انجبرت اعيش بين عيال (مكتملة)

البارت ٣

محمد كالعاده هادي راشد على جواله ومعاه شنطه اللابتوب مازن لابس ومتعطر فيكم تقولون ان مازن دايم يحب يطلع كاشخ ومتعطر ويهتم في اشياء مالها داعي
سعود بشكله وهدوئه وملامحه الهاديه
مازن : وين جوري
سعود جلس : بتجي الحين كل شخص يعطيني سير رحلته
مازن رفع يده بدون اهتمام : بدون هدف
محمد : انا ابغى اشتري قطع اقمشه افصلها واعدلها لها
سعود ابتسم : وانت ياراشد ؟!
راشد : ابي افتح ايميلات الشركه بكوفي
واتفقو على كذا وسعود مع جوري يساعدها
نزلت بنفس اللبس بس لبس جاكيت لان الجو بارد شعرها مفكوك وفيه ربطه ببدايه الشعر
سعود مد لها جوال جوري ناظرته ومو فاهمه شي : هذا الجوال لك اذا صار شي وضعتي او شي تحصلين ارقامنا فيه
جوري اخذت الجوال دخلته للشنطه طلعو توجهو للسوق طبعا السوق كان عباره عن ممر كله محلات
دخلو اول محل اخذت كم شي ومر الوقت جلسو بكوفي وانتبهت لمحل ملابس داخليه انحرجت ماتدري كيف تقول لسعود اما سعود مايدري وش فيها تغيرت وصار وجهها احمر
سعود : باقي شي تبغينه
جوري رفعت راسها يدها تحرك الكوب : امم ابغى محل
سعود وقف : يالله نروح
جوري رفعت راسها : بس مايصلح تروح معي
سعود جاء بباله انها تبي تروح منهم بس كيف وهي جالسه معه وطلعت معهم : وينه
نزلت راسها رفعت يدها تاشر على المحل ابتسم على شكلها حرك شعرها واخذ كوب الكوفي : تعالي مارح ادخل بنتظرك برا
جوري وقفت شالت اغراضها ونص شاله سعود
وقف ينتظرها برا اشترت لها القطع اللي تبغاها طلعت مشو للسياره
جوري : سعود متى رح اداوم ؟!
سعود : بكرا عندك دوام
جوري : اي بدايه الاسبوع
سعود : خلاص اجل بكرا انا اوديك واشوف جدولك وارتبه مع العيال
جوري ابتسمت ومسكت يده حب طفولتها وبرائتها
رجعو للبيت دخلت غرفتها ترتب الثياب وتجهز لبس للدوام بكرا بس للحين ماتدري اي تخصص ووش القسم ومين معها خلصت طلعت من غرفتتها البيت هادي وينهم انتبهت لباب غرفه مازن شوي مفتوح مشت متوجهه له وانتبهت له انه يشتغل باوراق بالشركه طلعت راحت لغرفه سعود دقت الباب مره مرتين مافي رد نزلت للدور اللي تحت انتبهت لراشد جالس بغرفه كلها كتب وفيه ٤ طاولات ومكاتب كانها شركه مصغره انبهرت المكان يجنن بعدها تسللت علشان ماتزعجه كان فيه صوت جاي من غرفه مسكره دقت الباب
محمد ببرود واستغراب من اللي بيجيه : من ؟!
جوري فتحت الباب شوي شوي وابتسمت له : انا
محمد عطاها نظره : فيه شي ؟!
جوري : امم كنت
وسكتت لما شافت المكان مررره عجبها يجنن كانت غرفه للخياطه وبالجنب ركن تعليق الثياب
محمد قرب منها : اطلعي برا
جوري ناظرته بحزن : ليش زعلان ؟!
محمد : ماحب احد يزعجني لما اشتغل
جوري اعتذرت وطلعت جلست بالصاله وقررت تروح المطبخ تسوي لهم شي دافي بما انو الجو مره بارد ودرجه الحراره ١٠ تحت الصفر سوت ٥ اكواب مع انها ماشافات سعود بس سوت له واحد راحت لراشد وحطت الكوب
راشد يسند راسه على الكرسي :اخخ شكرا جوري كنت محتاج له
جوري ابتسمت وقربت منه طبعت بوسه بخده وطلعت
راشد فهى فيها
راحت لغرفه محمد عقد حواجبه وكان بيهاوشها بس مدت له الكوب ولفت رايحه
محمد : شكرا
سكر الباب بعدها
راحت لغرفه مازن دقت الباب
مازن : تفضل
دخلت استغرب بس لما شاف الاكواب معاها ابتسم حطت الكوب
جوري : امم ماتدري وين سعود
مازن ابتسم : الا تحصلينه وراء بغرفه النباتات
جوري بساته وطلعت ابتسم ورجع يكمل شغله
طلعت برا ماكان عليها جاكيت انتبه لها جايه طلع لها على طول
سعود يمسك الاكواب : ليش تطلعين برد عليك
جوري : ادري بس ماحصلتك قلت اجيبه لعندك
سعود باس راسها واخذ كوبه ومسك كتفها ومشو للبيت لان غرفه النباتات كانت وراء البيت
سعود : مرتاحه ؟!
جوري  ردت وكانها تذكرت شي : اي الحمدلله بس
سعود بستغراب : بس ايش ؟!
