تهزمني السمراء وانا نّد الفرسان

بارت

البارت الرابع>>..
.
.
عند عجاج اللي كان راسه يوجعه من الضرب ومن هواش ابوه اللي سبب له ازمه وقف وهو ياخذ عكازه
ابو عجاج : وينك طاس تبي تجيب لي مشكله ولا تفضحني فالناس
عجاج : يبه الله يخليك بروح ارتاح تعبت من الحنه
ابو عجاج : ايه روح ارتاح روح بعد ما خليت كل الحاره تقول ولده رخمه
اخذ عجاج نفس وطلع وهو يضحك كل ما تذكر شكله وهو ينطق ويحسب طقاته
................••...........
. وعند رهام اللي كانت تراقب السلسال بخوف وهي ماتدري من ارسله ولا تدري من هذا اللي يدري بمشاكل قلبها مسحت جبينها بضيق ولفت بسرعه اول ماسمعت دلال تقول : رهام ليش مانمتي للحين
رهام: بنام بس كنت اشرب مويه واحضر ادوية امي
دلال ابتسمت : الله يعطيك العافيه
طلعت دلال وهي متجهه لغرفة بناتها فتحت وشافت نوف نايمه وشوق اللي قاعده على جوالها
دلال: شوق وش تسوين
شوق : ابد اتابع
دلال: يا بنتي نامي السهر مب زين
شوق : يمه ترا ويكند بنستانس شوي
دلال: وبعدين تكلمي باحترام مع خوالك وحريمهم
شوق ميلت فمها: ابشري
دلال : خلصي ونامي
طلعت وهي تهز راسها بأسى من شوق اللي تصرفاتها تعصبها كثير .................••............
وعند منيره اللي بعد ما تأكدت ان محمد نام وغطته وهو عمر وطلعت رفعت الجوال وهي تقول : هلا ثريا
ثريا : منيره كيفك
منيره : حمدلله وانتي
ثريا : حمدلله عندك احد؟!ثنيان فيه
منيره: لا محد فيه وثنيان مداوم يطلع بعد ساعه يمكن
ثريا: ايه تعالي مي هاذي وش قصتها تقول فجر ان ثنيان كفخها
منيره بضيق : ايه الله يصلحها ويصلحه وفجر من وين عرفت
ثريا:مدري بس قلت بسألك سولفي لي وش صار
منيره قالت لها السالفه ومنيره اصلا ضايقه من ذا المشكله
ثريا : احسن عساه يكفخها ليل ونهار
منيره: يا بنت وش تبين فيها استغفرلله زوجها وكيفه معها .
ثريا: يووووه يا منيره تقهرين زوجها زوجك مستوعبه انتي
منيره : ادري وكل وحده لها قدرها في قلب ثنيان ما راح يظلم احد
ثريا: ايه حبيبتي خليك كذا ضعيفه لين تطير الطيور بأرزاقها اقول مع السلامه بس
سكرت ثريا ومنيره متضايقه ووقفت وهي تطل من الشباك وشافت ثنيان اللي وصل ونزل رجعت لفراشها وانسدحت بهدوء لكن جلست بأستغراب وهي تشوف ثنيان داخل
ثنيان: سلام
منيره: وعليكم السلام
ثنيان: شفيك تناظريني كذا!؟
منيره وقفت وهي تاخذ منه اغراضه: يعني غريبه جاي واليوم ليلة مشاعل
ثنيان : منيره قلت لك قبل انام فالمكان اللي يريحني وبعدين امس كنت عند مشاعل
منيره : لا مو قصدي البيت بيتك تنام مكان اللي تبي
ثنيان: صلحي لي عشاء جوعان
منيره: ابشر
طلع ثنيان وهو يتفقد عياله كالعاده وراح لمشاعل وكانت نايمه ورجع وهو يجلس عند منيره بالمطبخ
وحضرت منيره اكل سريع وحطته وجلست
منيره: غريبه ما تعشيت فالدوام
ثنيان: ما كان معي وقت
منيره : شكل يومكم كان صعب
ثنيان وهو يناظر بفراغ : اي والله صعب
منيره: الله يعطيك العافيه
ثنيان وهو يناظرها: مدي يدك !
