تهزمني السمراء وانا نّد الفرسان

النهايه💚

« تـــاابــــع النهـــــايــــــه »
.
.
انتهت الليله الحلوه وطلبت منيره انها تنام عند ابوها ومشاعل اصلا عند اهلها وطلع ثنيان والترف للبيت
لف ثنيان على الترف : معاك اغراض احتياط لصالح
الترف : لا
ثنيان : اجل اسمعي اطلعي خذي لكم احتياط كذا وارجعي يلا
الترف : وين بنروح
ثنيان: اركضي اقولتس اذا جيتي يلا
طلعت الترف وثنيان دخل ياخذ العود وبعض الاغراض
ونزلت الترف وهي للحين مستغربه : وين بنروح
ثنيان ابتسم : اسمعي وش رايتس نرفع الصوت وتسمعين ولا تسألين عشانها مفاجأه
الترف ضحكت :مابي اسمع انت سولف
ثنيان : نسولف لعيونتس ليه ما نسولف
ابتسم ثنيان وهو يسولف لها وهو كل مره يسولف مع الترف يحس سوالفه تجدد وصلوا وضحكت الترف وهي تناظر : وش ذا
ثنيان : طلبتي نطلع لديره لانتس اشتقتي تنامين بهواء وبراحه لكن اني ما بغيت الديره كثير وجهزت هالمخيم الصغير بعيد وصاد ونرتاح فيييه بدون ازعاج
ضحكت الترف : توني قلت لك متى امداك
ثنيان: يسلمون الاصحاب وصيتهم وضبطوها
الترف حضنت ثنيان : والله انك كفففو
ثنيان : ههههههههههههههههههههههه اجل يلا انزلي
نزلوا وثنيان شايل صالح النايم وكان مخيم بسيط وااهواء بارد والجو حلو نزل ثنيان صالح وهو يغطيه وبدا ينزل الاغراض قرب بيشب النار ونطت الترف : حلفت عليك ما تشبها انا اشبها
ثنيان: وش عرفتس انتي !
الترف : افا ااعرف ما عليك ارتاح
ثنيان تكتف وهو يناظرها بإستخفاف : يلا يلا ورينا
الترف اللي جمعت الحطب وضبطه وهي تضحك لثنيان اللي يناظرها وفعلياً شبت النار ضحك ثنيان وهو يصفق : والله براڤو ما زلتي تدهشيني
ضحكت الترف : اعجبك
ثنيان قرب وهو يناظرها بهيمان : تعجبيني من زمان ومتفقيييين من زماااان بعد
الترف ابتسمت وهي تبعد الطرحه عن وجهها سحب ثنيان الطرحه وهو ينزلها ومد يده وهو يحرر شعرها اللي طار مع نسيم الهوا البارد واتسعت ابتسامة الترف اللي تذبح ثنيان اللي مسك يدها وهو يجلس قريب النار وهو يصلح الكرك مع ذا البرد
وجابت الترف العود : بتعلمني الليله عليه
ثنيان : من عيوني كم ترف عند ثنيان
الترف : يا ويلي ويلاه ياخي ما خلص كلامك الحلو والله ان قلبي يعورني
ضحك ثنيان : تعالي جنبي خليني اعلمك شوي
قربت الترف اللي حاولت وحاولت بس عجزت وعطته ثنيان: خذ خذ ماعرفت
ثنيان: اجل كل واحد له شغلته انا ادق وانتي تغنين
الترف : ايه كذا ازين
ثنيان: يلا وش بتغنين
الترف اللي تكت على كتف ثنيان وهي تدخل معاه بفروته :يلا
ثنيان ابتدا يدق وغنت الترف
( تقول اللي طرف عينك أنا مدري هدب أو عود
أحس أني من اللي صابها ما شوف قدامي
همست وقلت لا تخافي على بحر العيون السود
على شط الكحل مريت وهذا موضع أقدامي)
ثنيان : الللله عليييك اللله اييه ايه اخيرا لقيت سطر وصف اللي صار فيني من ورا عيونتس
اختلط ضحك الترف بصوتها اللي رجع يغني ودخل معها ثنيان بكل صوته ( عطيني عيونك الليلة وباكر يا عساه صدود
أمانة لا مسحتي الكحل خلي طيف أحلامي
أحبك كان يكفي الحب جروحي في هواك شهود
أنا اللي راس مالي حلم وهم الدنيا قدامي)
ماهي الا شويات وصحى صالح على صوت ضحكهم وانضم لهم بضحكاته الطفوليه
................••............
