SIAPA SIA?

Part 6

TAJUK: SIAPA SIA? (SABAHAN SLANG)
PENULIS: KLONG KATING

PART 6

  - JANE-

INI hari sia buli keluar hospital suda. Dalam pikiran sia tida buli lupa sesuatu. Ada muka-muka yang sia ingat dalam mimpi sia, sia langsung tida buli lupa. Sepa durang suma tu? Belum ada keberanian lagi sia mo cerita sama mami sia.

Masa sia tunggu mami sia ambi ubat dakat lobi hospital, trus sia nampak ada satu lelaki macam sia familiar ja tu muka. Sia tingu dia. Tapi dia pakai kerusi roda pula. Inda lama trus tu lelaki di kerusi roda pun tingu sia balik.

PRAMMM!!!

Macam sia rasa kepala sia kana pukul. Pening kepala sia kijap. Macam sia kana kilat pun ada. Laju-laju sia tarik nafas. Tu lelaki masi tingu sia. Trus sia nampak jari dia tunjuk sia. Sia tingu belakang, tapi mimang teda urang lain sana kecuali sia. Kijap.. Bukan ini kaitu lelaki dalam mimpi sia? Macam sama. Tapi kenapa dia duduk di kerusi roda? Pucat lagi muka dia sia nampak. Sia kasi berani diri ja pi dekat dia. Ketakutan pula dia nampak sia.

"Sorry.. Sia mo tanya. Ko kanal sia ka?" sia bilang kasi berani diri ja tanya.

"Ermmm.. Ma.. Macam.. " diabilang tu lelaki sama sia setelah sekian lama dia diam. Bergagar-gagar lagi bibir dia sia tingu. Ishk.. Bikin malu ja sia ni pi tegur-tegur. Inda pun kana kanal.

"Eh.. Sorry tida pa la." sia bilang sama dia. Merah kali muka sia masa tu. Trus baru sia mo jalan, tiba-tiba dia pigang tangan sia. Takajut sia! Yang lagi sia takajut macam sia pernah rasa kana pigang tangan oleh ni lelaki.

"Ko.. Ko masih hidup?" diabilang tu lelaki tiba-tiba tanya sia. Aik.. Soalan bonus ka apa ni? Inda kan dia pikir sia ni hantu?

"Err.. Iya.. Hampir mati.." sia bilang tiba-tiba. Sia mo buat lawak baitu tapi entah kenapa nada sia serius betul masa tu.

"Owh.. Ermm.. Sia happy ko masi hidup." diabilang tu lelaki trus tiba-tiba senyum sama sia. Trus dia kasi lepas tangan sia. Ahh? What? Sia blur beberapa saat. Apa yang dia tau pasal sia?

"Oh ya.. Nama sia Dino. Ko?" diabilang tu lelaki lagi. Eh.. Tiba-tiba pula mo berkenalan malu sia.

"Jane.. Nama sia Jane." sia bilang sama dia. Trus dia berdiri dari kerusi roda. Trus kami bersalam. Eh.. Apa ni? Miracle pula dia buli berdiri suda. Tadi sia nampak dia lemah saja. Sekarang semangat suda sia nampak ni lelaki yang diabilang nama dia si Dino.

"Dino.! Ko ok?!" diabilang satu suara perempuan tiba-tiba teriak di belakang sia. Takajut juga la sia. Ada dua orang berdiri sana. Satu lelaki, satu perempuan. Ibubapa ni lelaki kali ni.

"Ok suda sia ma." diabilang si Dino trus tingu muka sia. Nah betul la itu mama dia. Mama dia tingu sia macam urang yang nampak hantu ja. Basar tu mata dia tingu sia. Macam pernah jumpa juga durang ni. Tapi di mana ah?

"Jane.. Mari balik." tiba-tiba lagi sia dingar suara mami sia panggil. Siap suda kali dia ambi ubat sia.

"Sia jalan dulu ah.." sia bilang sama tu lelaki nama Dino sama tu dua orang tua dia. Si Dino ja senyum sama sia. Ermmm biar la durang tu. Macam jakun pula durang tingu sia hehe.

"Jane!!" tiba-tiba si Dino panggil nama sia. Sia tingu ja muka si Dino. Dia lambai pula sia. Sia lambai ja la balik.

Jauh suda sia jalan, sia tingu balik belakang. Si Dino lambai lagi sia. Ishk lain juga sia rasa. Baru jumpa pun macam lama suda sia rasa sia kanal durang. Ganjil ni perasaan sia sekarang.

