تهزمني السمراء وانا نّد الفرسان

بارت

«البارت الثالث والعشرين»
.
.
في بيت ثنيان في غرفة الترف
رهام اللي جات هي ونوف : سلام
الكل : وعليكم السلام
رهام: ثنيان كيفك
ثنيان: بخير الحمدلله
رهام: ارسلتنا امي نشوف ذا صاحي او نايم تقول بتجيك
ثنيان : لا تجي انا بجيها
نوف : تكفى تعوذ من ابليس والله انها لتفجر فينا اجلس لا يصير فيك شي
منيره:خلهم يجون انت تعبان
رهام : اصلا ما يقدر يعترض اذا جاء هناك يعرف عصاة امي
ثنيان: خلاااص تعالوا
رهام: يلا بقولهم
منيره: الترف تكفين جهزي القهوه
مشاعل: ايه تعالي
منيره: مشاعل اجلسي انتي تعبتي حيل اليوم
ثنيان: ليه مشاعل فيك شي
مشاعل: لا بس تعب كذا
ثنيان: لا لا اجلسي اصلا وينها مي ناديها ناديها
مشاعل نادتها وجات : وش فيك ثنيان
ثنيان: ماشاء الله صايره ضيفه
مي : وش فيك
ثنيان: كم اقولك يدك بيدهم فالبيت كم مره بأشرح
منيره: لا تعصب ثنيان خلاص بتروح معهم بس انت قوم للغرفه الثانيه
الترف قربت : ايه قوم للغرفه الثانيه عشان ادويتك
قام ثنيان ومنيره ماتبي يجلس بغرفة الترف ولاحظت الترف ان منيره تبيها توخر بأي طريقه نزلت مع مشاعل مي ورتبو الاغراض وجات منيره معاها الصحن
الترف : منيره تعالي ابيتس
منيره: ماني فاضيه يالترف
الترف : لا تعالي
اخذتها بعيد وهي تقول : منيره انا مزعلتس بشي
منيره تغير وجهها : لا ليش
الترف: مدري خفت مضايقتس لكن ابيتس تعرفين شي انا مستحيل اخذ ثنيان منتس بالعكس
انا ادري انتس اغلى وحده على قلب ثنيان ولا احاول اغيرها بالعكس انتي تستاهلين الدنيا كلها تحبتس واذا انا سويت شي وضايقتس انا اسفه بس صدقيني لو مدري وش يصير ان تغير ثنيان عليتس بعتبره مب كفو واصلا ثنيان ما يبدلتس بأحد ارتاحي مستيحل ابدل حبتس في قلب ثنيان
منيره كانت كأن احد ضربها كف وتجمدت : لا يالترف وش تقولين انتي اكيد ما فكرت كذا بس اني مضغوطه هالايام معليش اذا ازعجتك وانا مدري
الترف : ما عليتس انا بس ابيتس تعرفين إنا كلنا ندري إنتس اولى بثنيان
دق الباب وقالت منيره : ما ابيك تفهميني غلط بس ثنيان زوجك مثل ماهو زوجي وعادي الوضع
الترف ابتسمت وطلعوا
ام ثنيان : ثنيان وينه
منيره : فوق يا عمه الحين انزله
ام ثنيان : لا خليه بطلع له
الترف: لا الدرج بيتعبتس خليه ينزل ويتحرك شوي
دلال : ايه يمه
منيره: تعالي يالترف ننزله
طلعوا لثنيان اللي كان يسولف مع عمر ومحمد
منيره: ثنيان عمتي تحت
الترف : اتوقع بعد ان ابوك بيجي عشان كذا خلنا ننزل شوي شوي
ثنيان وقف وقربت منيره والترف بيساعدونه
ثنيان: اقدر اتحرك ماعليكم
منيره: وشلون تحرك وانت طايح اصلا
ثنيان: بسيطه يا منيره
الترف : خليه يا منيره خليه اذا احتاج بنساعده
ناظرها ثنيان وهي متكتفه مشى شوي شوي
منيره اخذت المخده : اجل انا بنزل ارتب لك المكان تحت وانتي انتبهي يالترف
الترف : ماعليتس عندي
نزلت منيره وثنيان اللي يمشي ويوقف
الترف : اقول يا حبك للعناد بس
ثنيان : وش عندتس !
