تهزمني السمراء وانا نّد الفرسان

بارت

«البارت التاسع والعشرين»
.
.
في بيت ثنيان المغرب
نزل ثنيان ومشاعل ومنيره اللي ماتدري وين تناظر بالضبط تشيل هم مشاعل ولا الترف
جلسوا ونزلت مي معاهم للقهوه
مشاعل: وينها الترف
منيره: محمد يمه روح نادها للقهوه
ثنيان : لا لا خلوها تنام تعبانه
مشاعل: لا فيها شي
منيره هنا طاح قلبها وتوقعت الترف ممكن تكون حامل لكن قال ثنيان : لا مافيها شي بس ما نامت زين امس
ثنيان يقصد زواج اخوها وهم ماعندهم خبر منيره ومي طارت عيونهم بغضب ومشاعل انتبهت لهم وابتسمت وهي تدري ان زواج اخوها امس وهي تقول بنفسها ( حمدلله ياربي اللي بردت غيرتي عليه وطمنت قلبي )
تقهوى ثنيان وطلع لعجاج
.................••............
في حارة عجاج
كانوا عندهم مثل الليله او العاده ان في يوم من الايام يكون فيه عشاء جماعي لكل الحاره وكل واحد يجيب معاه شي وثنيان عارف هاليوم وجاء وهو جايب معاه بعض الاشياء
عجاج: كنت متوقع انك مابتجي
ثنيان : وافوت ذا الجمعه معصي
عجاج : زين
ثنيان: كأنك معصب
عجاج : ايييه معصب ياخي
ثنيان: اوف اوف وش فيك
عجاج: ياخي معاد بروح معك لذيك الديره المشؤمه
ثنيان: اي ديره وش بك انت
عجاج من امس الساعه 12 لين الحين مرت 18 ساعه وانا اعاني من صداع فجر مخي بسبتك انت وهالسمراء وهالخبله اللي عندهم حسبي للله عليكم كلكم
ثنيان ما فهم شي : عجااج اخذذ نفس واشرح زين
عجاج جلس وهو ماسك راسه : ابد ذابحتني الفزعه والنخوه فازع معهم بودي الصحون مدري وش لقفني اوديها لا هو زواج اخوي ولا ابوي ولا لي فيه صله لكن وش ؟؟اللقافه ياعجاج
ثنيان : وش صحونه وش تخربط
عجاج: وديت صحون العشاء مع عايض وقال حطها بالغرفه ورحت الغرفه ... قال السالفه وختم وهو يرفس ثنيان : فالاخير طلعت خبله من مخبلهم تحسبني ذيب مدري جني جعلها بالسكني اللي يفتر بها لين يفتر مخها مثل مافرت مخي
ثنيان اللي كان يسمع بهدوء وفجاءه انفجر وهو يضحك بكل صوته وعجاج يناظره بقهر
ثنيان :ههههههههههههههههههههههههههههههههههههههههههههههههه ههههههه من قلت لي نوره تقول
عجاج : ايييه يا تبن
ثنيان :ههههههههههههههههههههههههههههههههههههههههههههههههه ههههههه والله ما اخبل منك انت وياها الا عايض
عجاج:وش اللي يضحك اقولك فجرت مخي فجرته
ثنيان وقف وهو يبوس راسه: بسيطه يالخال ما خبرتك دلوع الله يرحم حال السطوح اللي تطيح منها ولا عليك الحين فرقت على صحن
عجاج: وش دخل السطوح
ثنيان : ولا عشااان بنت طقتك سويت سالفه
عجاج: الشرهه مب عليك
ثنيان : مليون ٪ عليك الشره تدري ليه لانك جالس تناقشني بضربه بسيطه حتى ماطلع لها دم ولانك بعد تناقشني في ناس احبهم يعني عندي ضربهم مثل العسل ولانك مسوي سالفه على موضوع تافه
عجاج وقف وهو ياخذ صحن فاضي وخبط ثنيان به بكل قوته ومسك ثنيان راسه بألم : وجععع
عجاج: لا تناقشني الموضوع تافه
عيد : خير وش بلاكم انهبلتوا تصفقون بعض
سالم بضحك: عادي عوايدهم
ثنيان رمى الحذيان على عجاج وهو ماسك راسه
وجاء ابو سعيد: الحييين ثنيان انت حريمك 4 وجايب من المطعم
ابو سالم : وشوووله الخساير ماتقدر تقول اطبخوا
ثنيان: يا رجال وش بلاكم على حريمي الله لا يعيدها ساعتن دريتوا بهم
