#ذاتـانتفاضهه19
قال لي شهد صهيب عمل حادث بالعربيه ،
في البدايه حسيت نفسي م سامعه ،او سماعي للخبر كان بعيد شديد قلته ليهو بصوت هزيل قلته شنو؟قال لي لكن...قاطعتو قلته ليهو مات؟
قال لي شهد قولي بسم الله واهدي
قلته ليهو احمد قول لي الحقيقه صهيب مات؟قال لي م تتجنني ،كويس ياهو قدامي انا اتصلته بس عشان يكون عندك علم وم تقولي م وريتك ،قلته ليهو وين صهيب اسي في اي مستشفى؟
قال لي في رويال،الزمن اتاخر م تحاولي تطلعي من البيت او تجي اسي فاهمه ؟قبل م يخلص مكالمتو شلته توبي وطلعته من غير م اصحي حبوبه حتى فتحته الباب وجريت على باب الشارع ،طلعته الشارع لقيت الشارع فااااااااااااااااااااااضي غير نبيح الكلاب م فيهو شي،بقيت اتلفت شفته عربيه عمار اخو بلسم واقفه برة،قلته معناها عمار صاحي كدة احاول اتصل على بلسم،فتحته تلفوني كدة بابهم فتح وعمار طلع ،مشيت بسرعه عليهو قلته ليهو عمار كيفك،قال لي بإستغراب اهلين شهد مالك ي زوله في الشارع نص الليل كدة خير ان شاءالله،قلته ليهو عليك الله لو م فيها ازعاج ممطكن توصلني رويال كير؟قال لي خير ان شاءالله العيان منو ي ساتر،قلته ليهو راجلي عمل حادث واسي قالو في المستشفى وم لاقيه عربيه توصلني،قال لي ي ساتر اركبي على طول يلا،ركبته اتحرك بسرعه قال لي ان شاءالله م يكون اتاذى بس؟سكتت وانا ببكي م قادرة اتكلم بعد مسااافه قلته ليهو م عارفه شي والله انا بس كلمني اخوه اسي،قال لي م تخافي ي زوله ان شاءالله خير م بتجيهو عوجه والحوادث دي اصلاً بتحصل قضاء وقدر ،كان ماشي بإستعجال والشوارع فاضيه في اقل من 15دقيقه وصلنا المستشفى هو زاتو نزل معي،اتصلته على احمد اول م فتح الخط قلته ليهو انا في المستشفى وين انتو؟قال لي طيب طالع ليك،اقل من 5دقايق جا ،قال لي يعني جيتي وم سمعتي الكلام؟قلته ليهو صهيب وين؟عمار قال ليهو سلام عليكم ،احمد سلم عليهو ،قلته ليهو هو كويس؟قال لي ي بت الناس والله شديد ولضيض غلطان انا الضربته ليك والله،دخلنا وعمار ورانا وانا ماشه بسرعه لدرجه اني حاسه بنفسي عايزة اقع واصلي م مقتنعه بكلام احمد لغاااااااايه م وصلنا الغرفه ودخلنا لقيت محمد قاعد وصهيب راقد في السرير ونايم ومركبين ليهو درب وشاش ملفوف في يدو ،محمد قال لي شههد الجابك شنو زي الزمن دة ؟احمد قال ليهو جديدة عليك قوة راسها يعني؟قلته ليهو هو كويس؟ضحك قال لي والله غايتو انتي بتاعه خلع كيف عشان كدة قلته لي احمد م يوريك،الزول دة شديد ولضيض شويه رضوخ وجرحه بالقزاز في يدو،هو زاتو عشان حافظك بصمه قال م يوروك،احمد قال لي عمار اتفضل ي حبيب،،قال ليهم لا والله على مشيه بس لاقيت الزوله دي وقلت اوصلها ،احمد قال ليهو تسلم ي باشا م قصرت هي زاتها متجننه سااااااااااااي والله ،ضحك قال ليهم اعذروها ي جماعه ههههه،المهم استاذنكم انا شهد انتي راجعه ولا حتقعدي؟