جبورت ال يسار

#جبروت_ال_يسار

#البارت_الثالث

الصبح ما رحت للكليه جابوا ماما من المستشفى ووضعها كلش مو زين فوك مرضها تون وتبجي ع احمد وبابا رايح لواحد عرف بالداخليه ضابط وما كادر يساعده لاحمد كايله ما دام ما بيها قضية تنازل ما يطلع ابنك لو تقنعها تتنازل  وتنطيها فلوسها لو تحلم ابنك يطلع ......

وامي سامعه هذا الكلام لان عبالهم هي نايمه من سولفوا هو وليث ورجعت انتكست حالتها كان وجهه اصفر وذبلانه كلش وكايللهم الطبيب اذا بقه هيج وضعها ابد مو زين عليها تره احتمال تصير بيها جلطه ثانيه وذيج الساعه ممكن تفقدوها .....

اني سمعت هيج حسيت الدنيا كلها ظلمه وانسدت الابواب كلها بوجهي من جهه اخوي مناك بس الله يعلم بحاله ويكولون ما يطلع ومن جهه امي اللي ممكن على ساعه لا سامح الله نفقدها واذا صار بيها شي والله اني واسراء نضيع وراها دخيلك ربي

صعدت فوك ابجي واناجي ربي كتله ليش ربي ليش تخليني بهالموقف الصعب والله مو حمل هذا امتحانك ربي بجاه كلمن اله جاه عندك بجاه كلمات القران اريدك تشافي امي وتفرج عن اخوي ما اريد افقد حسين والله اموت وراه بجيت بأنين والم لمن نمت واني ما ادري

حلمت اني وامي واحمد كاعدين بغرفه ظلمه اجه واحد فتح الباب وطلع احمد وامي ردت اطلع وياهم دفعني ورجعني للغرفه اني كمت ادك بالباب واصيح طلعوني اجه واحد من وره شبكني ويكولي لا تخافين عمري اني يمج ما اعوفج كتله انت منو هدني يكولي ما اهدج انت حلمي اللي جنت عمري كله اتمناه واني اصيح هدني وادفع بأيده ويكولي ما اهدج شبيج تخبلتي
كعدت ع ايد اسراء تهز بيه وتكولي شبيج تخبلتي وتصيحين هدني ما هدني
كعدت واني الهث سالتها
.. شلون صارت ماما
نزلت دمعتها لاختي
.. ولج لجين ماما راح تموت والقران بس تون ومن نحاجيها ما تحاجينه بس تكول اخوج اذا انسجن وصيتي الكم تدفنوني بالنجف لان ادري راح اموت قبلها شأسوي حبابه كوليلي
كامت تبجي وحطت راسها ع صدري اني بهاي اللحظه عرفت كلشي طلع من ايدي وخسرته بس باب واحد هو باب التعاسه لازم ادكه وانقذ اهلي منه

سويت عشا الهم محد اتعشه بابا لف راسه ونام وليث حاط ايده ع راسه ويتباوع لموبايله والحزن مبين ع وجهه وماما
ما قبلت تاكل بس اخذت كم خاشوكة شوربه بعد ما شافت اسراء تبجي يمها واخذت علاجها ونامت

كلت لاسراء تغسل مواعين العشا وتنظف المطبخ على ما
اروح اخابر فرح قبل لا تنام اريد اوصيها ع كم شغله

صعدت فوك واخذت جهازي دورت بالمكالمات مال البارحه لكيت رقمه دكيته بدون تردد طول الاتصال يله جاوب بنعاس
..الووو
حجيت بصوت يرجف
.. الوو مرحبا يسار
حسيت صوته سكت فتره وفجأه حجه
.. اهلا لجين خير ؟
..اني موافقه ع عرضك بس عندي شرط
.. شنو هو ؟
.. تطلع اخوي يله نعقد
سمعته ضحك ضحكه خفيفه

.. بس هذا شرطي اني مو شرطج انه نعقد يله نطلع اخوج
.. يسار الله يخليك امي جاي تموت والله اذا تأخرت شغلة اخوي تروح بيها وبعدين انت شلون ترضاها اهلي يفرحون بيه واخوي بالسجن وامي مريضه