تهزمني السمراء وانا نّد الفرسان

بارت

«البارت الثالث عشر »
.
.
في بيت ابو الترف
عند الترف اللي بعد ما جهزت ثياب ابوها وصالح بلغها ابوها ان ثنيان بيجيي اليوم يملك وماصدقت طلعو من البيت الا تنهار من البكى فاجاءتها نوره اللي شهقت: الترف وش فيتس
الترف: ذا الشايب بيجي يملك بعد الصلاة
سكتت نوره بضيق وقربت : الترف استخرتي
الترف : ايه
نوره: طيب اهدي وربي بيكتب الخيره اتركي كل شي على ربي
الترف : يارب اني سلمتك امري
نوره: اسمعي انا بروح الحين اخلص الشغالي وبعد الصلاة بجيب سلوى وبجي لتس
الترف : طيب طيب
طلعت والترف اللي قامت ترتب وهي مره تبكي ومره تعصب ومره ترمي كل شي وترجع ترتب
................••............
في بيت ابو محمد
وعند محمد اللي صحى من الصبح وهو يقراء رسالة ثنيان اللي يبيه يروح معاه عشان الملكه رد له انه بيجي معاه بس منيره تجي عند ابوه
نزل الجوال ونزل الكوب وقف وهو يتجهه لابوه وهو يعطيه ادويته
راح يجهز لكن وقف يده على ثوبه اللي غسلته رهام ورتبته وهو من لحظتها ما غسله وكان محافظ انه ما يجيه اي شي يوصخه اخذه وهو يلفه بهدوء وحطه ببوكس وسكره ببتسامه ورجع يكمل نفسه وهو يفكر في رهام وتروح وتجي معاه بإفكاره
................••............
في بيت اهل مي
مي اللي من صحت وهي في بكية وحده وهي تدري ان ثنيان بيملك اليووم
ام مي : بس انتي بس ذبحتيني بالبكى اللي بايعك بيعيه خليه يولي
اختها: تبين نصيحتي لا تتركين زوجك لها بالعكس ارجعي واخذي حقك منها وطلعي عينها
مي : انتي ما تعرفين ثنيان ما تعرفينه
اختها: شوفي حبيبتي واسمعيني زييين اعرفه ما اعرفه هالحكي ما يمشي الرجال كلام بس لكن فعل ما فيه انتي تعرفين كيف تجيبين راسه خليه يتزوج وخليه يروح ويجي على كيفه لكن اذا جاء واجهيه بكل قوتك وانوثتك علميه وش خسر وش ضيع من يده لا تجلسين تنهارين بيطنشك ويمشي لاا خليه اذا جاء عندك امير ينسى الدنيا واللي فيها واكسبيه بدلعك وانوثتك الصراخ ما ينفع والبكى ما ينفع
سكتت مي اللي اقتنعت : كيف اسوي
اختها: قومي صحصحي بنفسك اطلعي للمشغل رتبي نفسك غيري نيولك خليه يشوفك ويطيح من طوله
مي وهي تناظر نفسها فالمرايه: تتوقعين ينفع
اختها: ينفع ينفع حتى انزلي السوق وخذي لك كم لبسه تطلعين قدامه فيها
مي : طيب روحي معي
اختها:يلا يلا اطلبي التاكسي وانا اعلمك انتي بس اسمع كلامي وشوفي اذا ما رجع على وجهه
.................••............
بعد الصلاة اخذ ثنيان ابوه وسيف ومحمد والشيخ ونواف وراهم وطلعوا متجهين للقريه بهدوء تام
محمد : غريبه عجاج ما جاء
ثنيان وهو يناظر رسالته اللي ارسلها على عجاج وطلبه يجي ورفض عجاج : تعبان ابوه مايقدر يروح
ابو ثنيان: هه يوم جاء وقت ربعه اخختفى
ثنيان: يبه لا تنكد تكفى
ابو ثنيان: اببد مانيب منكد عليك استانس انت استانس
صد ثنيان وهو يعدل شماغه اول ما دخلوا مع القريه
وصلوا ونزلو وهم يشوفون ابو الترف وصالح واقفين يستقبلونهم ولكن كان وجهه صالح جامد بغضب تجاهله ثنيان ودخلوا وكل القريه اجتمعوا وابتداء ابو الترف يحكي بالمهر وكل شي يقوله يقوله ثنيان تم .