قلته ليهو انا قاعدة تسلم ي عمار م قصرته ،قال لي العفو ربنا يكتب سلامتو ان شاءالله ي رب، طلع وخلانا قاعدين،قلته ليهو عمل الحادث دة كيف مش هو كان ماشي البيت؟احمد قال لي والله ي شهد اتصلته عليهو عشان اقول ليهو انو محتاج نوع ادويه معين للمصابين في مستشفى المعلم عشان م كانت كانت متوفرة وبالفعل ردة لي قال لي طيب تمام بجيبها اسي،م تميت 10دقايق جاتني مكالمه من تلفونو رديت زول غريب قال لي الزول دة عمل حادث في شارع ال60،محمد قال لي هو اتبرع بي دم وم شرب حاجه مفروض على الاقل قبل م يتحرك ياخد كبايه عصير،ف اثناء م هو سايق اظنو داخ وفقد توازنو ودخل في العربيه القدامو،قلته ليهم طيب هو كويس بجد يعني؟احمد قال لي ي ديني النبي اسمعي الزول دة شدة م كويس هو زاتو الطرد ناس امي وم خلاهم يقعدو واسي لو فتح احتمال كبير انتي كمان تنطردي،سكتت وفضلته قاعدة وبعاين ليهو وهو نايم ،شويه كدة محمد طلع،واحمد قال لي عايني انا طالع انوم مع محمد في مكتبو،انتي نومي هنا تمام؟قلته ليهو طيب،قال لي التلاجه دي فيها كل حاجه لو جعتي او كدة،قلته ليهو طيب،طلع وقفل الباب،قعدته جمبو نومتو وشوفتو بالحاله دي م كانت مطمناني،مسكته يدو وبقيت اصحي فيهو،اي والله بصحي فيهو عديل وبقول ليهو صهيب،صهيب اصحى،بقيت زي الشافعه بس،بعد مسااااااافه حتى فتح عيونو ،لما شافني اتخلع،قلته ليهو انت كويس؟قال لي شهد؟قولته ليهو انت مجنون؟داير تموت انت يعني ولا بتعرف تسوق؟قال لي انا الحمدلله كويس الجابك شنو انتي؟الزمن كم اسي الصباح اصبح؟قلته ليهو كيف يعني الجابني شنو؟قال لي انا كويس قلته ليك م عندي عوجه ،فضلته قاعدة وبعاين ليه وانا ساكته وعندي كلام كتير نفسي اشاكلو واقولو ليهو بس قلته ماف داعي. لانو م وقتو،قال لي احم ناوليني مويه،اديتو مويه شرب وبعدها شبه نام وم اتكلم معي كتير حتى ،وانا زاتي ارتحت وبالي هدأ بعد م سمعته صوتو،رقدته في السرير وانا عين مغمضه وعين مفتحه ووبعاين ليهو لغايه م عيوني زغللت ونمتتته،م صحيت الا على صوت اصوات فتحته عيوني لقيت عمتي عواطف وحبوبه وامتثال وصهيب مافي،لبسته توبي كويس سلمته عليهم،حبوبه اخدتني الا بالاحضان قالت لي انقطعتي مني مالك عندي ي بتي والوليد كيف ان شاءالله طيب م بتقولي اسال من حبوبتي دي سااااااي؟قلته ليها والله ي حبوبه سائله منك اسالي امتثال دايما بسالها منك ،سلمته على خالتو عواطف سلمت علي باطراف اصابعها وهي لافه وشها مني وقالت لي ااهلا بس من غير نفس،امتثال قالت لي جيتي متين انتي اوعى تكوني جيتي بالليل داك؟