SIAPA SIA?

Part 5

TAJUK: SIAPA SIA? (SABAHAN SLANG)
PENULIS: KLONG KATING

PART 5

  -DINO-

SATU minggu sia sakit demam sampai susah betul mo bangun. Berjalan pun susah terpaksa pakai kerusi roda. Pigi hospital pun teda perubahan. Last-last parents sia bawa sia jumpa si dodu Sigai sana ruma dia.

"Ko berkawan sama sepa sampai ko jadi begini?" diabilang si dodu tanya sia. Aik?! Berkawan apa pula. Mana ada. Sia geleng kepala ja. Tiada tenaga sia mo jawab.

"Kamu tau ka anak kamu ni kana tegur roh?" diabilang si dodu bercakap sama mama bapa sia. Takajut suma kami dingar dia cakap begitu.

"Roh? Roh apa?" diabilang mama sia tanya si dodu.

"Roh urang suda mati. Sebab tu semangat si Dino dakat-dakat suda mo ikut tu roh jalan." diabilang lagi si dodu. Takajut lagi kami suma.

"Macam mana pula buli begitu?" diabilang bapa sia pula tanya si Dodu. Sia diam saja la tida dapat bercakap.

"Ada roh datang pigi ruma kamurang. Perempuan. Sia tingu tu hari pun sama yang macam ko nampak." diabilang si dodu trus tingu mama sia.

"Astaga.. Yang sia nampak kacau si Dino masa dia ambi kain di jemuran?!" diabilang mama sia teriak. Dingar ja tu trus bulu roma sia kambang. Ada ka yang pi kaco sia? Inda pun sia perasaan.

"Bukan tu ja. 'Dia' ada masuk suda dalam ruma kamu." diabilang si Dodu trus tingu muka sia.

Lama sia berpikir trus... What?!!! Itu perempuan gila ka?!! Stop!! Rupanya itu bukan urang.. Tapi.. Roh???!!! Mo pingsan sia dingar oh. Lemah balik semangat sia. Betul ka tida ni oh?!

"Tapi sia tingu-tingu dia sekarang belum mati lagi. Mungkin roh dia terlapas kijap ja dari badan dia. Nasib juga la. Kalo dia mati tu, dia datang lagi kaco si Dino ni." diabilang lagi dodu Sigai. Apa bah si dodu cakap ni? Inda sia paham. Sia tingu trus muka tu dodu. Mo ja sia tanya dia. Tapi masi lemah lagi sia.

"Sekarang tinggal kasi balik semangat si Dino ja. Ko mesti kuat semangat ah. Ko sama mama ko ni keturunan mata yang buli nampak-nampak. Tapi semangat kamurang lemah." diabilang si dodu lagi.

Ting!!! Diabilang bunyi utak sia. Sia buli nampak-nampak?! Baru la sia paham sekarang. Sia ni pun jenis macam mama sia pula lemah semangat. Baru pula sia tau ni. Huhu. Sia tingu trus mama sia. Dia pigang tangan sia. Patut la mama sia sakit tu hari. Dia duluan nampak tu perempuan baju putih datang pi rumah.

"Ada satu cara ja ni kalo kamu mo si Dino capat baik." si dodu Sigai trus tingu mama bapa sia. Sia yang mendengar pun tida sabar mo tau apa.

"Apa? Cakap la. Apa-apa saja la yang penting anak kami sihat balik." ni kali bapa sia berdiri. Tulak pinggang trus dia macam tida kesabaran mo tau dari si dodu.

"Dia mesti jumpa balik tu perempuan.!" diabilang dodu Sigai. Serius lagi muka dia tingu sia. Ishkkk bikin takut.! Inda kan sia mo jumpa lagi tu perempuan kalo sia tau dia tu roh?! Ntah suda mati ka atau masi hidup. Huhu.

****

Ni hari sia kana bawa lagi pigi hospital. Teda perubahan sia rasa. Masih sia lemas, lemah suma. Sia rasa sia teda harapan hidup lagi. Sia mo putus asa suda ni. Tapi bila sia tingu mama sia hari-hari nangis tingu keadaan sia, susah pula hati sia mo mati awal. Sia masi tida puas hidup bah. Sia belum ada girlfriend, belum lagi merasa ada kerja, belum lagi sia puas mo men game PUBG. Tapi sia teda tenaga ja selalu ni. Banyak lagi sia mo buat.

Sia tingu muka sia di cermin pun sia tida sanggup. Dakat-dakat suda sia sendiri mo cakap sia ni penagih dadah ka atau isap gam. Abis kurus suda badan sia. Bukan tagap lagi macam dulu. Makan pun teda selera, angkat tangan pun susa. Apa lagi mo berjalan. Kuat betul penangan tu hantu perempuan. Jaga la tu perempuan! Kalo sia jumpa dia, sia pigi kawin sama dia! Dia la punca sia begini. Sakit hati sia tapi tida dapat buat apa-apa. Sia mampu bercakap dalam hati ja ni sekarang. Teda urang yang tau sia betul-betul menderita secara dalaman sekarang. Tulung la sia Tuhan. Kasi jumpa la sia balik sama tu perempuan. Kasi sembuh la sia balik. Baru sia insaf sama mo berdoa kalo suda sakit begini. Huhuhu. Tu la, dulu sihat-sihat tida rajin mo sembayang. Malar game. Manyasal juga sia sekarang.

"Dino.. Ko tunggu kijap sini ah. Mama pigi ambi ubat dulu. Kijap lagi bapa ko datang tu lepas parking kereta." takajut sia tiba-tiba mama sia bercakap. Hisyyy baru sia teringat muka tu perempuan putih baju. Sia ingat dia. Hisyyy... Bikin takut. Sia tingu mama sia, sia tunduk-tunduk ja tanda paham.

Inda lama sia terpikir lagi pasal tu perempuan lagi yang jadi punca sia jadi begini. Kalo la dia ada di depan mata sia sekarang? Sia rasa mo teriak ja sama dia. Sia mo tanya napa dia bawa semangat sia?! Napa dia mesti kaco sia?! Napa dia mesti datang pi ruma sia?! Sial punya hantu.! Eh maksud sia, tu roh. Hisyyy hantu la bah juga tu. Ehhh!! Kin takut!! Naik-naik bulu roma sia ingat. Lari la ko dari ingatan sia. Shu.. Shu.. Shu......

Kijap... Napa sia rasa macam ada urang tingu-tingu sia sekarang? Inda kan sebab sia pakai kerusi roda durang mo mengijik sia? Ataupun kesian sama sia? Trus laju sia tingu muka tu urang yang tingu sia. Jantung sia trus berenti berdegup kijap. Sia rasa ada kilat sambar sia. Pening trus kepala sia. Bedegung telinga sia kijap. Macam sia mo teriak ja masa tu tapi tida dapat. Kamu tau apa sia nampak?! Itu hantu! Ya! Sia nampak tu perempuan yang dulu! Sekarang dia di depan mata sia! Speechless sia. Jantung sia berabis kabak-kabak yang tida sanang hati. Macam sia rasa mo putus nafas sia. Mati la sia ni kali. Itu la perempuan yang datang pi rumah sia. Dia laitu yang pi kaco sia!! Automatik sia tertunjuk dia. Trus dia jalan mo pi arah sia suda. Sia harap mama sia ada sama sia sekarang. Tuhan!! Tulunggg sia!! Dia mo dekat suda.! Sia takut!!!

BERSAMBUNG