عند الترف وسلوى ونوره اللي كانوا يسمعون وكل ما قال ثنيان تم بكت الترف
سلوى: وش بتسوين يالترف
الترف : مافي الاحل واحد اذا ما هج منه الشكوى لله
نوره: الترف الله يخليتس اعقلي فيكنا من المشاكل
سلوى : وشو
الترف : بحط شروط تعجيزيه
سلوى: اقول انثبري انتي جاتس صمخ ابوتس شرط وانتهى والرجال تمم وبيكتبون العقد وانتي بتوقعين
الترف: اجل وش اسوي
نوره: مالتس الا تلعنين ابو خامسه هو وحريمه وتطلقين وتجين وعايض ينتظرتس اكيد
الترف: يا ربي ما عمري حبيت عايض الا هالمره
سلوى فزت اول ماسمعت صوت خطوات وركضوا للغرفه وجلسو ودخل صالح بيده الكتاب وهو وده انه يفجر براس ثنيان : لا توقعين
الترف : لو ما وقعت ابوي وش بيسوي
صالح: يسوي اللي يسويه
الترف : اييه يطردك 7 سنين من البيت ويتبرى منك مثل قبل
صالح: شتبين انتي يطردني انا بكيفي ابي انطرد
الترف: بيطردك وبتزوج غصب
سلوى: ما ندري وين الخيره يا صالح
سكت صالح وهو يرمي الدفتر ووقعت الترف وهي تحاول تحبس دموعها
وطلع صالح والكل قاموا يباركون وثنيان اللي كان ساكن فيه فرحه بس ناقصه حتى الترف مايقدر يشوفها بعد ما تغدوا وانتهوا وحددوا الزواج بعد اسبوعين طلع ثنيان متجهه للبيت والكل ساكت حرفيا محد يبي يتكلم
.................••............
في بيت ابو ثنيان
وعند شوق اللي كانت بغرفتها وهي مقفله الباب بهدوء فتحت جوالها وهي تفتح محادثة تنتظر الرد منها من زمان لكن كان هالرقم تماماً مطنشها ولا يرد نزلت الجووال وطلعت راحت لغرفة رهام وهي تشوف رهام السرحانه وبيدها سلسال القلب خطفته وهي تضحك: وييين وصلتي ومع ميين
رهام اللي اخذت السلسال بغضب: يا شين السماجه يا اختي ادخلي بشويش وبعدين كلامك ذا عدليه وش ذا الحكي
شوق : الله الله وش قلنا عشان تعصبين وبعدين ترا لك اياااام وانتي مانتي عاجبتني
رهام بحده وهي تلبس السلسال : ولا ما طلبت اعجبك
نزلت وتركتها ووقف شوق وهي تقول : ما عليه يا رهام انت اعرف اطلع سرك
................••............
في حارة عجاج
وعند عجاج اللي كان جالس عند بقاله الحاره بعد ما طنش رسالة ثنيان كان ينتظر ثنيان يجي مثل العاده ويحكي له لكن طول والوقت مشى وثنيان ما جاء
سالم: ثنيان وينه معاد نشوف
عجاج: مشغول
سالم: يقول ابو حمود انكم متهاوشين
عجاج: ايييه تطلبنا شي
سالم: بس مايصير
عجاج : والله يقالك جايب شي جديد ادري ما يصير
سالم : وش بتسوي طيب
عجاج: مب شغلك توكل ترا روحي في يديي
سالم : براحتك
راح سالم وعجاج اللي كان ينتظر وينتظر لكن ثنيان ما وصل
................••............
ثنيان بعد ما نزل ابوه ومحمد رجع لبيته الفاضي وحريمه كل وحده عند اهلها انسدح بالصاله وهو يفكر ويقلب في راسه اموره
رفع جواله بيدق على عجاج بس نزله وهو يقول : انتظر يا عجاج انتظر مب بس انت اللي تزعل اعرف كيف اجيبك
بس فز اول ما اتصل جواله وارتخى لما شافه محمد : هلا محمد
محمد : هلا فيك وينك
ثنيان: بالبيت فيه شي
محمد : لا لا بس كنت افكر اقولك اقتراح وتوني اتذكر
ثنيان: امر
محمد ابتسم لما تذكر رغبة رهام : وش رايك ذا الاجازه دامنا برد واجواء حلوه نطلع لمخيم ونستانس فيه
ثنيان : هي متى الاجازه
محمد : بعد شهر تنعد فيها انت عريس
ابتسم ثنيان: اييه ماعندي مشكله انتم حضروا واللي تبون وانا معكم
محمد : خلاص عندي اجهز كل شي بس انت عليك تقنع عمي وامك
ثنيان : اجل زين
................••......