منيره: تعشيت ولله
ثنيان ببتسامه : افتحي نفسي على الاقل
منيره ابتسمت وهي تمد يدها معاه
................••............
عند مي اللي كانت تنتظر وهي متوقعته يجي لها لكن تأخر فتحت الباب وهي تسمع اصوات وسوالف فالمطبخ وضحك تقدمت وهي تشوف منيره وثنيان جالسين يسولفون ويضحكون تقدمت بغضب ودخلت
ولف ثنيان يناظرها بهدوء وراحت مي وهي تصب لها مويه وطلعت كانت ماتدري وش هدفها من الحركه بس انقهرت وقف ثنيان بغضب وهو ناوي يكفخها بس مسكته منيره: ثنيان الله يخليك اجلس واتركها
ثنيان: منيييره لا تدخلين
منيره : ثنيان مهما كان هي توها صغيره وجاهله يعني وباقي حتى ماكملت سنه باقي ما تأقلمت كفايه لللي صار اليوم
سحب ثنيان يده بغضب وتوجه لغرفة منيره وهو يحاول يهداء اما مي اللي دخلت غرفتها بغضب وهي تنسدح بضيق ( ماشاء الله الدلع والرومانسيه لحريمه وانا بالطقاق اللي يصير فيني يصير)
................••............
في بيت ابو الترف
وعند الترف اللي مسكها صالح بغضب بعد الزواج: وش ذا اللي سويتيه انهبلتي
الترف : وش اسوي خفت يسجنك صدق
صالح: ليه شايفتني رخمه قدامتس
الترف : لا محشوم بس خفت
صالح: ان شاء الله تعدينها مره وبعدين احمدي ربتس ابوي ما درا بتس والا كان ذبحتس
الترف : تكفى يا صالح لا تعلمه والله خفت عليك
صالح : صادقه انتي ماني مهبول اعلمه
الترف سكتت وهي تشوف صالح معصب منها صدق بس ما اهتمت اهم شي دافعت عن اخوها
................••............
ومن بكره الصبح في بيت ثنيان
عند ثنيان اللي كان جالس على الطاوله بهدوءه العصبي المعتاد والكل جالس ما عدا مي
ثنيان بغضب : قم يا محمد قلها تجي قبل اجيها ويجيها موتها
راح محمد يركض لها وهو يدق الباب فتحت مي : نعم
محمد : ابوي يقول تعالي قبل اجي ويجي موتك معي
مي خافت وطلعت : جيت يلا
لحقت محمد ودخلت : سلام
الكل : وعليكم السلام
ثنيان بغضب: انتي وبعدين معك كم مره قلت لك مابي انتظر على الفطور كم مره افهمك
مي : ما انتبهت
ثنيان: وش اللي ما انتبهتي له يا هانم !
مي : انا اسفه
ثنيان : اي هذا اللي فالحه فيه
جلست والكل ساكت وثنيان اللي انتهى وقام وقامت مي : ثنيان ابيك بشغله
راح ثنيان ولحقته : ابيك توديني لاهلي
ثنيان : ليش !
مي: اليوم عندهم اعمامي وبروح لهم
ثنيان: مافيه تروحين
مي بصدمه: ليش !
ثنيان : لاني مابيك تروحين وخري عني تأخرت
مي : ثنيااااان كذا كثير
ثنيان: ما سمعت !
مي بكت على طول: ترا من يومين وانت تدقر فيني وتخاصم وتضرب وانا ساكته والحين ما تبي اروح لاهلي
ثنيان: مابي اعيد الكلام وان عدتي اي كلمه بتروحين لاهلك بس بدون رجعه
طلع وتركها ومي اللي جلست وهي تبكي منيره جات على صوتها : مي وش فيك !؟
مي اللي بعدت منيره وراحت وهي تبكي بقهر هزت راسها منيره بأسى ورجعت
................••............
