تهزمني السمراء وانا نّد الفرسان

بارت

« البارت الثامن والثلاثون»
.
.
مر الليل وثنيان يساوم سامي اللي كان اخذ فلوسه منه اشبه للموت ونهايةً رضا وابتسم ثنيان اللي رفع راسه على اذان الفجر طلع وهو يتوضى وصف مع افراد الشرطه وهو يصلي معهم وكان يدعي الله انه ما يكون ظلم سامي لان بالمقابل شوق ما خسرت شي بسيط
ثنيان اللي كان دمه محترق على شوق وعلى اللي صار فيها وهو ناسي حرقة السجن اللي للحين ثنيان تحت تأثيره ومانساه
................••............
الساعه 8 بعد ما وقع سامي على التنازل التام بنص املاكه لشوق اخذ ثنيان الورقه وهو يطلق سراح سامي بعد تهديد جبري وانه يذلف من الرياض بكبرها
طلع سامي اللي كان يدري انه ما يقدر يجازف بنفسه وينسجن ويدري زين ان زياد غلطان فقرر انه ينسحب افضل ويبتعد عن كل شي ويروح يدور زياد ................••............
في بيت ابو ثنيان
الكل جالس يفطر ولف ابو ثنيان:نواف ليه اهل ثنيان هنا !
نواف : والله مدري يبه امس رهام تقول ان ثنيان سهران عند اصحابه
ابو ثنيان:لا اكيد فيه شي
ثنيان دخل بتعب : سلام عليكم
ابو ثنيان: عليكم السلام
ثنيان: كيفك يبه
ابو ثنيان : بخيير انت وش فيك
ثنيان: ولا شي
نواف : ابوي مستغرب ان اهلك نايمين عندنا وانت مب فيه صاير شي
.ثنيان كان يناظرهم بهدوء : يعني فيه مشكله بسيطه
ابو ثنيان: كنت حاس وش فيه
سيف دخل : سلام
الكل رد السلام بسرعه ولفوا لثنيان اللي قال: امس اتصلت شوق بأمها اخر الليل وكانت منهاره وطبعا رحنا لها وكانت في حاله يرثى لها
نواف : لييييه وش فيها !
ثنيان: سامي استغل فرصه بعدنا عنها وصار يعذبها
سيف : شلون يعذبها
ثنيان: شلون يعذبها يعني معيشها مع الخدم تصحى بضرب وتنام بضرب حالتها حاله حتى الللي فالحروب مب مثلها
ابو ثنيان: وبأي حق ان شاءالله يمد يده عليها
ثنيان: بحق انه يربيها
نواف وقف بغضب : يخسي يمد يده عليها
ثنيان: اجلس يا نواف الموضوع انحل
ابو ثنيان: وشلون انحل
ثنيان اللي ابتدا يألف قصه على سامي وانه تنازل عن نصف املاكه
سيف : برافو عليك يا ثنيان تعرف تقلب الامور اذا صار الموضوع يفيدك
ثنيان لف له بهدوء: وش اقصد يا سيف
سيف : ولا شي خذ راحتك
ثنيان: راحتي موجوده بس لا تاخذها انت
ابو ثنيان: وش ذا الحكي انت وياه
ثنيان : عالعموم شوق هنا كل اللي بيصير إنا بننسى اللي فات ونكمل حياتنا زي الناس واتوقع انها اخذت درسها
ابو ثنيان: وتنسى ثلاث شهور
ثنيان: حتى اني نسيتها يبه
وقف ثنيان وهو متجهه لقسم الحريم دخل لما تأكد مافيه احد وهو يسلم على راس امه اللي متضايقه من وجود الترف اللي وقفت لما شافت ثنيان
ثنيان: اجهزي بكلم دلال وارجع
طلعت الترف تجمع اغراضها وثنيان اللي اتجهه لغرفة دلال وهو يدق الباب وفتحت دلال: ثنيان
دخل ثنيان وبيده الورقه رماها على شوق اللي كانت متكتفه ببكي : خذي ، اشبعي فيها
دلال :وش ذا يا ثنيان
ثنيان: ابد الفلوس اللي كانت تهم الاستاذه شوق
دلال: من قالك نبي فلوس يا ثنيان
ثنيان بصراخ: وش تبون يا دلال زياد طار واختفى لو نحفر عنه شبر شبر ما بنحصله وسامي جحد كل شي وانهاه ولكن هاذي نص املاكه شفت انها ممكن تعوض بنتك شوي خصوصا انها تهمها الماده والفلوس
شوق ببكي : والله مابي شي يا خالي ابي تاخذ حققي بس
ثنيان: هذا حقك
شوق بكت وهي تدري ان مستحيل يحصلون زياد ولكن ماكانت مهتمه كثير بالفلوس
وهي تسمع بكى امها ، ثنيان: لا تبكين يا دلال لا تبكين هذا غلطها وبتحمله هي بلحالها
طلع ثنيان وهو مقهور عليها بس كان يبيها تاخذ درس وتتعلم ان الفلوس ماهي كل شي ما تغني عن اشياء كثير
شاف الترف واقف واتجهه لها : يلا
نزلوا وطلع ثنيان بعد ما حذر امه ورهام والكل
.................••............