سكر محمد وهو مبتسم غمض لما حس يد رهام ولمستها تجدد على ظهره صوتها اللي يطلب انها تروح لمخيم لانها ملت بس صحى على صوت محمد الصغير: خالي خالي خالي
محمد : هااااه
محمد الصغير : امي تقول تعالي تقهوى
محمد : طيب
طلع محمد وجلس بجنب منيره اللي ابتدت تصب القهوه بعد ما لحفت ابوها: ابوي ذا الايام هادي
محمد : ايه ايه صرف له الدكتور مهدئات الانه يتعب نفسه مره
منيره : زين الله يشفيه ، من تكلم قبل شوي
محمد : ثنيان
منيره: وينه هو
محمد: فالبيت
منيره وهي تمسح الدله بهدوء : وش صار معكم اليوم
محمد بتمعن : انتي اللي وش صار معك عساك مو متضايقه ثنيان يقول كلمك
منيره ابتسمت وهي تبعد شعرها: اي قالي والله يوفقه وانا مبسوطه له
محمد : انا بموت وافهم ثنيان شلون يبدل قلبك الحنون يا منيره
منيره : ما بدله يا محمد ولا بيبدله انا سمحت له من البدايه وهذا من حقوقه
محمد : ان شاء الله يامنيره
................••............
من بكره
عجز عجاج يتحمل ان ثنيان ماجاء طلع لمدخل الحاره ينتظر لكن مامرت الساعات ولا جاء زهق ورجع وهو يطلع جواله بقلق : يوووه يا ثنيان وش صار عليك وش صار معك الله يستر لا يكون صاير له شي
ثنيان اللي كان واقف على باب بيت عجاج وينتظره يرجع ابتسم لما سمع حلطمته: قلت لك مانك قد الزعل ما تفهم
عجاج لف : ثنيان وينك من امس
ثنيان: اتذكر ان بعض الحمير زعلانين علي
عجاج : ايه صح
جلس عجاج وطنش ثنيان اللي جلس وهو ينزل علب البيبسي قدامهم : بتحداك تحدي ان فزت علي بكنسل الزواج وان فزت عليك بتحضر زواجي وترقص السامري
عجاج ناظره بتحدي: تحداني على بيبسي
ثنيان : بتمم ولا لا
عجاج : تم
ثنيان : بحط خمس علب قدامك وقدامي بوقت على 60 ثانيه اكثر واحد يشرب هو الفايز طبعا اذا انتهى الوقت نوقف
عجاج : تم
وقت ثنيان وانطلقوا وهم يشربون ويكبكبون ويغصون ويشرقون واخر شي وقف الوقت وهم كل واحد عيونه حمرا من الغازيات
بعد ما تداركوا انفسهم وقف ثنيان وهو يكح : لحظه كم علبه
عجاج :3 والرابع معي
ثنيان: 3 والرابع بعد معي
عجاج : شلون طيب
ثنيان اخذ اكواب وجلس وهو يصب بيبسي عجاج في كوب وبيبسيه في كوب كان الفرق بينهم شووووي بسيط لكن وقف ثنيان وهو يصرخ بضحك: جهزززز الطيران يا خال جاء وقته
عجاج اللي ضحك وهو يكب البيبسي في وجهه ثنيان اللي رجع وهو يكب البيبسي اللي معاه على عجاج وصار الوضع كله كبكبه وقفهم ابو عجاج لللي يقول : وجع ان شاااء الله يالاثنين
سكتوا وخروا عن بعض ودخل ابو عجاج وهو يرميهم بعلب البيبسي والحجر نزلوا اسفل الحاره وهو يقطرون بيبسي والناس تضحك
ثنيان: جهز نفسك بعد اسبوعين
عجاج: حشى ما تصبر
ثنيان: عمي اللي حدد
عجاج بقرف: عمك مين
ثنيان بدلع ماصخ : ابو توتو
عجاج: لا تخليني احلف ما احضر
ثنيان : امزح هو اللي حدد بس جعلك ما تشوف عيون صالح
عجاج: ليه
ثنيان: احسه حاقد علي قسم بالله انه شوي ويكفخني بالفنجان
عجاج: ليته كفخك
ثنيان اللي كأنها رجعت له الحياه وجلس وهو يحكي لعجاج اللي يطقطق طول الوقت
.................••............