في بيت ابو عجاج
عند عجاج اللي كان يسمع الباب يدق وهو مافيه يتحرك وقف وهو يمشي بضيق فتح الباب وشاف ثنيان: كيفك عجوووو
عجاج: في ستين داهيه بفضلك
ضحك ثنيان: ههههههههههههه حرام عليك
عجاج : انت اللي حرام عليك شف كيف حالي
ثنيان: جعله والله فيني لكن قم اللبس وبنطلع كلنا للمزكر وبيعطونك حقك
عجاج : يعني بكم بيعطوني
ثنيان: يعني هه هه 10 9 10
عجاج: ريال!!!!!!!
ثنيان:هههههههههههههههههههههههههههههههههههههههههههه هههههههه وش رياله يالخبل افاا هاذي قيمتك
عجاج: اجل كم
ثنيان 10 الاف
شهق عجاج : في ذمتك
ثنيان : شف هات تقريرك
اخذه وهو يعد عليه : كسر فالرجل وكسر مضاعف بعد وفك فالكتف وجرح عميق براسك ورضوض وخدش فالجفن ! ماشاء الله عليه مصفقك من قلبه شكلك قهرته
عجاج : الله لا يوريك كيف دخلت عليه انا قهرتني صراحه ، اصلا الممرضه منفجعه تقول مدعوس ولا مضروب
ثنيان:هههههههههههههههههههههههههههههههههههههههههههه هههههههههههه يعني توقعتك تطلع بشي بسيط بس براڤو
عجاج : قم يلا قم
طلعوا متجهين للمركز وطبعا بعد سين وجيم وتحقيق وكلام كثير اخذ عجاج ديه للاضرار بمبلغ 10 الالاف
................••............
في بيت ابو الترف
وعند الترف بعد ما انتهت من شغلها اتجهت لبيت نوره دخلت وهي تقول : نووره يا نوره
ام نوره: هلا يالترف تفضلي يابنتي
الترف : زاد فضلتس يا خاله بس اني ابي نوره مستعجله
نوره: وش فيتس تصارخين من صبح الله
الترف : استاذنتس يا خاله بنروح انا ونوره عند سلوى شوي
ام نوره: ما عليه
سحبت الترف نوره ورواحوا وهم يدقون باب سلوى اللي فتحت وهي تغني : هلااااابتس حي من عكس اتجاه الريح وجابتس
ردت ترف وهي تسلطن معاها : هلاااابتس قد ماسوى الولىه فيني بغيابتس
وكلهم بصوت واحد : هلاااااابتس
ضحكت سلوى : ادخلوا ادخلو جيتوا بوقتكم
نوره: ماشاء الله عليتس مزهبه قهوتس وشاهيتس من تنتظرين
سلوى: ابد انا دايم قهوتي زاهبه بس البلا باللي ما يجون
الترف : اسكتي وصبي قهوتس جينا عاد
سلوى وهي تصب القهوه : اقول يااترف وش سويتي امس يقولون وقفتي بوجهه الضابط
شهقت الترف : يا ويلي ويلااااه من يقوله
سلوى ضحكت : وش بلاتس خايفه
نوره : افا عليييتس يالترف ولا تقولين لي هذا وانا صديقتس واخيتس
الترف : ليتس تسكتين بس اصبري افهمتس لا تاكليني سلوووه من قالتس
سلوى: ياخبله كانت معتس سعديه نسيتي
الترف: اي والله وسعديه السلقه لايكون نشرتها
سلوى: لا معليتس حرصت عليها تسكت
نوره: وش السالفه
الترف : السالفه الله يسلمتس ......... وكملت السالفه
نوره: يهبييي يا وجهتس وقفتي في وجهه الحكومه يا ويلي ويلاه ياقوة قلبتس
الترف: وش اسوي اخليهم ياخذون اخوووي واسكت
سلوى: لكن زين انه فشلتس وطلع حليل ولا كان سحبتس انتي واخوتس للقسم
الترف: يخسى وانا الترف
نوره: اقول على شحم انتي وهياطتس قالت يخسى انتي والله اللي تخسين والله لو انه مايخاف الله كان لا انتي ولا اخوتس
سلوى: اي والله انتي اللي تخسين
الترف: اي والله اخسى اصلا طلعت عفويه لكن جتني ام الركب بعدها
سلوى:ههههههههههههههههههههههههههههههههههههههههههههه ههههههههههه اي ياحبيبتي هذا مب دويده
نوره: على طاري دويده اليوم مختفيه !
