خبايا الروح

الجزء الأول

#خبايا الروح❣❣
الجزء الاول.......
مشهد من القصة،،،،،
شمس:بابا الله يخليك ابوس رجلك
لاتزوجني اله والله اظل خدامة واحبسني
بالمخزن حتى اكل ما اريد بس كرصة خبز
الله يخليك بابا والله مالي ذنب وما اعرفه،،
ابو شمس:انجبي ادبسز تريدين تالي عمري
تنزلين راسي،،،
شمس:والله مو اني ليش متصدكني،،،
بسمة:شنووو قصدج مو انتي لعد منو الي
جتي تلهث وهدومهة متربة لج ليش
هيج قهرتي ابوج ونزلتي راسه
ابو شمس:سكتي بسمة لايصير شي
ع ابني هاي اني اعرف اتصرف وياها،،،

السلام عليكم اني شمس هاي جانت
نبذة عن معاناتي وية اهلي وبداية المستقبل
المظلم الي راح اعيشه،،،،
تعالوا اعرفكم عن نفسي وعن حياتي،،،
اسمي شمس عمري 16سنة حنطية البشرة
عيوني عسلي شعري وسط مو كلش طويل
لنص ظهري طولي160شكلي مقبول
الحمدلله مدام ماعندي عاهة،،،
طالبة خامس ادبي،،مستواي الدراسة
زين الحمدلله متوسطة مو كلش شاطرة
بس اهم شي افهم وما اهمل اي واجب
اني وحيدة اهلي امي توفت واني عمري
13سنة توفت اثر حادث وابوية اتأذى
بسبب فراقهة ورة فترة بيبيتي ام
ابوية لحت علية يتزوج وفعلا ورة شهرين
من وفاة امي تزوج اخذ بنت خاله
بالبداية حبابة وزينة وابوية جان كلش
يحبني زوجة ابوية اسمهة بسمة
ارملة وعدهة بنية بعمري اسمهة سارة،،
سارة جانت تحب ابن عمي وعدهة علاقة
بيه،،بعد مرور 6اشهر من زواج ابوية
بدأت معاناتي بالبيت بسبب حمل بسمة
وخبلت ابوية من عرف ولد ظلت تقرة
ابراسه ابنك وسندك لوتيه ،،،شوية شوية ابوية
ابتعد عني وصار شغل البيت بغياب ابوية
اكثره علية بس الطبخ ع مرت ابوية
بس شنو لو اطبخ اني احسن حمسي ثرمي
سلكي وبعد كل هذا تلكون كارثة بالمطبخ
من ورة الماعين،،،،
طبعا اني من بغداد بس كلشي مشايفة
منهة اول شي منعني عنه ابوية ورة
زواجه بيت جدي اهل امي وخوالي هم
مرادوا مشاكل تركوني ومسئلوا عمي ابد
مشت حياتي طبيعية احاول جهد الامكان
ابتعد عن المشاكل بس سارة هواية
تلح وياية واني اوصل لمرحلة اتعارك
وياها وتنلاص علية صح ابوية ميضربني
بس يظل يحجي ويرزل ويهين وهم يحجي
شوية ع سارة بس ميغلط ويدوس
يخاف ع مشاعر بسمة ام عطوب،،،،،
المهم،،،،،،
جانت عندي صديقتي اسمهة سرى
كلش مقربة الي بيتهم بعد عن بيتنة
ب4بيوت نروح ونجي سوة لان سارة
جانت بغير مدرسة تروح وتجي اداوم بمدرسة
متميزات بغير منطقة،،،،
بيوم من الايام جنة راجعين اني وسرى
من المدرسة نسولف ع الدوام،،،
سرى:تعالي شوشة خل نعبر ع الاسواق
شمس:شعندج مابيه حيل عود دزي
اخوج،،،
سرى:دمشي لج هو بطريقنة وبعدين
حمودي اذا ادزه لازم رشوة،،دمشي حبابة
شمس:امشي امري لله ليش هو اني
اكدر ارفضلج طلب،،عبرنة الشارع وطلعت
سيارة من الفرع واني انرعبت مدري
ارجع مدري اكمل طريقي،،محسيت غير
حرارة برجلي،،،،
رائد:العفووو،،خما بيج شي،،،
شمس:هاااااا،،مثل الثولة صافنة بوجهة
ياربي شكله كلش حلووو رجولي وصوته
خشن بيه بحه هو يحجي ومعصب ومبين
خايف عليه واني الفاهية صافنة،،،
سرى:ولج ثولة فضحتينة كومي عاد،،،
رائد:بس جاوبيني فدوة بيج شي،،،
شمس:هاااااا،،لاااا كلشي مابيه كمت لحيلي
وعطت و وكعت بالكاع،،وكمت ابجي،،،
رائد:كومي خوية كومي سنديهة خل
اوديهة للمستشفى مابية حيل فصول،،،
شمس:لاااااا مابيه شي والله،،سرى خل
نروح،،،
سرى:ولج شنروح وبهاي رجلج شمدرينة
كسر لو شبيهة،،،
رائد:سرى مو بعد اخوج سنديهة،،،
شمس:كومتني سرى بالكوة واني ميتة
خوف من ابوية اذا درى،،،
سرى:اخي بلا زحمة اكدر اخابر اهلي
من تليفونك بس انطيهم علم،،،
رائد:اكيد تفضلي،،بكلبي بس لا اهلهة
يدورون فصول،،،
سرى:دكيت ع امي وخبرتهة بالي صار
الحمدلله اهلي واعين ومتفهمين وناطيني
كامل الحرية واني الحمدلله محترمة الثقة
الي سلموهة الي،،،امي راحت ع اهل
شمس وبلغت زوجة ابوهة،،،
شمس:دموعي تنزل من الوجع،،،
سرى:حبيبتي لاتبجين ان شاءالله ماكو شي،،