ابو حمود : اي وولله وحنا صادقين وش عذرك
ثنيان : اول شي اذكروا الله كلكم مالي خلق اطلق
الكل : ماشاء الله
ثنيان: والله انا ناسي عشاكم وقالي عجاج وانا جاي ولا عاد معي وقت مريت وجبت لكم عشاء وصل ولا لا
ابو سالم : وصل
ثنيان: اجل سموا بالرحمن وكلوا مالكم باللي سواه
تجمعوا الكل على الفرش والكل ياكل ويتعشى ومبسوطين وعجاج اللي نسى وجعهه وراح يطقطق مع ثنيان والباقين
وبعد ما خلصوا جاب عيد العود وتجمعوا
وقال عيد : وش تطلبووون
عجاج : بالله جب لنا شي حزييين
ثنيان: وشو حزينه لا يا حبيبي جب شي فالمخ بلاش حزين وحزن مكتأبين خلقه
ابو حمود : جب شي قديم ياعيد
عجاج : تكفى يا عيد غن من بادي الوقت وهذا طبع الايامي
ثنيان : اقول اقعد يارجال عيد غن لنا على ذكر اللقاء مريت اسلم اهداء لسمر
الكل : ايه ايه
عجاج : الله لا يعطيهم العافيه يوم زوجوك
ثنيان مارد وهو يدندن مع عيد ولف يدق رقبه لعجاج ويضحك: يا اسمر لنا الله
................••............
في بيت ثنيان
عند الترف صحت ونزلت وهي تقول : الله تقهوون وما علمتوني
مي : اييه نايمه بالعسل
الترف : خليتس على جنب ما حكيت معتس
مشاعل: بغينا نصحيك ووقال ثنيان لا تعبانه خلوها تنام
الترف جلست : اي والله تعبانه مره
منيره: سلامات وش متعبك
الترف ابتسمت : صبي قهوه وبعلمتس الحين
رهام ونوف وفجر اللي دقوا الباب وفتح محمد دخلوا : سلام
وقفوا الكل يسلم وهم يعبرون لترف عن شوقهم لها
صبت منيره وقامت الترف تسولف لهم عن الزواج وواللي صار والكل كان مذهول ان ثنيان يرقص عند الحريم ! والكل صار يضحك على مقلبها الصبح فيه وعلى رده الغريب عليها
الكل كان عادي بس منيره اللي حست ان قلبها احترق لكن قالت بنفسها ( يا رب طمن قلبي يارب وفكني من ذا الغيره )
مي وقفت بغضب : من زين سالفتك تقولينها انتي وش قصدك هاااه ! تبين تورين انك مشيتي ثنيان على كيفك
رهام : نعععم وش فيك من قال انها مشته على كيفها وبعدين من زمان الكل يدري ثنيان يحب الرقص والمقالب لكن جيتي انتي وكتمتي على انفاسه
مي : انااا كتمت على انفاسه ؟ اقول وخري بس واطلعي معها لكن هين يا سويده ان ما قلت لثنيان كل شي وعلمته وشلون مستحقرته ما اكون مي
الترف : اقول انتي هييييه ابلعي لسانتس احسن لتس تراني احاول اتغاضى عنتس عشان خاطر ثنيان وعشاني وعدته ما اتعب نفسي ولا اقلق راحتي لا تخليني اخلف وعدي واتوطى ببطنتس وتعرفيني ما اعرف اقول يا ثنيان، امسكتس انا واحوس وجهتس وان كنتي ناسيه نذكرتس
الترف كانت تصوب في اكثر من جهه منها تهدد مي علني ومنها تصرح ان ثنيان يدور راحتها وهي هالكلام خصيصا توجهه لمنيره
مشاعل اللي كانت مبسوطه ومتفاهمه جدا مع الترف وعادي عندها
نوف : يرحم امتس يا مي خليتس في نفستس نبي نستانس مالنا خلق
الترف ضحكت لنوف : الله عليتس يالسييين
نوف : اعجبتس
فجر اللي كانت ساكته وباين حزنها والباقين يسولفون
منيره اللي اول ماسمعت كلام الترف صدع راسها ( ايه ثنيان كان يخلي منيره توعده انها ما تعب نفسها لكن هذا لما كانت حامل ! ) انهبلت وهي توقف : انا بسوي العشاء
الترف : اجل بنساعدتس
الكل قام معاها ومشاعل اللي كانت تساعدهم وهي جالسه ..................••............