في بيت ابو محمد
عند منيره اللي ما كانت تدري عن شي وهي ما تشوف الا اجتهاد محمد في بيته وفرحته لفت وهي تساعد ابوها فالاكل وعقلها تماما عند ثنيان اللي للحين ما مر ولا فكر يتصل عليها
................••............
في بيت ثنيان
الترف اللي كانت تدري ان حالات شوق مع ثنيان تسبب له ضغط نفسي كانت واقفه وهي تشيل ملابس ثنيان اللي راميها شافته وهو جالس على الابتوب وهو يكلم وكان ثنيان يحاول يحصل زياد بأي طريقه
ماحاولت الترف تسأله ابد وتركته يفكر وياخذ راحته
لفت لما سمعته يقول : جهزي قهوه سريع بيجي رجال
الترف : طيب
نزل ثنيان وهو يتسقبل عجاج : وش فيك خبصتني
ثنيان: ولا شي ضايق وقلت اناديك وندردش
عجاج: ندردش حبيبي هالكلمه كنا نقولها ايام الثانويه عشان نصرف العيال اذا عندك مشكله ودامك قلتها اجل وش السالفه
ثنيان : يوووه يا عجاج يووه
عجاج : قول
ثنيان: ابد عم شوق هالكلب معذبها
ثنيان ابد ما قال لعجاج موضوع شوق قاله الامور سطحيه جدا
عجاج: تستاهل هذا عمها اللي شادده الظهر فيهه
ثنيان : صار اللي صار
عجاج : بس قاهرتني خييير
ثنيان: الله يصلحها لأمها انا ما بيدي شي
عجاج: طيب دامها انتهت انت ليه متضايق
ثنيان: بنت اختي يا عجاج
عجاج سكت شوي :اجل وين عيالك
ثنيان: اي الله يا عيالي لي يومين ما شفتهم اشتقت لهم والله
عجاج : وش بلاها حياتك انت صايره اكشن
ثنيان: غصب علي
قام ثنيان وهو ياخذ القهوه وجلس هو وعجاج يسولفون ويحاول ثنيان يهدي ويعدي الوضع اللي مثقل على صدره كان يحاول ثنيان انه يفهم ان هالشي خلاص صار ما يقدر ثنيان يصلحه مهما صار
................••............
مر اليوم
وثنيان طول الوقت مع عجاج لما قدر يعدل مزاجه وراح عجاج ودخل ثنيان معاه الاغراض وهو ينزلها بالمطبخ
الترف : راح عجاج كنت حاسبه حسابه للعشاء
ثنيان : لا راح
جلس ثنيان على الطاوله وهو يروح ويجي مع الافكار
الترف نزلت العشاء : ثنيان يلا
ناظر ثنيان بهدوء وقبل يرفض مسكته الترف: خلفت ما ترفض افا يا ثنيان من اليوم تعبانه فالاخير ترفض والله تاكل
ثنيان : يالترف مالي نفس
الترف : افا والله مالي خاطر
ثنيان: لا والله الا لك الخاطر كله
الترف : اجل سم بالله
قرب ثنيان وهو ياكل اما الترف اللي بدت من جديد وهي تحاول انها تسولف بكل شي عشان ينشغل ثنيان معها ويسولف وياكل وقدرت
بعد العشاء كان ثنيان جالس على الطاوله وقدامه كوب شاهي والترف اللي تغسل
ثنيان اللي من دون سابق انذار قال : يا الترفي
لفت الترف مستغربه لكنت الاسم وطريقته وحتى صوت ثنيان فيه : سم
ثنيان : وش رايتس تغنين لنا
الترف سكرت المويه وهي تناظره بأستغراب : بسم لله وش فيك تكلم كذا فجعتني
ثنيان ضحك : ابد ابي اسمعتس تغنين
الترف : وين يا رجال من زين صوتي
ثنيان وقف وهو ياخذ كوب الشاهي له ولها وعطاها وهو يحط ذراعه على كتفها ومشى وهو يقفل كل اضاءة البيت وطلع للحوش وهو يجلس على الدرج والترف جنبه وكان فيه اضاءه خفيفه من الشارع والبيوت من برا والباقي ظلام لف وهو يبتسم: من قالتس صوتس مب زين
الترف؛ انا اعرف
ثنيان: اجل اسمحي لي اقولتس انتي خبله
الترف: الله اصلا متى سمعت صوتي عشان تحكم
ثنيان : تتوقعين يعني اني ساكت عن الانوار اللي تتشغل على راسي وانا نايم والشمس والازعاج عشان ايش كله عشان صوتتس اذا غنيتي
الترف ضحكت : الله اثاريك تجسس يا حضرة الضابط
ثنيان: ما يعد تجسس اصحى على اخر شطر
الترف: اغني بشرط انك تغني معي
ثنيان: انتي ابدي وانا اكمل
الترف: وش تبي طيب
ثنيان : تعرفين يا غايبه!!
