Fall in love with the type I hate most! [Own Creation]

၁

Unicode

အပိုင်း - ၁ : မင်းသားနဲ့မင်းသမီးညားလေသတည်းဆိုတဲ့ဇာတ်သိမ်းကို ငါ မကြိုက်ဘူး။

"ငါပြောမယ်... နင်ပဲစဉ်းစားကြည့်... မင်းသားနဲ့မင်းသမီးလေးညားလေသတည်းဆိုတဲ့ ကိစ္စတွေကအဓိပ္ပာယ်မရှိဘူးမထင်ဘူးလား..."

မိန်းကလေးတစ်ယောက်၏ အာဘောင်အာရင်းသန်သန် ငြင်းနေမှု။ ဆူညံနေသည့် ကန်တင်းတစ်ခုမှ စကားသံများ။ စားပွဲထိုးလေး၏ 'အစ်မဘာမှာမလဲ' ဆိုသည့် စကားကိုအခြားသောဝိုင်းမှ ပြန်ဖြေသံကိုအားရပါးရစကားဆိုနေသူကောင်မလေးကမျက်ထောင့်နီဖြင့် လှမ်းရှိုး၏။ မဆီမဆိုင် လှမ်းရှိုးခံရသည့် စားပွဲထိုးလေးသည် ဇဝေဇဝါဖြင့် သူတို့ဘက်သို့ပြန်ကြည့်လာသည်။ ထိုကောင်လေး၏ ခေါင်းပေါ်တွင် Question Mark သင်္ကေတလေးပေါင်းမြောက်မြားစွာကိုမြူလင်းမြင်လိုက်ရသလို။ ထို့အတွက် မြူလင်းသည်ဘုရှိုးရှိုးနေသူမျက်စိရှေ့မှသူငယ်ချင်းအမိကိုအသံတိုးတိုးလေးဖြင့်...

"ဒါ... ဒါပေမဲ့ သွန်းရဲ့..."

"လူတိုင်းက Happy Ending ကိုကြိုက်တာငါလက်ခံပါတယ်... ဒါပေမဲ့ မင်းသားလေးနဲ့မင်းသမီးလေးနဲ့ ညားလေသတည်းဆိုပြီးပြီးသွားတာကြီးကအဓိပ္ပာယ်မှမရှိဘဲ..."

"နင့်ဘာသာမကြိုက်ရင် နင်မကြည့်နဲ့ပေါ့ ကြိုက်တဲ့သူတွေရှိလို့ ဒါတွေကရောင်းကောင်းနေတာကို..."

"နဒီကလည်းဟာ..."

မြူလင်း၏ စိတ်အိုက်သည့် အသံငယ်လေးထွက်လာတော့၏။ နဒီဇော် မျက်နှာကတော့ အဖက်မလုပ်သည့် ပုံမျိုး။ မြူလင်းပခုံးကိုဖက်ကာပန်းကန်ထဲမှ မုန့်များကိုနှိုက်စားနေသည်ကိုကြည့်ပြီးသွန်းနှင်းဆုမျက်နှာကသုန်မှုန်လာ၏။ ဒီမိန်းမနဒီဇော်ကအားနေမြူလင်းတစ်ယောက်ကိုအနိုင်ကျင့်နေတာပဲ။ ဟိုကလည်းငြိမ်ခံနေလိုက်။

ဟူး... မတရားမှုတွေကိုစိတ်ထဲမြိုသိပ်ထားရတာလဲပင်ပန်းလိုက်တာ...။

"ဒါနဲ့ တစ်ပြုတ်မ..."

နဒီဇော်သည် မြူလင်းပန်းကန်ထဲမှ ဖက်ထုတ်ပြုတ်တစ်ဖတ်ကိုယူဝါးနေရင်းသွန်းနှင်းဆုကိုလှမ်းခေါ်၏။ သွန်းနှင်းဆုခေါင်းကိုဆတ်ခနဲခါချိန်တွင် ဆံပင်တိုတိုကုတ်ကုတ်လေးများဝဲခနဲဖြစ်သွားတော့သည်။ ထို့နောက်မျက်လုံးကြီးပြူးပြီးနဒီဇော်ကိုလှမ်းကြည့်တော့သည်။ သွန်းနှင်းဆုသည်ပထမနှစ်တွင် Roll No. 1 ဖြစ်ခဲ့ပြီးဒုတိယနှစ်တွင် Roll No. 413 ဖြစ်သွားခြင်းကိုဘယ်လိုမှ မနေသော်လည်းတစ်ယောက်ယောက်ကသူမကိုတစ်ပြုတ်မလို့ ခေါ်တာတော့ သွန်းနှင်းဆုဆိုသည့် သူမလေးနည်းနည်းလေးမှ မကြိုက်ပါပေ။