وعند ثنيان
الليي بعد ما انتهت السهره طلع هو متجهه لبيته دخل وهو يسمع اصوات وضحك راح للمطبخ : ماشاء االله ماشاء الله الكل هنا
وقفت فجر وهي تسلم عليه وهالمره ثنيان سلم عليها بحراره : كيفك يا فجر كيف امك
الترف بإستغراب ( امها ، وين اللي يكرهها ) ماكان لترف خبر بسالفة بندر والكل سكت بضيق
وقالت فجر: ابد حابسه نفسها بغرفه وعلى سجادتها
ثنيان مع انه مايطيق ثريا بس مهما كان حزين على وضعهم : الله يعين
ثنيان: وابوك وينه يجي ولا لا ؟!
فجر : يجي ويروح
ثنيان : لا اله الا الله
منيره: ثنيان العشاء جاهز تبي تتعشى
ثنيان : لا لا تعشيت مع عجاج تعشو انتم بالعافيه
رهام : نقنق معنا
ثنيان: بالعافيه والله مره شبعان! وين العيال
مشاعل: بغرفتهم
طلع ثنيان لهم وهو من زمان عنهم ومن زمان ما جلس معاهم
وبعد العشاء راحت الترف وهي تفرش بالحوش وتجهز الشاهي والمكسرات
رهام: وش تسوين
الترف: بنكمل الجلسه هنا انا اما احب اجلس بالبيت
نوف : بس امي تقول تعالوا
الترف : اصلا قولي لامتس تجي
نوف : والله ما تجي بذا الوقت اصلا ما رح تخلي شوق بلحالها
الترف اللي ماتطيق شوق لكن قالت : خليها تجي هي وشوق
رهام: ما بتوافق
الترف : ماعليتس خليها علي
طلعت الترف وهي تنادي منيره ومشاعل يجون وطلعت لغرفة العيال فتحت وهي تشوف ثنيان اللي يلعب معاهم بلاستيشن
وقف قدام التلفزيون ببتسامه ووقف ثنيان: وش بلاتس وقفتي كذا وخري
الترف : حولت عيونكم من ذا قوموا تعالوا معنا
عمر:وين
الترف : بنسهر برا
محمد : بس نبي نلعب
ثنيان بانزعاج: وخري وخري لا تخسريني
الترف لفت وهي تفصله ببتسامه وقف ثنيان بغضب : انهبلتي انتي
الترف : لا بس حرام شوف عيونهم كيف هذا وهم وراهم بكره دراسه
ثنيان اللي كان بيهاوش بس تذكر وهو يناظر الساعه: صح صح قوم يلا يلا ناموا تأخر الوقت بكره تلعبون
محمد : مافينا نوم
ثنيان: اقول يلا بس
قاموا وهم زعلانين وندمت الترف : يعني دام مافيهم نوم خلهم يلعبون شوي
ثنيان لف بغضب : لا والله
الترف : يعني
ثنيان : اقول يلا بس وانتم يلا
طلع ثنيان بعد ما طفى النور وطلعت الترف : ثنيان ثنيان اسمع
ثنيان لف : من سمح لك تفصلين اللعبه
الترف اللي تورطت : امزح
ثنيان: لا والله
الترف ضحكت بورطه : لاوالله ما امزح بس يعني عشان تتعب عيوونك شوف كيف صارت حمرا حرام والله عيونك حلوه
برد ثنيان وهو يبتسم بخقه : والله
الترف ( يالليل الحين وش يفكني ) : اااه ليه نسيتني اسمع كنت ابييك تدق على دلال تجي تسهر معنا
ثنيان لف بملل :وش جاب دلال الحين كنتي ماشيه صح
الترف : المهم كلمهم وقلهم حتى شوق
ثنيان : طيب
الترف : يلا اسبقني وبلحقك
اخذ ثنيان جواله وهو يدق على دلال اللي استغربت العزيمه بس قالت طيب
والترف رجعت لغرفة محمد وعمر
الترف: قوموا بكلمكم
محمد : وش فيك
الترف : اسمعوا معكم ساعه ألعبو لين تشبعون وتقفلون وانا ماني مخليه ابوكم يدري بس لا تطلعون صوت