الترف ضحكت : ومن ما يعرف الغايبه
ثنيان: اجل غنيها واعتبريها لك
الترف اللي انحاست مشاعرها وبالقوه استجمعت صوتها وهي تغني : يا غاايبه الا عن الخافق سلااام
ردي علي يا همسة العاشق سلااام
ردي وخذي مني ليالي في العمر
أقطف لك النجمة وأذوب لك قمر
وألبسك ثوب النسيم وأعطر أيامك زهر
واختلط صوتها بصوت ثنيان لما غنى معها
وأقول أحبك ... أنا أحبك .. وأفرش لك الدنيا حرير
ماهو على الغالي كثير
ضحكت الترف بخجل وكانت ابتسامتها تشلع قلب ثنيان حرفيا وسكتت وهي تقول : والله كثير مقدر اكمل
ابتسم ثنيان بضحك : اجل تعالي بوريك شي
قامت معاه ودخل للمخزن وهو يفتح صندوق ويطلع منه شي ملفوف استغربت الترف وابتسمت لما كشف عنه وكان عود
طلع ثنيان وهو يجلس : اجلسي اجل وانا بكمل تطلبين شي
جلست الترف جنبه ببتسامه : ابد اللي تبي تسمعه وانا اسمعه
وثنيان اللي نسى عمره وابتسم وهو يبدا :
أجاذبك الهوى واطــرب وأغني وأبادلك الغرام بكــــــــل فنّي
وأشاهد صنعة الله فـــي جمالك وحكمه الذي فيـــــك امتحنّي
وطوى ليله ثنيان وهو يغني والترف معاه وهو كأنه فاقد الذاكره كأنه ما يعرف الا الترف والباقي سدى
اما الترف اللي اول مره تحس انهم قراب من بعض لدرجة انها تشوف نفسها فيه
................••............
ومن بكره في بيت ابو ثنيان
شوق اللي كانت رافضه تنزل فزت لما دخل ابو ثنيان : شوق
شوق : نعم
ابو ثنيان : ليه ما تنزلين تفطرين
شوق : مالي نفس
ابو ثنيان : يابنتي اللي راح راح واللي صار صار قومي غسلي وجهك وتعوذي من ابليس وتعالي افطري وتوبي لله قبل تخافين وتستحين من الناس
دلال: يلا يمه قومي
شوق بكت: جدي سامحني
ابو ثنيان: الله يسامح الجميع يلا قومي
قامت شوق ونزلت وهي تشوف الكل ينتظرها بالصاله وكان زعل ام ثنيان منها واضح
جلست وهي متردده وطبعا نواف ورهام ونوف ابتدوا يتصرفون ان الوضع طبيعي ويضحكون ويتهاوشون وهم يبون يحسسون شوق ان ماصار شي رغم انهم زعلانين منها بس عشان تهديد ثنيان ووضعها
................••............
في بيت ابو محمد
محمد اللي من يوم صحى وهو مقرر يملك اليوم ويكون زواجه قريب
لبس وطلع : منيره تبين شي
منيره :سلامتك وين رايح
محمد : بروح عمي بكلمه نقرب الزواج
منيره: ليه مستعجل
محمد : معاد لي حيل اصبر خلاص صبرت سنين
منيره: اجل خذ محمد معاك لابوه يسلم عليه
محمد: غريبه ثنيان ما مر
منيره: مدري يمكن مداوم شي
محمد : يلا اجل حمووود يلا
طلع محمد اما منيره اللي قفلت جوالها بغضب وهي زعلانه من ثنيان اللي مهملهم
................••............