سلوى: اي والله دايم تجي اليوم ماجت
الترف : خلوها ياعرب تختفي تريحنا
فزوا على دق الباب وكان صالح فتحت سلوى : صالح هلا وش بغيت
صالح: ابي الترف
الترف : صالح وش فيك
صالح : امشي انا اوريتس وش فيني
راحت معه وهي خايفه ابوها درا بس الصدمه كانت اكبر لما دخلت البيت وشافته كله زباله وقرف
شهقت بصدمه : وش ذااااااا
صالح: انا اسألتس بعد
الترف : والله اني نظفت البيت كله والله
صالح : ادري بس اللي بقولك ان ابوي جاي وراي بسرعه نظفي
سلوى ونوره اللي خافو فيه شي وركضوا وراها : الترف وش فيتس .
شهقت نوره: وش ذا
الترف: مدري مدري
صالح: استعجلي ابوي جاي
ودخلوا سلوى ونوره معها وبسرعه بسرعه يرتبون وينظفون ويحطون بخور
صالح :ابوي جاء ابوي جاء
ركضت نوره وسلوى وصقعوا بعض وصرخوا وجلسوا وهم مرتبكين ودخل بذا اللحظه ابو الترف وهو يناظر بإستغراب وفجاءه قال : صالح وجع وش مجلسك مع الحريم
صالح: هاااه اي كنت باخذ اغراض وبطلع
ابو الترف : اطلع اخلص
لف على الترف : وش انتي وش فيتس
الترف بإرتباك : مافيتس ا ا اقصد مافيني شي
سلوى وقفت هي ونوره: اجل حنا نستاذن يالترف
الترف بنفس الارتباك : اذانيكم معكم
انفجرت نوره تضحك وطلعت بسرعه والترف اللي وقفت بتوتر
ابو الترف : اعجلي جيبي لي القهوه
الترف : ابشر
راحت الترف وهي مقهوره ماتدري من كب الزباله فالبيت حضرت القهوه وهي مقهوره وجلست بقهر وهي تشوف ابوها اللي جالس وماله نيه الطلعه
................••............
وفي بيت ابو محمد
رجع محمد وراه وطاح من قوة ضرب ابوه له شهقت الخدامه وراه وقف محمد وهو يبتسم : يبه الله يخليك خذ دواك عشان ما تتعب
ابو محمد : لاااا لااا انا مافيني شي تبي تذبحني انت تبي تذبحني
محمد : يا يبه الله يخليك لي وشوله اذبحك
ابو محمد : اقولك انقلع
غمض محمد بضيق : خلاص ابشر مارح معطيك دواء خلاص
حط محمد الادويه على جنب وهو محتار كيف يعطيه بعد شوي حط بعض الادويه بمويه وقال : يبه خذ اشرب مويه
اخذه ابو محمد وارتاح محمد انه اخذه بيشربه بس ما يمديه جلس الا ورجعه ابو محمد وهو يتفله على محمد : تلعب علي انت تلعب علي
وقف محمد وهو يمسح وجهه بضيق وطلع وهو يدق على الدكتور يبي حل لانه مو جالس ياخذ ادويته
................••............
