تهزمني السمراء وانا نّد الفرسان

بارت

«البارت الثامن والاربعين»
.
.
عند بيت ثنيان
وقف صالح وهو متجهه لسلوى يساعدها بس استوقفه ثنيان : صالح يا هلا
تقدم له صالح وهو يسلم : هلا والله يا ابو محمد ماجورين وعظم الله اجركم
ثنيان : جزاك الله خير واجرنا واجرك
صالح: والله اني توني دريت ومن يوم دريت على طول جيت الله يهون مصيبتكم ان شاء الله
ثنيان: ما تقصر ماتقصر الله يعين هذا حال الدنيا أقلط أقلط محمد افتح المجلس
دخل صالح وثنيان اتجهت الترف لصالح اللي على طول احتضنها وهو يسلم عليها بحراره: انتي بخير
الترف : حمدلله
ثنيان: الترف الله يعافيك زهبي القهوه
الترف : ابشر
طلعت الترف اللي اتجهت لسلوى دخلتها وهي تسلم عليها سلمت مشاعل ومنيره وبعدها نسحبوا لغرفهم ودخلت الترف تجهز القهوه وفي ذا اللحظات وصل عجاج ونوره اللي دخلت لترف بعد وهم يساعدونها وبعد ماجهزوا القهوه واخذها ثنيان لفت الترف عليهم وانهارت فزت نوره وهي تمسك الترف وسلوى اللي كانت مختبصه
نوره: الترف يا حبيبتي اذكري الله
الترف : ما شفتوا اللي شفناه يا بنات ماشفتوا
سلوى: لا تسوين كذا يالترف لا توجعين نفستس
نوره: اللي صار صار انتي اذكري الله
سلوى : عيني خيير
بعد شوي سكتت الترف وهي تشرح لهم اللي صار بحذافيره
سلوى: وهي ليش سوت كذا
الترف : مدري عنها هي مشاكلها كثير الظاهر ما قدرت تحمل وسوت كذا
نوره : حتى لو ان مشاكلها كثير هاذي حرام حرام
سلوى : الله يغفر لها بس
الترف: محد موجع قلبي الا دلال ونوف حالتهم حاله
سلوى: الله يصبرهم هاذي ما رحمتهم حتى بموتها
نوره : الله يعينهم بس
.................••............
في بيت محمد
رهام اللي كانت جالسه وهي تفكر دخل محمد ومعاه الاكل وجلس : رهام يا عيني قومي تعوذي من ابليس وكلي لا توجعين قلبك خلاص اللي صار صار
رهام بتردد : محمد معقوله ان الحب يسوي كذا
محمد لف لها بصدمه : شلون يعني
رهام وهي تراقب ملامحه : يعني مافيه شي سري عند البنت ويخليها تسوي كذا اكثر من الحب
محمد اللي ما يدري كيف جاته الصلابه وقدر يثبت ملامح وجهه بشكل عادي : قصدك ان ششوق انتحرت عشانها تحب؟!
رهام: مافيه الا كذا
محمد : والله مدري ماني بأعرف منكم لكن هالبنت مب دايم مالها حس وطاري يمكن عندها مشاكل نفسيه وبعدين هذا اللي طلع بالتقرير
رهام اللي ارتاحت وهي تشوف ملامح محمد :مدري فكرت كذا
محمد : لا تخلين الوسوسه تاخذك وتجيبك والله يرحمها وش بتسوون عاد ، المهم قومي يلا كلي معي
رهام وقفت وهي تمسح وجهها وجلست مع محمد اللي ما صدق يخلص الاكل وهو يحس ان داخله يحترق كيف بيعدي كيف بيقنع الكل انه ماله دخل بموت شوق رغم ان محد صرح بس واضح من نظراتهم
................••............
في بيت ثنيان
اللي كانت السوالف مختصره على عجاج وصالح سوالف عاديه لكن ثنيان اللي كان شبه سرحان وواضح تعبان
صالح: اجل انا استأذن وان شاء الله انها اخر احزانكم
ثنيان: بدري يا صالح خلك شوي
صالح : والله وراي شغل
ثنيان : اجل براحتك ، محمد روح ناد اهل صالح
ركض محمد جوا ووقف ثنيان يودع صالح
وعند الترف اللي كانت تختصر الاحداث وتقولهم قطع محمد اللي قال : الترف ابوي يقول نادوا اهل صالح
الترف : ليييه !
محمد : بيمشون
الترف: بددري
سلوى : والله ودنا نجلس معتس بس تعرفين ابوتس ورانا وغير كذا جينا بنتطمن عليتس ونمشي لكن بنرجع ان شاء الله
نوره: سلوى سلمي على امي
سلوى: طيب بس انتي تعالي بعد تزوجتي ونقعتي هنا
نوره: طيب لا تاكليني
سلوى طلعت بعد ما ودعت وجاء عمر بعد ينادي نوره تطلع وطلعت نوره ................••............
