البارت18
حسين طلق مرام متزوجها بجوه وبس وهي بنت يتيمة عايشة مع خوها ومرته وخوها لما جاها عرس فرح وافق طول بدون لا ينشده ع نسبه ولا فصله ... رجع حسين لحوشه وعمله ومرة مرة يمشي لاماليه يطمن عليهم
هبه قعدت مع امها وتمشي لتانويتها وتهتم بقرايتها ومرة مرة تفكر ف حسين .. استاحشته .. بديت نحبه ... هزت راسها بمعنى لا:لالا شن نقول اني هو كله على بعضه يوم عشته ع اساس حبيته فيه
نزلت راسها لكتابها تقرا توتي لامتحانات الشهادة بعد شهر
فجأة شدت بطنها حاسه وشدت فمها مشت تجري للحمام حاسة بغثيان رجعت طلعت لدار دايخة تعبانه تبي فراشها ترقد وبس
حنين تعبااانه نفسيا قبل ماتكون جسديا نفس الوضع هي واشرف ماتغير شي غير ان كل مرة تقوله طلقني ارفعني لحوش امي هو يرفض خايف تمشي معاش ترجعله.. 💔
بعد مرور شهر
السبت 8:90
هبه تلبس بدلتها التانوية وشادة شعرها وعيونها ف الكتاب تراجع متوترة خايفة مرعوبة ومستاحشة💔:يارب ساعدني ووفقني يارب
ام هبه توتي فطور بنتها ومتوترة اكتر من بنتها وتدعيلها:ربي يوفقك يارب يابنيتي
تنادي:هبببه يااهببه
هبه من الدار:نعمم
ام هبه تعالي افطري واطلعي وقت
هبه تلبس ف وشاحها خدت شنطتها وطلعت لامها نزلت لسفرة خدت كسرة خبزة وطلعت تجري :لالا مانبيش ادعيلي ياماما بس ادعيلي
ام هبه ترعش خايفة ومتوترة:ربي يساعدك يابنيتي
هبه تمشي بخطوات سريعة ف شارع مارفعتش عيونها من الكتاب تراجع وتقرا طول الطريق
بييييب
رعشت وانخلعت جسمها اختض رفعت عيونها انصدمت بيلي قدامها
حسين ف سيارة قدامها والابتسامه مافارقتش عيونه قبل فمه👌 نزل من السيارة لابس جينز اسود وسبيدرو اسود وتيشرت رصاصي ف ايده وردة حمرة وشوكلاطه قدملها:صباحك ورد ياوردة
هبه عيونها تجمعت فيهم الدموع علقتهم في عيونها خايفة تنزل عيونها تشوف باقي تفاصيله اللي استاحشتهم تخونها دموعها واطيح خايفة تتكلم يتحرك جفنها ودموعها ينزلو خايفة تمشي وتخليه لكن استاحشته ماشبعتش منه نبيه عندي رغبة فيه عندي رغبة ضحكته عندي رغبة ف كل تفاصيله 👌❤ ابتسمت بشوية خايفة نبكي
حسين ابتسم ابتسامه اكبر وبهمس:انحبك
هبه تجمه الدم ف وجها من التوتر والخجل بترد عليه فجأة حست بغثيان ومشت تجري لتحت الشجرة ورجعت
حسين لحقها خايف عليها:هبه خيرك
هبه مش قادرة تتكلم من الدوخة وتعب:شي تع تعبانه شوية من القراية بس
حسين مشي لسيارته بخطوات سريعه فتح الباب وقدم خدي شيشة امية ورجعلها :اغسلي وجهك تصحصحي شوي واشربي منها
هبه مش مركزة من الدوخة:تم
حسين بحنية:توا خشي لامتحانك ولما تكملي نجي نروح بيك اوك
هبه هزت راسها بمعنى اي
حسين ابتسم وشد وجها بيده ورفعه عيونه ف عيونها بحر وحكايات😍:حبي
ندى من بعيد شوي تنادي:هبببه هبببووش استني نخشو جميع
هبه اانحرجت من الموقف وخرت بخطوات بسيطه
وحسين انقهرمن صاحبتها ومشي لسيارته وطلع
ندى شافت حسين انصدمت التفت لهبه:شني؟؟
هبه شدت يد ندى وجرتها معاها:تعالي توا امتحان مش وقته الكلام هدا
ندى باستغراب:غير قوليلي شن جابه بس