وبعد ايام قدر عجاج انه يتشافى وتروح جروحه ولا بقى له الا الكسر كان جالس قبال بيتهم وهو يراقب سيارته اللي خذها بفرح وقف بفرحه اكثر وهو يشىف ثنيان جاي : عجهههه
عجاج : عجه تطيرك ان شاء الله ترا اسمي مب ناقص تعويق
ضحك ثنيان: كيفها رجلك
عجاج: الحمدلله احسن
ثنيان: تقدر تروح تجي
عجاج : مدري ماني متاكد
لف ثنيان وهو يضحك وشاف عربية السوبر ماركت وابتسم : اوووه الحين بنتاكد
عجاج طارت عيونه : نعم نعم وش اللي بتأكد منه لا يا حبيبي انا امشي الحمدلله مالي نيه اتكسر مره ثانيه
ضحك ثنيان وهو متجهه لها اخذها ورجع وهو يقول : عجووو تدري انك ما تقدر تعترض اركب بنستانس شوي ونرجع
عجاج : على حسابي تستانس
سحبه ثنيان بسرعه وهو يحطه فالعربيه غصب وعجاج يصارخ نزل ثنيان نعاله وركض وعجاج يصارخ وهو يفحط فيه بكل الحاره واللي يضحك واللي يهاوش ثنيان واللي ماسك راسه وعجاج اختلط صراخه ب ضحكه لكن هنا اجتمع صراخ عجاج وثنيان وضحكهم لما ما قدر ثنيان يسيطر على العربيه وصكت فالجدار وطاح ثنيان وطاح عجاج والعربيه عليه والكل ركض يرفعهم لكن المصيبه انهم كانو يضحكون وخصوصا ثنيان اللي كان ميت ضحك وهو يدف عجاج والعربيه عنه
ابو حمود : انتم صاحين ولا مجنن
سعيد : ثنيان انت بخير
ثنيان بضحك: بخير بخير
عجاج: هاذي والله العجه صدق استانست الحين
ثنيان: هاااه تأكدت انك بخير
عجاج : قلت من اليوم بخيير
سعيد: الله يخلف على اهلكم يالاثنين
راحوا وهم مازالو يضحكون وقف عجاج بعد ضحك عميق وقال: اسمع اللبس وتهندم بتروح معي
عجاج: وين
ثنيان: بوريك شي يسر خاطري وخاطرك
عجاج: صدق وين!؟
ثنيان: ساعه وارجع واحكي لك القصه بس اجهز
عجاج: طيب
طلع ثنيان متجهه لبيته ببتسامه وهو يضحك للان رغم انه تألم اما عجاج اللي دخل وهو يلبس وماهو مستغرب هبقات ثنيان الغريبه ................••............
عند محمد اللي طلع مع ابوه من المستشفى وقفه صوت جواله رد : هلا عمي
ابو ثنيان : سلام عليكم
محمد : وعليكم السلام
ابو ثنيان: كيفك وكيف ابوك
محمد . حمدلله بخير انت كيفك
ابو ثنيان: بخير بخير لكن انت وين
محمد : توني طالع من المستشفى
ابو ثنيان: زين اجل تعال انت وابوك تعشو عندي وتقهوو وخل ابوك يغير جو
محمد : ابشر
طلع محمد متجهه لبيت عمه ونزل وهو يساعد ابوه ينزل قابلته ثريا وهي تسلم عليك : وش فيك محمد يوجعك شي
محمد اللي كانت يده فعلا توجعه من كثر ما شال وحط في ابوه وغير ضرب ابوه المتعب : مافيني شي بس يدي توجعني شوي
ثريا : دقيقه بجيب لك مرهم كويس للعضلات
محمد : طيب
ابو ثنيان : محمد وانا ابوك الله يعطيك العافيه ويكتب اجرك
محمد : امين
ابو ثنيان: ورا ما تزوج وحده تعاونك وتعاون ابوك
محمد تنفس بهدوء : يا عمي محد يتحمل ابوي غيري والله يخليني اخدمه لاخر يوم في عمري
سيف: الله يخليك له ما قلنا شي بس تزوج اقل شي احد يقوم بالبيت بدال ذا الخدامه وتقوم بك
محمد : ماني فاضي يا سيف انا همي ابوي وبنت الناس اللي بجيبها مب مكلوفه في ابوي
ام ثنيان: وش دراك لو تطلع بنت حلال
محمد لللي سكت وهو يناظر الباب بهدوء : بنت حلال بس ما تقدر
سيف : وشو ما نسمعك
محمد : كل البنات بنات حلال
جات ثريا وهي تحط له المرهم ومحمد اللي كان ساكت وباين ضيقه ................••............