انتشر موعد زواج ثنيان والناس نصهم مأيد ونصهم رافض وبدت الايام تمشي شوي شوي وكان زواج ثنيان في قرية الترف والكل مبتلش وقبل الزواج بيوم
كان ثنيان من صبح الله طالع ويجهز ويشتغل وطبعا مع عجاج ونواف اللي كان مصدووم كلياً من وضع ثنيان مع عجاج وشخصيته اللي اول مره يشوفها
عجاج: نواف شفيييك رتب زين
نواف قرب وهو يهمس لعجاج: ياخي بسألك
عجاج: وشو
نواف : هذا اخوي ، ثنيان ولا واحد غيره
ضحك عجاج : ايه هو بس ولدكم عنده انفصام
نواف : واللله شكله اول مره في حياتي اشوفه مسفهل ( يسىولف ويمزح براحه) كذا
عجاج: اووه اجل ما شفت شي
ثنيان جاء وهو يدخل الاغراض اللي معاه: هاااه خلصتوا
عجاج: اذا طلعت اخوك من صدمته بنخلص
ثنيان: ليه وش صار
عجاج: منك حسبي لله عليك سببت للعالم جفاف يا نفسيه
ثنيان ضحك وهو يخبط كتف نواف : اشغتل بس اشتغل
نواف بضحك : ايييه هذا اخوي
رجعوا يكملون شغل والكل مبستم
.................••............
في ديرة الترف
وعند الترف اللي منسده نفسها وهي تناظر الشنطه المسكره على طرف وكانت هاذي هي اغراضها شنطه وحده بس ولا كانت الترف مجهزه اشياء كثيره لانها اصلا ما تبي ذا الزواج وسبب الثاني نظراً لسوق القريه المتواضع ماكان فيه شي كثير تاخذه الا اشياء تقليديه حرفياً ولا حتى جهزت فستان ولا شي
دخلت سلوى : اخبار عروستنا
الترف: سلوى يرحم امتس لا عاد قولين عروسه
سلوى: وش فيتس يا بنت عاد افرحي بيومتس وخلي الجاي بعدين كذا ولا كذا مب تقولين بتطلق عادي اعتبريها عرس بنحضره
نوره دخلت وهي تنزل الاغراض اللي معها: فاتس يالترف فاااتس
الترف : وش فيتس
نوره : دويده وام شوشه ونوير وكل حريم الجماعه ما بقى حش ما حشوه فيتس وناس تطلع وناس تنزل بالكلام وتحسبيني سكت لا
سلوى: صح وش تبين بصورة ذهب الترف
الترف : صورة وش
سلوى: الحين مب صورة ذهبتس كله امس وطبعة الصوره اخذتها نوره مدري شتبي فيها
نوره: الحين اعلمتس اخذتها وعطيتها امي وعاد تعرفون امي الله يهديها ما بقى وحده ما ورتها الذهب والحريم ماتوا ماتوا وخصوصاً دويده يقولون بيشيلونها فالاسعاف من القهر
الترف : والله اني كارهتن ذا الذهب والسبه ذا الشايب اللي جابه
سلوى: اقول تراني بكفختس الحين الشايب من يا العمياء تستهبلين الرجال من قو زينه اللي يشوفه ما يرمش وانتي ذبحتينا شايب وشايب
نوره: هو زين ما قلنا شي بس طبايعه قششر
الترف : علميني وش فايدة الزين علميني بس
سلوى: والله يا حبيبتي يكفي انتس تصبحين بوجهه يفتح النفس ولا بالله عليتس ازين هو ولا عايض
نوره: سلوى صدق انتس خبله وش جاب ذا لذا الله يستر على عايض بس
سلوى: بس والله انتس صادقه لو انه جالس زين من بعيد ازين
الترف : اوووف انا بخمد صدري ضضايق
نوره: يا بنت لا تنامين وانتي ضايقه
الترف: خليني يمكن افطس
طلعوا وتركوها وهي ما تدري كيف تحدد حياتها او كيف تتصرف
................••............
