تهزمني السمراء وانا نّد الفرسان

بارت

«البارت السابع عشر »
.
.
في بيت ابو محمد عند ثنيان
اللي قفل من منيره واخذ مفتاح وومسكه محمد : وش فيك يا ثنيان وش صاير
ثنيان اللي من الربكه ماقدر يمسك مفتاح
عجاج :وش فيك انطق
ثنيان : رهام طاحت مدري وش فيها
عجاج اخذ المفتاح : وين اي مستشفى
محمد : صار لها شي
ثنيان : مدري
ثنيان ركب وركبوا معاه وطاروا للمستشفى وثنيان اللي طول الوقت يدقدق
................••............
في المستشفى
عند رهام اللي اخذوها المستشفى وكان عندها ضيق تنفس وتألم قلبها كثير وخصوصا ان عندها احتشاء في عضلة القلب
وصل ثنيان ومعاه محمد وعجاج
ام ثنيان : ألحق يا ثنيان اختك بتموت
وقفوا ومحمد بعيد وثنيان ركض لدلال: وش فيها وش صار لها
دلال وهي تبكي وشرحت لثنيان اللي كان متوتر وينتظر وطلع الدكتور اللي قال لازم نتدخل بقسطره ثنيان هنا اختنق وقع بسرعه ودخلوا الدكاتره
وام ثنيان اللي متعلقه فيه وتبكي وعجاج ومحمد اللي واقفين وكان محمد محترق قلبه رفع جواله وهو يشوف ان اخر رساله من الرقم كان قبل نص ساعه ورهام اصلا لها ساعه فالمستشفى معناته مو هي غمض وهو يدعي لها بقلب موجوع
................••............
في بيت ثنيان
الترف اللي هجمت ثريا بعد عليها بالكلام وكانت الترف ما تدري وش السالفه اصلا ولا تدري ان رهام مريضه اسنحبت وطلعت فوق وهي منهاره وخصوصا ان حالة رهام صعبه مرررره مررره مرره
................••............
وبعد ساعات
اجتمعوا سيف وابو ثنيان وثنيان بالمستشفى فالاخير طلع الدكتور : حمدلله مريضتكم رهام كويسه تعدت مرحلة الخطر وسويتا لها قسطره سهلت الموضوع اكثر ان شاء الله يومين ثلاثه وتكون طالعه البيت
ثنيان : طيب يا دكتور وش اللي صار معها بالضبط
الدكتور : انتم عارفين حالة رهام من ققبل وانها لازم تكون حريصه اتجاه اشياء كثير ولكن اتوقع انها ضغطت على نفسها كثير لكن الحمدلله بعد ما سوينا القسطره بإذن الله بتكون بخير وتقدر تمارس اي نشاط بحياتها براحهه بس اللي لازم تكون حريصه فيه الضغط النفسي لازم ما تتعب نفسها وتجهد روحها لان الحركه الخارجيه للجسم ما تأثر زي الحركه الداخليه
ثنيان اللي راح مع الدكتور وهو ياخذ حالاتها ويعرف تفاصيل الموضوع
ومحمد اللي جلس بإرتياح وهو يقول : ياربي لك الحمد ياربي لك الحمد يارب خفف على قلبها الوجع يارب
عجاج اللي سمع واستغرب لهفه محمد ودعاءه بس ما عطى الموضوع شي كبيير
وبعد ساعه كانت رهام بغرفه التخدير ودلال مرافقه لها وقالوا لهم ماله داعي جلستكم
رجع ثنيان يوصل امه وابوه وانطلقت ام ثنيان: كله من بنت ابليس اللي دخلتها بينا هي اللي سحبت بنتي ودخلتها الرقص غصب والله يعلم يوم اخذتها على طرف وش قالت لها
ثنيان اللي ماهو مستوعب: يمه الله يخليك الله يخليك فهميني زين مين سحب مين
ام ثنيان : في غيرها القروييييييه
ثنيان حط يده على راسه : لا حول ولا قوة الا بالله خلاص يمه تكفين فيني اللي مكفيني
ام ثنيان: اييييه ايييه خلها تذبح اختك وانت اركض لها واركض وراها
ابو ثنيان: بسسسس يا حرررررمه بسسسس
سكتت ام ثنيان وفتح ثنيان ازاريره بخنقه