وفي بيت ثنيان
وعند ثنيان اللي دخل بيته وهو مستعجل وقف وهو يقول : مشاعل زي البرق ابي ملابس جديده ونظيفه بسرعه معزوم
منيره جهزي لي العود وقهوه على السريع بطلع بها للخط
طلع ووقفت مشاعل وهي تسرع تجهز ملابسه ومنيره بعد
جلست مي بضيق وهي تشوفه ما يكلمها من ايام
طلعت وهي متضايقه
وعند مشاعل طلع ثنيان ولبس ابتسمت مشاعل : شكلك معززوم بعيد
ثنيان : ايه
مشاعل: طيب متى بترجع
ثنيان: مدري
مشاعل وهي تعطيه الشماغ : بيروح معك عجاج
ثنيان ناظرها : وش رايك اكتب لك برنت
مشاعل بفشله: لا بس اسأل
ثنيان: تعرفين ما احب ذا الاسئله
مشاعل : طيب
طلع ثنيان وقابلته منيره وهي تبخره لف لمحمد : خذ القهوه ونزلها السياره
محمد : ابشر بس يبه بروح معك
ثنيان : بكره ايش !؟ محمد : الثلاثاء
ثنيان: يعني ايش !
محمد : دوام بس خلصت دورسي يبه ماعندي شي وطفشان
ثنيان : محمد انتهى ! طفشان هذا اخوك عندك انا بتاخر
محمد : ي... قطعه ثنيان اللي لف بغضب : لا ترد الكلام
سكت محمد واخذ القهوه وطلع وطلع ثنيان وراه وهو متجهه لعجاج واخذه وطلعوا متجهييين لقرية الترف
عجاج : وين بتودينا
ثنيان ابتدا يقوله السالفه ولف عجاج وهو يناظره بصدمه: انت ما سحبت السلاح عشان بنت
ثنيان: مب عشان بنت لا عشان كلامها اثرت فيني يعني
عجاج : ايييه يا حبيبي عشان تعرف ان حنا الخوال صقووور رجالنا وحريمنا
ثنيان : اقول انثبر قال صقور قال
................••............
وفي قرية الترف دخل ثنيان بسيارته والكل يناظره نزل وعجاج يناظره بهدوء ونزلوا
والكل عرف ثنيان وبما فيهم ابو الترف وصالح واقبلوا يسلمون عليه ويهلون ويرحبون به دخلوا مجلس القبيله والكل دخل معهم
ابو الترف : حي لله الضابط ثنيان
ثنيان: الله يحييك ويبقيك
صالح : حمدلله انك جيتنا وما نسيتنا
ثنيان: نساك الموت وهو فيه احد ينسى كرمكم وطيبكم
ابو الترف : والله ماجيت الا في ديرتك وبين اهلك
ابتداء كل المجلس يرحبون بثنيان وبعجاج
................••............
وعند الترف اللي كانت جالسه بالحوش هي وسلوى ونوره لف الترف بقهر : الحين بس ابي اتاكد اللي مسويتها دويده ولا ام شوشه ولا نوير الدعله ؟؟
سلوى: يووه يالترف عورني راسي ياكثر ما تمشكلين مع العالم
الترف: مب انا اللي اتمشكل هم اللي يغلطون
نوره: والله مدري يالترف اي وحده بس حركتها قويه
الترف سحب عبايتها واخذ عصا المكنسه : الحين نبي نعرف من
لحقوها سلوى ونوره وطلعت الترف وهي تشوف البزران يلعبون وبسرعه البرق جمعتهم وهي تطق بالعصاء على الارض وتصارخ عليهم: الحين بتعترفون من اللي كب الزباله في بيتنا
رضا : والله مب انا يالترف والله
وابتدوا كلهم يحلفون الترف تدق بعصاها وتصارخ وهو خايفين
حمود : انا شفت سوير دخلت بيتكم معها اكياس كثيره وبعدها طلت واكياسها فاضيه وهي تركض
الترف : متأكد !