الترف قربت وهي تسنده : ما تقدر تنزل لحالك استند علي
ثنيان: لااا ثقيل عليك بوجع ظهرك
الترف : يارجال ما انت اثقل من ابوي هات يدك بس
استند ثنيان عليها بخفه ونزلوا شوي شوي مع الدرج
وام ثنيان اللي تناظر الترف بإحتقار وصلته الترف للكرسي وهي تساعده يجلس
جلست ام ثنيان جنبه : هاه امي كيفك الحين
ثنيان : اووه عال العال
دلال : عاد امي من اليوم قلبها محترق تقول متى يصحى ونروح له ثنيان قرب يبوس كتفها: الله يخليك لي يالغاليه
نوف : خالي جدي ونواف برا
ثنيان وقف : محمد افتح المجلس
طلع وهو مستند لنوف
نواف تقدم له : هاه كيفك الحين
ثنيان : بخيير
ابو ثنيان : عساها ما توجعك جروحك
ثنيان : لا بسيطه بسيطه
محمد دخل وهو يسند ابوه: سلام
اسرع له نواف يساعده: هلا
قرب محمد يسلم على ثنيان : سلامات سلامات
ثنيان : الله يسلمك
محمد : ما قلتوا لي انك طلعت رحت وجيت على الفاضي
ثنيان: ليتك دقيت
نواف : ماعليه الحركه بركه
ثنيان اللي قرب لعمه وهو يسلم عليه وكان ابو محمد مايسمع ولا يقدر يتكلم كثير
ابو ثنيان: وش فيه ابوك معاد يتكلم
محمد : ذا الايام الضغط عنده مضطرب وصار اغلب وقته نايم ولا ساكت
سيف : سلام عليكم
ردوا السلام وكانت مواضعيهم حول ثنيان وابو محمد .................••............
في ديرة الترف
اما عند صالح اللي بعد ما رجع ماعرف كيف انه يبداء جلس قريب ابوه : يبه
ابو الترف : اذا بتكلم في موضوعك ذاك قفله
صالح اخذ نفس : يبه اسمعي سلوى بتترك الطق نهائي يعني لا تخاف من ذا كله
ابو الترف : حتى لو تركته كل الناس يعرفونها الطقاقه
صالح : يا يبه مب عيب مب عييييبب الحين عمتك الله يرحمها ما كانت تطق
ابو الترف : عشان كذا انا اهرج ماتت وللحين يقولون الطقاقه وانا مانيب راضي ام احفادي تكون طقاقه
صالح : ان ما تزوجتها تحرم علي بنات حواء كلهم
ابو الترف : احسسسن خلك لا تزوج
صالح وقف وهو يقول بغضب : ثنيان متصاوب وديت له الترف اليوم وهو طيب وبخير
طلع وترك ابوه اللي وقف :صالح تعال تعععااال
صالح رجع وهو يقول السالفه كلها وطلع بعدها وهو زعلان مشى وهو يناظر بيت سلوى انكسر قلبه ما يدري وش يقولها رفع راسه وهو يقول ( يارب والله مالي حيل ولا قوة لكن لا حول ولا قوة الا بالله ) .................••............