جوري بنحراج : ابغى اطلب طلب ابتسم وهز راسه بكملي  ابغى تروح معي للجامعه بكرا خايفه اروح بروحي
سعود حس انه تضايق لانه بكرا عنده اجتماع مهم : بروح معك وقت ثاني عادي بكرا عندي اجتماع مهم فا عادي تروحين مع مازن ؟!
جوري تضايقت بس لازم تتعود وابتسمت : اي عادي
سعود كمل كوبه ومايدرون وش يسوون شغلت التلفزيون على فلم تابعوه ومر اليوم عادي  تعشو وراحو الغرف جوري كانت خايفه بس بنفس الوقت تقنع نفسها انه لازم تتعود تنام بروحها اليوم الثاني كانت تتجهز للجامعه دق الباب
جوري : تفضل
دخل سعود شافها تتجهز ابتسم وقرب لها التفتت عليه : صباح الخير
جوري بادلته الابتسامه : صباح النور صاحي بدري
سعود مسك وجهها وعقد حواجبه كان وجهها مايل للاصفر   : اي بس وش فيك انتي ؟!
جوري : مافي شي بس مانمت عدل امس
سعود تذكر انها ماتحب تنام لحالها باس راسها : اسف امس كنت افكر بالشغل والشركه ونسيت انك ماتحبين تنامين لحالك
جوري ابتسمت وحطت وجهها بصدره ضمته : لا عادي بتعود
بعدت عنه دخل مازن وصفر: وش هالجمال الحمدلله انه عندي اخت مثلك
سعود ضحك لانه عارف اخوه يهتم بالشكل مررره : اي شوفها كاشخه علشانك بتداوم معها بس
مازن عطاه نظره : ليه ماتروح للدوام وانت ساكت
سعود متوجه للباب : انتظركم نفطر وبوصلكم
مازن فتح فمه : من قاللل
سعود : خلاص هذا اخر كلامي ولا روح بسيارتك وانا باخذها واذا وصلنا الجامعه تروح معك
جوري ماسكه ضحكتها وفجاءه : هههههههههه خلاص بروح مع مازن وانت روح لدوامك لاتخاف مو وعدتني تروح معي وقت ثاني
سعود ابتسم وراح اما مازن لف عليها وشبك يدينه : ايوه وش يبي لك تعديلات فتح دولابها وطلع بنطلون وبلوزه صوفيه وكبوس وجاكيت كان حلو للدوام وبنفس الوقت فخم طلع القلاده ولبسها
مازن : هذي من سعود بس كان منحرج يعطيك اياها
جوري مسكت القلاده وهي تشوف نفسها بالمرايه : يااااه طالعه اجنن
مازن ضحك عليها ونزل اخذت شنطتها وحطت عطر بالشنطه وروج بنفس اللي كانت حاطته نزلت شافت كل واحد ببدله رسميه والجاكيتات بالكراسي نزلت اغراضها وجلست بالكرسي ناظروها كلهم
محمد ياكل : تعالي كلي علشان ماتجوعين
جوري تبي تغيضه شوي وتشوف ردت فعله : بشتري من هناك
قام من الطاوله وتوجه لها ومسكها من كتفها ودفها للطاوله فتح الكرسي جلست وهي تبتسم للحين ماتدري كيف تكسبه حط لها من كل شي شوي
محمد : شاي او حليب ؟!
جوري : حليب
محمد ابتسم اما الباقي فرحانين محمد صار يبتسم وتغير شوي ومع الايام اكيد جوري بتغيره طلعت معهم ماكانت تدري الا عن سياره وحده اللي هي السياره العاديه فتحو الكراج طلعت ال ٤ سيارات فخمه وايعارها غاليه فتحت فمها
جوري ناظرتهم : من وين سارقينها
ناظرو بعض وضحكو
سعود : هذي سياراتنا
جوري اشرت على السياره اللي واقفه عند الباب : وهذي لمين
راشد : هذي علشان مانلفت الانظار لنا
جوري هزت راسها وتوجهت مع مازن لسيارته
طول الطريق صمت نست تشكر سعود على القلاده ارسلت له
شكرا على القلاده
                                                  جوري
كان يسوق وانتبه لرنه جواله فتح الرساله ابتسم
نرجع لجوري وصلت للجامعه طبعا كل الانظار عليهم السياره الفخمه والشخص اللي نزل منها بهيبته وجماله والبنت اللي نزلت معه مو اقل منه دخلو وتوجهو لقسم الطلبه اخذت جدولها وتجولو بالجامعه دخلت للصف
دخل معها وبداء الشرح تسجل كل الملاحظات وتبتسم لمازن وترجع تنتبه للدرس
مازن بهمس : كثير كلامه
جوري نفخت خدينها ماسكه ضحكتها : اشش خل اركز
مازن : من عيوني
انحرجت بنفس الوقت وكان في بنت تناظرهم
بعد ماخلصو طلعو برا باقي ربع ساعه على المحاضره الجايه في بنت اجنبيه من كانت بالقاعه وهي تلاحقهمم
سعود اتصل على مازن يساله عن اخبار الدوام واخبار جوري وقام من جنبه البنت الاجنبيه استغلت الوضع وراحت لها
كارلا : اهلن كيف حالك