تهزمني السمراء وانا نّد الفرسان

بارت

البارت التااسع >>✨
.
.
جهز العشاء وطلعت مشاعل تركض ركض ودها بس تصحي ثنيان وينزل يشوف المهزله اللي صارت بعد ما راحوا اهل مي صحى ثنيان ونزل لكن وقف بصدمه وهو يناظر حالة البيت اللي يرثى لها وكان ثنيان انسان عنده وسواس نظافه ما يحب يشوف الوصخ ابد ابد ابد
وفي ذا اللحظه كانت مي جالسه تحلي وهي حاطه رجل على رجل
لف ثنيان على مشاعل: هذا وشو ليييه البيت كذا
مشاعل : تو من خمس دقايق راحوا اهل مي
ثنيان وهو يناظر صواني العشاء واتسعت عيونه اكثر: ميييين جايب ذا العشاء
مشاعل ببتسامه من ورا ثنيان ( ايييه جت اللحظه اللي بموت عليها) : مي
ثنيان: شلووون يعني ميييي شلوون
مشاعل : جابها مندوب المطعم واستلمتها مي
ثنيان: خييييير وش قلتي استلمتها
مشاعل: ايه
فالمجلس قبل يدخل ثنيان كانت منيره واقفه وهي تقول : يا مي تعوذي من ابليس وقومي ساعديني ونخلص كل شي بلاش ينزل ثنيان ويشوفك كذا والله بيذبحك
مي : يوووووه تراك طفشتيني بتنظفين نظفي لحالك انا ما جيت هنا خدامه وبعدين خلي ثنيان ينزل وش يعني ذبحتونا بثنيان ولا يشوف ثنيان ولا تسوين عشان ثنيان
منيره: بس هذا حوستك انتي واهلك
مي : والله اذا مره مهتمه سويه انتي
ما بقى عقل حزتها في راس ثنيان ودخل وهو ما يشوف قدامه الا مي مسكها وهو يرفعها من كتوفها لما صارت بمستوى طوله وهو يصرخ : لااااااا طالت وشمخت سكتنا لك كثييييير بس اللي مايفهم تفهيمه صعب لمييين تقولين ذا الكلام هاااااه لمين
كانت مي اول مره تشوفه هالعصبيه من ثنيان وقالت بخوف : م م ما كنت اقصد
سكتها ثنيان بكف سمعوا صوته الكل وطاحت مي على الكنب وهي مصدومه ما اكتفى ثنيان وركع وهو يشد شعرها : شرحت لك لك مليون مره وكأني اكلم جدااار علمتك ستييين الف مره وقلت لك قبل تغلطين على احد تأكدي انه مو منيره ولا تفهميييييين قلت لك صوتك ما يعلى فالبيت وبعد ما تفهمييين وليتك جلستي كذا تتحديني بعد تبين تشوفين الحين ثنيان وش يسوي هاااااه
سدد لها الكف الثاني والثالث ووقفت منيره وهي تسحب ثنيان عنها : تكفى ثنيان خلاص تكفى الادميه حامل تكفى خلاااااص
ثنيان: وخرررررري عني وخري
مشاعل اللي كانت صح فرحانه بس ما توقعت الموضوع بيوصل لذا الدرجه ماكان ثنيان يوفر اي شي يطيح بيده الا ويرميه على مي تدخلت مشاعل وهي تقول : ثنيان خلااااااص تكفى اللي صار يكفي
مي اللي كانت في حالة بكي وخوف عظيمه ومن صراخ ثنيان صحى محمد وعمر بخوف
بالقوه بعدت منيره ثنيان وهي تشوف ان مي وصلت لحاله الله يستر من بعد ضرب ثنيان اللي كان صعب على مي وهي انسانه حامل
ثنيان بصراخ: فزززززززي على حيلك فززززي
وقفت مي وهي ترجف ببكى وسحبها ثنيان وهو اللي كان بينه وبينها منيره : تنظفين البيت كله من وصخك انتي واهلك وتطسين لغرفتك وان سمعت انك همستي همس ولا طلعتي منها والله والله لدفنك فيها سمممممعتي
منيره : سمعت مي خلاص سمعت
ثنيان: ولا احد يساعدها خصوصا انتي يا منيره سامعه
منيره: ابشر ابشر
ابتعد ثنيان وهو يسب ويلعن وطلع وهو يلبس ملابسه ونزل وبغضب ولحقته منيره : ثنيان وقف
ثنيان: وش تبييين يا منيره
منيره: لا تروح جوعان تعشى على الاقل
ثنيان: مابي شي يا منيره مابي
منيره: حلفتك بالله يا ثنيان حلفتك باالله ما تروح كذا
ثنيان اللي مسك راسه بغضب : منيره لا تجننيني
منيره : الله يخليك على الاقل خذلك حاجه بسيطه معاك
ثنيان اللي جلس وهو ماسك راسه بألم : جيبي لي مسكن قبل
ركضت منيره وهي تجيب المسكن والعشا وتعشى ثنيان بلقمات معدوده عشان خاطر منيره وطلع وهو ياخذ جاكيته ركب سيارته وهو يحس جنون الدنيا في راسه
................••............