في حارة عجاج
وعجاج اللي كان نازل وقابله سالم وعيد: وين رايح
عجاج : لثنيان
عيد: اول مره اسمعك تقول بروح لثنيان دايم ثنيان بيجيك
عجاج : عشانه تعبان
سالم : لا والله وش فيه
عجاج ما انتبهه : متصاوب في مداهمه
عيد:مداهمة وش
عجاج : اا ا
سالم: لا يكون داخل في شي شين
عجاج تورط وهو يدري ثنيان ما يبي احد يدري انه ضابط : لا بس انه مداهمه جنب بيتهم
عيد: جروحه عميقه
ابو حمود : وش منهم وش السالفه
سالم: ثنيان متصاوب
عجاج ضرب جبينه
ابو حمود : وش فيه ثنيان ، كم رصاصه، وشهو منه
الكل سمع وتجمعوا وتورط عجاج وسالم وعيد يقولون السالفه
وابتدوا كل اهل الحاره يعرفون ويطلبون انهم يروحون لثنيان
عجاج اللي انسحب وهو يدق على ثنيان اللي جواله ما وقف مكالمات: هلا عجاج
عجاج : امة محمد جايينك كلهم
ثنيان: هاااه
عجاج : مع الاسف الحاره دروا وكلهم جايينك
ثنيان: عن وشو بالضبط
عجاج : قلت متصاوب في مداهمه جمب بيتكم وبس
ثنيان : زين زين
سكر ثنيان : نواف انقز قلهم يضبطون لنا قهوه وشاهي
ابو ثنيان :من بيجي
عجاج : اهلي الثانين
محمد : مين !؟
ثنيان : حارة عجاج
ابو ثنيان صد وقام محمد يرتب هو ومحمد وعمر وبعد شوي وصلو وكانوا تقريبا 10 رجال
وقف ثنيان يستقبلهم والكل معاه
عجاج همس : والله انكشفت
ابتسم ثنيان : حسبي لله على ابليسك
بعد ماسلموا عليه وتحمدوا له بالسلام ابتداء ثنيان يعرفهم على اهله وكانت اكبر صدمه لهم عياله
ابو حمود : انت متزوج
عجاج : ارربعه في عيون الحسود
عيد: اننت
ثنيان: اذكر الله
ابو حمود : انت يا ذا اللي تناقز متزوج 4
عجاج : خلاص انصدمتوا نقدر نمشي
ثنيان:وين بدري
عجاج : انت مريض وبترتاح
ابو حمود : لاا الحين انت ابو عيال
نزل راسه ثنيان وهو يبتسم وودعهم
محمد : وش يقولون هذولا
ابو ثنيان: ثنيااان خذ اثرهم
ثنيان : ابد ماكانوا يدرون اني متزوج وانصدموا
ابو ثنيان : الله يستر بس
................••............
بعد العشاء
الكل راح والكل تقريبا نام عند ثنيان اللي كان منسدح جنب منيره اللي نايمه وقف وهو متملل مشى شوي وطلع وهو يشوف البيت ظلااام وهادي اتجهه لغرفة مشاعل اللي كان ملاحظ عليها انها تعبانه دخل بهدو وشافها منسدحه مابين النوم والصحوه
وجلست : ثنيان فيك شي
ثنيان دخل وسكر الباب : خليك مني انتي وش فيك تعبانه!
مشاعل: يعني تقلصات الحمل وتعبه
ثنيان: بس انتي تعبانه بزياده
مشاعل : شوي بيروح
ثنيان جلس جنبها وهو يحط يده على بطنها: وش يوجعك بالضبط
مشاعل: عادي ظهري وبطني هذا غير الوحم
ثنيان : حاولي ترتاحين وبكره بنروح المستشفى
مشاعل: ماله داعي انت لا تعب نفسك
ثنيان: اي تعب يا مشاعل اذا ما تعبت نفسي عشانك عشان مين اتعبها
مشاعل ابتسمت : الله يخليك لنا
ثنيان وقف : اجل يلا حاولي ترتاحين وتنامين وبكره خير
مشاعل: طيب
طلع ثنيان وهو ضايق ان مشاعل بعد تعبانه وهي الوحيده اللي ما يحبها تتعب لانها ما تشتكي مر على غرفة العيال دخل وهو يتفقدهم وطلع واتجه لغرفه مي اللي كانت نايمه على التيلفزيون والصوت لاخر مرحله تقدم وهو يطفيه ( مستحيل تنامين مثل الاوادم مستحيل )
وطلع وقف وهو يناظر غرفة الترف توجهه لها وفتحها بشويش وهو متوقع انها نايمه
لكن رفعت راسها الترف : ثنيان وش جابك ! يعورك شي تبي شيي!؟
ثنيان: ليه مو نايمه
الترف : كذا ماجاني نوم
ثنيان قرب وهو يجلس
الترف : وش فيك صاحي ذا الوقت
ثنيان اللي يدور سبب : امشي وبعدين جوعان
الترف : جوعان !! طيب وش تبيني اطبخ لك
ثنيان: لا تطبخين شوفي شي خفيف
وقفت الترف بتنزل وقف ثنيان وراها بينزل معها
لفت: وين وين
ثنيان: بنزل
الترف : يرحم والدينك فكني والله لو تدري منيره انك نزلت وتعبت لتذبحنا كلنا اجلس وانا بجيب الاكل واجي
ثنيان : ترا مانيب بزر وخري بس
الترف: ياخي لا تعاند والله والله شوي واجي بس اجلس منيره لو قامت ما لقتك بتنهار واصلا انت ماتقدر تطلع وتنزل بتلتهب جروحك
ثنيان : طيب استعجلي
الترف: عد للعشره بس
نزلت تركض وهي تشوف وش اخف شي ومن حسن الحظ حصلت الاكل جاهز وسخنته
اما ثنيان اللي رجع للغرفه وهو جلس ( هذا حال بالله حتى زوجتي بدور عذر عشان اجي اجلس عندها لكن ما عليه يالترف ايام بس )
رجعت الترف : هذا الاكل
حطته وجلست ثنيان: قربي كلي معي
الترف : لا والله مابي انام ثقيله
ثنيان سكت وهو اصلا شبعان وقرب ياكل شوي : ايه كيف انبسطتي عند اهلك
الترف نست : اي والله وتخيل رحنا البقاله و .. سكتت لما تذكرت انها بغت تقوله عن عايض
ثنيان: كملي !