في بيت ثنيان
اللي صحى وهو حلمان بمشاعل حلم يفجع فز وهو يسحب الجوال وبسرعه اتصل فيها وجاه صوت مشاعل :هلا ثنيان
ثنيان: صباح الخير
مشاعل: صباحك نور
ثنيان: كيفك اليوم كويسه
مشاعل: يعني الحمدلله
ثنيان: ليه يوجعك شي
مشاعل: تعب الحمل بس
ثنيان اللي ابتدا يخاف عليها: طيب وش رايك اجيبك فالبيت عندي عشان اتطمن
مشاعل: لا يا ثنيان بجلس عند امي
ثنيان اللي يحس انه مب متطمن : طيب خلاص انا شوي وبجي لك
مشاعل: طيب
سكر ثنيان وهو يرمي الجوال قام وغسل ونزل بتعب وشاف الترف اللي مجهزه الفطور : صبحه الله بالخير ضابطنا ومطربنا
ابتسم ثنيان : صباحك نور يالترفه
جلس على الارض وهو متعود ان الترف ما تاكل الا بالارض
كانت الترف تلاحظ ضيقه وللحين ماتدري وش سالفة شوق فا توقعت منه انه ضايق عشانها
ثنيان بعد سكوت: ليش ما تسألين شفيني رغم انك تشوفيني
الترف : مابي اضايقك طالما انك ما قلت معناته ماتبي احد يدري وانت ادرى
ثنيان: بس انتي مب اي احد
الترف : لا تحسب اني ما يوجعني قلبي على اني اشوفك ضايق لكن انا فعلا ما احب انبش ضيق احد ذا بتقولي تعرف اني بسمعك من كل قلبي
ثنيان ابتسم : انتي بذات سأليني ونبشيني واعرفي كل شي فيني
الترف قربت بعباطه: اجل علمني وش فيك
ثنيان تنهد : من جهه شوق ومن جهه مشاعل
الترف : وش فيها مشاعل
ثنيان : مدري ليه احس ماني متطمن مدري ليه احس خايف عليها
الترف : عشانها حامل بتؤام وحملها صعب تحس انك خايف لكن هي بخير ان شاء الله وتعبها طبيعي
ثنيان : ودي تجي هنا واشوفها تحت نظري ما تروح
الترف : عند امها احسن وانت كل يوم روح لها
ثنيان: قولك !
الترف : خذ مني القول
ثنيان: اجل توكلنا على الله
الترف : شوق !
ثنيان اخذ نفس وهو يقولها كل شي رغم انه اخفى عن الكل وكانت شهقة الترف بصدمه طلعت وكأنها طلعت من صدر ثنيان
ثنيان :مدري وش اسوي فيها
الترف وهي ماسكه راسها وبعد شوي قالت : والله مدري وش اقول بس اتوقع اللي سويته يكفي ويكفي انك تخبي هالسر
ثنيان : والله مدري وش اسوي والله
الترف : يكفي اللي سويته والباقي الوقت بيحله
ثنيان كان بيرد بس سكته الباب وقف وهو يفتحه شاف محمد وابتسم وهو يسلم على ولده بحراره وعلى محمد
محمد : خير يا ابن العم مختفي وش فيك
ثنيان: والله كان عندنا مشاكل بالدوام وغير ام عمر تعبانه
محمد : يلا اجل الله يعينك وانا انتظرك عند عمي ضروري
ثنيان: يلا ببدل وألحقك
دخل ثنيان وهو يسولف محمد وقال محمد: يبه ليش ماتجينا في بيت جدي ولا انت ماعاد تبي امي
ثنيان لف بسرعه: وش ذا الحكي من معلمك ذا الحكي
محمد : محد بس انت قبل خليتنا في بيت جدي وكنت ما تبي امي
ثنيان: محمد اسمعني زين لو اسمع ذا الحكي ما يصير لك طيب كلام الكبار مالك داعي فيه وبعدين امك هناك عشان جدك
محمد : اسف يبه
ثنيان: خلك جاهز بنروح لعمر بعد شوي
محمد : طيب
جات الترف وهي تسلم على محمد بحب وتسولف معه ونزل ثنيان بعد ما بدل : محمد بتروح معي ولا تجلس لين امرك
محمد : بروح معك
الترف: رايح لمشاعل
ثنيان: اول لابوي وبعدين لمشاعل
الترف : زين بس ترا بنادي البنات
ثنيان: يلا
................••............