في المجلس
ثنيان: لو تجلس انت يا عجاج شوي
عجاج: بعدين نجي الحين انتم تعبانين ارتاحوا وريحوا اعصابكم شوف وجهك كيف
ثنيان ابتعد لما جات نوره: الله يسهلها
عجاج : يلا فمان الله
رجع ثنيان للبيت وراحوا عمر ومحمد يلعبون وثنيان طلع متجهه لغرفة الترف دخل وشافها كعادتها الاخيره منسدحه تقدم وانسدح جنبها
ثنيان : كيفك الحين عساك ارتحتي بعد شوفتهم
الترف: خلك مني انت كيفك
ثنيان لف وهو يحتضنها بهدوء وهو يحاول يهون على نفسه: والله مدري على كثر ما انسألت هالسؤال ماعرفت اجاوبه
الترف: بيهونها ربي بس انت هونها وتهون لا تلوم نفسم وتتعبها انت مالك ذنب
ثنيان : والله مدري اذا لي ذنب ولا مالي بس الله يسامحني اذا اخطيت في شي والله يهونها على دلال وبتهون عندي
الترف ماعرفت وش تجاوبه لكن شدت عليه هذا اللي طلع بيدها لانها هي اصلا بعد ماعندها شي تقوله هنا غفى ثنيان وهو يتمنى تعدي هالايام المتعبه للكل .................••............
الايام عدت شوي شوي بثقلها وكآبتها لكن كان لها اثر فيهم والكل مب قادر يتحرر من الموقف لكن بعد شهر تقريبا بدا حزنهم يخف شوي شوي ويختفي
في بيت ابو ثنيان ..
دلال اللي بعد حزن شهر بدت ترجع للحياه لكن هدوء كبييير وصبر اكبر بعد ما انتهت من الفطور طلعت وهي تحضره ودخل نواف المطبخ: صباح الخير لست الكل
ابتسمت دلال : صباحك خير يا نواف
اخذ نواف منها الصحون: كيفك اليوم
دلال : قد ما اقدر بكون بخير
نواف: لا ان شاء الله انتي بخير وبقوه بعد
ابو ثنيان: ماشاء الله ماشاء الله ايه هذا الفطوراللي من شهر نحتريه ذبحنا فطور فجر ونواف
فجر: افااااا ياجدي نكرت جميلي
ضحك ابو ثنيان وهو يغمز لها : انتي ما تقصرين بس دلال غيير
فجر ضحكت :بتجيبكم الايام
نواف : ما عليه خليهم خليهم يقولون اللي يبون بيعرفون قيمتنا قريباً
ام ثنيان: وش قيمته يا حظي يروح نص اليوم سواليف تدخلون الساعه 8 المطبخ تحطون فطوركم 4 العصر
نواف بمزح: المهم حطينا فطور مب ناكل ونذم
ام ثنيان ضربته بعصاها والكل يضحك عليه والهدف يغيرون جو دلال ................••............
في بيت محمد
اللي عدا تأنيب ضميره على خير وبدا ينسى ويركز على حياته دخل المطبخ
وهو يشوف رهام واقفه بسرحان وهي تقطع الخبز بهدوء
محمد : شكلنا اليوم فطورنا خبز مفروم
رهام لفت بإستغراب : كيف ؟!
محمد : لك ساعه واقف وتقطعين فيه تسع ميه وتسعه وتسعين قطعه وش مشغل بالك الحلو هاه !
رهام ضحكت : مدري سرحت كذا ، خلاص الفطور جاهز
محمد : يلا يلا ترا ميت جوع
رهام : خذ الخبز خلاص وبجيب الحليب واجي
راح محمد وجلس وهو ينتظرها ولككن فجاءه انحط بحضنه بوكس !! رفعه محمد: وش ذا
رهام: مدري وصلك !؟ ومكتوب ممنوع الفتح !
محمد تجمد وهو للحظه كان وده يقول بكل صوته ( الله لا يسامح شوق اللي ما ريحتني حيه ولا ريحتني ميته )
.................••............