حمود : وربي
الترف وهي تنزل برقعها زين وركضت وهي تقول : انا اوريتس يا دويده
ركضت سلوى معاها ونوره دخلت الترف وهي تقول : دويييده وينتس اطللعي يالمخنزه اطلعي
سوير : خييير وش تبيييين
الترف : الحييين اقولتس وش ابي
انفلتت الترف وهي تمسكها من يدها: انتي كفو تكبين زبالتس عندنا يا المخنزه
فكتها امها وهي تقول : اني هييييه اذلفي لبيتكم وفكينا من شرتس انتي وش تبين بنتي كل ذا غيره اللهم يا كافي كفايه طيرتي المعرس من عيونتس جعلها بالفقع
الترف شهقت : نعم نعم نعم ااااانا اغار من دويده ام الذبان معصصصصي والله
نوره: الله واكبر معاد الا هي نعطي بنتس عين من زينها بنتس اللي حتى الذبان مبتلش بها .
ام سوير: حبيبيتي الله يعلم من اللي اهله مبتلشين به جالسين عوانس على قلوب اهلكم
سلوى: يا جماعه تعوذوا من ابليس
الترف: وين ان تعوذ وابليس قدامنا
انطلقت الترف على سوير وهي تطقها وطبت ام سوير على الترف وطبت نوره وسلوى على ام سوير واعتلاء الصراخ والهواش ................••............
وفي المجلس وسط الضحك والسوالف جاء حمود وهو يركض بتعب : اللحق يا صالح اللحق يا ابو الترف
صالح فز : وش بلاك
حمود وهو يلهث: الترف لعنت خييير سوير وامها كفختهم تكفيخ والدم للركب
كل المجلس فزوا وهم يسمعون الصراخ وركضوا الا ثنيان وعجاج المفجوعييييين
عجاج: الدم لركب !!!
ثنيان: شفت صالح!
عجاج : ايييه
ثنيان: اخو البنت اللي اقولك عنها وشكلها هي اللي لعنة خير سوير
عجاج: منهي سوير!!
ثنيان: وش دراني تسمع البزر
عجاج وهو يطل: والله ياحبيبي العجه هناك والله فيه دعثه شكل الترف مب هينه
ثنيان : قمة التناقض بين الاسم والافعال
ضحك عجاج : اقولك وش رايك تاخذها الرابعه تخليها تلعن خير حريمك الثلاث وتريح راسك انت
ثنيان طالع فيه بهدوء وهو يبتسم ونط عجاج: امزح امزح امزح لا تفكر يرحم امك لا تفكر امزح
ثنيان ضحك: بس والله صقور يالخوال ياحبني لكم
عجاج جلس وهو يضحك : يا رجال انا خال حضري ما انفع هذولا واالله اللي ينقال لهم خوال شف بالله شف الدعثه
ضحك ثنيان: لو هي عليك والله انك ما تسوى التاليه من الغنم
عجاج : اخس واعقببب والله لنادي عزوتي عليييك وانادي ذا الجنيه اللي صفقت العرب
ضحك ثنيان وهو يسلم على خشمه: يا اخوك امزح
عجاج : ايه اعععقل والله اني لهاجر واجلس عندهم خلهم يأدبونك ليي
ضحك ثنيان وهو يشوف صالح اللي مار وهو مسرع من بعيد ومعه وحده واضح انها تهاوش
.
.
.
بنوقف هنا♥اتمنى التفاعل