فجرَة

(الموسم الاول) الحلقة الثانية

#فجرة❤ (قصة من الواقع )

كتابة :🌷 ندى أحمد 🌷

#في_الحلقة_السابق :  -

طلعوا الصغار من الحوش
علي : مني فيه برا
زهرة : حي شرطة !!
محمد شد في قفطان اخته ويشبحلها : فجرة خيرك تبكي ..
فجرة شدت خوها من ايده : شي حبيبي تراب خش في عيوني وخششت خوتها ..
⚘⚘⚘⚘⚘⚘⚘⚘⚘

الحلقة الثانية : -

فجرة : انا طالعة شوي ما يطلع حد تو نجيكم ..
علي : وين ماشية ؟
فجرة : لخالتي جميلة !
علي : باهي مش تعطلي !
فجرة : لالا مش معطلة ، دير بالك على خوتك ..

مشت فجرة وطقت على باب جارتهم جميلة ..

فتح فوزي : خير بنتي كيف حالك
فجرة : باهي الحمد لله  .. نبي نطلب منك طلب ..
فوزي : خشي داخل خالتك جميلة قاعدة ..
-خشت فجرة للحوش ..
جميلة : فجرة كيف حالك اليوم ؟
فجرة : الحمد لله ..
جميلة : ان شاء الله خير حاسة صاير معاك شي ..
فجرة : جيت نبي نكلم عمي فوزي يشوف بوي ..
فوزي : خيره بوك .. ؟
فجرة : مش الطانطا انخنبت ، الراجل "سعد " عطي مهلة شهر لبوي يا يخلصه حقها يا يحبسه ، واليوم جت الشرطة رفعت بوي " وتغير صوتها  وانهمرت بالبكي و العبرة "
جميلة : به علاش هكي يدير ما استناكمش ؟
فوزي : لا حول ولا قوة الا بالله ..
فجرة : نبيك تمشي تشوفه وترفعله دبشه .. انت بعد بوي ماعندنا حد انا وخوتي ..
جميلة : وعمك عبد الله علاش ما قلتيلاش ؟
فجرة سكتت : ..
فوزي فنص في مرته : خلاص بنتي تو نمشي نشوفه ونحاول نحلها مع الراجل هذا بالك نلقوا حل  !
فجرة : صحيت عمي فوزي  امتى بتمشي ؟
فوزي : حتى توا ..
فجرة : باهي امالا خلي نحطله ما ياكل ودواه ولبسه ..

طلعت فجرة ..

جميلةة لراجلها : مش قلت مالياش علاقة بحد ، اهو خاش في مشاكلهم ..
فوزي : والنبي ضمي عليا فمك واسكتي ، حاجة الخير عمرك ماتحبيها غير لروحك .. نمشي نصلي العصر خير من تفتفيتك ..

وطلع لجامع

*عند فجرة *

فجرة فتحت الساكو وحطت دبش بوها ودواه  ولفتله خبزة الطاجين والفطيرة  وشوي حاجات خفيفة  وسكرت على الساكو ..

دورا طق بابهم ..

مشت فجرة : مني ؟
فوزي : انا يا بنتي !
-فتحت الباب ومدتله الساكو
فجرة : دبشه وشوي حاجات ياكلها و دواه ..
بالله عليك طمنا عليه وقولي شن صار ..

*مشي فوزي للمركز *

قعمز مع الضابط ..
فوزي : والله مايصير .. راجل كبير  مرته متوفية و مريض بالقلب  ومخلي اربعة صغار في الحوش ،
الضابط : ماتكلمنيش انا ، كلم اللي فاتح المحضر في الراجل ، الراجل طالب تعويض .. الا اذا الراجل تنازل  ابراهيم يطلع
فوزي : باهي بالله عليكم دواء وشوي دبش وصلوهمله ..