في بيت ثنيان
ثنيان اللي صحى على صوت بكى التوأم وعمر ومحمد يحاولون يسكتونهم وخطوات مشاعل السريعه اللي تحاول تسكتهم رفع راسه وهو يقول : مشاعل وش بلاهم يبكون
مشاعل : جوعانين خلاص الحين يسكتون
عمر : يبه الترفي تبكي كثير هي خلت حياة تبكي معها
محمد : يا حليلها حياة مؤدبه
ابتسم ثنيان وهو يناظرهم وفعلا حياة ماكانت تبكي كثير اخذها ثنيان وهو يبوسها وبعدها رجعها تكمل واخذ الترفي اللي كان لها صوت وحركه لكن مجرد ما حاول يرجعها انفجرت ببكى حار
مشاعل: شفت يا ثنيان قلت لك لا تعودها على الحضن الحين ترجع تبكي
ثنيان: افا والله يا الملح والقبله والله انها تستاهل الحضن بس تبكين على الحضن جعله فداتس والله
ضحكت مشاعل: اييه فداها لكن من بينشب فيها بعدين انا
ثنيان عطاها مشاعل : خليني اغسل واجي
بعد ما غسل ثنيان رجع واخذها ومشاعل معاها حياة اللي نامت المسكينه نزلوا وهم يشوفون الترف ومنيره مجهزين الفطور وينتظرون
مشاعل وثنيان: صباح الخير
الكل : صباح النور
جلس ثنيان وهو يحط الترفي بحضن الترف : خذي سميتتس المزعجه ازعجت الدنيا
الترف : لا والله من قال مزعجه بالعكس انسانه مليانه بالحياه
ثنيان: والله كفايه علينا انسانه وحده بيصيرون ثنتين بيولع بيتنا
الترف: وش حارق رزك انت كله غيره جب ولد وسمه ثنيان
فجاه الكل صاح عليها وضحك ثنيان: ماشاء الله ودتس تموتيني بدري وتسمين على اسمي
ضحكت الترف لما انتبهت : اوووه والله مادريت لكن مب شينه
مشاعل: يا زين المزح بس استغفري
الترف بعناد في ثنيان: مانيب مستغفره اصلا يمكن يجي الولد احسن شوي
منيره: يا وجهه الله يالعناد والله لو يصير فيه شي اول وحده بتموت انتي
ثنيان وهو مبتسم : بسم لله عليها
الترف : لا تحاول تحتك مانيب مستغفره
ثنيان : اجل بسم لله علي لحالي
الترف : وبسم لله علي لحالي ( من المعروف ان الولد ما يتسمى على ابوه الا اذا مات ) .
محمد اللي طفش من المناقر : بسم لله علينا كلنا
الكل :ههههههههههههههههههههههههههههههههههههههههههههههههه ههههههه
منيره: ثنيان عندي اقتراح
ثنيان: قولي يا مناير
منيره: وش رايك نستأجر لنا شاليه ولا منتجع نستانس شوي فيه ونغير جو
مشاعل : اي والله من جد ودي نغير جو توني كنت بقترح
الترف : اضم رائيي لهم بعد
ثنيان: ايه ما عليه حتى انا فكرت لو نروح لمكه احسن بعد نروح كلنا يعني
منيره: اي والله احسن
الترف : اضم رائيي لك
ثنيان : بس هاذي مشاركاتك
الترف : وش اقول
ثنيان ضحك: لا تقولين شي واضح مره مخك ضارب
عمر : يبه الترف صارت زي امي لما كانت حامل بالتؤام ما تفهم بسرعه
مشاعل والترف طارت عيونهم واانفجر ثنيان ومنيره يضحكون
ثنيان: عز الله صدقت
مشاعل: عمروه انا امك يا قليل لادب
عمر: اقصد يا ماما انك كذا تطولين
الترف : الشرهه مب عليكم على اللي يتعب عشان يزيدكم عدد اصبروا بس لين يجي ولدي والله ما تلعب معاه لا انت ولا ابوك
ثنيان: على كيفتس ولدي تراه
الترف : معليش ما افهم
منيره: ههههههههه يجي الحين العبط
ثنيان: طيب باقي سبعة شهور ونشوف العبط وين يروح
محمد : بس انا أللعب معاه صح يالترف
الترف : صح يا صديقي
ثنيان : ماشاء الله وانت كونت صداقه على طول
مشاعل : ههههههههه ثنيان ما انصحك ترا هالايام صايرين اصدقاء بشده بعد
ثنيان: الله يعينا اجل ، المهم صدق انا بكلمهم بالموضوع واذا وافقوا بكره بنمشي
الكل: تمام
ثنيان وقف وهو يعدل شماغه بعد ما باس التوأم
منيره : ماعندك دوام اليوم
ثنيان : لا بخلص كم شغله برا ، اذا ناقص شي ارسلوه
منيره: لا كل شي تمام
مشاعل : حتى انا
الترف : اجل انا هالمره ما اضم رائيي عندي نواقص انا
ثنيان: حمدللله ، ارسليها اجل
الترف: لا كتبتها في ورقه لاني كل شوي اتذكر شي بجيب الورقه انتظر
طلعت الترف وثنيان اللي اخذ اغراضه وطلع للحوش وهو يسقي الزرع جات الترف وهي تعطيه ورقه ومن النذاله مطبقتها مليون طبقه
ثنيان: ايوه كيف افتحها ذي
الترف : افتحها
ثنيان: انتي العباطه تمشي بدمتس
الترف : يعني
ثنيان اخيراً فتحها وهو يضحك انها ما اكتفت كذا بعد لا كانت مقطعه الحروف ضربها بخفه على راسها : وش ذا
الترف : تسلى بها شوي ، هذا مود ولدك
ثنيان اللي ابتدا يطول صبره كثير عن قبل وصار عادي يتحمل اي شي : مردوده مردوده لكن لين يجي ولدي على خير
ابتسمت الترف ونزل ثنيان المويه وهو يعدل نفسه لاخر مره
الترف : بسم لله عليك
ثنيان ابتسم : ماشاء الله تمدحيني اخيرا
الترف: لا ما امدحك الحين اسمي عليك عشان تفائلت عليك من شوي
ثنيان اتسعت ابتسامه : يا جعل مايسمي علي الا انتي
الترف : امييين
ثنيان: اروح احسن لي صح!