وصل امه وابوه وهو يعطيهم ادويتهم
نواف: ثنيان وش فيها رهام
ثنيان: مدري مافهمت رقصت مدري وش سوت وطاحت وامي طبعا شابه
نواف: خلاص روح انت وانا اتفاهم معها
طلع ثنيان متجهه لبيته دخل وشاف مي ومشاعل ومنيره جالسين والترف مب معهم
منيره فزت: ثنيان طمنا
ثنيان : لا تخافين هي بخير صلحوا لها قسطره وان شاء الله بخير
مشاعل : ما توقعت الرقص بيإثر عليها
ثنيان: وش اللي صار بالضبط
منيره شرحت له كل شي وقال ثنيان: وينها الترف
منيره : في غرفتها
طلع ثنيان وهو شماغه بيده وازاريره مفتوحه فتح الباب وكان مقفل
الترف اللي من كثر مابكت كانت متوقعه ان رهام ماتت سمعت الباب وهي تبكي حطت يدها على اذنها ما تبي تسمع اي احد
دق ثنيان : افتحي الباب
هنا انهارت اعصاب الترف اللي كل تفكيرها في كلام ام ثنيان اللي تكرر انها هي اللي ذبحت رهام ارتفع صوت بكاها وابتدا ثنيان يسمعه وهو يدق الباب والترف اللي دخلت في نوبه صياح فضيعه
راح ثنيان وهو يصوت: مشاعل مشششاعل جيبي المفتاح الاسبير
ركضت مشاعل وهي تعطيها وفتح ثنيان الباب بسرعه دخل وهو يدورها بس كانت الترف تعيش خيال مرعب مختلط بواقع موت امها اللي مرت عليها نفس حالة رهام
ركض ثنيان وهو يشوفها جالسه جنب السرير وهي مسكره اذانها وعيونها وشاده على اسنانها و تبكي
انفجع ثنيان لكن رجع وهو يقول :الترف التررف وش فيك الترف الترف
الترف : ماتت صح مااتت
ثنيان : لا بسم للله عليها لا هي بخير بخير
الترف ببكى: انا مدري وش صار لها كانت معي عادي مدري وش صار
ثنيان : ما عليك ماعليك هي كذا هي تعبانه لا تخافين
الترف : يعني حيه
ثنيان: ايه حيه لا تخافين
الترف وقفت وهي تمسح وجهها : قول لامك انا مالي شغل ما دريت انها تعبانه
ثنيان وقف وهو يمسك يدينها: تدري تدري انك ما تدرين انتي تععالي غسلي وجهك وبكره خير
الترف راحت تغسل ورجعت وهي تبدل بهدو وانسدحت بدون اي صوت كان ثنيان جالس يراقبها رجفتها بهدوء وتقدم وهو يحط يده على كتفها: الترف ماله داعي تخافين
الترف اللي سحبت لحافها عليها وهي للحين منظر رهام بعيونها
انسدح ثنيان بهدوء جنبها وهو عقله مع رهام .
................••............
ومن بكره الصبح فالمستشفى
كان ثنيان ونواف عندهم :دلال ما صحت رهام
دلال: تصحى وتتألم ويرجعون ينومونها
نواف: متى بيصحونها
دلال : على حسب وضعها
نواف : امي والله مقومه البيت ولا هي مقعدته
دلال : ايه ثنيان ترا الترف مالها شغل لا تعصب انت بعد تحوس الدنيا هي ما تدري عن رهام
ثنيان: ايه ادري
نواف : وطبعا ولا تهون ثريا اللي تحرض امي بكل فرصه
ثنيان : ثريا هاذي بذبحها مدري متى
دلال : اتركك منها خلك في نفسك وهي نفسها
ثنيان بغضب : لين متى بطنش ما كفاها كل شي سوته وجايه بعد الحين بتدخل
نواف : والله انا عجزت استوعب طينتها
دلال : ثنيان طنشها يا ثنياان لا ترجع تعيد نفس المواويل
نواف: والله اذا عليها هي حقها تنقلع من البيت بس سيف ومنيره ومحمد على الخط عشانهم
ثنيان: الله يصبرني بس انا برجع عندي دوام انتم علموني بالمستجدات
دلال: الله يستر عليك
طلع ثنيان متجهه فالبيت
................••............