شمس:ضحكت و الدموع مغركة عيني،،،
سرى:وجع شكووو اني اواسيج وانتي
سفيهة تضحكين،،،
شمس:لج والله حظي من السما اليوم
لج شوفي والله الولد يخبل الله كون هسة
اني مرته و داجيب وهو موديني للمستشفى،،،
سرى:عمت عينج لج انتي شخطتي
يمكن الدعمة ابراسج مو برجلج،،،وكفختهة
ع كييف وظلينة نضحك
رائد:اباوع ع البنية ساعة تضحك وساعة تبجي
وهي وصاحبتهة يتشاورن بعدين صاحبتهة
كفختهة براسهة ويضحكن،اني حبيت
الطف وياهم،،،يمعودة لاتكفخين بيهة
اخاف يصير ابمخهة شي وتنذب براسي
وادورون فصول بعدين،،،
شمس:ضحكت ودرت وجهي مخي الوصخ
كام يتخيل شغلات،،،
سرى:اي ظلي تمضحكي،،والله هسة اطلعين
عيارة كلشي مابيج ولخاطر الحلو مالتج
مسوية روحج متأية،،،،
شمس:لا والله وروح امي كلش توجعني،،،
وصلنة لمستشفى جابلي الولد كرسي
متحرك ودخلوني اشعة طلع تمزق بالاوردة
جبسوهة الي بس شنو راحت روحي
اجة ابوية للمستشفى وظل يرزل ويغلط
علية كدام العالم واني منزلة راسي
وبس دموع تنزل من فشلتي كدام
العالم وخصوصا الولد واكف،،،
سرى:وانتي شكو جذبتي مكلتي اندعمت
شمس:لاخطية الولد اخاف يتأذى بسببي
طبعا كلت للدكتور وابوية انلوت رجلي
من داعبر وردت اندعم والولد ساعدني
و وصلني للمستشفى،،،
ابو شمس:اني اعتذر ابني ع تصرفهة
وان شاءالله متكون سببتلك مشكلة،،،
رائد:هاااا لااا عمي مصار شي الحمدلله
ع سلامتهة،،،
ابو شمس:امشي من ثول الثولج بس
اني الله بلاني بغبية حتى شارع متعرف تعبر
شمس:مشيت واني مخنوكة وبس دموع
سرى لزمت ايدي وتعصر بيهة كأنما تمدني
بالقوة والصبر وابوية حتى مكلف نفسه
يسندني مشيت وية سرى خطية وياية،،،
رائد:تخبلت من هالرجال ممعقولة هذا اب
هذا مال حرك،،،،
رائد:مرحبا اني رائد ضابط عمري 30سنة
اسمر عيوني سود شعري خفيف ما اطوله
جسمي ضخم ورياضي بحكم شغلي
دوامي 10التحاق واسبوع نزول،،،،
ممزوج ماعندي اخوة بس اخت وحدة
ارملة ماعدهة اطفال حتى مطولت بزاوجهة
4اشهر وتوفى زوجهة بحادث عمرهة
26سنة خطية تعقدت لان تحس نفسهة
فكر خصوصا العالم وحجيهة الميخلص
امي عايشة الله يطول بعمرهة فقيرة
ومن اهل الله ابوية عايش الله يسامحه
سبب معاناة امي ومعاناتنة مزوج مرة
ثانية وطبعا كلشي بحياتهة يختلف
عنة مرفهة للاخير واصلا هو هاجر امي
من بعد ما خلفت سماح اختي،،
عندي 3اخوة من ابوية حسن وحسام
وسرمد وخوات ثنين رقية و اسراء
البنات والولد مزوجين ماعدا سرمد
هذا المدلل ابو المشاكل يومية موكعنة
ابمشكلة،،،،،
بيتنة كلش جبير وجنة كلنة سوة جنت
اشوف قهر امي وتحملهة للمشاكل
خلق حافز عندي ان لازم اغير حياتنة
تخرجت من السادس ودخلت اكاديمية
وتخرجت وانخرطت للجيش وبهاي
المدة دخلت دورة وصرت كلش
قاسي وحاد الطباع كلهة كامت تخاف
مني وتحسبلي حساب وبديت الم واجمع
من راتبي والحمدلله
ثابتت وثابرت الى ان وصلت لرتبة ضابط
وبيوم بلغت الكل ان راح اقسم البيت الي
ولامي واختي لان سماح كلش ادمرت
الكل شد وياها وبالفعل قسمنة البيت
وسكنة وحدنة حياتنة كلش تغيرت الحمدلله
للاحسن وصممت البيت ع الموديل
واثثتهة من ارقى الاثاث عوضت امي واختي
عن كلشي،،بس بقت شغلة باعدهة
عن بالي وهي الزواج بحكم شغلي
والخطورة الي بيه لاغي هالفكرة من
بالي اشيل هم لا بيوم اترك وراية مرة
واطفال،،،بس امي مترضى دائما تزن
براسي ع هالموضوع،،،،
وبيوم جنت طالع بشغلة ومريت ع ولد
وتيهت بيته ظليت اطب بفرع واطلع من فرع
الى ان وصلت لفرع طلعني ع شارع
عام النوب كملت علية خطية طالبة
مدرسة دتعبر وخافت ظلت كبالي
واني بكل قوتي دست بريك بس ملحكت ضربتهة
نزلت ركض عليهة بنية صغيرة احجي
وياها شلت حالي بس صافنة النوب
شغلت بالي كلت هاي هي انعلست
البنية مدري شبيه النوب هسة موديل
الفصول صديقتهة ظلت تحجي وياها
رادت تكوم بس عاطت و وكعت صدك مبين
متأذية مو تمثيل كبل كلت لصاحبتهة
وسندتهة للسيارة ظلن الطريق كله