الترف : ابد بس لقينا نوير
ثنيان: اخت منير !
الترف : ايه
ثنيان: وش صار طيب
الترف : عادي ماصار شي
حس ثنيان بإرتباكها بس طنش وكمل والترف اللي تدور سالفه ثانيه بس ما حصلت وسكتت
انفتح الباب بخوف وكانت منيره : اسفه بس ما لقيتك وخفت
ثنيان : ما عليه انا هنا
الترف : ايه كان جوعان وعطيته الاكل اللي سويتيه تحت
منيره: حمدلله
ثنيان: روحي نامي اخلص واجي
راحت منيره اللي انسدحت وهي ضايقه على نفسها حيل ( معقوله يا منيره غيرت افكارك ثريا وصرتي مثلها انتي اللي سمحتي وش تغير الحين وبعدين هي زوجته مثل ما انتي زوجته ، الله يسامحني بس ) ثنيان اللي لاحظ ان الترف ردت على منيره بسرعه وهي كأنها تقول انه بس ياكل : بينك انتي ومنيره شي
الترف : لا ليه
ثنيان: لا ولا شي
الترف : وش بيكون يعني
ثنيان اللي سكت وهو ينزل الملعقه : متى بتنامين
الترف : الحين
ثنيان اللي ماكان فيه نوم وتوقعها بتسهر: زين اجل
وقفت الترف تساعده وصلو للغرفه وطلعت منيره : جيت
الترف : اييه هيا خذي امانتتس عندتس سلمتس خلاص
منيره: وصلت
ثنيان: ايوه هذا اخر شي وصلتوا له !
الترف : خلاص انا مالي شغل
راحت لغرفتها وهي تضحك عليه وتناظرهم لكن صرخت لما صفقت بالباب وارتفع ضحك ثنيان : احسسسن احسسسسن
الترف : حسيبكم الله
ضحكت منيره : سلامتك
دخلت الترف وهي ماسكه جبينها ودخل ثنيان اللي كان يتعمد يجيب طاري الترف ويشوف توتر منيره واجزم ان فيه شي بس وش هالشي
................••............
من بكره
عند نواف اللي كان ينتظر ثنيان عشان ياخذه للمراجعه
طلع ثنيان ومشاعل معاه : سلام
نواف : هلا كيفك اليوم
ثنيان: حمدلله
ركبوا واتجههوا للمستشفى وبعد فحص الدكتور قال انه كويس بس يبي كم مرهم فالبيت
طلعوا ونواف واقف ثنيان: نواف سبقنا شوي لسياره
نواف : دواك اخذته
ثنيان : لا بمر على عياده واجيك
نواف : بروح معك انا بعد
ثنيان بقل صبر : ليه حامل انت !