الترف : اضم رائي لك
ثنيان ضحك وطلع ودخلت الترف
................••............
في بيت محمد
محمد اللي كان فيه تردد كبير يفتح البوكس بس كان لازم يفتحه بهدوء وفتحه لكن تبدلت كل مشاعره ونسى شوق واهل شوق لما شاف لبس طفل ومن بعد تقرير مستوصف ومعاه اختبار حمل والتقرير ايجابي
وقف وهو يناظر رهام بفرحة تملي عيونه وتفيض فرحة كانت كفييله تسبب لمحمد اغمى لكنه ركض وهو يحضنها بفرح وسط صوت ضحكه وضحكها
كان هالامل لمحمد شبه مستحيل اخيرا احلامه تحققت شوي شوي اخيراً
رهام اللي كانت طايره من الفرحه طايييره وخصوصا الدكتور قالها ماعندك اي خطر بالعكس تحملين وتولدين بخير ان شاء الله
................••............
عند عجاج
اللي كان ينتظر مثل هالخبر في ممرات المستشفى كان واقف مع نوره بعد ما كانت مريضه طول يومين اخيرا دخلوا لدكتوره وعجاج مختبص ما يفهم كثير بهالمواضيع
الدكتوره : نوره وش تشتكين منه بالضبط
عجاج على طول تكلم : من يومين يا دكتوره ومعدتها تعبانه و..
الدكتوره: مقدرين خوفك بس انا قلت نوره
ناظر عجاج فيها بصدمه ورجع : زين
نوره انصدمت : وش فيتس عليه هو يعرف وش فيني اكثر مني
الدكتوره: من المريض
نوره: انا
الدكتوره : معناته انتي تكلمي
نوره: خيير لا يكون ذابحين ابوتس
عجاج: اقول قومي يا نوره مالت عليها من زينها ومن زين دكترتها
نوره : الله من النفس الخايسه
طلعوا وهم معصبين منها
نوره: وجع يوجعها
عجاج:خايسه ماعليتس منها تعالي ندور دكتوره ثانيه
طبعا اخيرا لقوا دكتوره لكن هالمره تكلمت نوره وابتسمت الدكتوره: بسيطه يا نوره تعودي على الغثيان وتحمليه
عجاج: وش ذا المستشفى اللي يطقطقون علينا اقولتس مريضه تقولين تعودي
الدكتوره: هد اعصابك يا استاذ بس زوجتك حامل يعني مضطرين تتصالحون مع وضع تعبها
عجاج: هاه
ضحكت نوره بفرح واستوعب عجاج: في ذمتس يا دكتوره
الدكتوره : ايووه
عجاج اللي ضحك بفرح وهو ما صدق الدكتوره تخلص وصفة الادويه الا طار بنوره لسياره وهو يقول: وش اسوي بتس ياااا نوره والله من يوم دخلتي حياتي والفرح ما ينقطع
نوره: مدري وش اقولك بس الشعور متبادل
عجاج ضحك وهو يتحرك بفرح: الحييين بنروح البيت ترتاحين وتستانسيين واجيب فطورتس ونعلم ابوي وثنيااان يالللللله يا زين الخبر زينااه
ضحكت نوره: اجل انا بتصل في امي سلوى والترف
عجاج ضحك: ابشري ببطاقة شحن لعيونتس
ضحكت نوره بفرح وهي تحس ان فيها رجفة فرح
.................••............
