فجرَة

الجزء السابع

سامحوني كنت بنزلها  البارح اشتراك النت كمل

فجرة بعد زواجها ❤
كتابة : 🌷ندى أحمد🌷

في الجزء السابق : -

فجرة : امالا قولي شغلتني ، زعلان مني انا (وحطت ايدها على ايده)
عبد الحفيظ : وراسك ياحبي مازعلان منك ولا فيه حاجة تالاك ،
فجرة سكتت : براحتك (ووقفت عيونها في عيونه)
عبد الحفيظ ابتسم وهو متكنطي: اصرارك حتى في عيونك ، (وخدي ايدها وبوسها ) والله ما زعلان منك ، فوتيني بس معش تسألي وغيري الموضوع ، نبي نغير جوي ،

#قراءة_ممتعة ❤

الجزء السابع : -

فاتت فترة و عبد الحفيظ علاقته معش كويسة مع اخته وقاعدة ما تصلحتش ،
هبة تخمم في حالها وواكلة روحها على موضوع الحمل
هبة بينها وبين نفسها : *(احسن شي نتصل ب المرا هاذي لعطتني رقمها ميادة ،
بالك نلقا لروحي علاج بعدين هذاكا رجع رجع مارجعش يملح ، المهم نكون درت خطوة كويسة حتى في حق نفسي ، )
وقامت النقال وتتصل بها مع الضحى ،
هبة : ايوه السلام عليكم ،
: وعليكم السلام ورحمة الله ،
هبة : انتي استاذة فلانة ،
: اي تفضلي ،
هبة : نبي نعالج عندك على الصغار ،
: ضروري تاخدي موعد وتجيني ، وبعد نشوفك نعطيك علاجك !
هبة : به بناخد موعد ،
: الاسبوع هذا كله معبي ، يوم الخميس كلميني واحجزي ،
هبة : باهي تمام ، شكرا ،
وسكرت الخط ،
هبة *( شكلها علاجها كويس كنهذا مش زاحمة عندها اسبوع كامل مافيش حجز ، يلا اهو نتوكلوا على الله وخلاص ، )
على خشة امها : خيرك في شن تخممي ؟
هبة : حصلت مرا اداوي بالاعشاب على الحمل ،
ام عبد الحفيظ : لعطاتك رقمها مرت عم فجرة ؟
هبة : ايوااه ،
ام عبد الحفيظ : زعما عندها علاج على التهاب المفاصل ؟
هبة : ع حسب مافهمت عندها كل شي ،

****
بعد يجي قريب خمسة ايام ،
طيبت فجرة بسبوسة ونزلتها معاها لعزوزتها ،
خشت فجرة : السلااام عليكم ،
ام عبدو : وعليكم السلام كيف حالك اليوم
وهبة ناضت من وسط الحوش جنب امها خشت لدار تقلب في وجهها على فجرة ، ماردتش حتى السلام  وقربعت وراها الباب ،
ام عبدو : اللطف .. بالشوووويا على الباب قريب كسرتيه ،
فجرة عادية جدا وكأن ما دارت شي : تفضلي عمتي ،
ام عبدو : يزيد فضلك شن هذا ؟
فجرة : بسبوسة بجوز الهند ،
ام عبدو : صحيتي يا حنا ، كيف حال وخيينك باهيين ؟
فجرة : الحمد لله اهو قراية ليه ليه ،
ام عبدو : باهي ربي يوفقهم ان شاء الله ،
فجرة : سلمك ،
ام عبدو : امالا وين اعبودة ؟
فجرة : ماروحش اليوم قال عنده ضغط خدمة
ام عبدو : باهي ربي يعاونه ،
**
هبة الداخل في الدار تسحن ،
هبة : توا قعمزتلي هني بتغمني في الدار !
خدت غطاها وتغطت ،

بعد يومين اتصلت هبة وخدت موعد على اساس يوم الاحد الصبح مع ال10

هبة السبت في الليل : يما غدوة نبيك ترفعيني للمرا ،
امها : مرا ؟ مني المرا ،
هبة : المرا اللي اداوي بالاعشاب
امها : امتى به ،
هبة : مع ال10 الصبح ،
امها : انا سيارتي تبي تغيير زيت مانقدرش نمشي بيها ، تو ناخدوا سيارة خوك ،
هبة : به كلميه توا ،
امها : بالك راقدين توا شن بنزعجهم ؟
هبة : بيرقدوا من ال9 خيرك يام ؟
امها : به هاتي النقال بحدا التلفزيون خلي نضربله ،
جابت هبة النقال لامها ،
**
عند عبد الحفيظ كيف متعشيين متكيين هو وفجرة في دارهم ويهدرزوا ،