اما عند مشاعل الي كانت مفجوعه حرفياً تدري ان ثنيان ما يرحم بس اول مره تشوفه يضرب حرمه وخصوصاً من زوجاته بذا الشكل كانت تدري انه ما يفرق معه اذا عصب يطق اللي يطقه جلست وهي تمسح وجهها برعب لما تذكرت انه زمان ضربها كف للحين ما تنساه عشانها في وقت غضب غلطت على منيره وماكان كفه سهل حرفياً كان يكسر الوجهه تكسير
عمر اللي قال: يمه انا خايف
محمد : حتى انا خايف يا عمه
مشاعل حضنتهم وهي تقول : لا ياحبيبي مافيه شي يخوف
محمد : ليش ابوي طق مي كذا
عمر : يمه اخاف يطقنا بعد
مشاعل: لا يا حبيبي ابوك عمره ما طقكم بس اللي يغلط يستاهل
محمد : بس انا شفت فمها فيه دم
مشاعل بضيق : الله يعينها بس ما عليكم انتم ناموا لا تخافون هي بخير اصلا
ناموا وهم مرعوبين اما منيره اللي راحت بتساعد مي وطردتها مي وهي تمسح دموعها وقامت ترتب وهي منهاره تبكي بكى كل البيت يسمعه
منيره : الله يهديها مي وش سوت بنفسها
مشاعل: للامانه حزنت
منيره: كأنك ما تعرفين ثنيان يا مشاعل
مشاعل: ما توقعت انه بيقوى قلبه ويطق مي
منيره : الله يستر لا تسقط
مشاعل: الله يستر
.................••............
عند ثنيان فالقسم
طلع حرته في اي واحد يجيه وعنده قضيه مستفزه كفخهم كلهم بما فيهم منيير
جلس وهو ماسك راسه بضيق كان بيتفجر راسه من الالم ما صدق يمر الوقت ويطلع الصبح ويسلم وطلع وهو يحس انه مخنوووووق وقف وهو مايدري وين بيروح بالضبط راح لعجاج وهو يدق الباب وفتح ابوه : هلا
ثنيان بضيق : سلام عليكم
ابو عجاج : هلا .
ثنيان: عجاج وينه
ابو عجاج :ميييت نوم
ثنيان : طيب بدخل له
ابو عجاج ترك الباب وطلع وهو يروح لدكة الشياب ودخل ثنيان وهو يدخل لعجاج اللي كان نايم بجنب الجرايد وهو يدور اعلان وظيفه
جلس ثنيان وهو يقول : عجاج عجاااج عجاج اصحى
فز عجاج وهو يتخبط : وش فيه وش صار من انت
ثنيان : يالييل دامك فاقد الذاكره بعد
عجاج وقف بخوف : كم الساعه وش فيك جاي الحين وراه وجهك كذا
ثنيان: مافيني شي غسل وتعال ابيك برا
عجاج : يلا يلا
طلع ثنيان وعجاج بسرعه لبس وطلع : ثنيان وش صاير
ثنيان: اجلس
جلس عجاج وابتدا ثنيان يعلمه السالفه عجاج: تبي تزوج بعد
ثنيان: يا عجاج الحين جيتك ابيك عون تصير فرعون انا جبت طاري زواج انا
عجاج: لا بس عشان تعرف اللي انت فيه
ثنيان: اعرف مانيب خبل
عجاج : الحين لايكون سقطت
ثنيان: مدري عنها
عجاج : اتوقع انها بتطلق
ثنيان: باللي ما يحفظها
عجاج : الحين انت الله يهديك ما عندك الا ضرب رفقاً بالقوارير ياخي
ثنيان لف بغضب : وقارورة تفجر مخك ان شاء الله انا جايك تطقطق علي انا
عجاج: لا بس غلط تضرب
ثنيان: عجاج بتقول شي صاحي ولا اسكت
عجاج سكت ولف ثنيان : يعني كذا
عجاج : ياخي عجزت افهمك تقول اسكت وسكت
ثنيان: يعني ماعندك شي صاحي تقوله
عجاج: ايه ما عندي لانك تدري انك غلطان انك تضرب حرمه وبعدين حامل وفوق ذا انا محذرك 700 الف مره من زواجك ذا وقلت ماله داعي ولا طعت ها يلا خذ مشاكل
ثنيان وقف : الشرهه مب عليك على اللي جاي يشكي لك
سحبه عجاج وهو يجلسه : انثبر بس اسمع اتصل في احد اساله الادميه حيه ولا ميته
ثنيان: لا تبالغ ما طقيتها واجد منيره وقفت بينا
عجاج :لها الجنه منيره لها الجنه وش بتحمل عشان تحمل
ثنيان : ياخي انت صديقي ولا عدوي
عجاج : اسمع اذا تبي نصيحتي قم وتعوذ من ابليس روح لبيتك وشوف اوضاعك
ثنيان: اروح وش اسوي يرتفع ضغطي بس