في بيت ثنيان
مشاعل كانت جالسه تشرح لمنيره حالة الترف امس
منيره : انا اقول الله يعينها من استقعدت لها ام ثنيان
مشاعل: ياربي انا ودي يعادوني الكل الا هي
منيره: زين ان ثنيان فهم ولا دخل عليها ولعن خيرها
مشاعل : بس ان شاء الله وضع رهام كويس
منيره تذكرت محمد وقالت بسرعه: اييه ان شاءالله انا بروح اكلم بشوف ابوي
طلعت واخذت جوالها وهي تتصل على محمد
محمد : هلاا منيره
منيره: هلا محمد كيفك كيف ابوي
محمد : كلنا بخير طمنيني انتي
منيره ابتسمت على ضيق محمد : لا تخاف بخير الحمدلله
محمد : وش صار يا منيره من اتعبها
منيره بدت تقوله السالفه وقال محمد بإنفعال:لا يكون هالترف مسويه شي
منيره: لا حرام عليك والله لو تشوف كيف بكت تنفجع اصلا هي المسكينه ما تدري ان رهام تعبانه
محمد : الله يشفيها يارب
منيره سمعت صوت ثنيان: طيب ثنيان جاء بسكر الحين
طلعت وهي تشوف ثنيان واقف ومي اللي جالسه هي ومشاعل : وينها الترف
مي : يوه يا ذا الترف ثنيان ما تلاحظ انك معطيها وجهه
ثنيان؛ما تلاحظين اني رافع يدي عنك بما فيه الكفايه !؟؟
مي : وش فيك عصبت
ثنيان:اقول اكرميني بسكوتك ، مشاعل جيبي بدلتي واغراض الدوام بداوم
مشاعل: طيب
طلع ثنيان يدور الترف دخل وهو يشوفها جالسه بهدوء : سلام
رفعت راسها الترف : وعليكم السلام ، وشلونها رهام
ثنيان: بخير حمدلله ، بس انتي ليه جالسه هنا ما نزلتي تحت
الترف : مابي انزل
ثنيان: طيب قومي اللبسي واجهزي
الترف : وين بتوديني
ثنيان: انا عندي دوم ووبوديك لاهلك لين اخلص وتغيرين جو وتستانسين
الترف : احسن شي تسويه
ثنيان: يعني حتى في اسواء اوضاعك ما تخلين الملاسن
الترف ابتسمت بهدوء وهي تاخذ ملابسها ولبست وطلعت ولف ثنيان: دقيت عليك ما تردين ؟!
الترف بضيق: ما اعرف استخدم هالجوال
ثنيان سكر بهدوء وقرب : وش اللي ماتعرفينه بالضبط
الترف : ما اعرف ارد او اتصل او حتى اسجل اي رقم
ثنيان : الحين بعلمك كيف تتصلين تردين او ترسلين رساله والباقي اذا رجعنا
الترف : طيب
ابتداء ثنيان يشرح والترف تناظر بهدوء وكان متضايق لهدوءها ما تعود كذا
لبس ونزل وطلعوا ومي تراقبهم بحده
................••............
في ديرة الترف
وعند سلوى اللي طلعت وهي تتلفت تدور على صالح شافته طالع من بيتهم في يده اوراق شغله اسرعت وهي تمشي شوي شوي من جنبه عشان محد يشك : اوووه اخيراً طلعت
وخرت شوي على الطرف الثاني من الطريق وصالح اللي لف ببتسامه وراح جهتها وهو يتكلم بسرعه : دايم وانا ادورتس وانتي تختفين جاء دورتس تدوريني
وخر بسرعه ورجع مكانه وسلوى تناظر بحده : ماشاء الله امدى نسيت ترزازي ببيتكم اعنبو ابليسك ما بقى سبه من ابوك ما سمعته وقال جاء دوري
صالح تنحنح : قصري صوتس كلن سمع
نوره اللي جت من البقاله وهي تناظرهم وكل واحد واقف في طرف الشارع ويتكلم : يا شين اللي مسوين ما يعرفون بعض
صالح لف : حي الله نوره من بعد ماراحت الترف مالتس حس وش صاير
نوره ضحكت : انتظر متى يجي دوري وتختفي انت وسلوى وادوركم
شهقت سلوى: وشلون سمعتي
نوره تاخذ اغراضها: كل الحاره درت من صراخكم اعقلوا
راحت نوره ولف صالح: وشوله معاد تجين بيتنا
سلوى: اجي وش ابي
صالح : مري علي بشوفتس
سلوى؛ انت اللي مر من الباب حقي
صالح : دام وضعنا كذا بنبلش اقول وش رايتس نلتقي عند البقاله
سلوى: خلاص بس حدد وقت
صالح بضحك: الشوق موعدنا
سلوى وهي تعابط : لو على الشوق كان علوم
صالح: اللله يهدينا
ضحكت سلوى وهي تسمع صالح يحدد وقت لقاهم ................••............