في بيت ابو الترف
عند رهام اللي كانت جالسه هي ونوف يرتبون المجلس الخارجي ويسولفون ونواف جالس على جواله وهو يرد عليهم وقطع الكلام دخول محمد : سلاااام عليكم
نوف اللي كانت تمسح ورا الباب جمدت اما رهام اللي كانت طالعه على الطاوله تمسح المكيف شهقت ولفت بصدمه وفز نواف : محمد
محمد اللي ما ركز على نواف وهو يشوف رهام اللي جلست قبل تطيح وهي تغطي وجهها بالمنشفه رجع لورا وهو يبتسم : اسف ما توقعت فيه احد
نواف : عطنا طريق يا ابن العم
لف محمد وطلعوا نوف ورهام يركضون ونوف اللي ميته ضحك: وش ذا الشوفه شافك وانتي متعلقه الله يستر لا يكنسل
ضحكت رهام وهط تقول بنفسها( اووه الشوفات كثير بس هاذي علنيه ) .
محمد : معليش يانواف ما دريت
نواف : معذور يا ابن الحلال حصل خير
محمد : وينه عمي
نواف : الحين اناديه
راح نواف وهو يهاوش نوف : ما قلت قفلي الباب انا
نوف: وش دراني انه بيدرعم بعدين ماشاف الا خطيبته
نواف: طسي بس رهاموه نادي ابوي
رهام: طيب
................••............
في بيت ابو ثنيان
ثنيان دخل وهو معاه محمد وجاء سيف وهو معاه وائل ناظره ثنيان بهدوء ورد السلام ودخل ودخلوا كلهم وجلسوا ينتظرون ابو ثنيان اللي دخل : حي لله محمد
وقف محمد يسلم عليه وومحمد الصغير اللي كان يلعب مع وائل وثنيان مركز على نظرات سيف له
محمد : انا يا عمي جيت ودي اكلمك إن يكون الزواج قريب لان مثلك عارف وضعي
ابو ثنيان: متى تبيه يامحمد
محمد: شهر يكون كافي
ثنيان: ايه شهر كويس
محمد : انا جيت اليوم بعطيك المهر وبكره نملك والزواج بعد شهر
ابوثنيان:تم اجل
محمد ابتسم: تمت افراحك يا عمي
ابتسم ثنيان: الله يتمم لك ياحمود
محمد: امين
سيف: مب كأنه بدري مره
ثنيان: لا مناسب
ابو ثنيان: لا اشوفه مناسب
محمد : عندك اعتراض ياسيف عاد انت ادرى كيف تترتب الامور
سيف ناظره بطرف عين: منك نتعلم
ابو ثنيان هز راسه بضيق: وكيفه ابوك يا محمد
محمد : حمدلله احسن
ثنيان وقف : اجل انا استاذن
طلع هو ومحمد متجهين لبيت مشاعل
................••............
عند رهام
اللي كاانت تكلم الترف وقالتهم يجون حتى شوق وامل راحت وهي تقول لدلال
دلال: لا شوق تعبانه
رهام: بس خليها تجي تغير جو
دلال: لا روحوا انتم
رهام: بكيفك يلا يا نوف نروح لامل ونقول لها
نوف : يلا
راحوا وهم يدقون على امل اللي ردت: هلا يا رهام
رهام: اهلين اسمعي الترف تنادينا للقهوه بتروحين معنا
امل : بقول لسيف
رهام: يلا ننتظرك
جاء نواف : رهاموه يلا يلا ابوي يبيك
رهام: وش فيك بعد ياخي انت دايم تفجعني
نواف : هالمره بنسفرك تسفير خارجي
ضحكت نوف : اما لا تقول بتزوج والله يشكر محمد اللي صامل بعد المنظر للي شافه
ضحك نواف : له الجنه
رهام ارتبكت وطنشتهم وراحت لابوها اللي قال لها موعد الزواج والملكه واعطاها المهر
طلعت رهام بصدمه وفرحه وهي تناظر المبلغ خلاص صار الجد بكره بتتملك
نوف: يلا بنتأخر على الترف
رهام: اي بنت وش ترفه اقولك ملكتي بكره لازم اقل شي يكون عندي فستان جديد
ضحكت نوف وهي تشوفها مختبصه : تعالي بنقول لامي
ركضوا وهم يقولون لام ثنيان ودلال وقالت ام ثنيان : دلال يا بنتي روحي معها لسوق شوي
دلال : طيب يمه
اعطت رهام امها المهر وهي قلبها يدق بفرح
نوف : يلا دام السوق شوي بنروح لترف الحين
رهام: يلا
امل اتصلت فيهم وقالت ان سيف رفض
رهام: ياخي سيف مستفز
نوف : يا بنت الحلال خليه يولي يلا تأخرنا
................••............