عجاج: روح شوف الادميه شوف ولدك حي ولا ميت ياخي حل المشكله لا تطق وتطلع ان جلست عندك فهمها من جديد ما جلست الله يستر عليها
ثنيان وقف بضيق : بطيع شورك يا عجاج وبشوف مع اني ادري شورك هاجتن به
عجاج : والله يا شيخ لو ما تضف وجهك لهج بك انا لو انك اطيع شوري كان الحين انت في نعيم
ثنيان : يا ثقل دمك بس
عجاج : خف علينا يالشربات ياخفيف الظل
تركه ثنيان وعجاج اللي وقف وراح يدور له وظيفه ................••............
في بيت ابو الترف
وعند الترف اللي من صبح لله وهي صاحيه وتبكي صحى صالح بضيق : الحين انتي وش فيتس تبكينن
الترف : عجزت انام من الضربه توجعني كل ما تحركت راسي يوجعني
صالح: طيب انا وش اسوي يالترف .
الترف :ماقدر احط راسي على مخده يوجعني
صالح: طيب نامي على جنبتس الثاني
الترف : ما اعرف انام على يساري
صالح اللي اصلا عجز ينام من البارح قرب وهو يقول : تعالي حطي راستس على رجلي يمكن تنامين
الترف: اخاف يوجعني
صالح : تعالي نشوف
حط راسها بهدوء وهو يهزها بشويش لما نامت وما صدق نامت ونام معها
وعند ابو الترف اللي كان جالس برا جت نوره: سلام عمي
ابو الترف : هلا
نوره وهي تحط الفطور قباله: هذا انا جبت لك فطور ادري ان الترف تعبانه
ابو الترف: الله يسلمتس ما تقصرين يابنتي
نوره : الترف صاحيه
ابو الترف : اخبرها تبكي من راسها وصالح عندها ادخلي شوفيها
نوره: يا ويلي عنتس يالترف
دخلت نوره ولكن رجعت وهي تشوفهم نايمين ابتسمت ولفت بتطلع وجات سلوى طايره ومعها فطور هي بعدد بس وقفت وهي تقول : شبلاهم نايمين كذا
نوره: مدري بس خليهم نايمين
سلوى: وفطوري وش اسوي به بيبرد
نوره: جيبه ناكله حنا
سلوى: من قالتس مسويته لتس
نوره: اجل لمن
سلوى : اا لترف
نوره: تخسين والله ادري انتس مسويته لصالح لكن اطلعي اطلعي نتفاهم برا
طلعوا وهم يبعدون وسحبت نوره الفطور
سلوى : يا شينتس يا نوره
نوره : ما عليتس من شيني وقولي لي وش بينتس وبين صالح
سلوى: حمدلله والشكر وش بينا يعني
نوره: اسمعيني يا سلووه لا تحسبيني مهبوله تراني حاسةٍ بتس انتي وياه بس اني ساكته ابيتس تقولين انتي
سلوى تورطت: اكلي بس اكلي والله انتس مجنونه
نوره: يعني تبين اقول لترف ونعرف سوا
سلوى: لا تقولين شي لترف الله يشغلتس
نوره: اجل علميني
سلوى : مافيه شي غير اني احبه وهو يحبني
نوره تخصرت : يا ماشاء الله ومتى اكتشفتوا انكم تحبون بعض
سلوى وهي تضحك: من زمااان من يوم حنا بزارين
نوره:ههههههههههههههههههههههههههههههههههههههههههههه ههههههههههه ماشاء الله وانتي ضاقت بتس ما لقيتي تحبين الا صالح العاقل الرزين
سلوى: لييييه وانا وش فيني عاقله ورزيينه
نوره: اقول ضفي وجهتس قالت عاقله حبيبتي عقب سالفة ام سوير اغسلي يدتس من صالح
سلوى: تهقين والله انه له فتره ما يكلمني
نوره : والله انكم صدمه كيف تجمعتوا مدري
سلوى: حنا حبنا بس رسايل بس اذا تقابلنا يختفي كل شي
نوره: يا ويلي يا سلوى لا يكون صالح يطقطق عليتس
سلوى: لا وين يطقطق خبله انتي
نوره: اي والله خبله اجل ما لقيت الا صالح يطقطق
سلوى: لا هو يستحي وانا استحي من سحاه واصلا ما عمرنا تقابلنا بلحالنا دايم معكم ودايم هواش
نوره: اقولتس علمي الترف ترا بتوطى ببطنتس لو درت انتس ما علمتيها
سلوى: درينا قومي يلا بجدد الفطور
ضحكت نوره: جددي جددي ياختي
.................••...........
