SIAPA SIA?

Part 2

TAJUK: SIAPA SIA? (SABAHAN SLANG)
PENULIS: KLONG KATING

PART 2

  - JANE-

SIA lari laju-laju turun dari tu kebun gatah. Macam mana sia buli sampai sini? Sia rasa macam tida terurus suda ni sekarang. Pandai pula sia malu kalo terjumpa urang lain.

Dari jauh sia nampak ramai urang berkumpul sama jalan-jalan. Sia kasi berani diri juga la pigi sana. Tapi sampai sana macam teda pula urang peduli sia. Durang limpas-limpas ja sia macam tida nampak sia.

Yahoo!! Sampat lagi sia melumpat gembira sebab teda urang kisah. Sia rasa macam mo terbang-terbang badan sia sebab macam bebas pula sia jalan sana.

Siuk-siuk sia jalan, trus ada satu urang lelaki tua tingu sia dari jauh. Duduk-duduk tu lelaki tua sana satu bangunan yang tida banyak urang limpas. Sia tingu belakang sia. Tapi tiada urang. Mimang sia la tu dia tingu. Trus dia panggil sia. Sia pigi la dekat sama dia.

"Aki, ko nampak sia?" sia tanya sama tu lelaki tua yang panggil sia.

"Nampak. Apa ko buat sini?" diabilang tu aki tanya sia balik.

"Sia? Erm.. Teda. Sia jalan-jalan saja." sia bilang sambil sanyum-sanyum sama dia.

"Sepa nama ko?" diabilang lagi tu aki. Serius ja tu muka dia tida pandai senyum sama sia.

"Sepa nama sia? Ermm.. Ermm.. Sia? Sepa nama sia?" ulang-ulang sia cakap tu ayat.

Last-last sia sedar. Sia pun tida tau sepa nama sia. Siapa sia? Apa sia buat sini? Lama sia tingu tu aki. Dia tunggu ja apa sia mo cakap. Inda lama dia berdiri. Siap ada tungkat lagi di tangan dia.

"Ko tau ka ko suda mati?" diabilang tu aki sama sia.

"Mati? Ah.. Ya meh?? Ishk mana buli sia mati oh. Sia masi rasa tu tanah sia pijak." sia cakap sama tu aki. Sia tida percaya la sia mati. Sia yakin sia masi hidup. Cuma mungkin sia hilang ingatan sikijap.

"Balik la ko. Jan ko jalan-jalan sini. Nanti ada yang jahat hitam-hitam pi tarik ko. Ko tida dapat pulang suda." diabilang tu aki dengan muka serius dia lagi.

Sia terdiam trus sia rasa badan sia bergagar lagi. Sia rasa takut. Sia rasa sajuk. Trus sia lari jauh-jauh dari tu urang tua. Sia tida tau mana mo lari sekarang. Yang penting sia tau sekarang sia ketakutan.

Jauh-jauh sia lari dari tu lelaki tua. Inda lama trus sia nampak banyak rumah di depan mata sia. Cantik-cantik lagi tu rumah. Bukan banglo la tu rumah tapi cantik juga walaupun di kampung-kampung.

Trus sia pigi la tu satu rumah warna putih. Sia nampak dari jauh banyak kain berjemur sana jemuran. Sia pi dakat la palan-palan. Sekali sia nampak satu lelaki tarik-tarik tu baju di jemuran. Sia pun trus automatik tarik tu baju-baju tulung dia. Tapi dia tida perasaan sia di depan dia. Sia tingu tu langit mo galap suda. Trus tu hujan turun suda. Bila sia tingu depan, teda suda tu lelaki yang ambi kain di jemuran. Sia nampak dia naik tangga suda masuk rumah. Belum sempat sia mo tanya tu lelaki yang sia di mana sekarang, suda dia lari.

Laju-laju sia pigi sana bawah rumah tu lelaki tadi. Sia pun berlari kunu takut kana hujan. Tapi yang heran dia, sia tida rasa tu air hujan. Lama sia terpikir sana pasal cakap tu urang tua. Betulkah sia suda mati ni? Ahhh melampau juga bah kana cakap begitu. Kalo sia suda mati kompom sia di surga suda kan ataupun di neraka? Tapi kenapa sia ada di sini? Lama sia tunggu sana bawah tu rumah sambil sia berpikir sepa bah sia ni?

Sampai sia boring berpikir, trus sia rasa bagus sia cari urang lain mo tanya mana sia sekarang. Mana la tau kalo betul sia mati atau kalo sia hilang ada polis cari sia ka? Inda kan teda urang kanal sia kan.

Baru sia mo keluar dari bawah tu rumah, trus turun dua orang dari atas rumah. Laju-laju sia berdiri depan durang dua. Satu lelaki sama satu perempuan. Aunty-aunty sama uncle- uncle suda umur durang.

"Hai.. " sia bilang cakap sama durang.

"Arghhh..!!!" takajut tu aunty perempuan nampak sia. Trus sia pun takajut juga.