يسولفن مبينالمدعومة كلش فطيرة ومو
لسان وهاي الوياها رزالة ع شقى
بس جذبتني كلش عيونهة كلهة دموع
وخي تضحك اشاقيت وياهم شوية
وراها وصلنة واجة ابو البنية بس استغربت
من ردة فعله ظل يرزل ويغلط عليهة
كدام العالم وهي بس دموع ومدنكة راسهة
ومشت وصاحبتهة ساندتهة بس عجبني
تصرفهة مكالت اندعمت يمكن عبالهة
خايف من اهلهة لو يمكن لان سمعتني
احجي بالفصول راحت البنية واني
لغيت الموعد وية الولد ورجعت كبل
للبيت زسولفت لامي الي صار اليوم،،،
سماح:خطية اوووو رائد لو محاجي
والله كسرت كلبي ع البنية،،،
ام رائد:اي والله خطية الله يساعدهة
رائد:وراها صعدت لغرفتي مددت وجتي
هالبنية ابالي شكلهة حلو نازكة ومرتبة
ومبين كلش فقيرة وفطيرة من تصرف
صاحبتهة وياها،،،،،
شمس:رجعنة للبيت بعد ما وصلنة سرى
وكمل ابوية علية بالبيت وبسمة وسارة
بس يضحكون بشماته بس الحلو انعفيت
من الشغل وخطية سرى جتي العصر
وية امهة ومرت ابوية ظلت تتعقيل
وتتلوك كدامهم بس سرى وامهة يعرفوهة
كلش زين ظلوا شوية يمنة وراحوا
تعشيت وكعدت اقرة اذكرت الولد كلش
عجبني تمنيت اشوفه مرة ثانية دكت
علية سرى،،،،
سرى:لج هاااا عوبة بعدج تفكرين بيه
شمس:لج مو بيدي والله كلش عجبني
شخصية وجمال،،،
سرى:اي عيني كملي،،،لج بابا اولا جبير
ثانيا شتنتظرين منه حب وعلاقة ترى تعرفيني
شمس:اووووو هوب عمي هوب اكلتيني
وشربتيني شتعرفيني ادور هيج سوالف
بس حجي شبيج حتى الحجي حرام،،،
سرى:ياروحي انتي لاتزعلين مني والله
موقصدي شي اخاف عليج ولو انتي
حقج كل الي دتمرين بيه ومحافظة
ع نفسج ومنحرفتي عن الطريق،،،
شمس:هسة عوفج من هالحجي كملتي
الامتحان،،،
سرى:لا بعدلي شوية من المادة،،وانتي،،
شمس:هستوني بديت رجلي كلش
توجعني بالكوة داركز،،،
سرى:لاتجين اني احجي وية المدرسة،،،
شمس:لا سرو اني المدرسة متنفسي
الوحيد وتدرين بيه اذا منكعد ونسولف
اطك واموت،،،
سرى:لااا لااا يمعودة كله ولا اطكين،،يلة
روحي كملي،،تصبحين ع خير
شمس:وانتي ابخير،،كعدت شلون مجان
قريت رجلي كلش وجعتني اخذت دوة
وشربت فاليوم ونمت محسيت غير
ساعة11الصبح،،خرب ان راح علية الامتحان
الله يطيح حظج شمس،،نزلت شفت
بسمة كاعدة بالهول،،،خالة ليش مكعدتوني
للدوام،،،،
بسمة:اي مو اني البنكلاديشية مال
الخلفتج،ولي من كبالي ولي،،،
شمس:استغفرالله،،تريكت وشربت الدوة
رجعت سارة طايرة فرح جايبة درجة عالية
الحق يقال سارة كلش شاطرة تدرس
علمي تريد اطلع طبية،،،،وما شاءالله
ابوية فخور بيهة اكثر مني طبعا اذا
اكل ونوم ودراسة وبس تضوج
لو بيت جدهة لو خالاتهة والمولات والطلعات
واني كلش كلش ساعة يم سرى
وهم تطلع سم علية،،،،للعصر
جتني سرى،،،،
سرى:لج امشي بغرفتج عندي خبر الج
بشدة ونص،،،،
شمس:ولج مابية حيل احجي هنا،،،
سرى:انجبي وامشي،،،
شمس:وهاي صعدنة احجي،،اشو هاي
ركضت تباوع منا ومنا وسدت الباب
ع كيف،،،
سرى:كعدي شموستي كعدي والله انج
صاحبة حظ حلوووو،،،
شمس:دحجي مو الفضول يقرة الف،،،
سرى:حزري منو اجة وسئل عليج اليوم،،،
شمس:بعدم مبالاة منو يعني الامير
وليام....صفنت لابربج لاتكولين هوووو،،
سرى:هزيت راسي،،،
شمس:عاااااا كمت اكمز بعدين عطت من
رجلي،،،
سرى:ولج اكعدي خبلة فضحتينة هاي
هيج ماخذ عقلج،،،،دسمعي لعد،،
رائد:كعدت الصبح تريكت وية امي وسماح
جنت مجاز ماعندي شي ظليت اكلب
بالتليفون امي دتسوي غدة وسماح
تنظف مدري ليش جتي البنية ع بالي
بدون تفكير شلت السويج وطلعت،،،
ام رائد:يمة الغدة راح يكمل،،،
رائد:ما اطول يوم هسة شغلة قريبة منا
طلعت لنفس الشارع الي دعمتهة بيه
طلعت ليكدام شفت اعدادية وبعده
الدوام ممنتهي زرة نص ساعة طلعوا رحت
لجهة الاسواق كلت بلكت اشوفهة
ظليت واكف ماكو بس انتبهت ع بنية اباب
الاسواق تباوع علية بعدين اذكرتهة هاي
صاحبتهة مشيت بتردد وافرك بلحيتي
السلام عليكم،،،
سرى:وعليكم السلام،،،
رائد:انتي مو ...