عند ثنيان اللي وصل بيته ونزل وهو يحس بتعب دخل بهدوء وهو يشوف البيت نظيف طلع واتجهه لغرفه منيره دخل بهدوء تقدم وهو يقول: منيره منيييره
فزت منيره: ثنيان فيك شي
ثنيان: لا بس صحصحي شوي
منيره: لا يكون مي فيها شي
ثنيان: لا انا ابيك تروحين تشوفين اذا فيها شي ولا لا
منيره: طيب
ثنيان: لا تقولين اني اسأل
منيره: طيب
جلس ثنيان وراحت منيره وشافت مي نايمه بهدوء ووضعها طبيعي رجعت وهي تقول : لا ثنيان مي بخير
ثنيان: زين اجل تعالي نامي ازعجناك كثير
منيره: لا شدعوه
طلع ثنيان وهو متجهه لغرفة مشاعل دخل وصحت مشاعل على صوت الباب : جيت
ثنيان : ايه
بدل ثنيان ورجع وهو يناظر باستغراب : وش فيه عمر هنا وليش ما راح المدرسه
مشاعل بهدوء : اليوم اصلا ما عنده وغير كذا امس كله ما نام
ثنيان: ليه ما نام
مشاعل: يعني سخن وكان خايف بعد اللي صار امس وشافك كذا خاف لا تطقه لانه غايب
ثنيان سكت شوي وقال: ليش ما قلتي لي انه مريض
مشاعل: خفظت حرارته وصار بخير
ثنيان انسدح وهو يحضن عمر : حسبي لله بس ................••............
وفي بيت ابو ثنيان
وعند نواف اللي صحى بدري ونزل وقابل دلال : دلال الحلوه اختي الكبيره الحنونه
ضحكت دلال : قول وش تبي يا اخوي الصغير الحلو
نواف : مشتهي الفول اللي تسوييينه ابي افطر عليه اليوم
دلال ابتسمت: بس مافي اغراضه
نواف: بروح اجيبها لك واجي
دلال : يلا انتظرك
راح نواف ورجع بسرعه معاه الاغراض دخل وهو يشوف دلال جالسه: يلا يالشيف
دلال: يلا
نواف كان يحب المساعده ويساعد دلال يغسل ويقطع معاها ويحضر
دخلت رهام باستغراب : بسم لله نواف وش عندك من الصبح فالمطبخ
نواف : اساعد دلال
رهام : خلصتوا فطور
دلال: شوي ويجهز
نواف : انا بروح اصحي امي وابوي وانتي رتبي المجلس
رهام ببتسامه: يازينه نواف يفرق عن الكل
دلال : ايه نواف عكس ابوي واخواني اطيب واحد فيهم
ثريا دخلت: من ذا اللي تمدحونه من الصباح
رهام : نواف
ثريا : ايه اشوى على بالي ثنيان
دلال:وثنيان بعد يا زينه
ثريا: واضح يا زيينه واضح
رهام: وش فيك عليه
ثريا : ابد والله مافيني بس اخوكم ما يستحي على وجهه بإختصار
رهام ناظرتها بطرف عين : والله اذا اخونا مايستحي ولدك ما تربى ويستاهل
ثريا: شقصدك يا رهام
دلال : ما تقصد شي خلاص فكونا
طلعت رهام بغضب وهي ما تحب تصرفات ثريا الليي كانت عككككس منيره
نزل ابو ثنيان وام ثنيان ونواف بينهم يسندهم ويسولف لهم
ابو ثنيان: يا كثر كلامك يا نواف
نواف : افا يبه هذا وانا بوسع صدرك
ابو ثنيان: وسع بس مب كذا
نواف : على خشمي
ام ثنيان : خله يسولف وش بك عليه
ابو ثنيان: ما قلنا شي
دلال : صباح الخير
الكل : صباح النور
ابو ثنيان: نواف ناد ثنيان وسيف للفطور
نواف : ابشر
راح نواف يصحي سيف ودق على ثنيان اللي رد وجاء