عمر وقف بفرح: ووالله
الترف : والله بس بدون صوت
محمد : بس اخاف ابوي يدري ويعصب
الترف : ماعليك عندي واذا عرف انا ادبركم
محمد ركض وهو يشبك البلاستيشن وطلعت الترف وهي تضحك ونزلت : ما جت دلال
نوف : لا طلع خالي برا ينتظرهم
اخذ الترف عبايه رهام ولبستها وطلعت وهي تشوف ثنيان واقف قربت ووقفت : ما جت
ثنيان: بسم الله الرحمن الرحيم وش جايبك انتي
الترف : بنتظر معك
ثنيان: ليه بياخذني حرامي
الترف : انت ما ينخاف عليك من الحرامي ينخاف عليك من الحريم
ضحك ثنيان : الله يقالك تخافين علي من الحريم
الترف : يعني نسوي واجبنا من ناحية انك رجلي
ثنيان : يصير خير على طاري الواجبات
جات دلال : وش فيكم واقفين هنا
ثنيان: ننتظركم
سلمت الترف عليها: وين شوق
دلال : نايمه
ثنيان : زين ادخلي
دخلوا وجلسوا والترف اللي كانت تصب الشاهي
ثنيان: مي وينها
منيره: فوق الظاهر
ثنيان: ليه مانزلت
منيره: مدري
وقف ثنيان واتجهه لغرفة مي طلع فتح الباب وهو يشوفها تتجهز بتنام
ثنيان : وينك ما نزلتي تحت
مي : وين انزل
ثنيان: ما بتسهرين معنا !؟
مي : ما دريت اصلا وحتى لو دريت نزلت ولا مانزلت وش يفرق
ثنيان جلس مقابلها: وش ذا النبره وش ذا الكلام ! كيف وش يفرق
مي اللي نزلت راسها بكيد وهي تمثل الضيق : اللي يهمك وجوده منيره اللي ماتبيها تضيق ولا تزعل ومشاعل اللي لازم تكون قدامك عشان تشوف مرتاحه ولا لا والترف اللي تاخذ منها وعود عشان ما تتعب نفسها ولا تزعل
لكن مي اللي كل ما تضايقت طلعت حرتك فيها ما تلزمك في وقت وناستك
انصدم ثنيان من كلامها يعني ما عمرها تكلمت كذا معاه
ثنيان رفع راسها: افا يا مي وش ذا الحكي انتي غاليه علي ويهمني وجودك اكيد كيف تقولين كذا اصلا كيف تفكرين كذا صح ان احيان تطلعين بحركات تستفزني بس مهما كان احبك واغليك ومستحيل اني ارضى زعلك انتي بعد زوجتي وحبيبتي
مي : ايه تلعب علي وتسكتني لكن الفعل غير
ثنيان : مي انا اقول وافعل لا تجبريني ازعلك وانا مابي ازعلك
مي : خلاص طيب
ثنيان: يلا قومي انزلي معي واتركي ذا التفكير وجربي تصفين نيتك وتسمعين كلامي ولا تسوين مشاكل وتعرفين وش كثر احبك
وقفت مي وهي متعمده تستعرض بلبسها قدام ثنيان اللي كالعاده طارت عيونه بها : ابشر وانت معك حق بس ابدل لبسي تعرف مقدر انزل فيه قدامهم
ثنيان اللي كان يناظر فيها بنفس نظرة الاعجاب اللي عرفتها مي منه وقف وهو يمسح وجهه : يلا انا بسبقك
نزل ومي متوقعه الا متاكده انه الليله بيرجع
.................••............
نزل ثنيان لهم وكملوا سهرتهم وسوالف وضحك وناسه والوقت يمر وثنيان جالس يراقب الترف وسوالفها وكيف انه عمره ماشاف زوجاته وخواته جالسين كذا وبذا الوقت ويسولفون ويضحكون بذات وهو موجود
دلال : خلاص يالترف الله يسعدك موتينا ضحك خلينا بنروح لا تصحى امي وتخاف
الترف : تونا بدري
دلال : اي بدري الساعه 2 خلاص .