في بيت ابو ثنيان
دخل ثنيان وهو يسلم : دلال اليوم كيفك وحشتنا لمساتك على الفطور
نواف : لو سمحت اترك الكذب لمساتها مايعرفها الا احنا انت عندك لمسات غير
ثنيان رفسه بضحكه: وش دخلك انت
دلال ابتسمت: ما يوحشك غالي يا ابو محمد
فجر: والله لو ماتقولون ابو محمد ابرك احس عمي يتغير كذا
ابو ثنيان: افا مب عاجبك اسمي
ثنيان:هههههههههههههههههههههههههههههههههههههههههههه هههههههههههه واضحه وصريحه
ضحكت فجر: توك مب عاجبك فطوري
الكل :ههههههههههههههههههههههههههههههههههههههههههههههههه ههههههه
فجر: لا اقصد لا تكبرون عمي توه صغير
نواف : محد كبر عمك هو اللي مشقي عمره ويخبط فالعيال لين صارو مثل الفيران
لف ثنيان وهو ياخذ البيضه مسلوقه وفقشها بجبين نواف : قل ماشاء الله وجع
نواف : ماشاء الله يا دفش
ابو ثنيان: كيف اهلك يا ثنيان لهم فتره ماجوا
ثنيان : بخير يبه بخير توهم يستجمعون بعد حوسة اختبارات النهائيه واجازه
نواف: اخيرا تخرجت ياربي
ابوثنيان: اجل دور وظيفه
نواف: طيب
ثنيان:على طاري اجازه وش رايكم لو نطلع لمكه مب احسن
ابو ثنيان: اي والله من زمان ودي بعمره
ام ثنيان: ايه احسن ماقلت نروح ونستانس ونعبد ربي
دلال : اي والله يا ثنيان ودي اسوي عمره عن شوق
ثنيان: ابشري بها يا دلال
ابو ثنيان: اجل تم اعقلها وتوكل
ثنيان: اجل بروح اخذ اجازه واكلم العيال وانتم اجهزوا عشان بكره نمشي وانتم نواف وفجر بتروح مع امي وابوي طيران احجز يا نواف
نواف : امرك يا سيد
طلع ثنيان وهو مستانس ان دلال وافقت لكن في لحظه خروجه جات رهام ومحمد
ثنيان : توني بكلمكم
رهام ابتسمت وهي تسلم على ثنيان محمد : قبل تنطق بارك لنا
ثنيان: مبروك بس وشو
محمد : بتصير خال لثالث مره
لف ثنيان بفرح على رهام وهو يضحك : مبرووووك مبروووك
رهام: يبارك فيييك
ثنيان: هاذي والله الاخبار الحلوه
محمد : هذا اذا قالوا صبح بخير
ثنيان: اي والله
محمد : بنبشر عمي اجل
ركض ثنيان قبلهم وركض محمد ورهام وراه
وفز ابو ثيان بخوف : علامكم
ثنيان: يبه ابشرك ابشرك
صرخ محمد ورهام مع بعض : انا حامل
سكتو كلهم وانفجر ثنيان يضحك: رهام حامل انت وش دخلك
تفشل محمد اللي رجع وهو يضحك وفز ابو ثنيان وام ثنيان ودلال والكل ويسلمون عليهم بفرح
دق جوال ثنيان ورد بفرح: هلا عجه
عجاج: انقز لي بالبيت بسرعه
ثنيان: وش فيك
عجاج: اخلص
طلع ثنيان متجهه لبيت عجاج وصل ونزل وهو يسلم على اهل الحاره وشاف عجاج اللي رافع صوت المسجل ( نحمد لله جت على مانتمنى )
ركض له ثنيان: خييير وش فيك
عجاج اللي مسك ذراع ثنيان يرقص معه : بندخل بوابة الابوه يا ثنيان
سحب ثنيان يده وهو يضحك بفرح: يا ربي رباااه وش ذا الصباااااح اللي يتنفس فرح
ضم عجاج وهو يضحك ويبارك له
عجاج : شفت كيف والله يا قلبي يرقع يرقع
ثنيان طارت عيونه: يرقع ماعليه بس لو تشوف اللي جاي لبيتك بيطلع قلبك مع عيونك
لف عجاج واول ماشاف مرزوقه صرخ وهو يوقف على الباب
مرزوقه: سلام وش فيكم مستانسين
عجاج: حمدلله دايماً مستانسين
مرزوقه: وخر طيب بروح لنوره
عجاج: لااا
مرزوقه : ليييه
ثنيان: عند اهلها نوره بتجي بعدين مافي البيت احد
مرزوقه: طيب تكلم مثل الناس مب ناشب على الباب
عجاج: اقول روحي لاهلتس بس
راحت مرزوقه وانفجر ثنيان يضحك: انتبه زيين
عجاج: والله لجلس حارس على الباب
ثنيان: يالليل لو تدري الترف اني جاي ماجبتها
عجاج: روح جبها وتعال
ثنيان: على كيفك وراي شغل بعدين نجي
عجاج: وش وراك
ثنيان: معاملات ما معاملات وبعدين بقولك منك خوه
عجاج : وين
ثنيان: مكه بنروح بالعوايل نوسع صدورنا ونستانس
عجاج: معلييشش نوره تعبانه
ثنيان : يوووه غثيااان ترا حتى الترف حامل وتعبانه ماقلنا شي يجلسون ورهام بعد ابشرك يعني الحوامل كثير
عجاج: ماشاء لله اجل تم
ثنيان: يلا بكره بنمشي
عجاج : زين
................••............