نواف انلخم وتفشل : اييه طيب
ثنيان: حمدلله على السلامه
راح نواف مشاعل: ثنيان ليش تحرجه
ثنيان: شسوي له
اتجهوا للعياده وثنيان يسند مشاعل وهو بالقوه على نفسه دخلوا لدكتوره وبعد ماشرحوا تعب مشاعل
الدكتوره : طيب يا مشاعل انتي الحين في شهرك الثالث وواضح حملك ثقيل ومتعب عشان كذا ارتاحي قد ما تقدرين انك ترتاحين ابد لا تبذلين اي جهد
مشاعل : طيب
الدكتوره : بس فيه شغله بقولك اياها
ثنيان : خير يا دكتوره
الدكتوره: مشاعل حامل بتوأم عشان كذا بيكون صعب عليها
شهقت مشاعل بصدمه ولفت تناظر ثنيان اللي ابتسم : توأم من جد
الدكتوره : اي الله يتمم لكم
مشاعل اللي ماعرفت وش تسوي الا انا تناظر بطنها بصدمه وضحك : كيييف
ثنيان ضحك : حمدلله
الدكتوره : رح اعطيك ادوية تلتزمين بها ولازم الراحه
ثنيان: لا توصين
كتبت الدكتوره الادويه وطلعت وهي مبسوطه : يمه يا ثنيان مدري مدري كيف بصدق
ثنيان : احمدي ربك هاذي نعمه
مشاعل: ادري بس خفت وفرحت
ثنيان قرب يبوس راسها : بتهون ما عليك وانا معك
طلعوا لنواف لللي جالس وثنيان الابتسامه شاقه وجهه شق ................••............
في بيت ثنيان
عند الترف اللي نزلت وشافت رهام موجوده
رهام: صح النوووم طولتي
ضحكت الترف : تعبت والله
رهام: سلامتس
مي اللي كانت تنظف وهي تتأفف جلست الترف بعد ماخذت فطور : وينها منيره
رهام : مدري والله جيت مب فيه حتى ثنيان ومشاعل
مي : قوموا بنظف
رهام: توك تتذكرين النظافه
مي: رهام خلصيني
الترف : تعالي نطلع فوق لين تقضي لا تموت علينا
مي : اسكتي انتي
الترف : والله مانيب رايقتن لتس
رهام: تعالي بس
طلعوا فوق وجلسوا
رهام : ايوه كيف انبسطتي لما رحتي عند اهلك
الترف : حمدلله انتي تعالي قولي لي وش سالفة ثريا مع ثنيان
رهام : ليه صار شي
الترف : مدري مره احسه يكرهها
رهام : كرهه العالم والله
الترف : وش السالفه
رهام : ابد الله يسلمك سالفتهم عجيبه ثنيان قبل يتزوج منيره كانوا سيف متزوج ذا الثريا وكانت معنا فالبيت وطبعاً محومه كبد ثنيان كل شي تشوفه يسويه تروح تقول لابوي وتكبرها وتزيد عليها وطبعاً ثنيان ما يسكت لها وطول الوقت هي وياه هواش
وليتها على ابوي بس لا تكذب على سيف وسيف ينبرش على ثنيان واحيان حتى يطقه على كذب
وابوي طبعا مستحيل يكذب ثريا ابد
وعاد جاء وقت ان ثنيان يتزوج وابوي الا يزوجه غصب المهم يتزوج ومن يتزوج منيره اللي كانت لثنيان غييير عن ثريا كان يعدها مثلنا طفولتها اصلا مع ثنيان انهبل ثنيان ورفض وهو مستحيل يشوف منيره الا اخت له وانهبلت ثريا ولا خلت كذبه ما طلعتها على ثنيان وقولته كلام على منيره وثنيان ما قاله وطبعا حاول ثنيان يكذبها بس ابد مافيه مجال فا خيره ابوي عشان يصدقه يا يتزوج منيره او يطلع من العايله بكبرها وتزوج ثنيان منيره بإجبار من ابوي وعشان رضا ابوي ودايم يحس ابوي انه فرض حياه غلط على ثنيان لان ثنيان حط قدام ابوي واقع انه بيتزوج لين ينتهي عمره المهم يحصل اللي يبيها لكن حمدلله ان ثنيان كان يعرف منيره وفاهم عقلها وكانوا اصلا اصحاب قدر انه يتفادى الموضوع ويعيش مع منيره وهو اصلا يحب منيره حب غيير حب اغلبه احترام وتقدير اكثر من كونه حب لزوجه ولا خلتهم ثريا كل ما يرجع ثنيان يحصل منيره معبى راسها على ثنيان لين وصلت فيها ان اخر شي سوته