Fall in love with the type I hate most! [Own Creation]

၆

Update Schedule : Mon & Fri
Unicode

အပိုင်း - ၆ : ဒီဖက်လုံးကောင်ကသူ့အမေ ငါ့ကိုဆူရဲသွားသေးတယ်!!!

လင်းယုဝေသည် campus king ဟုသိပြီးသည့်နေ့မှစ၍ သွန်းနှင်းဆု၏ ကျောင်းပျက်ရက်များသည် ယခင်အတိုင်းပြန်ဖြစ်သွားတော့သည်။ နဒီဇော်ကတော့ သွန်းနှင်းဆု၏ ကျောင်းကင်းကိုမှ အချိန်အကြာကြီးကြိုက်မိလေခြင်းဟုမြည်တမ်းအရှက်ရနေခြင်းကိုကြိတ်ခွီ၍မဆုံး။

"သွန်းကကျောင်းပျက်ပြန်ပြီ..."

မြူလင်းသည် အအေးပိုက်လေးအသာကိုက်ရင်းပြောလေ၏။ လင်းယုဝေကြောင့် သွန်းနှင်းဆုသည် ရှားရှားပါးပါးတစ်လတိတိတောင် တစ်ရက်မပျက် ကျောင်းလာခဲ့သည်လေ။ အတန်းအချိန်ပြည့် တက်တာမတက်တာကတော့ ထည့်တော့မတွက်နှင့်ပေါ့။

"အင်းငါလည်းအခုသွားမလို့..."

နဒီဇော်သည် ကျောပိုးအိတ်ကိုတစ်ဖက်လွယ်ကာထရပ်သည်။ သူမကိုမြူလင်းသည် အံ့အားသင့်စွာကြည့်၏။

အမ် ဘာလို့သူတို့နှစ်ယောက်လုံးအတန်းလစ်တာလဲ?

"အင်းဒီနေ့ငါတို့ guild မှာပျော်စရာတစ်ခုဖြစ်နေတယ်..."

နဒီဇော်သည် ခပ်အေးအေးဆိုသည်။

"ရှင်းသန့်ကိုသွားပြဿနာရှာမလို့..."

"သြော် အင်း..."

ပထမနှစ်ဝက်ရောက်ရန်လိုနေသေးသလိုအတန်းချိန်ပြည့်မပြည့်ထုတ်ရန်ကလည်းလိုနေသေးသည်မို့ မြူလင်းဘာတစ်ခွန်းမျှမပြောတော့။ သို့သော် နဒီဇော်ကဲ့သို့ဂိမ်းမဆော့ နိုင်ခြင်းကိုတော့ သူမအနည်းငယ်ဝမ်းနည်းမိသည်။ နဒီဇော်၏ အခြားကျင်လည်နေသည့် ကမ္ဘာတစ်ခုကိုသူမမသိနိုင်တော့ဘူးလေ။

နဒီဇော်သည် မြူလင်း၏ စိတ်ထဲမှအားငယ်နေမှုကိုမသိခဲ့။ နောက်လှည့်မကြည့်ဘဲထွက်သွာခဲ့ချေပြီ။ စိတ်ထဲတွင်တော့ သွန်းနှင်းဆု Messenger မှတစ်ဆင့် ပြောပြသည့် အကြောင်းအရာသာရှိနေခဲ့၏။ သွန်းနှင်းဆုပြောပြကာသူမကိုကျောင်းအနားရှိဂိမ်းဆိုင်ကိုလှမ်းခေါ်သည့် အကြောင်းရင်းက...

"ငါတို့ရဲ့ အရှက်မရှိကောင် ခွေးတစ်ကောင်ကောက်ရထားတယ်" ဟူ၍။