فجرَة

الجزء السادس

فجرة بعد زواجها ❤
كتابة : 🌷ندى أحمد🌷

في الجزء السابق

شبحت ميادة الصغار واقفين عليها
ميادة كشخت في وجههم : شن قلت انا ؟؟؟؟؟؟ مش قلت ماتجوش هني ولااااااااا

الجزء السادس : -

#قراءة_ممتعة❤

فجرة تلفتت لمرت عمها مبتسمة : كيف حالك مرت عمي ..
ميادة : باهي ..( من راس خشمها ) خودي شكلاته ..
فجرة : صحيتي  (ومشت خدت )
طبعا فجرة مزال تتعامل بالباهي ومبردة اعصابها تالا ميادة .. في بالها لو ماهدتش عليا خلي تزيد تنحرق هي بالسيئة وانا بالحسنة والباهي هو اللي جاية معاه ويغلب
حطت فجرة شكلاتتها في الشنطة ومشت سلمت على الناس اللي تعرفهم ومن ضمنهم الطاولة اللي فيها
عائلة منذر وعزوزتها وحماتها هبة ..
طبعا ام عبد الحفيظ فرحاانة بكنتها كيف لابسة البدلة
وهبة مانحكيلكمشش عاد تمنت حتى هي لبست البدلة لكن هي ديما منكدة على روحها
تتحير وقت تشوف غيرها بس وتبدا تغلي وتحسد ..

فجرة مدت ايدها تسلم : كيف حالك عمتي ؟
ام عبد الحفيظ  عيونها يلمعوا فرحت بفجرة : الحمد لله  صحة صحة !!
فجرة : سلمك ..
ام عبد الحفيظ : وين اعبودة طلع ؟
فجرة : حطني ومشي .. قال عنده مشوار وجاي ..
فجرة قعدت واقفة مش لاقية وين تقعمز ..
ناضت وحدة من خوات منذر وجابت كرسي من اخر الصالة وحطتهولها جنب صفة الصدارات ..
فجرة : بارك الله فيك (وفرحت من لقطة اخت منذر)
ودورا بدوا في تفريق الروزاطة والعبمبر
ومع قريب العشي ..
جت بسمة  بالبدلة الكبيرة ومكياج اخر صيحة وعالقصص والعالم حايس
خشت للغرفة اللي فيها اسراء وسلمت عليها وطلعت جت عينها في عين ميادة ..
ولا انتي يابسمة جيتي سلمتي على ضرتك ولا انتي يا ميادة رحبتي بيها ..
خشت بسمة شايفة رويحتها وكلهم يشبحوا من هاذي من هاذي ..
وحدها سلمت على طاولة اهل منذر وعبد الحفيظ وفجرة والصدارات حتى هما اللي في الصفة ..
فجرة : استني نكلملك عليوة يجيبلك كرسي ..
اشرت فجرة لعليوة بين الطاولات يدور ..
جاها : نعم فجرة ..
فجرة : جيب لمرت عمك كرسي ..
ومشي عليوة قام الكرسي في غمره وجي وحطهولها ..
وقعمزت جنب فجرة وخودلك يا بصارة ويا ضحك واما مزين مشيتي ومن لبسك ..
***
اسراء في الغرفة وواقفة عليها أمها ..
ميادة : ولدك خليه هني ماتطلعيش بيه ..
جبت بمبلة لفيتهالك بش تطلعي بيها ودرقيها ..
اسراء : علاش يما توا .. والله جو زايد
ميادة : زايد في عينك  يطقوك بعين انتي وولدك وتقعدي عرم ملوحة تعاني
اسراء : باهي هي ..

وطلعت اسراء لابسة ردي محلول بتخليلة على الأزرق ..
ويدرجوا فيها  على أسماء الله الحسنى