وصلت ثنيان ومنيره لطلاق وان ثنيان اصلا راعي شقق وشبهات وطبعا كانت هاذي الاخيره من ثريا وما سكت ثنيان وسواء مشكله عريضه طويله وكشف كذب ثريا ومحمد اللي ما قصر في ثريا كفخها لين ما قالت امين وعمي زعل عليها ومنيره رجعت لثنيان وكانت حامل بمحمد وتعسرت ولادتها وبغت تموت وبعد معاناة ولدت وكانت اول واخر ولاده ولا قدرت منيره بعدها تحمل وكله من اسباب ثريا وحاول ثنيان يعالجها يمين يسار بس ما فيه فايده لكن ثريا قدرت انها تحوس سيف على ثنيان وصاروا مايكلمون بعض شهور وتزوج ثنيان على منيره وانهبلت هالخبله زود وخربت زواج ثنيان ومشاعل وفضحتنا بالعالم
وزعل ابوي عليهم وقطعهم سنتين وبعد سنتين رضا ورجعهم وهي اللي كرهت بندر وسيف في ثنيان وصاروا ما يتواطنون والاوضاع رسميه
وطبعا مشت الايام ومرت وبدت تخف العداوه بس ان ثريا ما وقفت كل ما تشوف ثنيان تغثه وابوي عشان خاطر عمي وعياله مخليها وساكت
الترف : اهبي يا وجهها وش تبي ذي
ثريا: هي اصلا من يوم حنا اطفال ما تطيق ثنيان ولا يطيقها ومشاكلهم كثير بعدين اقولك سوالفهم
الترف : تدرين حسيت انها قلبت راس منيره علي
رهام: ليش
الترف : كذا احسها لها فتره ما تطيقني مدري وش فيها
رهام : لا منيره عاقله ما تسمع لها يمكن متضايقه من شي
الترف : يمكن
رهام : بس بعد انتبهي
الترف : ما عليتس
...............••............
في بيت ابو محمد
عند منيره اللي كانت عند ابوها تتطمن عليه وكانت ثريا موجوده : هاااه وش صار معك
منيره: وش يصير معي
ثريا : ببرود كذا
منيره: وش فيك
ثريا : اشوفه امس طول وقته وعينه على ذا السويده وما درا بك وانتي تفرفرين حوله
منيره: وش اسوي له يعني انقز عيونه
ثريا : لا ياخبله نقزي ذا السويده من بيتك خليه يطلقها وتذلف
منيره : ثريا ماله داعي ذا كله رجال ومتزوج على سنة الله
ثريا : يا خبله معك وقت ومعك فرصه ترجعين بيتك وزوجك انتي اغلاهم عند ثنيان يسمعك وهو مغمض ابد بس قولي ان الترف ما تحترمك وانها تغلط عليك والله انه ليرميها رميت الكلاب
منيره : اكذب عليها
ثريا : حبيبتي اكذبي عادي ان لم تكن ذيب اكلتك الذيابه على بالك هي متقطعه بحبك تبي بس لين تمكن منه وترميك برا انتي اول وحده
منيره لللي دق محمد يقولها تطلع : بعدين ياثريا
طلعت وهي بالها مشغول ركبت سيارة محمد وهي تفكر
محمد : منيره وش فيك
منيره: هاه مافيني شي انت قول لقيت الرقم
محمد : لا ما لقيت اتوقع اني بقدم بلاغ
منيره: انتبه لا يدري ثنيان
محمد : لا ما عليك منتبهه
................••............
في بيت ثنيان
ثنيان وصل هو مشاعل اللي فرحتهم ماهي بسيطه
دخل وهو يشوف مي ترتب : ثنيان جيت
ثنيان: ايه ايه اشطفي ذا المويه عن الطريق
مي وهي تنظف المويه : وش قالو لك
ثنيان : حمدلله بخير ، منيره ما جت
مي : لا
ثنيان: والترف وين
مي : فووق
ثنيان: مشاعل اطلعي يلا بشويش لا تعبين نفسك
مشاعل : طيب
طلع ثنيان ومشاعل ورمت مي المساحه : ماشاء الله وحده طالعه وحده تدلع والثانيه داقه حنك ومي تكرف
راحت مشاعل لغرفتها وثنيان اللي اتجهه لغرفة الترف وفتح الباب : اووه رهام هنا
رهام: ايه جيت ادورك بس واضح انك مب فيه
ثنيان: كنت بالمستشفى
الترف : مشاعل معك ! امس كانت تعبانه
ثنيان: لا مشاعل الحين يبي لها راحه على اصول
رهام : ليه !