وثنيان
اللي طول الطريق يحاول يسولف يرفهه عن الترف لكن كانت صامته وصمتها بالنسبه لثنيان قااتل دخلو الحاره وفزت الترف وهي تناظرهم بكل حب وشافت صالح اللي واقف عند عايض ويكلمه
وفزت الترف وهي تناظرهم بكل حب وشافت صالح اللي واقف عند عايض ويكلمه ولف صالح ببتسامه لما عرف السياره وقرب وقفوا ونزلت الترف وهي تسلم على صالح بحراره وحب ىصالح اللي يرحب فيها نااااسي ثنيان اللي واقف ببتسامه
انتبهه وقرب له يسلم وكان ثنيان عليه بدلته
صالح : اقلط تقهو
ثنيان: والله اني مستعجل وراي دوام مره ثانيه
صالح : بس ما يصير
ثنيان : يصير يصير احنا اهل مابينا ذا الحكي
صالح : اجل فمان الله
ثنيان : سلم على الوالد
صالح : يبلغ
رجع ثنيان لسيارته : اجل يلا وداعتك الترف
صالح ابتسم ودخل هو والترف وثنيان اللي رجع والانظار علييييه
صالح :حي الله الترف وشلونتس وش اخبارتس
الترف : حمدلله
صالح : علامه وجهتس كذا
الترف : ابد بس تعبت امس حيل وعشان كذا
صالح فز على ركبه ونص : وش تعبتي منه لايكون حريمه متعباتس
الترف : لا لا تخاف بالعكس امس زوجته الاولى سوت لي عزيمه وهي حليله وكلهم والله طيبين
صالح : زين اجل طمنتييني وثنيان كيفه معتس الترف اللي كانت ودها تقول ( مابيه طلقني منه ) بس سكتها دخول ابوها
دخل ابو الترف : هلا والله ببنيتي
وقفت الترف تسلم عليه وهو يسألها ويسولف معها
ابو الترف : والله كلٍ يمدح برجلتس وبطيبه راحوا لرجال كثير ونفعهم هذا عشان تدرين ان ما ازوجتس الا اللي يستاهلتس
ابتسمت الترف بضيق : صادق
امتدت السوالف كذا بما يقارب ساعتين وبعدها
صالح : ان شاء الله انتس بتنامين هنا
ابو الترف بحده : وش تبي هنا مكانها بيت رجلها تجلس هنا وش تسوي لا لا وانا ابوتس روحي مع رجلتس
الترف اللي امتلى وجهها ضيق ووقفت : اجل انا بروح اسلم على البنات
صالح: ايه ايه ترا ماعاد شفناهم من بعد العرس حتى ام عايض اللي كانت ترسل لنا اكل معاد ارسلت
ضحكت الترف : اوريك فيهم اروح اغسل شراعهم
طلعت الترف متجهه لبيت نوره دقت الباب وفتحت امها : الترف هلا هلا
الترف سلمت : شلونتس ياخاله
ام نوره: بخير انتي وشلونتس
الترف : حمدلله وينها نوره
ام نوره : عند سلوى
راحت الترف ودخلت : يااااهوه يا اهل البيت
فزت سلوى ونوره وهم يصارخون ركضوا يحضنونها والترف اللي تضحك وبعدين بكت
سلوى: يمممه بنت وش فيتس
نوره: تطلقققتي
سلوى: يومتس تطلقتي وشوله تبكييين
نوره: ها مانتس تبين الطلاق
الترف : عللللللى شحم واص لين افهمكم
جلسوا وراحت سلوى تجيب القهوه وتصبها
الترف وهي تاخذ الفنجان: ما تطلقت
نوره: اجل حامل
سلوى: يا ويلتس ويلاه يالترف وش بتسوين