في بيت اهل مشاعل
وصل ثنيان ودخل وهو يسلم على عمر رفع راسه لها وهو يسلم عليها : هاه كيفك
مشاعل: مثل ما انت شايف
ثنيان: افكر لو انك تروحين للمستشفى عشان نتطمن
مشاعل : لا كذا احسن المستشفى يمرضوني اكثر
ثنيان : والله ودي لو تروحين معي
مشاعل : انت شايف وضعي احتاج امي
ثنيان : طيب محتاجين شي تبون شي
مشاعل: ابد سلامتك بس خذ عمر معك احسه طفش
ثنيان : ابشري
كان ثنيان ياخذ ويعطي مع مشاعل ويسولف معها وهو يحس انه اشتاق لها فعلا وخايف عليها اخذ عمر ومحمد وطلعوا
......••............
في بيت ثنيان
ررجع ثنيان للبيت بعد ما تمشى هو وعياله وانبسطوا دخل قابل نوف ورهام طالعين
ثنيان: وين
نوف : خلاص بنروح بيتنا
ثنيان: بدري
نوف ببتسامه: ماعاد بدري عند رهام
ضحك ثنيان: اجل ما نعطلك يا عروسه
ابتسمت رهام وراحوا ودخل ثنيان والعيال وركضت الترف وهي تسلم على عمر
ورفعت راسها: كيف مشاعل
ثنيان:ان شاء الله بخير
عمر: بنطلع نلعب يا بلاستيشن يبه
ثنيان: يلا شوي وانزلوا للغداء
طلعوا وجلس ثنيان وهو يكلم عجاج وابتسمت الترف بعد ما انتهى ولف عليها: وش فيك تضحكين
الترف : ابد احب كلام الاصحاب تذكرني بسلوى ونوره
ابتسم ثنيان: حلوين الاصحاب
الترف بكيد: تصدق اني ادعي ان نوره تزوج وتجي معنا فالمدينه قريب مني
ثنيان: ليه
الترف:زهقت وانا لحالي ابيها معي يا زينها نوره
ثنيان: نوره بتتزوج بس لا تضمنين تجي هنا
الترف : ما ادري من ذا اللي بيتزوجها ويجيبها هنا
ضحكت وهي تلمح : ليت الايام مثل الاحلام كنا دايم ندعي نتزوج اخوان ولا اصدقاء عشان نكون مع بعض سلوى تزوجت اخوي وباقي نوره
ثنيان ابتسم : نزوجها نواف
ضحكت الترف برعب : وين نواف عشان امك تكمل عليك
ثنيان ابتسم :الا تعالي على طاري الزواجات انا فكرت في شي
الترف: وشو
ثنيان: كلمت ابو عايض عن نعيمه وقلت لهم ان فيه ناس كويسه لو يتزوجها عايض ويستر عليها
ابتسمت الترف بصدمه: وش صار لك صاير خطاب ،وبعدين وش معنى عايض
ثنيان ارتبك : لا مب يعني عايض بس قابلني بعد السالفه وقلت يمكن ربي يكتب نصيب
الترف ( الله لو تدري اني مخططه قبلك بس زين جت منك ): والله مدري
ثنيان سكت وهو مايبيها تفهم انه كارهه عايض عشانها وبيفتك منه بعد سكوت قال لما لمعت في راسه فكره: اقول دامتس تقولين اصحاب وما اصحاب وش رايتس نزوج عجاج نوره
الترف اللي لفت وهي ودها تقوم تهز ( اخيييراً فهمت ) : وين ما اتوقع عجاج يوافق
ثنيان اعتدل لما جازت له الفكره: ماعليتس من عجاج قولي لي نوره بتوافق
الترف ( يا ربي رباه ماني مصدقه ): نوره مقدور عليها اقنعها انا
ضحك ثنيان : اجل ازهليهم اعتبريهم تزوجوا وانتهوا
الترف: واثق مره
ثنيان اللي تذكر سالفة الصحن وانفجر يضحك : اتوقع فيه تجاذب بعد تكفيخ الصحون
الترف ناظرته بصدمه وضحكت :لا تقول انك تدري
ثنيان : اكيد بدري
انفجرت الترف تضحك : هاذي ناويه تهبل الرجال اجل بطلنا خلاص
ثنيان ضحك وهو يرجع شعرها لورا : لا يا حبيبي محد يودينا في ستين داهيه الا الهبال
الترف ابتسمت وهي تناظره وطالت النظرات بينهم ونزلوا العيال وقامت الترف تنزل الغدا وهي تحس في صدرها شعور غريب فجاءه حست بالانانيه بحب ثنيان خلاص فعلا صارت ماتبي احد يشاركها ثنيان مره
اما ثنيان اللي اول ماشاف محمد تذكر منيره اللي له وقت مايدري بها طلع وهو يسحب جواله اتصل مره ومرتين الجوال مغلق استغرب منيره عمرها ما اغلقت جوالها رجع وهو يقول :حمود جوال امك خربان
محمد: لا
ثنيان: اجل ليش مغلق
محمد : يمكن ما شحنته وهي عند جدي
ثنيان: زين
ارسل لها ( سلام مناير اول ماتفتحين جوالك اتصلي بي )
جلس وهو يشوف الترف جايه رغم انه فاقد منيره الا انه فعلا مايدري وش يصير له اذا شاف الترف ينسى نفسه
..................••............