ثنيان ببتسامه : حامل بتؤام
صرخت رهام بفرح ونطت الترف معها : والله
ثنيان وقف : هاااه بشويش عليها بشويش
رهام : مبرووك
الترف : مبروك
طلعوا لمشاعل بحماس وضحكت مشاعل اول ماشافتهم وهو يحضنون ويباركون لها
الترف : والله اني فرحة لتس
رهام: اي والله وناسه مره
الترف : ايه يا حبيبتي لتس واحد ولي واحد
مشاعل بضحك: لا والله انا اتعب وانتي تاخذين روحي جيبي لك واحد
الترف بضحك : بنشوف يا شعيله
ثنيان اللي كان وراهم وهو مبتسم : ايوه يا شعيله انتي ارتاحي وانتم تعالوا
الترف ورهام طلعوا وهم مبسوطين
وجلس ثنيان وهو ينزل ادويته وجاء عمر يركض بفرح : بابا ماما بتجيب بيبي اثنين
ثنيان: ايه يا بابا وبتستانس معاهم وتلعب معاهم
عمر: زيي انا وحمود
ثنيان: ايوه زيكم
مي جات : وش يقول عمر!
رهام : مشاعل حامل بتوأم
انقلب وجهه مي بضيق وزعل وراحت وجات بعدها منيره : ثنيان محمد يقولي كلام ما فهمته وش يقول
ثنيان هنا شال هم من جد وجات الترف بقصد انها تفرح منيره معهم ونست وضع منيره : مشاعل حامل بتوأم
منيره اللي انصدم وجهها وابتسمت بضيق : ماشاء الله الله يهنيها
ثنيان اللي يراقبها ويراقب غرفة مي مايدري من يواسي بالضبط
راحت منيره وهي حاقده ان الترف تزف لها ذا الخبر وكأنها تبي تقهرها
وقف ثنيان وراح ورا منيره
الترف : وش فيها
رهام: كلهم تضايقوا
رفعت الترف كتوفها بصدمه
رهام: خليني اروح احسن
الترف : زين
................••............
في غرفة منيره
اللي بكت ودخل ثنيان وهو يمشي بشويش : منيييره
منيره هالمره ما مسحت دموعها بالعكس زادت
ثنيان انفجع وقرب وهو يحاوط كتفها : افا يا مناير ليه تبكين وش يبكيك ما عرفتك الا تفرحين لمشاعل
منيره لفت : من قالك ماني فررحانه الا فرحانه لها بس مقهوره على نفسي
ثنيان باس راسها : افا بسم لله عليك من القهر وشوله تنقهرين
منيره: ليه انت ما قلت لي ليه تخلي الترف تقول وهي كأنها تشمت فيني كأنها تقول شوفي هاذي مشاعل وبكره انا
ثنيان انصدم : منيره وش ذا الحكي ماخبرتك هذا تفكيرك منيره اللي صار مكتوب وهذا رزق كل انسان وبعدين الترف ما قصدت تشمت كانت تقولك عادي
منيره: من متى كنا نتكلم وانت فيه !؟ من متى كنت تسمح ان احد يقول عنك مثل هذا الخبر ولا خلاص جات هالترف واعمت عيونك
ثنيان عجز انه يفهم لغتها : منيره ماني فاهمك مدري وش مضيقك لكن انتي اول وحده كنتي مع الترف وتعرفين طبعها وش تغير الحين !الترف سوت شي ؟؟
منيره وخرت يده وهي تشهق ببكى : الترف تمحيني يالثنيان وانت ولا تدري
انهارت وهي تدخل الحمام وثنيان اللي انصدم ما يدري وش السالفه ولا وش الخبر كان يعرف منيره اكثر من نفسه مستحيل تبكي عشان احد او توصل هالمرحله الا ان الترف مسويه شي
راح ثنيان لمنيره:منيره قولي لي اذا الترف غلطت بكلمه وحده عليك قولي لي
منيره اللي بلحظة غضب قالت : ما خلت ولا شي ما سوته وانت ماراح تسوي لها شي لو بتحرك نصرت مي لكن ينصرنا الله
هالكلمه بس فجرت ثنيان وانفجر من الغضب طلعت وهو شاد على جرحه بغضب متجهه للترف
................••............