رهام :من جد حتى اني ما قلت لامي اني طلعت
ثنيان: اجل يلا قبل تصحى
وقفوا كلهم وراح ثنيان يوصلهم والترف اللي شافت منيره بتجمع الاغراض وسبقتها: لا والله ما تلمسينها انا جبتها وانا بشيلها
منيره: بساعدك
الترف : لا والله خلاص انتي تعبتي روحي ارتاحي
اخذت الترف الاغراض وهي ترجعها لمكانها ببتسامه ومشاعل اللي طلعت بهدوء لغرفتها وهي تشوف مي اللي سبقتها تركض وهي اللي تنتظر ثنيان اما الترف اللي راحت لغرفتها وهي تبدل وتنسدح متوقعه ان ثنيان بينام عند منيره ولا مي فالنهايه كانت كل ما تناظره تحصله يناظر مي بنظرات اعجاب
ارتمت وهي تقول ( بالطقاق يناظرها ولا ما يناظرها انا وش دخلني ) ثنيان اللي كان واقف وهو يناظر في الاربعه الغرف وهو هالليله بذات ما يدري وين يروح
اذا كان بيسمع لضميره فهو بيروح لمنيره واذا بيسمع لرحمته بيروح لمشاعل واذا بيسمع لنفسه بيروح لمي واذا بيسمع لقلبه بيروح لترف
اخذ نفس وهو يستسلم استسلام تام لقلبه
كان شايف حركة رجول مي اللي من تحت الباب باينه وهي تنتظر ومنيره اللي فتحت الباب بشويش وسكرته وهي على بالها مو منتبه لها وهي للي بعد تنتظره اما مشاعل اللي كان شايف انها تعبانه ويدري انها بعد ممكن تكون تنتظره لكن توجهه لغرفة الترف فتح الباب وهو يدري انها ابد ما تنتظره وفعلا حصلها نايمه دخل وسكر الباب وهو يناظرها ( الله يا ثنيان تارك وراك 3 ابواب تنتظرك والكل يدور رضاك وجيت عند ذا المجنونه )
تقدم وجلس وفتحت عيونها الترف: ثنيان !
ثنيان: ايه
الترف اللي بالحقيقه ماكانت نايمه وبالعكس بتموت من الفرح لانه سحب على مي وجاء هنا : غريبه وش جابك
ثنيان : الحين بسألك شي واحد بس
الترف : وشو
ثنيان: ليه ما انتي مثلهم !
الترف جلست : شلون يعني
ثنيان : ليه مب مثل منيره ولا مشاعل ولا مي
الترف اختفت ابتسامتها بغضب : انا ماني مثل غيري حط هذا الشي في بالك انا الترف بنت ابوي لا توقع اني بصير مثلهم
ثنيان اللي كان عنادها نظرتها القويه اختلافها عنهم كلهم يجيب راسه ويخليه يحبها زود : انا ما سألتك انقص في قدرك او قدرهم انا اسألك ليش انتي عندي ماتشبهين احد
الترف ماكانت تدري وش تحدد كلامه سب او مدح لكن قالت : لانك عندي ما تشبه احد
الترف لانها ماتدري هو وش يقصد قررت تجاوب عليه بنفس جوابه ان كان مدح بيفرح وان كان سب بيزعل
ابتسم ثنيان وهو يقرب : تصريحاتك اليوم قويه
الترف ماردت وهي تشوف عيونه اللي هالمره صدق ركزت فيها ركزت بنظرتها للي مليييانه حب اول مره تشوفه لفت بترجع لكن وقفها ثنيان اللي حاوط خصرها بسرعه وهنا حرفياً جمدت الترف ما قدرت تسوي اي شي او تعانده .....فالنهايه استسلمت له كونه زوج حقيقي... 🌚
.................••............
في غرفة منيره
اللي كانت شايفه ثنيان لما دخل غمضت بضيق وهي للحين كانت متوقعه ان الترف ممكن تكون حامل
جلست وهي تعوذ من ابليس وتستغر وتدعي ان الله يطمنن غيرتها ................••..........
