فجرَة

الحلقة الخامسة ( الموسم الاول)

#فجرة❤ (قصة واقعية )

كتابة : ⚘ندى أحمد ⚘

في الجزء السابق : -

العزوز : لا فكري انتي سنك سن زواج توا ،
فجرة : ان شاء الله يا حاجة .. اللي يكتبه ربي راضيين بيه

عجبها العزوز الكلام !!
ميادة تسحن مش عاجبها واللي فهماته انه فجرة بتجي سلفة مع بنتها ( وعلاش لا اللي عند ربي مش بعيد )
الجزء الخامس : -

فات بيان اسراء على خير

فجرة في دار اسراء ويهدرزوا
اسراء : قالي طالعة ماشاء الله .. احلى وحدة في عيوني
فجرة : انتي الاحلى في عيونه اكيد لانه بحبك حتى لو شاف بنات اجمل مش زي !!
اسراء غمزت : شنووو قارية فلسفة حب ..
فجرة ضحكت : مبردك هههه قصدي واضحة اللقطة هاذي حتى مع الصديقات ، تصادقي وحدة صداقة قوية حتشوفيها احسن وحدة حتى لو في خير منها ..
اسراء : فاهمة غر نلبس فيك .. بنت عمي ونعرفك ماعمرك خشيتي في علاقة يعني !
فجرة : مرات تجي في الخاطر نكلم شخص يحبني ونحبه وهكي في عواطف بينا ، لكن نفكر  في رضا ربي ، وبعدين كلام الناس ، الحمد لله عشت صاينة سمعة بوي وامي لين توفوا ، وباذن الله حنصونها لين يجي النصيب ...
سكتت اسراء  بعدين تكلمت : ايوه هو كلامك صح ، بس دام بعقلك اكيد مش حديري حاجة غلط حتى لو كلمتي ، مثلا تتحفظي تخليك مكالمة او دردشة ع النت ويبيك يجي للحوش ،
فجرة : والله نخاف نضعف قدام الحاجات هاذي ،
اسراء : لكن بصراحة شن رايك فيه هذا الشاب صحب المحل ، شكله انعجب بيك ويبيك بالرسمي
فجرة : ايااه دوته فارغة هذاكا ، خيره ماقالش نبي نجيب اهلي ،
اسراء : ماهو مرات يبي يتعرف عليك عن قرب اكثر في من شباب هكي عقليتهم يتعرفوا كويس وبعدين يجيب اهله ،
فجرة : دوة فاضية كل حوش فيه باب على ما اظن اكيد مانطلعوش ونخشوا من الرواشن
اسراء : ههههههه اما انتي بكللل !!

فجرة : قناعات في الاخير
اسراء : اللي يشبحك بسكاتك يقول ما تعرف شي ، وانتي افهم حتى من بوي وامي !
فجرة : بوي الله يرحمه كان يقول البنت زي المرايا كان انكسرت مستحيل ترجع زي قبل ، وزي الكتانة البيضاء عند البياع ، الشاري كان جت عينه على البقعة يفوتها وياخد غيرها !
اسراء : الله يرحمه يارب !
فجرة : من قبل وفاته في حياتي مافكرتش ان نتزوج ولا خطر في خاطري ان نحب شخص ويحبني ويحسسني بالامان ، من فقدت بوي وانا فاقدة الحنية (وبدت تبكي )
اسراء تاترت ودمعوا عيونها : ياروحي ( وتغمرتها بقوة )
فجرة تبكي : نتمنى ربي يرزقني بشخص يكون ليا سند ويعوضني فقدان اهلي ، والله صعبة ،

اسراء تمسح في دموع فجرة : .. ..
فجرة : يمكن انا سند خوتي وهما مطمنين لان معاهم ، لكن الحمل هذا ثقيل عليا ومزالت نقاوم ، بجديات نتمنى سند في حياتي يخفف عليا ، مش مستعجلة على زواج ومش اي شخص حنقبل بيه
اسراء : صح كلامك
فجرة : الاختيار حيكون صعب ! لان بجد نبي من يحمل معاي مسؤولية خوتي ! او على الاقل يخفف عليا وجعي !!