فجرَة

الجزء الثامن (الموسم الاول)

فجرة❤ (قصة واقعية )

كتابة : ⚘ندى أحمد⚘

في الجزء السابق : -

اسراء : حيييييي على الجوووو .. باهي هو شنو معاك ..
فجرة : زبطني وسألني عندنا عرس من اربعة شهور قتله لا .. وقاعد شاك نحس فيه
اسراء :الله على الصدفةةةة 😍❤

الجزء الثامن:-

عند فجرة
وهي في المكتب الثاني جنب مكتب عبد الحفيظ
تسمع في دوشة وصوت عالي
زادت ركزت : حي هذا صوت عبد الحفيظ ، وطلعت راسها من الباب دورا ..
عبد الحفيظ :اطلع يا وسخ وجهك معش نبيه هني انت وياه
دورا تشبح في الموظفين منظرهم متبهدل والوجه اصفر ومتعفلقين ..
عبد الحفيظ حدف وراقهم في الممر
وسكر باب المكتب (طاااااااااف)

خشت فجرة !
فجرة : ( حي عليا ياريتني ما قلتله فصلهم من الخدمة .. صحاب عايلات قطعت رزقهم غر شن درتي يا فجرة )

**
عند اسراء ..على سفرة الفطور
اسراء : اسمع حبيبي ..
مندر : نعم
اسراء : قلتلي هذاكا المدير صاحبك حاط عينه على فجرة ؟
مندر : قتلك شكله حاط عينه عليها ، شكلك قلتيلها البنت ؟
اسراء : لالا والله ما قلتلها ! ، لكن تبي الحق !!
مندر : شنو ؟
اسراء : نبيك تجس نبضه يبي وحدة حاط عينه عليها ولالا ..
مندر : علاش
اسراء : نقولك مش تمشي تقوله ؟
مندر يلبس في جاكته : شن تحسابيني عيل اللي نسمعه نقوله !
اسراء : حشاك يا عمري ، بنت عمي حكتلي على شبوب شافها في عرسي في الصالة وعجبت بيه والباين عجب بيها ! امس جسيت نبضها مافيش حاجة هكي ولا هكي ؟ قالتلي اللي ريته في عرسك طلع مدير الشركة اللي باعتينها ليه المكتب !
قلتلها ماعرفكش ؟ قالتلي شاك فيا وسألني على العرس قالتله بمعنى العرس مش لينا بعدت الشبهة ..
مندر : بجديات ؟
اسراء : ت اييييييه شن نحكي امالا ، تمنيتهم يتلاقوا تاني في ظرف احسن !
مندر : ما تندريش مرات نصيب بعضهم !
اسراء : اي هذا باش قتلك جس نبضه بالك فيه وحدة .. كنهذا بنقربوهم لبعض بطريقة غير مباشرة !
مندر يلبس في كندرته : كيف ؟ نبي منك خدمة تخدم فيها بنت عمي ، وظفها معاكم في الشركة !
مندر : علاش هذا كله ! والله كان يبيها فعلا لم ياخدها !
اسراء : اهله حيعارضوله !
مندر : ان شاء الله تو نشوفوا غر ماتسبقيش الاحداث ناخدوا الزبدة قبل ..
اسراء جت تجري بوست خد مندر: يا سلمهولي !
مندر : هي ما تبي شي ؟
اسراء : سلامتك ..

عند مندر وصل لمكتب عبد الحفيظ (طق طق )
عبد الحفيظ : تفضل !
مندر : شن يا خال شن الجو ..
عبد الحفيظ : ماشية ..
مندر : خيرك معكرش ؟
عبد الحفيظ : زبطهم ( فلان و فلان )
مندر : اي خيرهم ..
عبد الحفيظ : فصلتهم من الشغل
مندر : ملا فكا من قبل مانيش مرتاحلهم .. شن خلاك هذا وين تفصلهم
عبد الحفيظ : محاولة خنبة !
مندر : كيف خنبة شنو ..
عبد الحفيظ : معاملات ستة مليون !
مندر : ماتقوليش متع هذاكا الموضوع القديم ؟
عبد الحفيظ : بالضبط ..
مندر : يستااهلوا لا يستاهلوا
عبد الحفيظ : ولد حلال جابلي المفتاح رايح مني كنهذا مشت في خبر كان الميزانية !
مندر : من هو؟
عبد الحفيظ : حلفني ما نقولش عليه !
مندر : باهي بارك الله فيه !
عبد الحفيظ : تعالا نطلعوا للقهوة ..
مندر : لا والله فاطر ..
عبد الحفيظ : تي اني نبي نفطر ! لا انتم المتزوجين عندكم من لاهي بيكم ، احني يا ناري علينا ..
وطلع عبد الحفيظ ومندر من المكتب واقفين في الممر و فجرة تنشف !
عبد الحفيظ وعيونه في فجرة : كان نحصل من يهون عليا تعب الخدمة ،
مندر : شن فيه حاجة في بالك ؟
عبد الحفيظ : حاجات مش حاجة ! نبي نستقر ياسر خلاص عمري 31 حتى الشيب بدي يطلع ! ( ويحدف في نظرات لفجرة )
مندر شاف عيونه لقاهم في فجرة : ..
ومشوا كملوا الممر ..