الترف : ياربي انا مدري وش ذا الحظ اللي جمع المجانين على راسي مانييي حامل وجع
سلوى: وجعٍ يوجعتس اجل وش بتس تبكيين
نوره ضحكت بهباله: ايييه يا سلوى تبكي عشانها اشتاقت لنا
سلوى ضحكت بحياء : ايه صح وحنا بعد اشتقنا لتس
وقفت الترف : انا ليه اجي عند المهبل اصلا يوم افكر اجي وش ابي
سلوى: اقول انثبري مافهمنا وش بتس
الترف جلست: اشتقت لكم ايه بس فيني شي ثاني
نوره: اجل ها... سكرت الترف فمها بالطرحه: اص اصصصص لا تحللين ابي اهرج اص
نوره : اهرجي
الترف بدت تقولهم كل شي صار معها من اول يوم للحين
سلوى: انا قايله لتس امه هاذي مجرمه مجرررمه عيونها تروعت منها
نوره: الله واكبر مب انتي اللي قلتي لبنتها ترقص
الترف : والله احسب انها ماتت انهرت ومالقيت انهار الا عند الشايب
سلوى: بس والله هالشايب مب هيييين
نوره: والله يقشعر جسمي من حركاته
الترف : ما علي منه انا الحين انا تورطت مع ذا العجوز هذا غير السلق الباقيات
سلوى: تبين شوري
الترف : ايييه ما جيتس الا ابي شورتس
سلوى : لا ترجعين معه واطلبي الطلاق وخليه يذلف هو واهله المصرع
الترف : اسكتتتتي لا يسمعتس ابوي تحسبيني ما فكرت والله جايه وانا ناويتن القشر بس قال صالح ارقدي عندنا ابوي بغى يتشنج يقول للااا محلتس بيت رجلتس
نوره: طيب وش بتسوين
الترف :ابد طال عمرتس ابي اخرب سمعته عند ابوي بحط فيه نون وما يعلمون وصالح اصلا يكفيه اني اقول مضايقني
نوره: بس وضعتس صعب
الترف : ما عليتس دامها خاربه خاربه بحوسها مع اهله كلهم
سلوى: بس انتبهي
الترف : صبي قهوه بس والله لوريهم
..........••............
في بيت ابو محمد
وعند محمد اللي كان كل شوي يتصل بالمستشفى ويسأل عن رهام وماصدق انها صحت وانها بخييير
طلب انه يتكلم مع الدكتور واخذ موعد وطلع
دخل الغرفه وهو يسلم وجلس وكان يستجوب كل اوضاع رهام واذا هي تمام خلاص واذا تقدر تتزوج ومن هالاسئله وطار محمد من الفرحه لما قاله الدكتور : انها بخييير وتقدر تتزوج وتخلف وكل شي من هالخبر ما قدر محمد انه يتمالك نفسه وهو يضحك
وطلع بعد ما طلب من الدكتور ما يقول لاحد شي
رجع بحماس وهو مقرر بعد المخيم يخطبها وعند ثنيان اللي جالس بمكتبه ومندمج بشغله رفع الجوال وهو يشوف امه تتصل : هلا يمه
ام ثنيان: وينك انت لا يكون عند سويده
غمض ثنيان: يا يمه الله يهديك وش هالحكي
ام ثنيان: ايييه ما ترضى عليها لكن امك واختك بالطقاق
شد ثنيان على راسه : يمه الترف ما تدري عن رهام وبعدين رهام هي للي دخلت الترف مالها شغل
ام ثنيان : ايييه لعبت عليك بنت ابليس وخلتك ما تطق لنا خبر لكن هين يا ثنيان
سكرت في وجهه ورمى ثنيان الجوال بطفش : انا ألقاها من امي ولا من الترف
................••............