هزيت ليها راسي،قالت لي وحات الخلقني مجنونه كلنا اتخلعنا ولو شوفتي العربيه حتتخلعي اكتر بس الحمدلله قدر ولطف وطلع منها بعافيه،قلته ليها الحمدلله،جا احمد داخل ومعاهو صهيب ووراهم احمد،حبوبه قالت ليهم صباح الخير ي اولادي،قالو ليها صباح النور،خالتو عواطف قالت ليهو اها الليله كيف كويس ولا في حاجه؟صهيب قال ليها تمام الحمدلله جيتو لشنو انتو ي جماعه انا كويس والله،محمد قال ليهم عملنا صورة الاشعه عشان نتاكد انو ماف اي كسرو والحمدلله طلعت نضيفه والمساء حيطلع من المستشفى عادي،حبوبه قالت ليهو الحمدلله الحمدلله ي ولدي عين وصابتك بس والله،قال ليها الحمدلله هم رجعو البيت بعد م صهيب اصر عليهم يرجعو وانا فضلته رغم اصرارو علي في انو ارجع البيت بس رفضته وفضلته قاعدة في قعدتي ديك جات حبوبه ومعاها بلسم وعمتو بسمه ،جابهم عمار قالت ليهو البت م كلمتني انا زاتي اتخلعته لمن لقيتها مافي ووالله ي ولدي قلبي اتقطع لما لقيتها مافي م خليت تلفون م ضربتو الحمدلله البركه في ود الجيران دة والله من ضمن الايام انا شالتني نومه الصبح زاتو م صحيت صليتو،قال ليها فعلا انا زاتي غلطتها في جيتها نص الليل دي ،قالت ليهو ي ولدي راسها قوي وم بتسمع لزول كلمه ي ولدي براك عارفه الحاله اسي الولد الا خليتو مع الجيران حتى جيت المهم الحمدلله قدر ولطف ي ولدي ربنا يكتب عافيتك ان شاءالله،خالتو بسمة قالت ليهو ي ولدي الله يكتب عفيتك ان شاءالله ي رب،قال ليهم اميييين،بعدها سالوهو من تفاصيل الحادث وحصل كيف و...بعد مسااااافه خالتو بسمه قالت ليهو نستاذن نحن عشان نخليك ترتاح وكدة ونجيك مرة تانيه لو م حيخرجوك،قال ليهم تسلمو م قصرتو وانا بخرجوني اليوم المساء ان شاءالله لانو م عندي شي كلها رضوخ عاديهه الحمدلله..حبوبه قالت ليهو ي ولدي الرضوخ دي زاتها وجعها اشد من الجروح الله يكتب سلامتك وترجع احسن من اول ان شاءالله،بعد م طلعو انا واحمد فضلنا قاعدين معاه،قريب للمغرب جات ام صهيب وحبوبه وامتثال اصلا جاتنا بدري،جابو معاهم الفطور،فطرنا جوة الغرفه حقت صهيب زاتها انا اصلا م كان عندي نفس م اكلته شي بس شربته كبايه مويه وشويه عصير بعد اصرار حبوبه السرة علي،بعد اذان العشاء صهيب قال لي محمد لو ماف شي تاني خلينا نطلع،قلته ليهو تطلع تمشي وين؟عمتي عواطف حمرت لي وقالت لي بانفعال ودة سؤال دة؟زول طالع من المستشفى بمشي وين يعني؟اكيد حيمشي بيتهم ،محمد قال ليهو ماف شي تاني تطلع على طول،صهيب قال لي احمد طيب خلينا نتحرك مش عندك نسخه من مفتاح الشقه في عربيتك؟احمد قال ليهو اي؟امو قالت ليهو شقه شنو؟تمشي معانا البيت بحالتك دي م بخليك براك بسوقك في قدامي، صهيب قال ليها امي انا كويس زي م شايفاني قدامك وسامعه كلام احمد يعني لو في حاجه كان م طلعوني،وبعدين الدنيا رمضان م كان في داعي لدحيتكم حقت الصباح والمساء دي ،وانا م براي معي احمد وشهد شي بجيني ماف ،انا بس عايز امشي البيت ارتاح يعني مشيتكم م منها اي فايدة،قالت ليهو ايواااااااا قلته كدة مش؟