فجرَة

الجزء التاسع

فجرة (بعد زواجها ❤)
كتابة : 🌷ندى أحمد 🌷

في الجزء السابق : -

عبد الحفيظ : ربي مايحرمني من دعواتك ، تي تعرفي قريب مشيت فيها حبس في مالطا ،
فجرة : نخلعت نهار بيض !
عبد الحفيظ : تخايلي نقعد محبوس سنة ولا اتنين ؟
فجرة : اس خلاص ما نبيش نتخايل ،
عبد الحفيظ : شن الدوشة شكلكم طالعين ،
فجرة : اي طلعنا مع اسراء ومنذر للمنتزه ،
عبد الحفيظ : باهي طمنتوني ، غيروا جوكم وجو الصغار ديما وهما مكبوبين على كراساتهم مسخفيني ،

الجزء التاسع  ما قبل الاخير : -

فجرة : ربي يحفظك ليا يارب
عبد الحفيظ : امين يا قلب القلب انتي ،  امالا منذر وين غاطس ،
فجرة : اهو يلعب في الصغار ، اضحك وبس  ،جري في جري ،
عبد الحفيظ : باهي باهي ،  انا  احتمال الاثنين الجاي مروح ان شاء الله غير بنشوف وضع الشركة ونتم امورها  ،

*بينما عبد الحفيظ في هاذيكا الايام  قعد لاهي في وضع الشركة ويرتب في اموره في مالطا ،

هني في ليبيا عند هبة ،
بعتت مندوبة وصلت الفلوس للعزوز الشمطاء "السحارة"
ومروا الايام بسرعة على الكل ،

وتستنى الست هبة على أحر من الجمر ،
وهي ادور ادور في هاذيكا الدار اتزربز ،

رن نقالها شافت (لقاته علاج اعشاب تتصل)
ردت هبة : ايوه ؟ كيف حالك اليوم ؟
العزوز : باهية  بلا كثر دوة ، اليووم ضروري تجي وتحضري ،
هبة : شن بنحضر العفو؟
العزوز : تحضري الذبيحة ،
هبة : لالا نخاف مانقدرش المرة الاولى تقربيعة وتوا شن بيصير ؟ بينهد علينا الحوش !،
العزوز : لااااازم تحضري كان هذا بيعكس عليك ،
هبة خابفة : باهي به ، امتى نجي ؟
العزوز : توا قبل المغرب ،
هبة : الجدي واتي ؟
العزوز : اي جايبه الوليد في الطريق ،
هبة : به امالا ، تو ندبر كيف نجي ،

هبة تخمم *( كيف بندير باهي ؟ بنقول لامي ترفعني  اكيد بتنزل معاي بتشوف الشي )

هبة تفكر : *( احسن حاجة نمشي ناخد المفتاح 
ونطلع بروحي .. )
ولبست عباية ووشاح ماشي حالك على السريع ومادارت حتى حاجة في وجهها ، وخدت المفتاح بدون ما تحس عليها امها ، وطلعت ،

***

عند فجرة مقعمزة تفكر  شن بتطيب غدوة حبيب القلب والروح عبد الحفيظ مروح ولازم اتفتلك الجو ، في داخلها فرحانة باطير 
فجرة : هيا خلي نتصل باسراء بالك تقترح عليا ،
وقامت النقال من على الطاولة ورجعت لمكانها ونقصت التلفزيون واتصلت بإسراء ،

اسراء متكية جنب ولدها ومنذر رااااقد ولا يندري عليها منين زارقة من التعب والنوضة بكري لشركة ،
سمعت نقالها يرن خداته لقت فجرة تتصل

مشت للمطبخ وردت ،

اسراء : ايوه يا عسل ،
فجرة : كيف حالك يا حلوة شن امورك ؟
اسراء : الحمد لله
فجرة :  وين منذر امالا  ؟
اسراء : والله متكي في سابع حلم ،
فجرة : ماهو من تعب الخدمة ،
اسراء : اي
فجرة : ربي يعاونه ان شاء الله ،
اسراء : سلمها !
فجرة : اسمعي اسكتي ساكتة ،
اسراء : شن ؟
فجرة : اعبودة يا حنا مروح غدوة  ،
اسراء : اي قالي منذر غدوة عبدو  مروح ، بالسلامة ان شاء الله
فجرة : سلمك يا حنا ، غر اسمعي حايرة يا مرا شن بنطيب ،
اسراء : بري خودي عشي واتي من معمل وريحي راسك ، امتى بتوتي روحك وامتى بتلبسي ، خوديه واتي وعلى التسخين بس ،
فجرة : زعما هكي قولتك ؟
اسراء : اي والله ، في معمل في طريق زناتة نظيييف نظيف بري يا حنا وصي على صواني وريحي راسك
فجرة : به شن تقترحي عليا نختار ؟
اسراء : يا حنا عندهم كباب دجاج مش عادي ، وخودي سلطات ، حاجات حارة يحبها عبدو شن هي ؟
فجرة : الزمني ، المبطن اكثر شي ، وميني بيتزا ،
اسراء : اخلاص يا حنا البيتزا ديريها في الحوش طريقتك فيها حلوة ، اسمعي اسمعي ولا نقولك ؟
فجرة : شني ؟
اسراء : خلي عليا انا تو نطلع ونوصيلك منها صواني ندوق حاجاتهم واحلى حاجة نحجزهالك ،
فجرة : والله تبدي انتي احسن وحدة ،
اسراء : ههههه ، به وخوتك كيف بديريلهم ؟
فجرة : بيقعدوا وين بيمشوا ،
اسراء : عينك ، تو نمشي للمعمل ونخطم عليهم انا ، نرفعهم عندي ، خليكم عيشوا الرومنسية على راحتكم ،
فجرة : لالا بالك راجلك يضايق ،
اسراء : منذرررر بيضايق من صغار عمي ، والله يسأل فيا عليهم ويقولي جيبيهم يباتوا
فجرة : مش عارفة سرو باهي وانتي عندك عيل بتلهي بيه ،
اسراء : نحرج منك معش تقولي هكي ، غدوة لازم يخلالكم الجو ، باهي ؟ 
فجرة : ....
اسراء : باهي ؟؟؟؟
فجرة : اممممبااااه ،
اسراء : انتي اختي ، وهاذم صغار عمي ونشوف فيهم صغار اختي ، وبعدين مش الخوات لبعضهم ؟ حتى انا ندير حليق ونخليهم عندك وقت المناسبة  ههههههه
فجرة : ادللي يا حنة في عيوني انتي وياهم وبوهم ،
لكن حقاا ،
اسراء : شن ؟
فجرة : غدوة مدرسة ! اخطمي عليهم غدوة عندي بعد يروحوا ،
اسراء : لالا ، عادي تو نقول لمنذر يكلم الباص ويجيهم هني ، اقعدي في الهدوء براحتك ، ديري اللازم
***
عند هبة في الطريق بالسيارة ،
نقالها يرن ، 
شافاته لقتها امها تتصل ،
هبة : *( اياااه هاذي امي ، ) وحدفت النقال على الكرسي ،
والنقال عاود يرن ،
خدت هبة النقال وردت ،