في المستشفى
رهام اللي صحت وهي تناظر حولها شافت دلال نايمه طالعت نفسها وهي ما تدري وش صار بس اخذت نفس لما تذكرت الرسايل لفت بشويش وهي تمسح دموعها
صحت دلال : رهام حبيبتي صحيتي
رهام : وش صار
دلال : ما صار الا كل خير
جلست وهي تحكي لها اللي صار
.................••............
في بيت ابو ثنيان
وعند شوق اللي طلعت من غرفتها وراحت غرفة رهام دخلت وهي تقفل الباب وابتدت تفتش بالادراج وطاحت عينها على الورقه اللي كانت مع السلسال اخذتها وهي تكتف : اجل قلبك قوي نشوف اذا قلبي اقوى ولا قلبك
راحت تفتش وهي تشوف السلسال مقطوع ابتسمت وهي تحطه على التسريحه: لنا معاك شغل باقي
طلعت وسكرت غرفة رهام وراها
.................••............
وعند نواف اللي كان راسه مصدع وهو ينتظر امه تروح معاه لرهام
نواف : يممه يلاااا
ام ثنيان: تعال انت بعد وهاوشني بعد تعال مع اخوك
نواف : يمه الله يصلحك وش قلت انا ما قلت شي
ام ثنيان : اسكت اقول اسكت ما عمري شفت واحد منكم مبرد قلبي كل واحد له مصيبه لحال
ركب نواف اللي ندم انه تكلم اصلا
................••............
في بيت ثنيان
وعند مي اللي هالمره ما رح تخلي ثنيان ابد ابدا من لما طلع دخلت وهي ترتب غرفتها وتعزلها وتعيد هيكلتها وشوي جابت المساج وجابت وحده تصلحها ورتبت نفسها من الاخر
مشاعل ومعها كتابها راحت لغرفة منيره وهي تدق الباب : منيره
منيره فتحت : هلا مشاعل
مشاعل: محمد حبيبي روح مع عمر ألعبو
راح محمد ودخلت مشاعل: وش فيها ذا الخبله قايمه وتشيل وتحط من ساعه
منيره: انا اقولك تبي تلفت انتباه ثنيان
مشاعل: كأنه فاضي لها
منيره : خليها اهم شي تفكنا من مشاكلها
مشاعل: اي والله صادقه
................••............
في ديرة الترف
وعند الترف اللي كانت جالسه مع سلوى ونوره ودق ثنيان وبالقوه ردت وهي مستعسره من الجوال وحطته سلوى سبيكر سلوى ونوره اللي كانوا يسمعون بهدوء وردت الترف : هلا
ثنيان : يا هلا والله لا لا صوتك يقول بخير
الترف وهي تناظر سلوى : ايه اكيد بكون بخير عند اهلي
ثنيان : الله يديمهم لك ، عساك استانستي معهم
الترف : ايه
ثنيان : اجل نص ساعه وبكون عندك وبنرجع البيت
الترف : بددري
ثنيان: بدري من عمرك ياعمري لكن اذا لاحظتي اني لي 12 ساعه مداوم نص يوم تقريبا وانتي معهم خلي باقي الوقت معي
سلوى اللي طاحت وهي خاقه وضحكت نوره وهي تكتم صوتها توترت الترف ووقفت : الله وش دخلني انا تدوام ولا ماتدوام
ضربتها سلوى وصرخت ترف بشويش ثنيان: بسم لله عليك وش بك تصرخين
الترف: مافيني شي
ثنيان: لا لا ما دام لسانك رجع شطوله هذا يعني انك ارتحتي مره وعشان كذا لازم ترجعين معي تعرفين اموت اذا ما سمعت لسانك الطويل
سلوى اللي كانت تضحك الترف سكتت وقال ثنيان : تمام اجل انا بسكر ونص ساعه بكون عندك خلي العناد واطلعي
الترف : طيب
سكر ونطت سلوى: وجع يا مهبوله وجععع بتطلقين من ذا !؟
نوره: والله يالترف وضعتس مره حرج انتي كيف قلبتس في ذا زين وجه وزين كلام
الترف : تكفين اص انتي وياها
سلوى: هو دايم كذا