في غرفة مي اللي سمعت صوت باب الترف لما تسكر وانهبلت حرفياً انهبلت كان عندها ان ثنيان بيجي عندها وخصوصا نظراته لها ضربت جبينها بغضب : فكري يا مي فكري لازم اطلع ثنيان من عندها لازم لازم وش تسوين يا مي وش بتسوين
طبعا اشتغل الحقد عند مي وهي تفكر وش بتسوي وش بتسوي ومر الوقت وصارت الساعه 3 ووقفت وهي تناظر مراية التسريحه بغضب لما ما حصلت فكره بعدت كل العطورات واخذت اثقل عطرين وهي ترميهم بكل قوتها وفي ثواني تفجرت المرايه قطع قطع وطارت شظايا منه على يدين مي اللي غطت وجهها فيه وصاب وجههها بعض الجروح واخذت العطور وهي تخبيها وهي تصرخ وكان الجروح في يدها كثيييره
صرخت بكل صوتها وهي جالسه بين القزاز
طلعت منيره الللي تركض بكل قوتها وبرعب فتحت الباب وهي مفجوعه شافت مي جالسه وهي تبكي وتصرخ ركضت لها وهي تسمي عليها وتحاول تطلعها
مشاعل اللي صحت هي بعد بفجعه جات وهي مصدومه وصرخت: وش صااار
مي : مدددري مدري نادي ثنيان
الكلل كان ينتظر ثنيان لكن ثنيان مادرى باللي صار
ركضت منيره وهي تدق الباب : ثنييييان ثنييييان
بعد شوي طلع ثنيان بفجعه : منيره وش فيك
منيره: ألحق مي
ركض ثنيان بعد ما سكر الغرفه ومنيره وراه
اما الترف ما كانت تدري وش اللي صاير بالضبط معها عشان تدري وش صاير برا
دخل ثنيان غرفة مي والصدمه ان القزاز بكل مكان ومتفتت صغاار ومي بالنص وجهها فيه دم ويدينها اتسعت عيونه بصدمه وهو يركض لها رفعها بسرعه وهو يبعد القزاز منها
ثنيان: مي وش فيك وش صار وش اللي كسره
مي اللي حضنت ثنيان وهي منهاره تبكي : مدري مدري سمعت صوت وقمت بشوف وش فيه لكن فجاءه انفجر في وجهي انا خايفه يا ثنيان
الترف جات على هاللحظه وهي تشوفه حاضنها ومتجاهل وجود الكل رفعت راسها مي وشافت الترف ابتسمت لها بمكر و اتسعت عيون الترف بغضب وهي مصدومه وش ذا اللي مسويته بنفسها
رجعت غرفتها الترف بغضب
منيره: ثنيان ودها للمستشفى
ثنيان : عطيني عبايتها
اخذها ثنيان وهو يساعدها وقال: اطلعوا من الغرفه وسكروها لين اشوف وش صاير
طلعوا وراح ثنيان ومي اللي تبكي وتتباكى وثنيان المصدوم من اللي صاير وهو متشتت
منيره : كيف صار كذا
مشاعل: مدري يمكن حراره ولا شي
منيره : لا حول ولا قوة الا بالله تعالي بنطلع
مشاعل : غريبه ما صحت الترف
منيره: مدري والله
راحت منيره تتفقد العيال ودخلت مشاعل وهي تناظر الغرفه وصدت بتمشي بس وقفها ان العطور اللي على التسريحه كللللها مب موجوده حتى المكياج وتسريحه مي كانت دايم مليانه عطورات ومكياج لفت تناظر ماشافتت ولا شي متكسر ولا فيه اثر قربت وهي تفتح الدرج وشافتها مرتبه فيه وشافت فيه عطرين متكسره مرميه تحت رجعت وهي مصدومه من مي ( لا يا الحيييه كل ذا عشان ثنيان عند الترف ما انتي بسهله لكن هين )
طلعت مشاعل ورجعت لغرفتها وهي للحين بصدمتها
اما الترف اللي شافت مي وضحكتها وحست نفسها انها انذلت وانقهرت كيف تسوي فيها كذا كل عشان ثنيان عندها وفي مثل هالليله بعد انهبلت الترف وهي ودها تكفخها لكن اخذت نفس وهي تقول ( هييين يامي هيييين انا اوريك كيف اللعب هين )
................••............