في بيت ابو محمد
عند منيره اللي كانت تراعي ابوها وهي في نفسها ضيق ملت من ثنيان ومن طردها وراه خلاص فتحت جوالها وشافت رسالته طنشت وهي ترجع تقفل الجوال
وثنيان اللي كان يراقب الرساله وشافها انها فتحتها ورجع اتصل بس مغلق نزل لقمته وهو مستغرب ورجع يتصل ويتصل بس ما ترد
الترف : فيك شي
ثنيان: لا ، محمد خلصت يلا اوصلك
محمد : طيب
الترف: خله يتغدى وش فيك
ثنيان: ببدل وارجع تغد
طلع ثنيان وهو مايدري وش بلاها بدل بسرعه ونزل اخذ محمد وطلع لبيت عمه
................••............
في بيت سيف
عند امل اللي كانت جالسه مع فجر والوضع رسمي بينهم دخل سيف وهو يرد السلام وطلع لغرفته وطللعت امل وراه
امل : سيف ليش رفضت اني اروح لزوجة ثنيان
سيف : انا ما جبتك هنا تكونين علاقات مع زوجات ثنيان الشي الوحيد اللي مطلوب منك تكسبين امي وابوي وتحفظين بيتك يا امل لا تخربين الحياه سامعتني
امل : شي جديد انك صاير تصارخ علي
سيف : امل اليوم مالي خلق ابد توكلي على الله
طلعت امل وهي ما حدها على سيف الا الحياه الضيقه .
.................••............
في بيت ابو محمد
ثنيان اللي وصل ونزل وهو يدق الباب فتحت منيره وهي بارده : هلا تفضل
ثنيان دخل : كيفك
منيره:حمدلله
ثنيان: عمي وينه
منيره:داخل
ثنيان تقدم ودخل وهو يسلم عليه ولما شافه مايدري عن الدنيا تراجع وقف وطلع لمنيره اللي كانت تزهب القهوه بالمطبخ : منيره ليش جوالك مغلق
منيره : مالي خلقه
ثنيان: مالك خلقه شلون ذي !؟
منيره: يعني مابي افتحه مابي ادور عليه مابيه بكبره بأختصار
ثنيان: شفتي رسالتي ومارديتي ورجعتي تغلقين الجوال
منيره: ماني فاضيه
ثنيان: منيره اكلمك عدل تكلمي زي الناس
منيره : شلون تبيني اكلمك يا ثنيان هاااه قولي كيف ، شايف كيف الطريقه تقهر شايف كيف التطنيش يعصب
ثنيان : وش تخربطين انتي تكلمي زين بدون ألغاز
منيره : مافيه ألغاز ابد انت مطنش انا ماني مجبوره اركض وراك انت ما تهتم انا مستحيل اهتم مب لاني مابي لا لاني عذبت نفسي كثييير تعبت وانا اطرد وراك ياثنيان عطيتك الحق لين صرت ما تشوفني يا ثنيان عساك مرتاح الحين عسى فضى لك المكان وارتحت
ثنيان : اضبطي كلامك يا منيره وهالتفاهه قفلي عليها وتكلمي عدل
منيره : اوه صح نسيت ان الكلام عن الترف يصير تافهه اذا ما عجبك
ثنيان اشتدت ملامحه بغضب : قلت لك مليووون مره يا منيره عدلي كلامك احسن لك واشرحي مشكلتك بالضبط
منيره : لا بشرح ولا بتعب مخي هي كلمتين ورد غاطها يا أنك يا ثنيان تضبط وضعك وتعرف الحق زين يا اني في بيت ابوي وانت الله يهنيك
والله معاد لي حيل بعد اتحمل اكثر
ثنيان اللي حس ان جسمه برد من الصدمه وهو يناظرها بصدمه : خير يا منيره خير لكن قبل اي قرار اشرحي كل الموضوع اللي انتي متضايقه منه
منيره : ثنيان مب لذا الدرجه صرت اعمى ترا حتى محمد صار ينتبه ويسأل طول يومك مع الترف تفكيرك مع الترف رايح جاي عشان الترف ولا تضحك الا لترف ولا تسولف الا مع الترف حياتك كلها صارت وراك والترف قدامك انا ما احكم قلبك لا لكن خاف الله ياثنيان ما يسوى عليك يا ثنيان