"Kanapa ko?" diabilang tu uncle lelaki sebelah tu aunty perempuan tanya dia. Pucat muka tu aunty.

"Teda la.. Mari la kita jalan." diabilang tu aunty tarik tu uncle. Sia kana limpas saja sana. Tu uncle macam tida nampak sia. Tapi sia yakin tu aunty nampak sia. Macam kami bertingu tadi.

"Tunggu.. Ada sia mo tanya?!" sia teriak sama durang yang mo naik kereta suda. Tapi dua-dua durang tida tingu sia. Durang jalan saja. Sedih betul sia rasa masa tu. Sia duduk la sana tangga rumah. Sia mo menangis tapi sia rasa teda air mata sia keluar.

PRAMMMM!!!!

Haisyyy silaka! Takajut sia dingar tu bunyi guntur kuat lagi. Bagus sia masuk sini rumah. Kalo sia kana guntur mati la sia. Sekali sia naik atas, tu pintu rumah berbuka. Jadi sia palan-palan la masuk dalam. Harap ada urang di dalam. Sia hello hello tapi macam teda urang menyahut. Jadi sia jalan-jalan la dalam tu rumah tingu-tingu tu gambar keluarga sana. Sia nampak gambar tu lelaki yang ambi tu baju di jemuran tadi sama tu aunty sama uncle yang baru jalan tadi. Oh rumah durang pula ni. Trus sia gembira sebab sia tau tu lelaki ada dalam ni rumah. Sebab yang jalan tadi dua urang saja. Sia pigi la masuk bilik-bilik yang ada sana.

Nah betul-betul sia nampak tu lelaki tadi duduk-duduk sambil pigang mangkuk. Takut juga sia mo kacau nanti dia takajut lagi. Sia tingu ja dia dari belakang. Inda lama jatuh tu chop stik yang dia pigang. Trus tu lampu terpadam. Tapi yang herannya, sia masih nampak terang. Suma sia buli nampak lagi.! Tu tangan lelaki berabis macam mencari sesuatu sana atas meja. Macam urang buta ja sia nampak gaya dia. Takkan dia mo cari tu mangkuk dia pigang tadi? Sia pi kasi dekat la tu mangkuk. Teriak pula dia termasuk tangan dia di dalam. Alala sorry. Sia silap. Baru sia mo kasi jauh tu mangkuk, tiba-tiba tu lelaki pigang tangan sia. Takajut juga sia tapi sia terpaksa diam-diam ja nanti dia pula takajut. Bila dia suda kasi lepas tangan sia, trus laju-laju sia tarik tangan sia. Trus sia pi berdiri di belakang dia. Ngam-ngam ada balik tu lampu. Mungkin dia buli nampak suda la sekarang.

Inda lama tu lelaki pusing terkaras dia sana tingu sia. Sia pun terbesar mata juga la. Dia nampak sia ka tida? Teriak tu lelaki nampak sia.

"Hai..." sia cakap palan-palan sambil lambai tangan sama dia. Sia senyum la supaya dia tida takajut. Tapi masih lagi dia berdiri sana tida dapat cakap apa-apa.

"Ko nampak sia?" sia bilang lagi sama dia.

"Ko.. Ko sepa?" last-last dia bercakap juga. Wah!!! Dia nampak sia!!! Punya sia gembira trus sia terlumpat.

"Ko nampak sia?! Yeah! Ko nampak sia!" sia bilang gumbira betul sia rasa.

"Ya.. Sia nampak ko! Tapi ko sepa?!" diabilang tu lelaki. Makin tinggi pula suara dia. Muka dia macam mo marah sama sia saja. Bah mimang pun dia ada hak mo marah sebab tiba-tiba sia masuk rumah dia. Siap masuk bilik dia lagi.

"Sorry.. Sorry.. Sia bukan datang mo mencuri ka apa. Sia sesat ja." sia bilang mo kasi yakin tu lelaki. 

Diam trus tu lelaki sambil garu kepala dia.

"Sepa ko? Macam mana ko buli ada di sini?" diabilang lagi sama sia. Masih tinggi lagi nada dia.

"Sia pun tida tau sepa sia. Yang sia tau sia sesat ja. Pintu rumah ko terbuka. Sia masuk la." sia bilang sama dia. Trus sia rasa sedih balik. Rasa mo nangis ja sia sana.

"Ok ok.. Jan ko nangis sini. Mari kita pigi ruang tamu. Kasitau sia macam mana ko buli sampai sini?" diabilang tu lelaki trus bagus-bagus dia cakap sama sia.

Sia ikut ja dia jalan keluar pi ruang tamu. Mimang teda urang kali sana rumah. Sia sama dia saja ni. Dia suru sia duduk di kusyen. Trus sia ikut ja. Nasib dia tida halau sia la.

"Ko tunggu dulu sini. Sia pi buat kupi dulu." diabilang tu lelaki cakap sama sia. Sia tunduk-tunduk ja. Sia tida tau suda mo buat apa sekarang. Sia harap ja tu lelaki buli tulung sia. Huhu.

BERSAMBUNG