في مكان ثاني عند العرسان
سلوى وصالح اللي طلعوا من الديره وهم ناوين ياخذون جوله سياحيه فالممكله وقف صالح بعد ما اخذ فندق في مكه ونزلت سلوى وهي تناظر الفندق ببتسامه وانبهار
صالح : هاه عسى جاز لتس
سلوى: اكيد بيجوز ومالي عيني بعد
صالح : افكر إنا نطلع للمدينه ونسكن فيها بس تعرفين ابوي
سلوى :ما همني اكون بقريه ولا مدينه ولا بجحر المهم معك
صالح ابتسم وهو يجلس : اي والله هذا الاهم
سلوى اللي فجاءه قررت تصير سنعه وطارت لشنطتها اللي كانت ثقيله واطرافها فيه زي الحديد شالتها وهي تحطها فوق راسها ومرت بسرعه ومع الاسف ماقدرت تشيلها اكثر وطاحت على صالح اللي صرخ: اااااه
فزت سلوى برعب وهي تسحب الشنطهه من فوقه وقف صالح اللي كان يحوم وهو ماسك عينه
سلوى وهي تشوفه يركض وتركض وراه: صالح صالح وش صار لك والله ما دريت والله
صالح : اااااه ااااه عيني فقعتي عيني
شهقت سلوى بخوف : والله ما فقعتها طاحت الشنطه مادريت
صالح : من قااااالتس شيليها اصلا
سلوى اللي امتلت عيونها صدمه ودموع : كنت بفزع
صالح اللي كان بيموت من الالم لكن عجز انه يقول شي وهو يشوفها كذا : ليه ياا سلوى انا كنت بشيلها بس برتاح
شهقت سلوى لما شافت عينه انتفخت بشكل يفجع : صاالح
صالح : لبيه
سلوى بكت: عينك صدق انفقعت
فز صالح اللي حس انها بدت تضيق وتظلم وشهق اول ماشاف شكلها بالمرايه
سلوى: تكفى بنروح المستشفى تكفى
صالح اللي حس بدوخه لما شاف كيف مرومه : يلا يلا
نزل وهو يوقف تاكسي وراح هو سلوى اللي تبكي للمستشفى ................••............
عند ثنيان
اللي دخل مع مي الطوارئ وهو يشوفهم يلفون وجهها ويدينها ومي تبكي وسوت مناحه عظيمه ماكان من ثنيان الا انه يحن عليها وتكسر خاطره بعد ما انتهوا اعطوها سيروم وجلس ثنيان وهو يمسح دموعها : مي بسم لله عليك خلاص اهدي انتهى الموضوع بسيطه ان شاء الله
مي : كيف بسيط شوف كيف ملفوفه من كل جهه
ثنيان : لا يا بنت الحلال بسيطه انا شفتها بسيطه انتي لا تخافين
مي : والله خايفه يا ثنيان
ثنيان : افا انا معك ما بيصير لك شيي بس قولي لي كيف صار
مي : مدري والله مدري انفجر فجاءه
ثنيان: الغرفه كانت حاره
مي : ايه
ثنيان: شكلها انفجرت من الحراره
مي : ماعاد بجلس هناك اخاف تنفجر كلها
ثنيان: لا تخافين ما رح ينفجر شي
اانتهى السيروم على اذان الفجر وطلع ثنيان وهو يدق على منيره تفتح غرفة الضيوف اللي تحت وتحط فيها فراش ل مي
................••............