في بيت مي
وعند مي اللي كانت تراقب نفسها ببتسامه ورضا تااااااااااام عن شكلها اللي كان اقل ما يقال عنه يوجع القلب جمالها ابتسمت بعد ما رتبت شكلها بفستان على جسمها يشلع القلب لبست عبايتها وطلعت مع اخوها متجهين لبيتها
................••............
في بيت ابو ثنيان
وعند رهام اللي كانت تفكر في المخيم اللي الكل هب فيه وصاروا يجهزون وكان محمد اللي مقترح واللي مسؤول عن كل شي ابتسمت لما تذكرت انها قالت له وهي تحسبه نواف
دخلت فجر والبنات وقالت فجر: يا بنات خالي يقول لامي حجز مخيم يوجع القلب من كثر ماهو حلو ومرتب وبنططلع له
نوف : انا مدري كيف محمد طرت له الفكره وبعدين رهام انتي كلمتي خالي ثنيان وقلتي له
رهام: لا كنت بقوله بس اللي صار ان محمد حجز
شوق بهدوء وشك وخصوصا انها صارت تنتبه لرهام اللي اذا جابو اسم محمد تهجد : وش درا محمد عن المخيم
فجر: مدري بس سبحان الله طلعت من الله
رهام اللي ماكانت مرتاحه لشوق كثير بس ما عطتها وجه
دلال دخلت: بنات اتركوا المخيم ووقموا جهزوا اغراضكم لزواج ترا من بكره بنطلع بدري
شوق: لازم يعني نروح يمه
دلال : ايه لازم ويلا قوموا
رهام وقفت بفرح: والله انا عاد ما يفرق معي الا اني مستانسه وتحمسه
نوف : اي واللله لكن انا ابي اشوف وجهه مي بس
دلال : نوفووه استغفري ربك الشماته مب زينه
فجر: اي والله استغفرلله
................••............
في بيت ثنيان
وعند منيره ومشاعل اللي كانوا جالسين بالصاله ويتقههون
مشاعل: منيره ثنيان قالك شي عن بكره ولا تكلم
منيره: ابد هالاسبوع كله مشغول يا دوب ينام ويقوم يطلع يخلص شغله
مشاعل: ايه هو خلص غرفتها صح
منيره: مدري اصلا تعرفين ثنيان مستحيل يخلي احد يشوف غرفة احد قبله وتذكرين غرفة مي ما شفناها الا بعد الزواج بشهر
مشاعل: على طاري مي وينها ذا العوبه
منيره: وش تبين فيها
مشاعل : ابد كذا بشوفها
محمد وعمر االلي جو يركضون: مي جت مي جت
مشاعل بضحك: اووه زين اني مصلحه فشار
منيره: الله يقطع ابليسك يا مشاعل
دخلت مي وصوت كعبها يرن رن : سلاااام
الكل: وعليكم السلام
مي : كيفكم وش مسوين من اخر مره
منيره: حمدلله
مشاعل: ننعم بالراحه
مي : جعله دوم يا رب ، ودي اجلس معكم شوي بس وراي شغل
مشاعل: لا ابد معذوره معذوره .
مي : اقول مين عندها ثنيان اليوم
منيره: عند مشاعل
مي : معليش مشاعل حبيبتي ممكن اسرق ثنيان منك الليله
مشاعل بضحك: ابد ابد يا قلبي عليك بالعافيه اسرقيه براحتك
مي انصدمت: من جدك!