"Sepa tu?" diabilang mami sia tanya sama sia.

"Erm.. Tida tau. Hehe." sia bilang sama mami sia. Sia pun tida tau apa mo cakap.

"Sia ingat ko kanal." diabilang mami sia selamba ja muka dia. Sia geleng kepala ja. Betul ka tu lelaki yang sia pernah nampak dalam mimpi? Kalo sia cerita mami sia ni, kompom dia tida percaya sia. Bagus sia diam ja sampai la kami di rumah suda.

****

"Mami ada sia mo tanya.." sia ada hati juga tiba-tiba mo tanya sama mami sia. Tida tanang hati sia.

"Napa tu?" diabilang mami sia tanya sia balik.

"Anu bah.. Anu.. Sia ada kakak ka?" sia bilang sama mami sia. Terdiam dia kijap. Takajut muka dia dingar soalan sia.

"Kakak? Napa ko tanya begitu?" diabilang mami sia. Trus sia terdiam tida tau mo cakap apa.

"Eh.. Teda la mami." sia bilang sama dia. Tida mo la sia cakap. Takkan sia mo cakap sia mimpi yang ada urang mengaku jadi kakak sia.

"Napa Jane? Tiba-tiba ja ko tanya begitu? Ko ada ingat apa-apa?" mami sia tanya lagi sama sia. Bulat lagi tu mata dia.

"Teda la mi.. Sia mimpi ja kali sia ada kakak." sia bilang lagi sama mami sia. Mami sia pun lama terdiam.

"Ko tida ingat?" mami sia tiba-tiba cakap begitu sama sia.

"Ingat apa?" sia bilang tanya mami sia. Trus inda lama sia nampak keluar air mata mami sia. Eh.. Apa sia suda buat ni?!

"Mami.. Ko ok ka?" trus sia lap air mata mami sia di pipi dia. Kanapa mami tiba-tiba nangis ni??

"Ko mimang ada kakak. Sera nama dia." diabilang mami sia. Ni kali sia betul-betul takajut sama dakat tida percaya. Sera tu mimang nama perempuan dalam mimpi sia tu.

"Napa sia tida tau?" sia tanya lagi mami sia. Ni kali sia betul-betul bingung.

"Bukan ko tida tau Jane.. Tapi ko hilang ingatan lepas tu kejadian hitam." diabilang mami sia. Makin kuat dia menangis.

"Apa?! Apa yang ko cakap ni mi?!" terdesak suda sia mo tau sekarang apa maksud mami sia.

"Tahun lalu ko kemalangan jalan raya. Sama kakak ko, sama laki kakak ko juga. Ko saja hidup tapi durang mati Jane." menangis-nangis suda mami sia. Jatuh-jatuh lagi hingus dia.

"Apaini? Sia tida paham mi.! Sia tida paham!" keluar trus air mata sia. Sia rasa sebak betul ni perasaan. Yang sia geram sia tida ingat apa pun yang mami sia cakap sekarang.

"Mimang la ko tida paham Jane. Sebab lepas tu ko hilang ingatan pasal dorang. Pasal tu kemalangan suma tida berani mami cakap. Sebab mami takut kehilangan ko. Ko masi sakit." laju mami sia paluk sia. Laju juga sia dingar nafas dia naik turun.

"Jadi yang sia kemalangan baru-baru ni apa?" sia tanya lagi mami sia.

"Yang baru-baru ni ko bukan kemalangan. Ko lari dari ruma. Satu malam ko hilang. Nasib juga urang kampung jumpa ko sana dekat kebun getah urang. Ko pingsan sana. Dekat jalan raya kamu kemalangan dulu. Siou.. Mami buat cerita ja tu di hospital. Mami tida mo ko stress lagi." diabilang mami sia kasi explain. Sama-sama kami menangis.

Jadi selama ni sia mimang pernah ada kakak sama abang ipar. Kakak sia sedang mengandung masa tu kemalangan. Tapi suma tu sia tida ingat. Doktor bilang sia kana penyakit amnesia. Banyak benda sia hilang ingatan. Nama sia sendiri pun sia buli lupa. Umur sia sekarang pun sia tida tau. Satu benda yang sia tida buli lupa mami sia ja. Dadi sia? Sia pun tida ingat sebab dia suda meninggal masa umur sia 2 tahun lagi. Wah malang juga pula kehidupan sia ni. Yang kesian sekarang mami sia la. Sorry mami.. Buli ka sia jadi normal lagi macam dulu? Siapa bah sia dulu? Huhuhu

BERSAMBUNG