في بيت ثنيان
عند الترف اللي كانت تسولف مع منيره مشاعل اتصلت نوره واول ماردت الترف صرخت نوره : باااركي ليييي بصييير ام
سكتت الترف شوي وشهقت وهي تضحك: في ذمتس مبرووك مبروووك
نوره: يبارك فيتس
الترف: متى متى دريتي
نوره: توني من شوي
الترف : ماشاء الله لله يتمم لتس
نوره: الله يتمم لنا كلنا انا وانتي وسلوى
ضحكت الترف : امييين امييين
نوره: بروح ابشرهم يلا باي
الترف : باي
مشاعل: الترف وش فيك
الترف : نوره حامل
مشاعل: ماشاء الله مبروك
منيره: مبرووك
الترف: يبارك فيكم خلوني اشحن جوالي وابشر ثنيان بعد
دقت الترف وهي تنتظر ثنيان يرد ورد وهو مستانس : ثنيييان
ثنيان: يا لبييه يا عيونه
الترف خقت ونست وهي تضحك
ثنيان: وين رحتي
الترف : ها اييه ايه ابشررك
ثنيان: ابشري بالبشاره
الترف : عجاج بيجي له ولده ولا بنت
ضحك ثنيان وهو يدري بس فرح عشانها : بالله عليييييك ماشاء الله ماشاء اللله الله يتمم لهم
الترف: امييييين بس هاه لا تنسى بشارتي
ثنيان: ابشري ابشري
الترف : واذا جيت بنروح لهم
ثنيان: ابشري خليني اخلص الطلاسم اللي بالورقه وبعديم نشوف
ضحكت الترف : لا تبطي احتريك
ثنيان: يا لبييه بس
ضحكت الترف وسكرت بفرح وهي ودها تطير
.................••............
في بيت منصور
منصور اللي دخل بيته وهو يدور على نوف اللي كانت جالسه بهدوء وهي سرحانه صح تجاوزت الصدمه وامها صارت بخيير وهذا اللي تبينه بس ما زالت تراجع في بالها تصرفات شوق تحركت لما حست بمنصور اللي حط يده على كتفها وجلس : نوف مو كفايه عليك الحزن يا عيني
نوف : غصب علي يا منصور مو بيدي
منصور وهو يحط راسها على كتفه : ادري مهما حاولتي انك ما تحزنين ما يطاوعك قلبك ولكن حاولي انك تعدين هالفتره بأقل الاضرار شوفي عيونك كيف ووجهك صار يوجعني قلبي عليك اخاف يصير لك شي يا نوف اسمعيني وتعالي معي خلينا نطلع ونغير جو واذا تبين ابي اخذ امي والبنات
نوف حزنت على منصور اللي من بعد وفاة شوق وهو معها ولا تركها ولا لحظه ومراعي شعورها وبالعكس كان لها مثل الاب : خلاص ابشر نطلع ونغير جو
ابتسم منصور : ايه الله يرضى عليك حتى امك اذا شافتك بخير بتصير بخير
نوف : صدقت وانا اسفه اذا ضايقتك كثير
منصور: لا لا وش تقولين وش ضيقه الله يهديك افا يا نوف انا لك سند بضيقك وانتي بيجي يوم وتسنديني وان شاء الله احنا مع بعض بالسراء والضراء
نوف اللي ما ترددت ولا لحظه انها تحضن منصور اللي فعلا كان تعويض كبيييير وكبير جدا في حياتها استقبلها منصور بحب وهو اللي في هالفتره البسيطه جدا قدر يتغير كثير مع نوف
................••............
وعند نواف
اللي بعد ما حجز التذاكر طلع وهو واقف بالاشاره تذكر شهد وابوها وقرر انه يمر ويسأل حمدان عنهم وصل الحاره والاحسن انه شاف شهد وابوها جالسين برا وواضح ان شهد تحاول تسلي ابوها اللي كانت سوالفه متقطعه وحزينه بأسم عبدلله
وقف نواف بجنب سيارته وهو سرحان في ذا الشايب
وشافته شهد اللي استغربت وجوده بس ما عطته اهتمام عجز نواف يبعد وهو يشوف كيف تعاني عشان تنتبه لابوها وتعيل بيت انكسر قلبه كثير ان مثل هالبنت بهالعمر الصغير تشيل كل هالحمل على ظهرها ابو مريض واخو متوفي وفقر ودين ونظرات ناس شفقانه تقدمت شهد بغضب لما طول
شهد: لو سمحت وش فيك واقف مسمتر هنا لفت الانتباه لو سمحت لا توقف هنا
نواف : انا اسف ما اقصد بس حبيت اساعدكم لو تحتاجون
شهد : ما نحتاج مساعده شكراً
نواف : لو احتجتي شي او شي كملي حمدان يكلمني
شهد: مشكور
راح نواف وهو للحين يلتفت فيها اما شهد اللي رجعت للبيت
................••............
في بيت ابو ثنيان
في لحظات تبدل الحزن بفرح ووناسه ووقف محمد : اجل احنا بنروح نبشر منيره
ابو ثنيان: الله يستر عليكم
طلعوا رهام ومحمد بفرح كانوا يمشون لبيت ثنيان ولكن داخليا كانوا يطيرون
وصلوا وفتح محمد وعمر لهم
محمد : حمود امك وين
حمود: تساعد عمتي مشاعل بالغداء
رهام؛ بروح اسلم عليهم واناديها
محمد : لا انتي خليك معي وبعدين ادخلي ،روح ناد امك
دخل محمد يركض : يمه يمه خالي محمد برا يبيك
طلعت منيره بخوف : محمد وش فيك
محمد وهو يسلم عليها: خيير يا وجهه الخير
رهام سلمت عليها : مبروك لك يا عميمه
منيره: هاه وش مبروكه !