الترف : ايه
سلوى: وبتطلقين !!! اقول انتي مانتس كفو تطلقي بس وهاتيه اتزوجه انا
الترف : اكلي تبن بس
نوره: طيب ما دام كذا ليه متحامله عليه
الترف : مابي ياخي مابي حريمه
سلوى: حددي ما تبين حريمه والا ما تبينه هو
نوره: والله من كلامه واضح انه حليل
الترف : حبيبتي حليل لكن بعد شهر ولا شهرين بيسوي فيني مثل مي 24 ساعه هواش وغير هذا حليل لين ياخذ اللي يبي
سلوى: والله عجزت احدد
الترف اللي تناظر جوالها : انا بروح اجلس مع ابوي وصالح شوي قبل اروح وهذا رقمي اتصلوا عليه
سلوى: يلا الله معتس
سلمت الترف وطلعت راحت بيت ابوها ونص ساعه وسمعت صوت سياره ثنيان وقامت وسلمت عليهم وطلعت شافته واقف لفت وشافت سوير جايه وجلست تناظرها بحقد
ثنيان فهم نظرة ترف وتدخل قبل تسوي مشكله تقدم وهو يحاوطها بذراعه ومشى وهمس : اتوقع فيه خطه تكفيخ على الضعيفه
فتح باب السياره لها وهو يركبها وابتسم : بس مب وقته الحين بعدين تكفخينها
سكر الباب وهو كان يبي يتفادى مشكله لكن حركته اخمدت نار الترف اللي شافت الحقد بعيون سوير ضحكت في نفسها ( جت بوقتها والله )
ثنيان: مين هاذي !؟
الترف: دويدده
ثنيان ضحك : زين اجل تدخلت
الترف : اصلا ما كنت بسوي شي
ثنيان : لا واضح ، المهم ان شاء الله ما تعشيتي
الترف : لا ليه
ثنيان : انا بعد ما تعشيت قلت نطلع نتعشى
الترف رفعت حواجبها بإستغراب وسكتت
ثنيان: وش تحبين تاكلين
الترف : اي شي
ثنيان اللي كان يحاول يفتح موضوع يتكلم لكن الترف ماعندها الا ترادد
وصلوا للمطعم ونزلوا ودخلوا قسم العوائل والترف طايره عيونها ومستغربه : بناكل هنا
ثنيان : ايه تقدرين تفتشين ما فيه احد
نزلت الترف الغطى وجلست ووطلع ثنيان يطلب لكنه رجع وبيده ورد
والترف اللي مميله جلستها وتفكر كيف تفتك من ثنيان بس الصدمه لما لفت وشافته واقف قدامها معاه الورد تنحت وهي تناظر بصدمه
ثنيان : ما بتاخذينها !! ادري تأخرت شوي بس يعني تو استقرينا
الترف اللي بالقوه اخذتها وهي مصدومه
ثنيان جلس وهو مبتسم والترف مصدومه وقالت بكبرياء : وشوله ذا
ثنيان : ابد هديه من الشايب
حست الترف ان احد عطاها كف جاء الاكل وبعد ما نزلوه قال ثنيان وهو يحاول يقلدها : ايه كيف اهلتس
الترف ناظرته : بخير
ثنيان: وسلوى ونوره
الترف : طيبات
سكت ثنيان وبعد سكوت قال : ممكن ابي اعرف وش مشكلتتس معي
الترف رفعت راسها بسرعه: وش مشكلته
ثنيان تكلم بجديه : الترف لا تحسبين اني ماني منتبهه شايف وعارف ومرت علي هالحركات مثل الالف واعرفها لكن قلت بشوف وين بتوصلين يعني خليني اقول هالتصرفات من صفاتك لكن اغلبها عبط وعناد لي ! مدري انا وش صار عشان يجي هالهجوم كله !؟
الترف سكتت وهي تشتت نظراتها ونزلت الملعقه وهي تشرب مويه
ثنيان : انا مابي اضغط عليك لكن ابي اعرف هالحاجز اللي تبنينه اذا كنتي شفتي شي يخليك كذا قولي لي نتفاهم ونحل الوضع
الترف ماردت
ثنيان: عندك سبب ولا
الترف : لا
