخذ الاذن منج واذا تكرر هذا الكلام ما يحصللج طيب من عندي ...( صرخ بصوت عالي بوجهي ) سمعتي ؟

هزيت راسي بمعنى نعم واني دموعي تجري دفعني وطلع وركع الباب حيل وراه اني كعدت بمكاني من الخوف ارجف وابجي لاول مره بحياتي احس روحي وحيده والدنيا سوده بعيني ربي ما خلص امتحانك تنازلت عن الغالي والنفيس وضحيت باغلى ناسي علمود اسعدهم ما استاهل السعاده شويه منك... لشوكت ابقى اخاف من اي كلمه يحجيها وكلمته خنجر اذا تجاوزتها يذبحني .... بجيت بحركه لمن عيوني حسيتهن كام يحركني كمت سبحت سمعت الباب اندكت سمعت صوت ميسم كالتلي راح اصعدلج العشا كلتلها ما اريد طلعت سمعت الباب انسدت قررت من هاي اللحظه انه التزم الصمت وياه وما احجي اي كلمه وما اعتبره موجود بحياتي ورجعت فرشت فراشي جوه و نمت بمكاني واني ااتذكر كل كلمه منه واحسها سهم وصاب قلبي

مر ٣ ايام واني ما احجي وياه اي كلمه وهو كذلك التزم بوعده وما تدنالي وما حجه بعد وياي بس اذا يريد شغله او حاجه مني يسألني عليها اجاوبه ب أي او لا وهالشي خلاه صار اعصاب ونار عليه وع اهل بيته
تعرفت بذني اليومين ع اخوته كرار الجبير اللي كان قمة الاخلاق شغله عنده كيعان يزرع بيهن وهناك واكو عمال جوه ايده وهو صاحب الكلمه بالبيت حته اكثر من ابوه
وتعرفت على ناصر كان يشتغل عسكري كان ناصر عصبي وما يتحاجى ابد لذلك كان بيننا بس سلام وابتعد عنه كلش اخاف منه و هوار اللي كان يدرس هم كلية هندسه نفس طباع احمد اخوي يحشش ويضحك فكلش جنت ارتاحله
وتعرفت ع اولاد كرار (امير ٨ سنوات سنوات وسيف ٤ سنوات و عبد الله سنه) وبنت ناصر (تقى ٣ سنوات ) ومرته حامل
بهاي الايام عرفت انه عمي الشيخ هو الاصل بالمنطقه يعني شكو صغيره وجبيره يرحون اله بيها وكان كرار ويسار هم ايده اليمنى بسوالف الشيخه اما ناصر ما كان اله علاقه بهاي السوالف ابد لا هو ولا هوار