في بيت ثنيان
منيره اللي كانت تجهز الغرفه ومشاعل اللي كانت على الشباك تنتظر وهي تبي تشوف وين وصلت مخاطر كذبه مي
الترف اللي نفس وضع مشاعل بس حاقده من كل قلبها على مي وعلى نظرتها لها وضحكتها شافتهم وصلوا وثنيان اللي راح وهو شوي يشيلها من كثر ما هي لازقه فيه
تكتفت ونزلت ونزلت مشاعل اللي كانت حانه على الترف وهي ما تدري ان الترف اقوى حقدد على مي ومنيره اللي قربت بتمسك مي وقالت : لا لا يديني توجعني
ثنيان كان ساندها عليه مره لما وصلو الغرفه والترف ومشاعل واقفات ينتظرون
انسدحت مي ووقف ثنيان بيبعد وتمسكت فيه : ثنيان تكفى لا تروح خلك معي انا خايفه
مشاعل والترف لا شعورياً ناظروا بعض بإشمئزاز
ثنيان : لا لا مانيب رايح بجلس
منيره: سلامتك يا مي وش قالو لك
ثنيان: جروح بسيطه لفوها وامورها بخير المهم افتحوا تكييف الغرف كلها لا يحتر البيت وتنفجر بعد وحده ثانيه
مشاعل في نفسها ( يا حليلك البيت مولع مب محتر لكن اصبر )
الترف ( هييين افتحوا التكييف لا انفجر انا اعلمك الانفجار يا ميييي اوريك كيف نحتر وننفجر )
تحركت الترف وهي تتجهه للفازه اللي بطرف الغرفه : انا اقوووول لو نطلع كل القزززااز اللي هنا عشان ما ينفجر بعد وتتشوهه مي فوق ماهي متشوههه حرااام
مشاعل: اييه ايييه عاد يووه اذا الجروح تنبشت
ثنيان كان حاس ان فيه تتش فالجو بس ماركز : ايه ايه طلعوها
قربت الترف وهي تسوي نفسها تعرقلت وطيحت الفازه قريب من مي وانكسرت وصرخت : بسم للله وش صار يمممه
ثنيان: الترف وش فيك
الترف :مدري شكلي من كثر ماني شايله هم مي تعرقلت وطيحتها بالغلط
ثنيان : لا اله الا الله سمي بالله وانتي تشيلين
مي اللي كانت لافه وهي ماتبي القزاز بعد يطير عليها
الترف جابت المكنسه وهي تكنس وتنفض المكنسه قدام مي بلعانه : ما عليتس لا تخافين يا ميي انا منتبهه لتس
الكل كان فاهم ان الترف تقصد انها منتبهه لها من ان المكنسه تطير عليها لكن الترف ومي فاهمين ان الترف كاشفه مي
مشاعل اللي حست بكلام الترف ان فيه شي ( يارب تكشفها يارب )
ثنيان: خلاص خلوها ترتاح
لفت الترف بقوه لثنيان وكأنها ما انتبهت وصقعت مي بعصاة المكنسه وهي تقول :صح لازم ترتاح
وصرخت مي :ااااه وجهي
ثنيان: انتبهي يالترف صقعتيها
الترف : اوووه اسفه والله
منيره: خليها شوي نفضي المكان
طلعت الترف ومشاعل ومنيره اللي كانت تعطي مي ادويتها مشاعل مسكت الترف: وش تسوين انتي
الترف : وش اسوي
مشاعل ضحكت : ادري بك كاشفه مي
الترف لفت : في ذمتس حتى انتي شفتيها
مشاعل: وش اشوف
الترف : ملعونة الخير تخيلي شافتني يوم جيت وتقوم تحضن هالثنيان العمى وتضحك علي
مشاعل شهقت : قولي والله
الترف: وربي
مشاعل: ماشفتها بس كشفتها
الترف : كيف
مشاعل : تعالي للغرفه اخاف يسمعنا ثنيان ويقلب علينا
الترف: اي لا يسمعنا ذا الجني وش يفكنا
ضحكت مشاعل وطلعوا للغرفه وقالت مشاعل كل السالفه لترف
الترف : نعبنوا ذا الوجهه ياذا السلقه اهبييي وش ذا الللي مهبوله تشوهه نفسها
مشاعل: ما تعرفينها هاذي حيه حيه بس غبيه
الترف : شكلتس حافظتها
مشاعل: شفت منها كل اللي ما تخيلينه عشان كذا اتوقع منها كل شي
الترف : ما عليه اذا ما وريتها شغلها ما اكون الترف
مشاعل: ابد وتراني اعين واعاون
الترف ضحكت: اقول يا ويل اللي بتحقدين عليه يا مشاعل ماينعرف وش وراتس
ضحكت مشاعل : بارك الله في ثنيان وشغله فهمت التحقيق والبحث الجنائي من وراه
الترف : ما عليه حنا بعد بنصير ضباط
.
.
انتهى البارت💛