جيتنا ومشيتنا نحن معاك م نها فايدة لكن ديل مشيتهم منها فايدة عشان معاك دي صح؟امتثال قالت ليها عواطف م تحوري الموضوع وتكبريه ساي،قالت ليها انا امو الوالداهو من رحمي يبدلني بي دي؟بتفضلها علي انا امك بتفضل علي العواليق ؟لكن معليش اصلا ربنا لما يديك ولد راسو خفيف وسميع كلام دة بكون حالو عاد ،طلعته برة الغرفه خليتهم تجاوزاً للحتقولو،م تميت دقيقتين جات طالعه لما لقتني واقفه قالت لي شاحدة ربي تشوفي القسوة دي من جناك زي م قسيتي قلب ولدي علي ومسكتيهو مني وحسبي الله ونعم الوكيل فيك،
كان في ناس كتار بقو يعاينو لينا وهي بتقول في الكلام دة وانا دموعي م وقفت نهائي،جات حبوبه وامتثال طالعين وراها وهي لسه بتتكلم قالت لي تبكي شنو يبكو عليك ي المجرمه ومنافقه حبوبه مسكتها قالت ليها عواطف مالك دايرة تخليني امد يدي عليك اخر العمر ي بت؟امتثال مسكتها قالت ليها بتبالغي بتبالغي طبعاً،جا محمد لاحقهم على صوت الجوطه قال ليها معقوله ياااااااااااااااااااااااخي معقولهه ي امي البتعملي فيهو دة وفي المستشفى؟قالت ليهو هو شنو الما معقول؟تدافعو للعفن ،محمد قال ليهم سوقوها ي امتثال،اتفكت منهم قالت ليهم م ماشه م تمسكوني قلته ليكم خلوني انا م شافعه،امتثال قالت لي شهد وهزت لي راسها ،مسحته دموعي ووقفت،انا كان بامكاني اتحرك امشي،وكان بإمكاني ارد بس انا اصلا عايزاها تقول العايزاه ،صهيب واحمد جو طالعين احمد ساند صهيب ،محمد قال ليها تعالي ي امي ومسكها من دها ،قالت ليهو م تخليني امد يدي عليك فكني ي ولد،بعدها قالت لي متلصقه في الولد زي القرادة دايرة منو شنو انتي؟زول خلاك عديل ومشى عرس برضو م خليتي يتهنى بعرسو بمصايبك العملتيها ليهو دايرة مننا شنو انتي؟
صهيب جا باخر نفس وبرود قال لي يلا نمشي ي شهد،بقيت اعاين ليهو،قال لي م قادر اقيف انا ارح نمشي ارح ي احمد يلا،اتحركو وانا اتحركته وراهم ركبنا الاصانصير وخليناهم واقفين فيفي وقفتهم ديك،كان في حاله صمت غريبه وانا دموعي كانت حالفه كان تقيف رغم اني كنت بحاول م ابينها خالص،طلعنا ركبنا العربيه واتحركنا وبرضو من سكات لغايه م وصلنا الشقه،احمد دخل صهيب غرفتو وانا فضلته برة في الهول ،احمد جا لقاني قاعدة وبهز في رجلي قال لي شهد انا م عارف اقول ليك شنو بالزبط بس العايز اقولو ليك م تركزي مع كلام امي ياهو حال الحموات ولا النسيبات م عارف المهم غيرة ام عهلى ولدها م تزعلي وم تفكري في الموضوع ابداً واعتبري نفسك م سمعتي وطنشي اتفقنا،قلته ليهو طيب،قالي صهيب شبه نام م اظن يصحى اسي،انا طالع م بتاخر شديد ،قلته ليهو طيب ماشي،م كان عندي نفس ارد بيهو حتى كنت عايزة اقعد براي وابكي بس،وبالفعل اول م احمد طلع دخلته المطبخ وقعدته ابكي بطريقه هستيريه ،م تميت نص ساعه سمعته صوت احمد بيقول شهد،مسحته دموعي بسرعه وقلته ليهو نعم،جا داخل المطبخ شايل اكياس قال لي هاك جبته ليبكم حجات ممكن تحتاجوها لو جعتو او كدة،صهيب م صحى صح؟