الحلقة السادسة:::
رواية عيناها سر سعادتى
(بين العشق وحب الذات)
عبدالله : ليه هى آية عملت ايه؟؟!! آية دى بنت كويسة جدا واخلاقها عالية فوق ماتتصور
خالد كان مبسوط جدا من كلام عبدالله عن اية ومبسوط اكتر لان قلبه اختار صح :
هى ماعملتش حاجة ....فى قضية كدة تبع حد هى تعرفه من بعيد فكنت عايز اعرف منها معلومات عن الشخص ده بس بشكل ودى
عبدالله : طيب هات موبايلك ده اسجلك رقمها فيه
***طارق خلص كل اجراءات الطلاق وبعت ورقة الطلاق لامل البيت
امل اول ماشافت الورقة انهارت من البكاء ولسة محمود رايح يتكلم عشان يسالها هى بتبكى ليه مادام ده طلبها بس والده شاورله بايده انه مايتكلمش خالص معاها ولا يلومها على اى حاجة وهى دخلت اوضة اختها اية وقعدت على سريرها وكانت اية قاعدة على مكتبها بتخلص مشروع تبع الشركة واول ماشافت دموع امل والورقة اللى فى ايديها فهمت اللى حصل راحت جنبها واخدتها فى حضنها ومااتكلمتش نهائى معاها
***هاجر جالها عريس كويس وباباها وافق عليه لكن هى رافضة تماما عشان بتحب محمود لكن والدها صمم عليه وحدد ميعاد خطبتها منه يوم الخميس الجاى
هاجر بكت بكاء شديد فى اوضتها وقررت تكلم اية
اية : الو ازيك ياهاجر عاملة ايه
هاجر ببكاء شديد : انا جالى عريس يااية وبابا وافق عليه وحددوا خطوبتى يوم الخميس انا محتاجاكى اوى يااية
اية : طب ياحبيبتى اهدى وانا هاجيلك دلوقتى
واستاذنت اية من والدها تروح لهاجر ووافق
**اية راحت لهاجر واول ماشافتها رمت نفسها فى حضنها ودخلو اوضة هاجر
هاجر : انا مش مصدقة يااية انى ممكن ارتبط بحد تانى غير محمود انتى مش كنتى قلتيلى قبل كدة انك لمحتيله انى معجبة بيه وهو ابتسم وقتها طب ماتقدمليش ليه لحد دلوقتى
اية : مش عارفة اقولك ايه ياهاجر
هاجر بحزن : ماتقوليش حاجة اخوكى ده اصلا انسان زبالة وماينفعش اساسا انه يبقى شيخ جامع لانه كداب ، شافنى قبل كدة وادانى امل ان احنا هنرتبط ودلوقتى جاى يخلى بى انا بكرهه قد الحب اللى حبيته ليه مليون مرة
اية : ماتظلميهوش ياهاجر ، محمود بيحبك وكلم بابا علشان يتقدملك فعلا
هاجر بتريقة : والله طب ومجاش ليه ؟
اية : بابا اللى مش موافق انه يتجوزك
هاجر بدموع : باباكى طب ليه؟ كان حد قاله على انى بمشى مشى بطال ولاحاجة؟
اية : لا بيقول ان كان فيه مشاكل زمان بينه وبين ابوكى وانه استحالة يسامحه على اللى حصل ويناسبه
أنت تقرأ
رواية عيناها سر سعادتى (بين العشق وحب الذات)... بقلم: فاطمة البربرى
Misterio / Suspensoهل السعادة تكمن فى العيش مع من نحب فقط ام مع من لنا معهم مصلحة نظن اننا من غيرها لم ولن نقدر على الحياة؟؟!! وهل الوفاء شئ موجود فى هذه الحياة ام ليس له معنى ولاوجود مادمنا لم نحصل على حياة مستقرة كما نريد؟؟ وهل المبالغة فى حب الذات تعتبر انانية ام...