سرى:اي اني سرى صديقتهة لاتخاف
شمس زينة الحمدلله،،،
رائد:بداخلي اسمهة شمس حتى اسمهة
حلووو،،لعد شعجب ماكو والله ظل بالي
عليهة خصوصا موقف والدهة محبت
تحطني بموقف وية اهلهة،،،
سرى:اي هي هاي شمس فطيرة بس
اطمئن الحمدلله مابيهة شي بس خطية
باليل كلش تأذت من رجلهة ويمكن اخذتهة
نومة،،،
رائد:ان شاءالله مابيه شي وصلي
سلامي واتشكري منهة ع موقف البارحة
واني اسف اذا سببتلج ازعاج،،،
سرى:لاعادي اخي مصار شي وسلامك
يوصل ان شاءالله،،،
شمس:الله عليج يعني مناسية شي منا
منا حجاية شي،،،
سرى:باع هاي دكعدي حبابة واقري
زين باجر تمتحنين وية الشعبة الثانية
لان ملحكت تمتحنهم وهاج هاي الواجبات
شمس:ظلينة نسولف ونضحك مقبلت تتغدة
وياية،،،
سرى:لا اروح اكل ابيتنة احسن شعندي
هنا يم هاي المغرورة الي يكول
بس هي علمي واحنة اغبياء مدامنة ادبي
شوووو لج خل اطلع قبل لا اشوط،،
شمس:بوستهة كاش احبهة اعتربهة اختي
خطية جانت امهة موصلتلي ماعون دولمة
تغديت بيه وصعدت اقرة وظلت الافكار
تاخذني ليش سأل علية،،،
اوووو شمس بطلي افكارج الغبية من كل
عقلي واحد مثله يخليني اباله شلون
طول وجمال وشخصية بس سيارته تسواني
اني وعشيرتي اكيد عنده الف وحدة،،
رائد:مرت الايام وخلصت الاجازة والتحقت
بس كل ما اصفن تجي ع بالي شمس
يمكن اثرت بيه بسبب معاملة ابوهة
الهة حسيتهة مضطهدة التهيت
بشغلي وتقريبا راحت من بالي خلصت
دوامي ونزلت مجاز طبعا الوالدة الله
يحفظهة كل الاكل الاحبهة تسوي من
انزل مجاز بس هالمرة تلكتني امي
مقهورة ومهمومة،،،
رائد:رحت للمطبخ سماح شبيهة امي
سماح:ماكو شي،،،
رائد:سمااااح،،،
سماح:يمعود هذا ابوية هد علينة البارحة
شلون امي لازمة سرمد وحاجية وياه،،،
رائد:ليش شبيه صخمان شسوة هالمرة،،،
سماح:البارحة خطية جتي بنت جيرانة
تشكي لامي تكلهة احجوا وياه لزموا
يومية يكطع عليهة الشارع والبنات بالمدرسة
مطلعات حجي ع ان صاحبهة وهي خايفة
ليوصل الحجي لاهلهة امي دزت علية
وحجت وياه ومو بس هي حتى عمي
خلدون جان موجود امي دزت علية،،،
رائد:ماشي بسيطة،،،طلعت لبيت ابوية،،،
ام رائد:حجيتليه مووو لج توة نازل من التعب
سماح:يمة والله كذبت بس هو عرف وعاط
بية وحجيتلهة بعدين شكووو بيهة خلي
يأدبهم،،،
ام رائد:لج لو صارله شي محد يوكع
من جيسه لج بس اني الاخسر هذا
سندي وشمعة بيتي،،،
رائد:رحت هديت عليهم،،والله والله وحق
الحق الي يوصل لامي ويقهرهة شعرة
لا احركه هنا،،عفتهم وطلعت صار سرمد
بوجهي وتلاغينة واطاول علية اتلازمنة
وتضاربنة اجة صدفة عمي خلدون
مناك وطيح حظه لسرمد،،عمي خلدون
كلش يحبنة ويحترمنة جان دائما يكول
امك وانتو متستاهلون اب مثل ابوك،،،
رجعت للبيت فاير امي تلكتني وظل
تهدأ بيه واني شفت قهرهة وهدأت
لخاطرهة،،سماح صبتلي الغدة،،،
سماح:اكل خوية انعل ابو الراح لابو
الاجة محد خسران غيرك وداعتك،،،
محد يفيدك عكب صحتك،،،
مرت الايام وكمت اتردد دائما ع طريق
