رواية عيناها سر سعادتى (بين العشق وحب الذات)... بقلم: فاطمة البربرى

الحلقة الرابعة والخامسة عشر

الحلقة الرابعة عشر
رواية عيناها سر سعادتى(بين العشق وحب الذات)
بقلم ::: فاطمة البربرى

اية: خير ياخالد فيه حاجة حصلت
خالد : مصيبة، الواد الزفت اللى اسمه برعى ده انتحر
اية : انتحر ليه !!، اكيد الست اللى اتفقت معاه دى عرفت انه قال فى
المحضر انه يقدر يتعرف على البودى جارد اللى كان معاها فهددته
خالد : هددته باايه ، الواد ده مالوش حد اصلا يخاف عليه ، انا متاكد انه مانتحرش وحد قتله فى الزنزانة ، بقولك ايه تعالى اوصلك
علشان اروح اشوف المصيبة دى
اية : طب وهتعمل ايه فى موضوع ندا
خالد بعصبية : اية ريحينى بقى مش ناقص وجع دماغ
اية الدموع جت فى عنيها : طب يالا تعالى وصلنى ومشت خطوة
خالد شدها من ايديها : آسف ياحبيبتى ، ومسك وشها بايديه الاتنين
، وبص لعنيها : العنين الجميلة دى ماينفعش تتملى بالدموع كدة ،....
انا تعبان اوى ياحبيبتى معلشى استحملينى موت اخويا وتورطه فى
حاجة مش كويسه الله اعلم ايه هى ومراته اللى عايزة تتجوز دى ، كل  دى حاجات تخلى الحجر ينطق انا مش من النوع اللى بيحب يفضفض باللى فى قلبه لحد انتى الوحيدة اللى بسمح لنفسى انى اتكلم معاكى واحكيلك اللى مضايقنى ، انا ببقى مستنى منك ياحبيبتى انك تهونى على همومى مش تضايقينى وتحسسينى انها هموم تقيلة
اية : غصب عنى ياخالد انت عارف انى بحبك اوى وخايفة تروح منى
خالد بابتسامة : بس يابت ياعبيطة انتى ، انا عمرى ماهسيبك لو السما انطبقت على الارض ، انتى حبى الاول والاخير يااية ، انتى اللى قلبى اختارك من غير مايعرف عنك حاجة ولاحتى اسمك ، انتى اللى عنيكى كل لما ابصلها بحس انى اسعد انسان فى الوجود ، اطمنى ياحبيبتى انا لايمكن ابدا اتخلى عنك
اية : وانا مطمنة ياحبيبى ، واوعدك انى مش هافتح معاك الموضوع ده تانى
، انا واثقة فيك ومتاكدة انك عمرك ماهتضحى بحبنا ابدا

————————————————————-

خالد راح لحازم

خالد : ايه رايك ياحازم فى المصيبة اللى حصلت دى
حازم : والله ياخالد انا دلوقتى عندى احساس كبير ان الست اللى
جاتله دى كذابة فى ادعائها انها حامل من عبدالله والموضوع اكبر
من كدة بكتير
خالد : يعنى متوقع زيى بالظبط ان دى عصابة كبيرة وعبدالله طبعا
اكيد متورط معاهم؟؟
حازم : للاسف ياخالد هو ده اللى انا حاسس بيه

خالد : طب لوعبدالله كان معاهم يقتلوه ليه
حازم : ممكن يكون عمل حاجة ضايقتهم ، مانت عارف ياخالد المجرمين دول مالهمش عزيز
خالد : المشكلة ان عقلى مش قادر يستوعب ان عبدالله ممكن يكون كان متورط فى اى حاجة مش كويسة
حازم : والله ياخالد ولاانا ، انا اتعاملت معاه اكتر من مرة وحسيت انه انسان اخلاقه عالية جدا ، عادى ياخالد توقعاتنا كلها ممكن تكون مش صحيحة
خالد : انا عايزك ياحازم تهتم بالموضوع ده كويس جدا وتحاول توصل للست  دى باى طريقة انا هامشى انا بقى هاروح على شغلى
وبعد ماخالد مشى خطوة
حازم نادى عليه : الا صحيح لوهما فعلا عصابة ليه ماقتلوش عبدالله بنفسهم، اكيد عندهم ناس مخصصين لكدة ، ليه راحو لبرعى واتفقو معاه
خالد : انا احترت والله ياحازم وماعدتش قادر افكر فى حاجة الموضوع بيتعقد كل يوم عن التانى