فجرَة

الجزء الثامن

فجرة بعد زواجها❤
كتابة : 🌷ندى أحمد🌷

في الجزء السابق : -

عبد الحفيظ : ضربت حتى مضاد وعطوني كريمة ،
فجرة : باهي الحمد لله على سلامتك ، (وبوست خده)
عبد الحفيظ : الله يسلمك ، باهي اللي جت في ايدي ماركبتش في وجهي ،
فجرة : الحمد لله ربي ستر ،
عبد الحفيظ :  حقا بنقولك
فجرة : ان شاء الله خير !
عبد الحفيظ : وتيلي الشنطة الصبح ، غدوة مع ال2 الظهر طالع لمالطا ،
فجرة : ان شاء الله خير علاش ؟
عبد الحفيظ : فيه عقود بنوقعها وبنتم شوي امور غاذي ،
فجرة : تمشي وتجي بالسلامة ،

الجزء الثامن : -

#قراءة_ممتعة ❤

تاني يوم مع الصبحيات فجرة بعد ما سقدت خوتها للمدرسة ،
وعبد الحفيظ للعمل ،
ضمت الحوش وتت شنطة عبد الحفيظ ،
وهي قلبها متضايق ماتبيشي يبعد عليها ،
طفت غذاها وسقاته ،
على خشة خوتها من المدرسة ،
فجرة : شن جاوبتوا ؟
عليوة : زوز اسئلة ما عرفتهمش ،
فجرة : بعد الغذي وريهملي ،
زهرة : فجرة ، قالتلنا الابلة بنديروا حفلة في المدرسة الاسبوع الجاي ، قالولنا تعالوا في سورية بيضاء وسروال ازرق ،
فجرة : انتم الثلاثة حتى حمودة ؟
زهرة : ايه ،
فجرة : تو نشوف باهي ،

وبدلوا حوايجهم وغسلوا طرافهم
وحطتلهم الغذي وعلى جية عبد الحفيظ ،
فتح باب الحوش ،

عبد الحفيظ : السلام عليكم ،
فجرة : وعليكم السلام ،
عبد الحفيظ : شن واتية الشنطة ؟
فجرة : ايه ، تغذا قبل !
عبد الحفيظ : مستعجل معش وقت
فجرة : به حتى شوية بس ،
عبد الحفيظ : به اهو تو ناكل مع الصغار ،
وقعمز جنب الصغار وكانجوه مش تمام ،
بس يساير وياكل بسرعة ،
طلعت فجرة الشنطة ،
فجرة زعلانة : بتعطل غاذي ؟
عبد الحفيظ : 10 ايام ومروح ان شاء الله مرات اقل ،
فجرة : به ممكن تقولي شن عندك غاذي ؟ لان والله جوك ماهو عاجبني ،
عبد الحفيظ : صار باين على وجهي ،
فجرة : قول ما تقلقنيش ،
ناض عبد الحفيظ للمربوعة ، : غر تعالي ،
لحقت فجرة راجلها وقعمزت جنبه ،
فجرة : شن بتقول ،
عبد الحفيظ : انا ماشي  بنشوف وضع الفرع اللي فاتحينه غاذي صاير شوي تلخبيط في الشغل وفي ورق مزورينه ولاعبين فيه يستر الله على سمعة الشركة غاذي ،
فجرة : حيييي من اللي مداير هكي ؟
عبد الحفيظ : واحد من الانذال اللي غاذي ، بنمشي نفصلهم ونشوفلهم راي ،
فجرة : تزوير حاجة قوية هاذي ، وكان تنضر انت ولا يشدوك ؟
عبد الحفيظ : ماشي بنتصرف قبل مايتفاقم الوضع غاذي ويخش فيها القانون ،
فجرة : باهي ربي معاك ويوفقك ،
عبد الحفيظ بوس جبينها ووقف ، : كلمي اسراء تجي تكسد عندك ولا بري عندها ، كلمت منذر وصيته عليكم ، كان نقصت عليك حاجة ولا تبي شي ،
فجرة : باهي به تمام ،
عبد الحفيظ : ولا شوفي امي خليتلها مفتاح السيارة ،
فجرة : به من رافعك للمطار توا ؟
عبد الحفيظ : منذر ،  جي وراي بسيارته ،
عبد الحفيظ طبس على الصغار سلم عليهم ،
حمودة : بابا حفيظ بتركب في الطايرة ؟
عبد الحفيظ : اي على الخير ان شاء الله ،
حمودة : مرة تانية ارفعني معاك ،
عبد الحفيظ : نتم شغلي هذا ووعد نمشوا كلنا نغيروا جو في تركيا ، ( وتلفت لفجرة لقاها مواطية عيونها ، حط ايده على وجهها ورفعه قبالته ) خيرك ؟
فجرة عيونها مدمعات : ...
عبد الحفيظ : تبكي ؟
فجرة بدون رادة منها جت قربت منه وحضناته
عبد الحفيظ : فجرة خلاص ، خيرنا  عاد ؟ شن انفوت السفره ؟
فجرة وخرت ومسحت دموعها : لالا برا شغلك وسمعتك قبل كل شي ، ما ادورناش حني في امان هني ،