مشاعل : اففا وانا عمري رديتك ابد ثنيان لك بس بلغيه قبل
مي ابتسمت بمكر: زين اجل
راحت ومشاعل صارت تضحك ضحك هستيري
منيره: انت مصدومه كيف كذا رضيتي
مشاعل: حبيبتي منيره مي جايه وهي حاطه في مخها تلعب بحساباتنا لكن ما تفوت علي وبعدين على بالك سمحت لها حب لا يا قلبي انتي تدرين ثنيان له اسبوع ما نشوفه الا الساعه 12 وينام حتى ما تعشى والليله بذات لو مي تنخلق من جديد ماعطاها وجهه وخصوصاً ان وراه زواج بكره وانا مابي صراحه اشوفه ليلة زواجه خليني مغمضه عن حماسه خلي مي تنصدم صدق
منيره: يالله يا مشاعل ينخاف منك والله
مشاعل: من جدك منيره متوقعه اعطيها ليلتي
منيره: قلت يمكن حنيتي عليها
مشاعل: شفتي الكلب احن عليه اكثر منها
منيره: الله يصلحك بس
.................••............
اما ثنيان وعجاج ونواف اللي اخذوا العمال والاغراض وراحوا لقرية الترف وهم بيبدون بترتيبات العرس وكان عرس بسيط بسيط بسيط مثل اعراس زماااااااان
وقفوا كان ابو الترف اللي جاي من مجلس القبيله وصالح اللي راجع من دوامه
صالح تكتف بإستغراب وهو يشوف ثنيان يسلم على ابوه ويكلمه وبعدها نزلوا العمال وصاروا يزينون عقود الانوار ويفرشون الفرش ويرتبون كل شي واهل القريه مصدومين
عجاج قرب بهمس :ثنيان لايكون مسوين شي غلط
ثنيان: ليه
عجاج: الناس كلها تناظر
ثنيان: شسوي لهم خلهم يناظرون
.................••............
اما الترف ونوره وسلوى اللي وقفوا بصدمه وهم يشوفون ثنيان وعماله وكيف مشتغلين
نوره: الترررف وش يسوي ذا الشايب
سلوى: يزهب للعرس وش تشوفين انتي
الترف: باقي بدري عساه العمى
سلوى: من الحين اقولتس بيجي عرس يحكون به العالم
نوره: واضح واضح
سكتوا لما تقدم ثنيان بعد ما انتهى التجهيز ووقف بالنص وهو يقول : اول شي سلام عليكم
الكل: عليكم السلام
ثنيان: حياكم الله في محلكم ويشرفني ويسعدني اني ادعوكم لعرسي بكره على كريمة ابو صالح وانا اعدكم كلكم اهلي
وعشان كذا على شرفكم العشاء الليله في ذا وحياكم الله جميعاً
اختفلت الردود السعيده على ثنيان اللي ابتسم وهو يدري انه كسب القريه وهاذي بداية جيده بالنسبه له وابتدوا الناس يجلسون وصارت القهوه والشاهي والعود يدور
نواف جلس جنب ثنيان : اهنيك على هالحركه
ثنيان: خلك فطين
عجاج اللي كان يراقب صالح اللي ساكت طول الوقت : تصدق واضح انه ما يطيقك
ثنيان: هذا هو اللي لازم احله
وقف ثنيان واتجهه لصالح وهو يمد يده له ويوقفه: ابي بكلمة راس
وقف صالح وهو يسحب يده بهدوء من يد ثنيان : امر
ثنيان ابتعد : ما يامر عليك عدو بس اني ما حبيت ضيقتك وانا ادري ان لي منها نصيب
صالح : ما تقصر
ثنيان: شوف يا صالح انا افهم قلقك وادري انك شايل هم وشلون الترف بتواجهه حريم وعيال وشلون اصلا بتبني حياتها على ثلاث بيوت وادري انك خايف من اشياء كثيره وكل هذا معك فيه
لكن بقولك شغله ما اجبرك تصدقني بس على الاقل تثق فيني
انا اوعدك ان الترف ما تشوف اللي يضيقها في بيتي وتاكد ان ما رح اسمح لاحد يغلط على الثاني ابد
وانا اوعدك اني بكون معها وانا اوعدك ما تجيك ضايقه مني او تشكي هم في بيتي واترك الكلام اذا ما تبي كلام وانتظر الفعل
صالح اللي كإنه ارتاح لكن ابتسم بهدوء : انا اثق فيك لكن من حقي احذرك لو عينها ترمش بدمعه ولو تفكر انها بتبكي بضيق في بيتك او منك
صدقني لهدم بيتك على راسك وحزتها ما تدري اذا انت حي ولا ميت
لكن عسانا ما نحتاج
ثنيان فهم لهجه صالح وتهديده ابتسم وهو يخبط على كتفه : بيتي تحت امرك ان بغيت تعمره وان بغيت تهده
راح ثنيان وجلس بجنب عجاج وهم مستمتعين ................••............