في غرفة الترف
اللي اخذت جوال مشاعل وهي تتصل على سلوى ونوره وتسولف معهم
الترف : عاد اقولتس جلست من الصبح للمغرب انتظر اشوف ولا شفته وكل ما اسأل منيره تقولي نايم ونايم
سلوى: الله لو انا منتس دخل
نوره: قولي عاد يوم شافتس وش سوى
الترف : اسكتوا تكفون توقف قلبي لكن مستحيل اخضع يجلط ذا الرجال يجلط
نوره: الترف وش رايتس تكلمين معه دام كل اموركم بخير
الترف بمزح وخقه : وين الخير وحنا نعرف لسان هالشايب
( كانت تقصد ان لسانه حلو وهي تعودت تقول الشايب )
وشهقت : اسكتوا بغيت اقوله عن البقاله وعايض حمدلله اني سكت ولا جبت العيد
سلوى اللي كانت على المايك : حسبي الله عليتس وش بتقولين رايحه اشوف وش ردة فعل عايض اللي يحبني يوم تزوجت
كانت الترف بترد وكانت بتنفي ذا الحكي لكن كانت هاذي اخر كلماتها لما ضرب ثنيان الباب بغضب بعد ما سمع كل شي بأذنه وهو يقول: لاااا ياللي ما تستحين لا يالواطيه
في لحظة غضب سمع ثنيان كل شي بالحرف في لحظة غضب قال كلامه في لحظة غضب اثبتت الترف لثنيان كلام منيره وهي تمزح ما درت بوجوده اتسعت عيون الترف بصدمه لكن تسكرت بألم من كف ثنيان على خدها
ثنيان اللي سحب حمالة اليد اللي كانو لافين يده بها ورماها وهو يسحب الترف بغضب لوجهه : بأي وجهه تسوين ذا الافعال فيني وفي بيتي بعد بأي وجهه
الترف لاول مره تواجه مثل هالعصبيه ومثل هالعنف بالاخص مع ثنيان اللي على كثر ما سوت فيه ما عمره رفع صوته كانت تبي تتكلم وتبي ترد بس ألجمها بالكف الثاني
منيره كانت على باب غرفتها وهي ما توقعت ان بيعصب كذا كانت متوقعته معصب عشانها تحركت بتروح لهم بس رجعت وهي تبكي لغرفتها وقفلت الباب
مشاعل اللي فزت على الصراخ وهي ماتدري وش السالفه فتحت الباب كانت اكبر صدمه ان ثنيان يضرب الترف
ركضت مشاعل وهي اول مره تحس انها ودها تاخذ احد من يد ثنيان سحبت ثنيان لكن صرخ عليها وعيونه مثل الدم : انقلعي برااا
طلعت مشاعل تركض لغرفة منيره المنقذ الوحيد لترف
فتحت الباب : منيره اللحقي مدري وش فيه ثنيان يطق الترف اركضي
منيره اللي كانت تبكي صدت ودخلت الحمام وتركتها ومشاعل انهبلت ما تدري وش تسوي رجعت تركض لمي اللي كانت تناظر بصدمه وفي نفس الوقت نصر بس مي بعد ماساعدتها بكت مشاعل وهي ماتدري وش تسوي ماكان فالبيت الا صوت كفوف ثنيان وصراخه والترف اللي ما تسكت هالمره سكتت
.................••............
في ديرة الترف
عند سلوى ونوره اللي كانو على الخط فزوا برعب وهي ينادون بس ماسمعوا الا صراخ ثنيان وضربه
سلوى اللي رمت كل شي وركضت وهي تلبس عبايتها ونوره وراها تبكي وتنادي على الترف
دخلت سلوى بيت ابو الترف وهي تبكي: صالح صاااالح
فز صالح اللي كان نايم : سلوى وش فيتس
سلوى : ثنيان ذبح الترف
صالح : هااااه
سلوى: ألحقها ألحق اختك يا صالح
صالح اللي فقد نفسه وركض وهو يركب سيارته وركبت سلوى ومعه وهو يصيح فيها ويسألها بس جمدت سلوى وهي تبكي : مدري مدري كنت اكلمها ... ماقالت السبب بس قالت اللي صار
.
.
انتهى البارت🌟