هبه فتحت كتابها ترجع مش مهتمه بكلام ندى
ندى تكنطت قدمت قبلها:اقعدي فيها انتي وياه
هبه سكرت كتابها وابتسمت بشوق تتفكر وتتخيل في شخص عرفاته اسبوعين وحباته في يوم .. نست كل شي صار نست المسج نست خياناته نست نفسها نست كل شي تتفكره هو بس تتخيله هو بس صوته .. ضحكاته .. انفاسه .. حنيته .. قربه .. لهفته .. وااه من نظراته اللي ياما وياما دوختها
قطع حبل افكارها نغزة يد ع رقبتها
انخضت بخوف والتفت:اووف خيرك
ندى:انتي اللي خيرك ليا ساعة انادي فيك ماتسمعيش هي امتحان بسكرو اللجنة را
هبه في لحظات نست ان هي طالبة نست ان امتحان نست ان في مدرسين وكل شي فكرتها ندى انخضت بسرعة وفتحت الكتاب تبي تلمه وتراجعه كله في هالتواني
ندى تنهدت بتعب:امشي بس
حسين طلع بسيارته للعمل وهو الدنيا مش سايعاته من فرحته وضحكته اللي مافارقتش قلبه وفمه فاتح المسجل وعلى حده .. شاد قلبه من الفرحة ويدندن بسيارة
حنين مشت للمطبخ وكلها طاقة ايجابية خاطرها في ادير شكشوكة بدت فيها وهي اتدندن .. ريحة الشكشوكة ملت المطبخ والحوش بالكامل .. فجأة حست بغثيان ودوخة مشت تجري للحمام رجعتت وطلعت حاسة بدوخة وتعب حطت يدها ع فمها توسعت عيونها وشهقت بصوت عالي نزلت دمعتها غصبا عنها تهز في راسها بمعنى لا ماتبيش تستوعب او تحاول تنكر الشك بهمس:لالا يارب لاا
مشت تجري لدار وخايفة متوترة وتحاول تفكر وتحسب :ااه يااارب لا لا
مشت لاشرف مقعمز ف الصالة ع التلفزيون تجري بخوف:اشرف
اشرف خاف من خوفها :حنين
حنين دماغها استك عن كل شي تبي تتأكد:ار ارفعني للمستشفى
اشرف من الخوف وقف قدامها:خيرك حبيبي شن فيك
حنين مشت لدار متجاهلة خوفه .. ورجفته .. وسؤاله :نلبس عبايتي ونجيك
اشرف مش مستوعب شي خدي تلفونه ومفاتيحه وطلع جري لسيارة ولعها وقعمز فيها وهو متوتر ويغلي وخايف مشاعر متلخبطة:ان شاء الله خير يارب
حنين لبست عبايتها وطلعت ركبت ف سيارة
وصلو للمستشفى
توجهو عند الرسيبشن
اشرف:السلام عليكم
الريسبشن:وعليكم السلام تفضل
اشرف بدون تفكير:نبي دكتور ف الباطنه لو س
قطعت عليه حنين:عفوا منك نبي دكتور نساء وولادة
اشرف التفتلها مصدوم من طلبها شدها من يدها .. ابتسم لريسبشن وخرها معاه بهمس حنون:حنيني... خيرك حبيبي شن يوجع فيك
حنين دوبها استوعبت ان هدا خصيمها.. شريكها .. عدوها اللدود .. وممكن يكون اب لوادها .. وولد عمها👌
نفضت يدها منه ولفت عيونها عنه بقرف:لو سمحت ماتمسنيش
اشرف انجرح من قرفها اللي حسه اكتر من يلي سمعه💔 بهدوء انسحب بخطوات هاديه لكن عيونه تراقب في كل تحركاتها في كل تصرفاتها .. نفسها .. صوتها .. ضحكتها .. عيونها يااااه من الحب قداش مايكسر ياااه من الحب قداش مايجرح ياااه وياااه والف ياه
حنين بدون اهتمام ليه ولوجوده قدمت من جديد لريسبشن:لو سمحتي نبي نحجز عند دكتور نساء
سمعت صوت حاد من وراها:لو سمحتي دكتورة
التفت لمكانه بدون مايشوفلها حتى
حنين عضت شفايفها بقهر هزت راسها بمعنى اي وسكتت
الريسبشن:باسم من ؟
حنين:حنين ال ...