في بيت ثنيان
عند مي اللي كانت تننتظر وتنتظر وتنتظر بس الساعه 1 ومنيره ومشاعل رتبوا اغراضهم وناموا
وثنيان ما جاء ناظرت الغرفه اللي رتبها ووقفت هي تناظر نفسها لفت مسرعه لما سمعت صوت الباب وركضت وهي تتعطر وطلعت فتحت الباب ببتسامه ساحره وهي تقول : اوووه الحلو شرف
لف ثنيان اللي كان ميت ميت تعب وهو يناظرها وحواجبه مرفوعه بصدمه : مي !!
مي قربت وهي تحضنه: يا عيون مي
بعد يدها ثنيان: متى جيتي
مي : اليوم
ثنيان : زين حمدلله على السلامه
مي : يسلمك بس ترا خطفتك من مشاعل شوي وهي ماعندها مشكله
ثنيان: من اللي ماعنده مشكله
مي: مشاعل
ثنيان: مشاهل ماعندها مشكله معك ؟!!!!
مي : ايي تعال معي
دخلوا الغرفه وكانت مي مجهزه طاولة اكل وشموع واشياء كثيره
ثنيان: اوووه كل شي تمام بس ميت تعب
مي : لا لا الليله مافيه تعب بروح الحين واسوي قهوه ونروق ونستانس ترا وحشتني مررررره
مي : لا لا الليله مافيه تعب بروح الحين واسوي قهوه ونروق ونستانس ترا وحشتني مررررره
ثنيان: زين اجل استعجلي
راحت مي وثنيان يناظر بالغرفه حاول يقاوم بس انتهى معاد قدر حتى يفتح عيونه انسدح وراح في ساااابع سابع سابع نومه
وكانت الصدمه لمي اللي جات لكن جمدت على الباب لما شافت ثنيان نايم بتعب لدرجه انه ما نزل نعاله
نزلت الصينيه بقوه ورفع راسه ثنيان بفجعه: شفيك تخبطين
مي : ثنيان انا انتظرك
انقلب ثنيان وهو يرمي النعال وهو بالقوه يتكلم من النوم : بعدين يا مي بعدين
مي هنا وللللعت وابتدت تطلع اصووات وتزعجه لكن وقف ثنيان بغضب : انتي لازم تسببين بلا اقولك تعبان وتصقعين
مي : بالغلط
طلع ثنيان وتركها وراح لغرفة مشاعل اللي شافته لما جاء وابتسمت لما سمعت مي تتحلطم وبسرعه رجعت لسريرها ودخل ثنيان وهو معصب نزل ثوبه ورماه
مشاعل: ثنيان مي تنتظرك
ثنيان: فكيني من مي ومن الازعاج تعبان بنام
انسدح وبسرعه دخل في نومه من جديد ومشااعل اللي طلعت وشافت مي تجمع اغراضها ورجعت وهي تضحك
.................••............
ومن بكره قبل العصر في بيت ابو ثنيان
عند نواف اللي كان يدور فالبيت وبيده اغراضه : اجهزوا ترا بعد صلاة العصر بنمشي
شوق : اوووف درينا من زين الزواج اللي بنحظره
نواف : ايه حبيبتي بنت الباشا ما يعجبها شي
دلال : ما عليك منها يا نواف روح روح شوف ابوي وامي
رهام : نواف عمي بيروح العرس !