محمد : بتصيرين عمه يا مناير
منيره اتسعت عيونها بفرح وضحكت: ياااربي ياااربي ماشاء الله مبروك مبرووك
محمد : يبارك فيييك
حضنتهم منيره بفرح : يا ربي ماني مصدقه اخيراً بيكتب لي ربي اشوف عيالك
محمد : ههههههههههههههههههههه اشوفك قاطعه الرجا مني
منيره: يعني معي حق شوي
ضحكت رهام : الحين ارتاحي
منيره: ادخلو ادخلوا تغدوا معنا
محمد : لا لا جينا بنبشرك وبنروح نتغدا برا
منيره : زين اجل الله يستر عليكم بس لازم تغدون عندنا
دخل ثنيان وهو معاه اغراض : الله الله المستجدين عندنا
منيره : ثنيان تعال ببشرك
ثنيان : ابشري
منيره : رهام حامل
ثنيان ابتسم : ماشاء الله مبرووووك مبروك
رهام ومحمد ناظروه بإستغراب بس فهم محمد انه بيفرح منيره ومشوا معاه بالكذبه
ثنيان: اجلسوا تغدوا عندنا
محمد : بنطلع نتغدا برا بعدين ان شاء الله
ثنيان : براحتكم يالكناري
دخل ثنيان وهو ينزل الاغراض بالمطبخ جلس وهو يحتضن عياله
مشاعل : هاه ثنيان كلمتهم
ثنيان: ايه اجهزوا بنمشي بكره بعد الفطور
الترف : جبت اغراضي
ثنيان : بالمطبخ
راحت الترف تاخذها ورجعت منيره وهي تبشرهم والكل مبسوط
مشاعل: الله يعينك يا ثنيان على البشاير
ثنيان : يبشرون بالخير انتي بعد دوري لك بشاره نعطيك عليها شي
مشاعل ضحكت : ماعندي اي بشاره الا ان الترف بدت فقرة التوحم والله يعينك
ضحك ثنيان: لا لا انتي لك بشاره خاصه من زمان توني اتذكر
الترف : اخس يالبشاير الخاصه وشو علمينا ترا حنا منتس وفيتس
ضحكت مشاعل وهي تدري ثنيان مايبيها تضايق: خاصه ما تنقال لاحد
بما ان الغداء جهز جاء ثنيان وهو حاط يدينه ورا ظهره
والكل جالس
منيره: وش ورا ظهرك
ثنيان : بشرتوني وما اسعفني الوقت اختار بشاير ولكن بعطيكم الحين اللي متوفر ونعوضكم بعدين
الترف : اهم شي بشاره منك تكون اللي تكون
ضحك ثنيان: اهم شي تسحبين مني بس
الترف : يا فاهمني
مشاعل: الله يرزقنا مع المبشرين
تقدم ثنيان وهو يعطي منيره ظرف و مشاعل ظرف والترف بسكويت
شهقت الترف : وش ذا !!
ثنيان: تقولين تبين بشاره لو بسيطه هاذي بشارتس
الترف : ماشاء الله عليك رايح للمطبخ واخذت من اغراض اللي انا قلت جبها يعني حتى ما كلفت نفسك تفكر بشي ثاني اقل شي غير ياللي ما تخاف الله
وبعدين الكل عندهم ظروف تلقلق وانا بسكوت
ضحكت منيره: الحمدلله اني سكت قبل كنت بقول سلامتك
مشاعل : وانا بعد اشوى اني ما استحيت
الترف : لاول مره في حياتي قررت اصير ذربه وليتني ماصرت
الكل :ههههههههههههههههههههههههههههههههههههههههههههههههه ههههههه
عمر : يا بابا حتى حنا نبي ظروف تلقلق على قولة الترف
ثنيان :هههههههههههههههههههه ايوه طبقوا الدروس طبقوها
محمد: حتى انا
الترف : والله نحتج عليييك ونسوي مظاهره بعد
ثنيان : كنا في عمر ومحمد وما خلصنا والحين بتجين معهم اجل كنسلنا خذي ظرفتس ولا عاد تصيرين ذربه
الترف : اشوى بغيت اموت
ثنيان ضحك وهو ينادي محمد وعمر ويعطيهم فلوس وسكتهم
ابتدوا يفتحون الظروف بس صرخوا كلهم : وش ذا
ثنيان انفجر ضحك : المقسووم
منيره: عز الله ما قررت اصير ذربه
مشاعل: حتى انا والله
الترف : انت تستعبط معنا حرام عليك يا خي خاف ربك
ثنيان ضحك : والله نعمه احمدوا ربكم غيركم مب محصلها
منيره :حمدلله ما قلنا شي بس ريالين وش اسوي بها
ثنيان: ابد انتي خذي لك خبر والترف تاخذ بيض ومشاعل شطه وينزل فطور ااووه كلام