شمس بس ابد محظيت بشوفتهة احس
صارت واهس بية ان اروح اوكف بطريقهة
من اوصل لشارع المدرسة عبالك واصل
الهة كمت احس تعلقت بيهة بس مداعرف
شنو الي احس بيه عندي صديق واحد
من الطفولة سوة جيراني وامه هم صديقة
امي عشرة عمر اسمه محمد دائما نتعلل
سوة من انزل مجاز لو ابابه لو ابابي لان ناخذ راحتنة
همة عدهم جناين وامي عندي سماح
فنكعد بالشارع نركيلة ودومنة جايات
ومن هالسوالف،،،
رحت يمة وكعدنة نسولف وحجيتله عن شمس
محمد:معقولة كل هاي السنين بالاخير
وكعت طالبة مدرسة،،،
رائد:ضحكت مو يكولون يعذب الگلب
عشگ الطالبة وهاي اني كدامك اروح
اكابل المدرسة واوكف،،،
محمد:والله ما ادري شكلك،،،
رائد:انت مو جنت تحب احجيلي بلة شوية
عن الحب،،صدك اوكف كبل لاتحجي
يعني صارلنة شكد عشرة وابد محجيتلي
ع البنية،،،،
محمد:عوفهة يمعود راحت بحالهة لاتذكرني
خلبني ناسي،،اسمع خوية الحب حلو
ومو حلو،،،
رائد:شلون بلة،،،
محمد:حلوووو لان حياتك تصير مشاركة
متعيش الوحدة ودائما تحس بحزنك وبفرحك
اكو من راح يشاركك بيهن وحلاوة الليل
من يجي وانت تفكر بالي تحبهة بتواصيفهة
عيونهة برائتهة حجاياتهة الدافية وياك
ويامحلى الغزل وياها،،،،
من طبع الورد تشتمه كل الناس
بس عطرك غريب وحير انفاسي
ناس تحط عطر ساعه زمان يروح
وانته اسنين عطرك باقي براسي،،،
رائد:يمعود ابو الشباب وين رحت صفنت
لازم اذكرتهة،،،،
محمد:اتجاهلت سؤاله اي نكمل والمو
حلو يا حلوووو اذاصار فراك غصب عنك
وعنهة هاي ماعدا نار الغيرة والبعد بس
الحب ميحلى بدون شرارة الغيرة تعتبر
توابل لحتى تضيف نكهة للحب،،،
رائد:والله ما ادري شكلك،،،
محمد:انت ليامرحلة واصل،،،،
رائد:ضحكت وحكيت راسي مرتبك من
موقفي حسيت روحي مراهق،،،
محمد:احجي ياصاحبي احلى ايام العمر
هاي الحب حلووو بكل حالاتهة فضفض،،
رائد:اشتاقلهة هواية وملامحهة ومعانيهة
ابد متغيب عن بالي وعايش بقلق لان
حسب علمي من تصرف ابوهة يمكن اهلهة
مأذديهة او اني يتهيألي هيج،،،
محمد:ضحكت توكل خوية انت كلبك هاويهة
للبنية،،،
رائد:تصدك كمت ارابط طريق المدرسة
والمدرسة من انزل مجاز بس ماكو
مشفتهة ابد من يوم الحادث،،بس باجر
هم اروح،،،ظلينة نسولف وراها كلمن
راح لبيته،،،
شمس:ظليت يومية اراقب الطريق من
ترجع بلكت اشوفه بس ماكو يمكن خيالي
راح لبعيد لو يمكن عطف علية بسبب
ابوية بس هم مشلته من بالي ظليت
يومية ادعي ربي يجمعني بيه،،،،
الى ان بيوم جنت راجعة وحدي سرى
ممداومة جانت مريضة رحت للاسواق الي
تشتري منهة دائما تعلمت منهة وكفت اخذ
جبس واشتريت نساتل وجلاتين واخذت
دانيت ابو المحل جان شاب،،،
ياحلووووة هو انتي دانيت شتسوين بيه
اني كلش ضجت اجة صوت من وراية،،
خلاني اجمد بمكاني،،،
رائد:كمل حسابك خوية وخليت الفلوس ع الميز
هاج اخذيهن وانتظريني برة الولد كام
يبيع الوان عباله زوجهة اخوهة،،،
شمس:يمة كلبي راح يوكف هو والله هو
بس اشو هذا دفع حسابي وكلي طلعي