وحطوا العشي ويا حنة الست ميادة جبدت كرسي وقعمزت مع طاولة امالي راجل بنتها وامالي راجل فجرة ..
وحطوا العاملات العشي ..
وميادة تهدرز على هبة  ..
ميادة : شن جوكم انتم وفجرة ..
هبة : على حالها تنزل مرة بعد وين ..
ميادة : لااا هذا حوش عزوزتها كيف ماتنزلش ؟
هبة : خوي هكي يبي شادة حوشها وخلاص
ميادة : باهي امك بروحها ولا ؟ مامعاها حد ؟
هبة :أي بروحها .. وتجيها الشغالة الصبح وتروح المغرب ..
ميادة : اهااااا مدايرين شغاااالة .. لكن مفروض وله تبي الحق .. مفروض  تنز  اطل على عزوزتها ..حتى شوي ..
هبة : مانبوا منها شي تشد حوشها وتقيم خوي وتشد خوتها ..
**ميادة عادي شدت في الكلمة الأخيرة **
ميادة : ينزلوا هما ؟
هبة : لالا لكن غر مرة عندها مشوار وحطنا خوي في الامر الواقع يقعدوا عندنا .. واحني يومها عندنا مشوار حتى حني ..
ميادة : لا فجرة فالحة فيها الحركات هاذي ..ادير حاجتها من تحت التحت ماتتكلمش هي مرات ادف في راجلها في الواجهة ..
هبة : يمكن .. شورا انتي وياها مش في الصحيح بنت سلفك ..
ميادة تاكل في الرز : هييي بالله خليني ساكتة ..
هبة : خيرك هدرزي  ومش تقولي تعاود .. انا راهو نطلع من الباب نلوح الدوة في مكانها ..
ميادة لقت فرصة : لا عارفاتك يا حنا ..
هبة كبشت : باهي تكلمي خيرك ..
ميادة : بالله خليني ساكتة .. مش هي السبب وراء زواجة راجلي التانية جابها عليا صغيرة ؟
هبة : بالله عليك ؟
ميادة : والله تزوج .. اوني هي وياها يهدرزوا جنب بعضهم ..
هبة : ماتقوليش هي جابتها ..
ميادة : لا هو جابها لكن دبارتها هي .. تهدرز هي وعمها ديما لين قلباته عليا وجابها نديدتها ونديدة بنتي .. (ودارت الدموع)
هبة : ريتي ريتي ما يطلع منها ..
ميادة : أي شوفيها اوني هي وياها مقعمزات جنب بعضهم ويطقوا فيها ..
هبة : عطيها ما يرفعها ..
ميادة : ردوا بالكم منها .. وفتحي عيون خوك  مايعطيش فيها الثقة مش مزبوطة ره ..
هبة : خيرها ؟
ميادة : وحدة جارتهم ..جتني للحوش وقالتلي بنت سلفك  طالعة العشيات ومروحة الفجور على رجليها ..
حشاك راجلها شافها وهو ماشي لصلاة الفجر ..
هبة حطت ايدها على فمها وشهقت : هييييييي نهار حرش ..
ميادة : نزلي ايدك ماتفضحيناش كلهم يشوفوا ..
هبة :مصدومة انا .. خوي انضحك عليه ؟ غبااارة وخلاص ..
ميادة : ونزيدك من الشعر بيت يا حنا ..ماتندروش بيها كانت تخدم قبل ؟
هبة : لالا .. قالنا عبد الحفيظ ربة بيت ..
ميادة : امالا كاذبة عليه .. كانت تخدم نظافة في الحياااش .. ساعتها كانت تسكن عندي .. تكذب عليا تقولي شركة .. وهي طلعت نظافة ..
هبة : لالا ميادة معقووولة ؟
ميادة : باش تبي نحلفلك .. شديتها مكالمة من نقالها رديت .. الراجل اللي يخدم فيها  يدور فيها يومين ماجتش .. مريضة ..
هبة : انا حتى العشي معش نتبنن فيه .. دماغي وقف ..
ميادة : انا اللي عندي قلتهولك اعرفوا كيف تتصرفوا ..وردي بالك تجيبيني في الواجهة انا البنت هاذي ماعنديش معاها حظ ..
ام عبد الحفيظ تشبح فيهم يوشوشوا ..
ام عبد الحفيظ : خيركم في شن تهدرزوا ..
ميادة سكتت وردت هبة : شي على الحمل والجياب .. عطتني اسم دكتورة اعشاب .. بنمشي نشوفها على الحمل ..
ام عبد الحفيظ : حلك ماسكرتيش عامين وتبي تمزرطي روحك ..
هبة سكتت : ..
ميادة طبست على هبة :  جديات تبي علاج للحمل ؟
هبة : أي ..
ميادة : نعطيك رقم وحدة نعرفها .. خودي معاها موعد ..وتقولك شن اديري
هبة : كيف تعطيني حبوب ولا اعشاب ..
ميادة : تعطيك دواء عربي يمشي معاك ..
هبة تحمست : باهي كويسة هاذي ،؟
ميادة : ما شاء الله .. عطلت اول ما تزوجت ثلاثة سنين ..بعدين خديت منها ياحنة الدواء
وحملت ببنتي .. تعطي حتى في دواء يوقف الحمل ..نهائي كان معش بتجيبي ..
هبة : باهي هاتي رقمها هي .. طلعتي حق عندك دكتورة اعشاب على قولتي لامي توا ، ههههه
*وسجلت الرقم من ميادة ..