ثنيان : طييييب ليه كل هاذي الحواجز ترف انا زوجك مب لازم تبنين كل هذا بينا شوفي انا معك سمعتي شي شفتي شي قولي لكن من الباب لشباك هذا مشكله انا ما اقول غيري اطباعك بالعكس خليك مثل ما انتي لكن التصرفات اللي مب لك اتركيها واذا انتي مشكلتك زوجاتي انا مقدر احكم غيرة الحريم لكن اعرفي ان كل وحده لها حقها علي وانتي لك حق اللي ابيه منك الحين اذا عندك مشكله اشرحيها واذا ما عندك عطيني يدك نبدا من جديد
الترف كان ودها تقول ( انت المشكله انا ما ابيك ما بي اتزوجك ) لكن ما تدري وش خلاها تسكت ما تبي تخرب الجو ما تدري وش جاها
ثنيان وهو يصفق : للحين معي
الترف : اييه ايه معك
ثنيان : يعني
الترف : وش يعني
ثنيان: قرارك
الترف ضحكت بهباله : العشاء حلو
ثنيان غصب عليه ضحك : يا بنت انتي مجنونه انا اتكلم جد
الترف : وش اقول يعني
ثنيان : يا نبدا يا نوقف !؟
الترف اللي تبي تفتك : نبدا
ابتسم ثنيان ابتسامه عريضه : اجل توكلنا على الله
الترف كملت بدون ما تنتبه او تفكر كملوا عشاهم وكان ثنيان يسولف شوووي والترف تعااااابطه كثيييير
................••............
في بيت ثنيان
وعند مي اللي جهزت وخلصت وتنتظر ثنيان
مشاعل اللي كانت تعشي عمر وطلعت وهي تدخله غرفته طلعت وشافت مي نازله بقميص النوم قصير جداً
مشاعل : الله اللي استحوا ماتوا خير حبيبتي وين رايحه بذا اللبس
مي : انتي خيير يا همجيه وش تبين
مشاعل: اقول ادخلي غرفتك ازين لك ولا تنسين البيت فيه اطفال ومعك ناس فيه
طنشتها مي وهي تنزل للمطبخ ودخلت على منيره اللي شهقت وهي تصد : مييي خير وش فيك نازله كذا انهبلتي
مي : وش فيني جايه باخذ اغراض واطلع
منيره:مييي البيت فيه معك ناس لو طرا على بالك تستري
طنشتها مي واخذت اغراضها وطلعت منيره : استغفر لله يا ربي ................••............
وعند ثنيان
اللي بعد ما انتهوا من العشاء طلع هو الترف رجعوا للبيت وطبعا قدر ثنيان يطلع من الترف سوالف الدنيا
نزلوا دخلواا وكانت الساعه تقارب 2 الليل طلعوا وقبل يدخلون طلعت مي وبصوت يذوب الحجر نادت : ثنيييان
لفوا كلهم وكانت الصدمه منظرها حرفياً كانت تشلع القلب وكانت جريئه بشكل عجز ثنيان يرفع عيونه عنها وتذكر فجاءه وقال : نعم
مي : معليش بكلمك بموضوع لكن معك ناس
الترف اللي كانت تناظرها بقرف واستحقار وهي تقلدها : ثنييييان روح لها قبل تموت ذا البزر
ثنيان اللي كان شبه منفتن في مي لكن لاحظ غضب الترف اللي دخلت وصفقت الباب
اخذ نفس ثنيان: خير يا مي وش الموضوع
مي قربت وهي تشبك ذراعها بذراعه : ابد الموضوع اني اشتقت لزوجي اللي اخذوه مني
ثنيان سحب يده : بعدين يا مي روحي من هنا الحين
مي : اقل شي اجبر في خاطري واجلس نص ساعه مابي اجهز على الفاضي شوف مجهزه حلا وعصير ترا سحبت علي لما رجعت من عند اهلي ووعدتني تعوضني جاء وقتها وبعدين جد عندي موضوع
ثنيان اللي كان ثلاثة ارباع قلبه مع الترف وربعه مع مي لكن قال : معك نص ساعه يا مي ودخلي بمواضيعك بسرعه
مي ابتسمت وهي تبوس خده : طيب
راح ثنيان معها وهو مازال يفكر بالترف لكن نجحت في انها تاخذ عقله وهالنص ساعه صارت ساعات وطبعا مارجع ثنيان
.
.
انتهى البارت✨