النهايات كانت للكل سعيده تتمثل في عجاج اللي دايماً وابداً صار يؤمن ب ( عسى ان تكرهوا شيئاً وهو خير لكم ) على كثر ماكان معارض زواج ثنيان والترف على كثر ما سوى عشان يتفركش على كثر ما هو يشكر ربي ان ثنيان تزوج الترف اللي حرفياً صارت اكثر نقطه سعيده في حياة ثنيان وهالسعاده ورثت لعجاج نوره اللي صارت ملاذ الأمان والحب لعجاج
ومن الحكايات السعيده نهاية الصبر الجميله اللي تتمثل بحب محمد الطاهر لرهام اللي انتظر سنين بس فالنهايه عطاه ربي رهام مثل المعجزه ونفس الفرج للي احتوى محمد احتوى رهام اللي كانت نهاية المرض ارتباطها بأعظم قلب
وهالصبر ينطبق على فجر بعد اللي صبرت وعوضها الله بعبدالرحمن اللي كان سد عظيم بينها وبين الحزن واللي من يوم عرفته ما بكت عينها الا فرح
وبين حكاايات الأمل موجود صالح اللي كافح ألين اجتمع هو وسلوى اللي تركت الدنيا عشان صالح وتمسكوا بحبهم ونجوا به وخلوه عبره تغير كل العوائق
اذا تكلمنا عن حكايات الثقه بالله موجود بندر اللي صار مضرب مثال لتغير الاحسن وللهدايه
ومشت امه بطريقه ولحقهم سيف ومن بعدهم أمل
ومن حكايات الطمأنينه وحسن الظن بعطاء الله موجوده دلال اللي كل يوم كانت تفهم ان ربي رحم شوق واخذها عنده من هالدنيا اللي بتعيشها
والطرف الثاني شهد اللي حصلت نواف اللي عطاها أمان الدنيا واحتواها رغم انها ما قدمت له شي كثير
ونواف اللي عرف ان ربي اختار له شهد وابوها رزق وامانه وهو حريصصص على هالامانه
ومن بعدهم مشاعل ومنيره اللي تتمركز طمأنينتهم بوجود ثنيان اللي ماكان ابد يبخل في انه يكون سبب بسسمتهم وفرحهم ورغم ان قلبه شوي مايل لترف بس كان يدفع عمره ولا تضيق وحده منهم
................••............
واخيرا عن قصص البحث الطويله عن أمان الشخص اللي تحصل روحك فيه واللي معاه تحس انك مع نفسك بسيط وما تحتاج اقنعه ومجامله اللي مستعد انك تحط كل شي على جنب وتكافح الدنيا عشانه وعشان حبه اللي تعب لين حصله هنا نحصل ثنيان اللي اخيرا اجتمع بالسمراء اللي بدلت كل معاني ثنيان وغيرتها وملت الدنيا على ثنيان وصارت جزء ما يتجزاء منه
والترف اللي اخيراً حصلت حنية صالح اخوها بأحد ثاني وحنيته تفوق حنية صالح بكثير حصلت ثنيان اللي يشتري خاطرها بالدنيا واللي مجرد ما تضحك له الترف تبدل الدنيا عنده لضحك وافراح و ما يستاهل ثنيان منها الا تبادله هالحب العظيم وتعطي كل الدنيا عشان خاطر ابتسامته وضحكته اللي تجبر خاطر الدنيا
................••............
اخر حدث ينهي كل القصص بعد ما تبدلت خيوط الليل بخيوط الفجر بعد صلاة الفجر الساعه 6 ماقدروا ثنيان والترف ينامون ابد وهم ما زال حبهم يعم الدنيا وكل ما ارتفع صوت ثنيان والترف بالغناء ارتفع حبهم لف ثنيان على الترف وهو يبتسم :
تدرين وش يختصر كل قصتي معك قصتي اللي عساها ماتنتهي
الترف : عساني ما افقدك وعساها ما تنتهي
ثنيان : اجل هالبيت هو اختصار ثنيان والترف
وننتهي بأخر سطر يدمج عود ثنيان وصوته وصوت الترف
(تهزمني السمراء وانا ند فرسان) ...
وتكمل الحياه معهم بسعاده وقصص حلوه وعساها ما تنتهي
.
.
تمت بحمدلله روايتنا (#تهزمني_السمراء_وأنا_ند_فرسان )
اللي تعلمنا ما نكون عنصرين ابد ونناظر الجوهر ما ناظر المظهر
وتعلمنا بعد مهما واجهتنا صعوبات نصبر ونخلي الامل بربي كبيير
وتعلمنا بعد ما نفرط بإيمانا واخرتنا عشان بشر لا بالعكس نقتنع ونؤمن بمقوله ( لو كان خيراً لبقى )
واتمنى انها تنال اعجابكم واستودعكم الله برواية جديده ♥واعتذر عن اي تقصير وتأخير🌿اتمنى ان الكل يكتب رأيه او انتقاده ♥