اخذ ثنيان نفس ولف وهو يمسح وجهه : ان كان فيه سبب يا منيره هو انتي انتي اللي بديتي تقارنين وانتي اللي بديتي تفرقين وتسوين مشاكل وتبعدين المسافات تزوجت بعدك لكن لانك كنتي عاقله وكنتي تدرين انتي مين وانتيي وش مكانك ماتغيرت عليك ولا تغيرت مكانتك انتي اللي هزيتي كل شي يا منيره
منيره هنا نهارت وبكت : ايييه صح هذاك اوووول يوم كان ثنيان زوجي اللي اعرفه وولد عمي اللي يقدرني يوم يناظر نظرات متساويه للكل يوم ماكانت عيونه تطير بوحده وينسى البقيه انا خلاص تعبت منك يا ثنيان تعبت
تعبت منك يا ثنيان تعبت ان كنت باقي ساكته ساكته عشان محمد ياثنيان
ثنيان اللي انوجع قلبه على دموع منيره وقرب وهو يحتضنها : انا اسف يامنيره ما توقعت الامور وصلت لهالصعوبه انا اسف اذا اوجعت قلبك لكن انتي ما قصرتي فيني بعد والغلط ماهو غلطي ولا غلطك لكن اوعدك اريحك واريح نفسي
ابتعد ثنيان بعد ماباس جبين منيره وطلع وهو يحس انه في دوامة عصصصف قاتل
................••............
اما رهام ونوف ودلال اللي كانوا يتمشون بالاسواق ويقضون ورهام من فرحتها تحس انها بتطير جلست لما تعبت ونبهها رساله بجوالها كان المكتوب فيها زاد رهام فرحها لدرجة ان قلبها وجعها ( حبيبة أيامي وشهوري وسنيني حبيبة أحلامي والليل الطويل حبيبة الصبر والأمل حبيبة الحب الطاهر رهام اخيرا بينجمع اسمي واسمك اخيرا بينقسم كل شي بينا واخيرا بتصيرين شريكة حياتي في الواقع مثل ما كنتي بأحلامي ابعتبر هاليوم عيد وابيك معي تعيدين ابي هاليوم مثلل الفجر اللي يمحي عتم الليالي ما تخيلين قد ايش قلبي من فرح يدق ما تخيلين قد ايش دعيت ربي وقد ايش شكرته حبيت اكتب لك هالسطور اللي ماقدر صدري يتنظر بها لين بكره ابي اوصلك الفرح اللي ينعش قلبي ابيك معك تفرحين .. محمد )
رهام الحين بالضبط حست بالفرح وحست صدق وش تعني دموع الفرح وقفت وهي تكمل لكن بدافع لقاء محمد بكره ................••............
عند ثنيان اللي طلع هو حتى مايبي يروح لعجاج جلس بعيد بعيد عن كل شي بعيد عن اي تأثير لازم يقرر ولازم يستوعب ولازم يفهم وش يبي
الساعات مرت ومرت ومرت وثنيان للحين بحرب مع نفسه ومع قلبه ومع ضميره ومع عقله وبين اختيارات بين الترف ومنيره
اخذ نفس لما دقت الساعه بيده على 12 وقف وهو يركب سيارته ومتجهه للبيت وهو في راسه قرار واحد وقرار نهائي مايقبل التعديل
................••............
في بيت ثنيان
الترف اللي من بعد ما طلع ثنيان وهي شايله هم وهي حاسه ان اليوم مابيكون مثل بكره طلعت بعد ماغطت عمر وهي مستغربه ثنيان ماله حس اخذت جوالها بتتصل بس وقفها دخوله نزلت مسرعه : ثنيان وينك من اليوم اقلقتني وجوالك مسكر
ثنيان : مافيني شي بس خليني لحالي
الترف: طيب بس قولي عمك فيه شي
ثنيان : لا
الترف : مشاعل؟!
ثنيان : لا
الترف : زين اجل
راحت الترف والثنيان اللي جلس بالحوش شوي وبعدها طلع مر على عمر ومن بعدها توجهه لغرفة الترف دخل وهو يشوفها صاحيه كان في عيونها قلق اقوى من قلق ثنيان اللي قرب وهو ساكت وهي ساكته سحبها وهو يحضنها حضن يشبه الحضن الاخير .
.
.
انتهى البارت✨ اتمنى التفاعل