انتظريني برة طلعت شفت سيارة
بيهة ولد ظل يباوع علية اني نزلت راسي
ومشيت سمعت صوت وراية،،،ممكن دقيقة،،
رائد:جنت طالع وية محمد بشغلة وتأخرنة
واني اريد اروح بلكت اشوفهة
اليوم واستحيت من محمد هو حس بيه،،،
محمد:اذا تريد تروح عادي ذبني وتوكل
رائد:هااااا لا شلون الجو بارد،،اااممم
تكدر تجي،،
محمد:رائد مداعرفك هيج صاير ترتبك
وخجول امشي عمي امشي هل اشوف
المرة الي وكعت النجر،،،
رائد:رحت و وكفت بمكاني كالمعتاد
الى ان أيست هستوني داشغل السيارة
وشفتهة من بعيد تريد تعبر الشارع يمكن
ع الاسواق مبين صايرة عدهة ردة فعل
من الدعمة،،بش شنووو حسيت كلبي
راح يوكف،،،
محمد:هاااا شبيك يمعود،،
رائد:هااا لاا بس ذيج جتي لك انت وردة
بعد يومية اجيبك،،،
محمد:وليش بلة،،،
رائد:لك ابن الاوادم راح يصير شهر اريد
اشوفهة ماكو بس جبتك شفتهة،،يالله
شوف شلون خايفة من السيارات،،،
محمد:طبعا غير من وراك يالسبع،،،
رائد:شفتهة دخلت للاسواق نزلت هسة
اجيك حمودي،،ظليت اراقب شتاخذ
وحفظتهن النوب راحت تحاسب الولد ظل
يصجم بيهة متحملت حجيت بنتر وية الولد
وكتلهة انتظريني برة اشو طلعت الخاتونة
دتمشي،،صحت عليهة،،،
شمس:نعم وياية،،،
رائد:ايي،،،
شمس:تفضل،،،
رائد:اولا انتي تذكريني،،
شمس:ضحكت واني اشر بعيني ع رجلي
معنة بعدهة مجبسة شلون انساك،،
رائد:ضحكت اني اسف كلش والله مجان
قصدي جنت متيه الفروع الا ان طلعت
ع الشارع،،،
شمس:عادي مصار شي عدت سلامات،،،
رائد:عندي موضوع وياج ممكن دقيقة،،،
شمس:عذرني اخي شلون اوكف وياك
بالشارع وانت غريب،،،
رائد:حقج والله بس ماعندي غير طريقة
لو تدرين شكد جنت منتظر اشوفج يومية
انتظر هنا وانتي ماكو الا اليوم حظيت
بشوفتج،،
شمس:اوكي تفضل شرايد،،،
رائد:والله ما اعرف شلون ابدي بس
من يوم الي شفتج مدري شصار بحالي
يومية اوكف وانتظرج وافكر بيج شغلتي
بالي وقصدي شريف وياج بس اتمنى
تنطيني مجال اوضحلج مشاعري واثبتلج
صدق نيتي وتفضلي هذا رقمي انتي
براحتج متى حبيتي تنطيني فرصة بس دزي
مسج،،وشغلة ثانية بعد لا ادخلين لابو
الاسواق خلي صاحبتج تشتريلج اذا تحبين
طبعا،،،
شمس:مثل المنومة مغناطيسيا محسيت
غير سلم علية وراح اباوع الرقم بيدي
شوكت اخذتهة شوكت نطاه الي خرب ان
اني منتهية رجعت والطريق كله شاردة
التفكير،،،،
رائد:رجعت للسيارة وظليت كاعد ايدي
عركانة معقولة هاي اني رائد الضابط
والي تهابة الناس وتحسبلة حساب
افقد السيطرة كليا ع نفسي وتركيزي
بحضرة بنية مثل شمس تعتبر طفلة
بالنسبة لعمري،،محسيت غير محمد يهز
بيه،،،هاااا هاااا يمعود شبيك،،،
محمد:والله لعد المن صار ساعة اصيح،،،
رائد:اكلك تعال انزل سوق انت بمكاني
لان ممركز،،،
محمد:سقت ابداله ظل ساكت وشارد
بتفكيره،،رائد،،
رائد:هااااا،،
محمد:ترى مبين عليهة صدك فقيرة وفطيرة
من صفنتهة وارتباكهة والحلووو اول
مطلعت بس انتبهت عيني عليهة دنكت
ومشت،،،
رائد:بربك وانت....