الريسبشن كتبت الاسم:تفضلي استريحي
حنين ابتسمت:شكرا
مشت حنين قعمزت في انتظار النساء واشرف في انتظار الرجال مفصول بينهم حاجز بالألمنيوم
انسجمت حنين ف الهدرزة مع اللي جنبها وتهدرز وتضحك طغت ع الجلسة بصوتها
اشرف مقعمز ع كرسي الانتظار بروحه مسند راسه ع الحيط .. مغمض عيونه .. مبتسم .. بهيام .. وولهام لصوتها .. لعفويتها .. لضحكتها .. لكل تفاصيلها
الممرضه وقفت ع الباب :حنين ال ....
حنين التفت:نعم
الممرضه:تفضلي
اشرف فتح عيونها وناض وقف بعد سمع اسمها
حنين ابتسمت وناضت التفت للمعاها:ان شاء الله معرفة خير
المريضات:بوجودك حبيبتي
طلعت حنين ولقت اشرف يمشي قدامها ورا الممرضة
حنين تأففت ومشت
الممرضة فتحت الباب:تفضلو
اشرف خش:شكرا
خشت حنين وراه قعزت قدام الدكتورة:السلام عليكم
الدكتورة وجه بشوش وبابتسامه:وعليكم السلام
تفضلي
حنين بتوتر ومتحشمة من اشرف:احم امم اني شاكة ان
الدكتورة فهمت:انتي مدام
حنين متوترة:اي
الدكتورة بابتسامه:كم عمرك
حنين:21
الدكتورة تسجل:امتى اخر مرة جاتك
حنين تجمع الدم ف وجها تحشمت التفت لاشرف لمحت طيف ابتسامه
الدكتورة حست بحشمها والتفت لاشرف وحنين:راجلك والالا
حنين نزلت راسها وهزت بمعنى اي:اي
الدكتورة:تمام امتى اخر مرة جاتك
حنين متحشمة:احم يوم 2:5
الدكتورة وقفت:تمام تعالي حبيبتي نديرلك الجهاز
حنين :احم دكتورة مادرتش تست ف الحوش
الدكتورة:مش مشكلة عادي
حنين وقفت متوترة خايفة ضايعة متحشمة كاره .. جمعتهم كلهم في لحظة:تمام
قدمت لسرير
الدكتور بابتسامه:ارتاحي حبيبتي ارتاحي
حنين بتوتر ومتحشمة بهمس:تمام
اشرف يوزع في نظراته عليها وع تصرفاتها وع حشمها ومصدووم لما عرف شن في بالها
حنين رقدت ع سرير خايفةة
الدكتورة جابت الكريم:افتحي عبايتك هي
حنين بتوتر يديها يرعشو وكل جسمها يرعش خايفةةمن يلي حيصير فتحت عبايتها وقامت شوي من تيشرتها من ع بطنها
الدكتورة التفت لاشرف:تعالى قدم جنب مدامتك
اشرف متوتر ومتحشم اكتر حتى من حنين قدم قعمز ع الكرسي جنب حنين مقابل الدكتورة والايكو
الدكتورة شغلت الجهاز وحطاته ع بطن حنين وو...