قلته ليهو لا،قال لي طيب تمام ،شلته منو الاكياس قال لي انا طالع لو حصلت اي حاجه او احتجتي اي حاجه اتصلي علي،قلته ليهو طيب تمام،بعد م طلع خلاني فتحته التلاجه ادخل فيها الحجات لقيتها وسخانه وحالتها بالبلا قعدته انضف فيها،بعد م خلصته ودخلته فيها الحجات وانا لسه كنت ببكي،كل م اتزكر كلام ام صهيب بزيد البكى، بقيت انضف بديت بالمطبخ اي عدة وسخانه غسلتها وطلعته نضفته الهول وم خليت ركن في البيت م نضفتو دة كلو وانا ببكي ،بعد م خلصته جيت راجعه المطبخ بقيت افوط في الكبابي عشان ارجعهم ادراجهم فجأة اشوف صهيب في وشي ،قال لي انتي لسه قاعدة م مشيتي؟سكتت وانا ماسكه الصحن والفوطه في يدي،فتح التلاجه شال مويه شرب،اتجهته على المغسله وعملته نفسي مشغوله بالتفويط فجأة حسيتو قريب منها وبعدها مسكني ولفاني عليييه وبقى يعاين لي،قال لي قبيل لو قلته حرف واحد كان الموضوع حيكبر عشان كدة اكتفيت بي انو اختار انو انتي التجي معي البيت هنا،انا عارف انو تصرف امي غلط وكلامها حار وشين معاك وعارف انو ماف زول برضى الغلط في نفسو،بس كمان انا واثق انو انتي شنو وعارفك م حتردي بحرف مهما حصل، ومهما سمعتي ،تلقائياً دموعي جات جاريه وبقيت اتنهد،قال لي شهد،قلته ليهو بس لمتين؟لمتين ي صهيب؟كل حاجه ليها حد صح ولا لا؟يعني انا تجيني منك انت ولا من امك ولا منو؟انا تعبتهه بجد ،انا بشر على فكرة م حيطه في بيتكم،قال لي اسمعيني طيب،زدته في البكى زيادة بكلامو معي دة اصلا كنت قاعدة على الهبشه،قال لي ارفعي راسك دة واسمعيني عايزة اقول شنووو؟ولا كأنو بتكلم معي،مسكني ورفع لي راسي قال لي خليك من كلام امي ومن الدنيا كلها انتي عارفه انتي بالنسبه لي شنو صح ؟عارفه ولا م عارفه؟هزيت ليهو راسي وقلته ليهو م دي المشكله هنا ي صهيب ،لغايه اللحظه انا م قادرة اعرف انا بالنسبه ليك شنو ،ولا قادرة اعرف انا مسيرة ولا مخيرة ،الحاجه العارفاها انو انا بالنسبه ليكم انت وامك ملطشه،ملطشه ي صهيب ،ورجعت كملته بكاي وبقيت اتنهد وانا كاتمه البكيه،قال لي بطلي بكى واهدي نتفاهم،فضلته مواصله في البكى وكل م يتكلم معي بزيد،بعد مسافه من وقفتو وهو ساكت وبعاين لي قرب علي ومسكني وقال لي خلاص قلنا كفى وضماني عليييهه...💔
#اقتباسهه
"والكاظمين الغيظ "
-لن ينسى الله ابتلاعك للكلام ،ولا عتبا كتمته ،ولا قهرا ألجمته ،ولا ألما بحقك سكت عنه ،فاطمئن...💜
#نتلاقى