الترف بنظره قهر : لو اني مافي بطني مخلوق والله لتشوف الكلام لكن نخوتي في مشاعل ومنيره
مشاعل: اشوى ما بشرت بشي ولابموت من القهر
كمل ثنيان غداه بضحك والترف ومنيره منجلطييين وخصوصا انه يسمع احتجاجاتهم ومطنش حتى عمر ومحمد ما عطاهم ريالين كان كل واحد معه 100
وكملوا غداهم وثنيان يضحك والترف تحلطم ومنيره متحطمه
وقف ثنيان : الحمدلله اجل دامني سويت اللي علي بروح انام وانتم جهزوا
الترف : ياظالم كيف لك قلب تنام وانت كاسر قلوبنا
ثنيان :ههههههههههههههههههههههههههههههههههههههههههههههههه ههههههه ظالم وكاسر قلوب اجل اعتبروني ما عطيت شي ورجعوا علي الريالات بعطيها محمد وعمر فسحه
منيره: ثنيييان من متى صرت بخيل
ثنيان: من يوم جحدتوا النعمه
طلع ثنيان وهو يضحك على وجيهم المصدومه
الترف : يا حسافه اني مبشرته
منيره: اي والله والله ماكان كذا
مشاعل : انهبل وقعد الظاهر الفرحتين اثرت عليه
الترف : يا عيال من يبادلني واعطيه بسكوت
محمد : ما اعرفك
عمر: وانا بعد
الترف : واطييين مثل ابوكم
مشاعل: اص لا يسمعك
منيره:والله صدمني
ثنيان اللي سمعهم وضحك من صدمتهم وبعدها طلع لغرفة الترف بيريح للعصر
بعد الغداء وبعد ما نظفوا كل وحده طلعت لغرفتها
عند منيره دخلت وهي ترفع شعرها وناظرت على السرير موجود ظرف قربت وهي تاخذه وكان مكتوب تستاهلين بشارتك يا مناير فتحتها ببتسامه وكان 1000 ريال ضحكت بفرح: اييه هذا ثنيان اللي اعرفه
نفس التصرف كان عند مشاعل اللي ضحكت بنفس الفرحه وهي تدري حتى لو ما بشرته بيعطيها مثل ما عطاهم
اما الترف دخلت وهي تشوفه معطيها ظهره ونايم طلت في وجهه وهي تقول : والله نااام شكله صدق مافيه بشاره ليتني خليت عجاج يبشره
لفت وهي تنسدح لكن ارتفعت لما حست تحتها شي وكان نفس الظرف وعليه نفس الظرف فتحته وفزت وهي تضحك : ووالله اني داريه ما تسويها
لف ثنيان اللي كان صاحي : اجل ليت عجاج مبشرني
ضحكت الترف وهي تبوس راسه: امزح عليك ياملحهم كلهم والله انك كفوو
ثنيان اللي سحبها لحضنه : اييه الحين صرت كفو
الترف اللي ماكانت هامتها البشاره كثير بس تبيها من ثنيان ضحكت وهي تقول :انت كفو من يوم يومك
ثنيان: الله ينصرني على كثر ما انظلمت
الترف : ما عليه تسامح
ثنيان : اي والله اسامح واذا ماسامحتتس من اسامح
الترف للي تقدر الحين ماصار عندها اي مخاوف من ثنيان ولا من حبها ثنيان بالعكس تحس انها مع مرور الوقت تحب ثنيان اكثر تحب اهتمامه فيها وحنيته عليها اسلوبه معها واللي يحاول انه يغير اسااليبه القديمه مع الكل كان كل شي يحبب الترف فيه ومن هالنقطه صارت تقدر حتى تعبر له عن حبها بكل صراحه مدت يدها وهي تحاوط دقن ثنيان الكثيف وهي ما زالت مبتسمه : اصلا قلي انت من يقدر يظلمك
ثنيان اللي تقريبا محد كان اسعد منه وهو اللي م تردد انه يدمج يده مع خصلات شعرها اللي يحبها حييل وابتسم : انا ماعمر احد عذبني وتجبر علي كثرك
الترف ضحكت : انا ما اعرف احب بهداوه وما اعابطك الا لاني احبك
ثنيان اللي في هاللحظه مقابل هالجمله كان مستعد اتم الاستتعداد يبيع عمره عشانها
ثنيان اللي ابتسم وهو يبوس خشمها : يا ليت بس اقدر اوريك اللي بقلبي لك
الترف ابتسمت بخجل وهي تحمد ربها ان الله عوضها بثنيان رغم ان فيه عوايق كثير بحياتهم بس اهم شي وجوده
.
.
انتهى البارت 💕