محمد:انجب بلة كل ظنك اخلي عيني عليهة
بس من باب اشوف ذبتهة وميتهة بس
الشهادة لله مبين خوش بنية يمعود غيرهة
وحدة جان اخذت وانطت بالحجي او تجاوبت
وية نظراتي بس مبين مالهة درب بهيج
سوالف،،،،
رائد:شكد شايف بنات ومعاشر ماكو وحدة
جذبتني ابرائتهة ولا لكيت اصلا،،
محمد:الله يسهللكم خوية وتصير من نصيبك،،
رائد:ضحكت ان شاءالله،،،مرت الايام
وهم رجعت اختفت وصار اسبوعين وهي
ماكو حتى لا اتصلت ولا دزت مسج،،،
كلش ضجت،،شلون بلة حتى بيتهم ما اندله،،
شمس:من بعد ما حجيت وياه شغل بالي
امثر بس متجرأت ادك علية او اتواصل
وياه حجيت لسرى ما اعرف اضم عليهة
شي بالبداية نصحتني اخاف يلعب علية
ومن هالحجي بس من شافت صفناتي
وهاي،،،
سرى:جربي احجي وياه واذا شفتي طلباته
طبة وطلعة وحجي تالي الليل وطلبات سخيفة
ذاك الوكت راح تبين نيته وياج،،،
شمس:انتي هيج تكولين،،
سرى:اي والله كلشي بحدود اي سالفة
محلوة رأسا حضري ولاتنطيه اي معلومة
عن نفسج لان لو صدك رايدج مثل
ميكول الي يريده يعرفه من يسأل عنج
هو طلبه بس تتواصلين وياه يوضحلج
مشاعره وتفاصيل حياته مو صحيح،،،
شمس:اي هو هيج كال،،،
سرى:هاي هي خلص جيبي الرقم ودكي
علية هسة،،
شمس:ارتبكت،،شلون اخاف احد يجي
ويسمعنة،،،
سرى:لا تخافين كلهم طالعين بس امي
وخالتي جوة،،،
شمس:تجرأت ودكيت الرقم بتليفوني
ظل يرن واني وية كل رنة احس ينقص
من عمري توني داسده جاني صوته،،،
رائد:جنت كاعد يم محمد ابابهم ويمنة
ولد مسوين نراكل وجايات ودنلعب دومنة
محمد:يول تليفونك ديدك،،
رائد:شفته رقم غريب صفنت معقولة هي
محمد انتبه واشرلي كوم بعيد جاوب
ترخصت وكمت فتحت خط واني ادعي
هي،،الوووووو ماكو محد يجاوب
الوووو يمعودين ردوا،،سمعت صوت وحدة
تهمس احجي ولج جاوبي،،،،
اجاني صوت نفسهة المضطرب،،عرفتهة
هي،،حجيت بكل هدوء،،شمسسس،،
شمس:اااالسلام عليكم،،
رائد:وعليكم السلام،،شلونج،،
شمس:اني زينة وانت شلونك،،،
رائد:والله متصدكين اذا كتلج هسة ارتاحيت
شمس:ظليت ساكتة ياربي شحجي النوب
سرى عافتني وطلعت من الغرفة،،
رائد:احجي ليش ساكتة،،،
شمس:شحجي،،اااا اني بس ردت،،،
رائد:بس احجي والله شلعتي كلبي،،
شمس:لاهيج ماكو شي بس انت مو كتلي
انطيني فرصة وهاي اني ،،،
رائد:حسيت بيهة كلش خجلانة ومرتبكة
وبالكوة دتجمع بالحجي مردت اضغط
عليهة بالحجي،،رديت،،اني اشكرج
من كل كلبي لان انطيتيني فرصة وان
شاءالله ما اخيب ظنج وان شاءالله نتلاكى
ع الخير،،،
شمس:ان شاءالله،،اااا من رخصتك اني
اروح وان شاءالله نتواصل بغير وقت،،،
رائد:ان شاءالله،،شموسة اني ما اعرف
ضروفج بالبيت واوقات فراغج فراح
ادز مسج من تفرغينردي بمسج واذا
ممشغول اتصل ماشي،،
شمس:ان شاءالله،،يلة مع السلامة،،
رائد:الله وياج،،،سديتهة وترخصت من
الولد ورحت للبيت وكبل وعدل للغرفة
تمددت واني افكر بيهة واراجع ذاكرتي
وارد اسمع صوتهة،،،
شمس:سديتهة واني يمكن نزلت كيلو
هلكد معركت جتي سرى تضحك وشايلة
صينية كيك وعصاير،،،
سرى:باعي شكد احبج واداريج عرفت
اختي حبيبتي هسة نزل سكرهة،،،
شمس:صدك شربت نص الكلاص جرة وحدة
وسولفتلهة كالت بداية حلوة ملزك
ولا كبل حبي وحياتي ظلينة نسولف
وراها رجعت للبيت نفس الروتين شغل
ومناكر لكن لاول مرة بحياتي مهتميت
ولانغثيت يمكن جرعة السعادة كانت عالية
عندي اليوم،،كملت شغلي وصعدت قريت
ونمت وكعدت ثاني يوم كلي نشاط
وفرح جاني مسج ع الفايبر،،،،
(صباح الورد والياسمين ان شاءالله من تطلعين
اني يم الاسواق)ظليت مدري شكد
اعيد واقرة واضحك طلعت لبيت سرى
وظلينة طول الطريق نسولف وانتظر شوكت
يخلص الدوام وانتهى وطلعنة للبيت قريب
منوصل للاسواق سرى كالعادة عبرتنة
شفته من بعيد واكف ع صفحة من
الاسواق طبت سرى واني ظليت واكفة
بس متجرأت ارفع عيني عليه
سمعت
صوته يحجي وية الوياه ويضحك ضحكته
كانت بمثابة انغام موسيقية اداعب روحي
لا اراديا رفعت نظري وتلاكت عيونه سوة
وكأنما ارواحنة تلاقت هو صفن وسكت
واني كذالك بس صفنتي كانت مليئة حزن
حسيته شي حلووو وسعادة تغمر
حياتي بس اني دائما الحظ العاثر يمنع
عني السعادة فخفت اتعلق بيه وانحرم
منه حسيت بيه انسان محب وحنون ويمكن
بيه الكه كلشي فقدته بحياته انتبهت
علية يأشرلي ابتسمي بس نظرته اخترقت
قلبي غصب نظرة انسان خايف علية وقلق
وهذا الشعور ناسيته حسيت بغصة ياربي
اذا كان بيه خير الي لاتحرمني منه
واذا بيه شي يأذيني ابعده عني يارب
ودرت وجهي ومشيت طلعت سرى ظلت
تسأل شبيج عبالهة حجة شي او سوة شي
بس حجيتلهة مخاوفي وظلت اطمن
بيه وتشاقيني حتى ابعد هالافكار عني،،،
اول موصلت صعدت للغرفة مجرد
التفكير بأن انحرم من هالانسان تعبني
ما اعرف ليش هيج تعلقت بيه مجرد لقاء
ومكالمة لو اجمعهة متطلع نص ساعة
بس تلمست شي حلوو بروحه،،،
شفت اشعار فايبر رأسا فتحته لكيت منه
مسج،،،،،
(??????)