نواف : لا بتجلس ثريا والخدامه عنده
رهام : زين
فجر اللي جات بضيق وجلست
رهام: شفيك ماجهزتي
فجر: ما رح اروح
رهام: لييييييه
فجر : امي رافضه
نواف : وش رافضه هذا عرس عمك قومي اجهزي بسرعه
فجر: امي حلفت يا عمي
نوف: نواف كلم عمي سيف
نواف : ايه هذا اللي بيصير
فجر: لا لا امانه امي بتعصب وتزعل علي
نواف : شلون يعني تجلسين
فجر: عادي اجلس
دلال: انا بروح اكلمها اصبري
فجر: لا تكفين يا عمه والله بتعصب ويرتفع ضغطها
نواف : خلاص خلاص
طلع نواف ورفع جواله وهو يدق على ثنيان للي رد وهو يضحك: هلا يا نواف
نواف : ثنيان وينك
ثنيان: بالحلاق في شي
نواف: لا بس ثريا رفضت تروح فجر معنا وش نسوي
ثنيان : ليه ترفض
نواف : بعد ما تعرف ثريا
ثنيان: قول للفجر تجهز وانا بشوف سيف
سكر ثنيان ودق على سيف اللي قال ان فجر بتحضر
عجاج : وش فيييك
ثنيان: ابد ثريا من جديد
عجاج : انا عجزت استوعب كيف ثريا هالقشرا اخت منيره
ثنيان: سبحان الله ياخي
عجاج وهو يضرب ثنيان على رقبته من ورا : بس طالع كشخه يا هووه
ثنيان ضحك وهو يناظر وجهه عجاج: يعني نعكس كشختك
عجاج : متى بنروح
ثنيان: الحين يطلع ابدل واللبس ومطلع يعني قول المغرب بالكثير نكون واصلين
عجاج : الله يوفقك
ثنيان: عقبال زواجك الرابع
عجاج : ارحم ابوك تكفى فكني من دعاويك
ضحك ثنيان وطلع وافترقوا عجاج راح يجهز وثنيان اتجهه لبيته وهو ما قابل مي ابد دخل وهو يشوف الدنيا حوسه
جات منيره اللي كانت قمه بكشختها ابتسم ثنيان : اووه اوووه السلطانه منيره
ضحكت منيره : شكرا على المجامله بس بسالك اكلت شي ولا جوعان
ثنيان: ما اكلت بس ماني جوعان
منيره قبل تتكلم سكتتها مي اللي جات بفستانها وكشختها : ثنيان شرايك فيني
لف ثنيان يقيمها بنظره وقال : ابدعتي
قلبت مي وجهها : ليش في مدرسه احنا قول شي ثاني
مشاعل من وراها : ايه مثلا وش رايك بلون شعرها للي غيرته ولا ما انتبهت
ثنيان قطب : غيرتيه ما انتبهت بس حلو
مي : اي حبيبي ما الومك ما تنتبه متعود على اشكال وحده
عمر اللي جاء يركض وهو مشخص : انا يبه وش رايك فيني
ثننيان ابتسم وهو يدق له تحيه : اووه اووه لا شكلنا بنزوجك انت
ضحك عمر بفرحه وجاء محمد : يبه شخص لي
ثنيان قال بدقه في مي : والله يا حبيبي انا تشخص لي امك خلها تشخص لك تعرف اكثر مني
منيره ابتسمت وهي تقرب لمحمد وتشخصه وثنيان اللي مشى بس وقف وهو يناظر مشاعل ببتسامه : اووه مشاعل اليوم ناويه تكسر الدنيا
ضحكت مشاعل ضحكه استفزت مي : لازم نكون لاقين في الضابط ثنيان
ضحك ثنيان ومر والكل مستانس انه مروق
مي تحركت بغضب
وراحت منيره ورا ثنيان اللي تجهز ووقف وهو ياخذ غترته واتجهه لمنيره وهو يعطيها : جاء دور لمساتك
ابتسمت منيره واخذت الغتره وجلس ثنيان وابتدت تشخص له
جات مشاعل وهي تدق الباب وترفع صوتها عشان مي تسمع: ادخل ولا بعد ما جهز المعرس
منيره: تعالي جهز
دخلت مشاعل بالعود وهي تبخره وتبخر بشته
محمد : يبه اذا كبرت بتزوج زيك
ثنيان: اذا كبرت تزوج
عمر: وانا بعد
ثنيان: وانت بعد جهز عمرك
مي اللي كانت تسمع ضحكهم وهي تحس بقهر شلون يقدرون يضحكون يسولفون كأن الامر عادي
اما منيره ومشاعل اللي متأقلمين وفاهمين انهم لو تضايقوا مارح يستفيدون شي لذلك كانوا مبسوطين
.
.
انتهى البارت✨