صفنت شنو معناه للمسج بعدين اذكرت
كلامه كلت يمكن يخاف يدز شي
اخاف احد يلزم التليفون دكيت علية
ما اعرف شلون تجرأت ودكيت اول مفتح
الخط جان ضايج ومعصب،،،
رائد:رحت كالعادة انتظرهة تجي وجتي
ويامحلة جيتهة وكفت برة الاسواق
ضحكت سمعت الكلام بس ابد مرفعت عينهة
وراها رفعت نظرهة وظلت مصوبة
عينهة علية بس ملامحهة كله حزن
سلبت مني روحي بنظراتهة حسيت
عبالك معاشرهة سنين وخطفت كلبي
من غابت ضحكتهة واني اشوف بس
حزن وتعب بملامحهة كلش اشرتلهة
حتى تبتسم بس هي صدت وجهة بكل
قهر ومشت احتركت روحي رأسا دزيتلهة
مسج علامات استفهام كلت بلكت ادك
علية لان اخاف ادز شي واحد من اهلهة
يشوفوه وتصيرله مشكلة والله ورة
نص ساعة جنت راجع للبيت متمدد بالهول
دكت شلت التليفون وصعدت فتحت الخط،،،
بدون سلام كتلهة،،،،
احجيلي ياروحي شبيج منووو وياج
ليش هيج مقهورة،،،
شمس:اولا هلوووو شلونك،،،
رائد:موزين وداعت امي موزين،،،
شمس:ليش شبيك،،،
رائد:لج متدرين من شفتج شلون احترك
كلبي هذا الوجه الحلو ميلوكله الحزن
احجيلي احد مأذيج اسمعج اعتبريني طير
اخذ همومج واطير بعيد لاتعتبريني لا صديق
ولا اي شي،،،
شمس:دمعت عيوني واني احس بالاهتمام
والحنية منه غصيت مكدرت احجي
رائد ماكو شي صدك بس من رخصتك
ديصيحون علية،داسده وسمعته كال،،
رائد:.شحلاتك من تمر عـ البال غفلات ..
تسعدني وتخليني دوم بـ سلامه ..
الك شارع فرشت الروح من جيت ..
ويوم الما تمر بي كله ندامه ..
من نضرات عينك شيب الراس ..
فز القلب يركض من غرامه ..
انا بحبك فطرت وصمت عـ الزاد ..
و عشت دونك الومن بالـ ملامه ..
و احن و اشتاك الك لو مرني الغروب ..
و اكطع روحي بسيوف الملامه ..
و ادور بيك انت واسال الناس ..
ما شفتو كمر و بخدة شامة ..
و ابوس الصفنة اذا بيها انت مريت ..
و اظل صافن لحد يوم القيامة ..
شموسة لو هاي الدنيا كلهة ضاكت عليج
خلي ابالج اكو گلب بوسع هالكون يتمنى
يضمج وعد مني اظل للموت سعادة
روحج يابعد روحي انتي،،انسي كل
الاشياء الي غثتج او قهرتج فكري بتفائل
من كل ناحية وفكري بأنسان حبج
من كل كلبه ومستعد يدفع روحه وعمره
لاجل شوفت ضحكتج،،،
شمس:تدري رائد انت ثاني انسان صادفته
بحياتي ينطي لروحي طاقة ايجابية،،،
رائد:ضجت من كالت ثاني واحد بس مبينت
ممكن اعرف منو اول شخص،،
شمس:عرفت مقصد سؤاله كتله،،لاتشيل
هم سرى صديقة الطفولة،،
رائد:اتمنى يجي يوم واكون من اول الاشخاص
بقائمتج،،،
شمس:ضحكت وكتله ان شاءالله،،،
رائد:يلة ياروحي،،،اني اسف صدكيني
طلعت بدون شعور وحتى قبل شوية بس
كلش ضجت من شفتج ضايجة ردت بأي
طريقة اشيل عنج الضوجة،،
شمس:مصار شي واني بداخلي حسيت
ملكت الكون بكلامه،،
رائد:اوكي يلة روحي ارتاحي وتغدي
ولاتشيلين هم باجر ربج موجود لو شلت
هم دهر الي كاتبه ربج يصير،،،
شمس:ونعم بالله،،ماشي ديربالك ع نفسك
مع السلامة،،،
رائد:الله يسلمج،،،
حين يشاءالله يستبدل أسباباً بأسباب
وحين يشاء الله يغلق باباً ويفتح أبواب
كن راضياً وكأنك تملك كل شيء
فكل ما يكتبه الله لنا ألطف مما نشاء.
................ ......... ............ ....... ........
ياترى ما هي خبايا القدر وهل ستدوم
السعادة لشمس وهل لقلب رائد من مجيب
يتبببببببببببببببببع