جلسوا كلهم على الفطور باستثناء ثريا اللي اول ما سمعت ثنيان بيجي طلعت
لف ابو ثنيان على سيف : الحين ثريا وش بها كانها شايفه الشيطان
سيف : مدري يبه
ام ثنيان: ولا زعلانة على ثنيان بعد
سيف : يمه الله يخليك محد زعلان على احد
دخل ثنيان ومعاه عمر : سلام عليكم
الكل : وعليكم السلام
نواف : ثنيان مزبطييييين لك فول يوجع قلبك
ثنيان: ان شاء الله مسويته دلال
دلال : ايه ارتاح
ثنيان: اوووه
حطوا الفطور وقربوا كلهم وثنيان اللي مشغول بعمر ويفطره معاه
سيف : ماشاء الله عمر جاي اليوم وين المدرسه
ثنيان : سخن امس وما خليناه يداوم اليوم
رهام: بسم لله عليييك
ام ثنيان: باقيه سخونته ولا خلاص
ثنيان : لا راحت
ابو ثنيان: ايه برد ذا الايام حطي له يا رهام زنجبيل في حليبه
رهام : طيب
سيف بزعل : ماشاء الله الاهتام لناس وناس
وقف وهو يقول : كثر خيرهم
طلع وقف ثنيان وطلع وراه بسرعه ومسكه قبل يدخل بيته: سيف لايكون زعلان وش ذا الحكي
سيف : ايه زعلان ليه تبيني اضحك لك
ثنيان: سيف انت شايف غلط ولدك
سيف : ادري به غلطان لكن انا ابوه انا موجود قلي وانا اتصرف ما تروح تطق من كيفك وتمشي
ثنيان: انا عمه بعد
سيف : وش موقفك اذا لقيتني اطق واحد من عيالك
ثنيان: اذا كان مسوي غلط طقه وألعن خيره
سيف : خلاص تكفى
طلع سيف وترك ثنيان اللي رجع بضيق وهو يغسل : عمر افطرت يلا
ابو ثنيان: وينك رايح
ثنيان : برجع انا تو الساعه 7 سلمت ويوم دق نواف قلت اجي افطر معكم
ام ثنيان : اجلس تقهو بس وينك رايح
ثنيان : لا يمه تقهوى معكم العافيه
اخذ عمر وطلع وهو متضايق
ابو ثنيان: اكيد ان سيف ذا قايل شي
دلال : يبه الله يهديك سيف ماقال شي وش فيك متحامل عليه
ابو ثنيان: انا متحامل عليه ولا هو اللي يزعل من كيفه
نواف : خلاص يبه هدو الوضع وافطروا اصلا ثنيان قالي انه توه سلم وبينام بس اصريت عليه
................••............
في بيت ابو محمد
عند محمد اللي كان منشغل من صبح الله وهو عند ابوه اللي انقلب وهو يصرخ ويقول توديني لاخوي محمد
محمد : يا يبه ابشر ابشر
ابو محمد اللي كان يطق بعصاه في كل مكان وقف محمد وهو يقول :يلا بنروح يلا
ابو محمد اللي كان يطق بعصاه في كل مكان وقف محمد وهو يقول :يلا بنروح يلا
اخذه وطلع وهو متجهه لبيت عمه دق الباب وهو ساند ابوه وفتح نواف : محمد
محمد : خذ طريق بسرعه
دخل محمد وهو ينزل ابوه فالمجلس : عمي معليش ازعجناك بس ابوي قوم الدنيا ولا قعدها يقول ودني عند اخوي
ابو ثنيان: الله يحيه الله يحيه حطه حطه
محمد بتعب وهو يقول : نواف تكفى ابي مويه وشف لي طريق بغسل
نواف: روح ما قدامك احد وانا بجيب المويه
راح محمد للمجلس الداخلي وهو ونزل راسه وهو يغسل وجهه بتعب وهدت حيل وألم من ظهره تجمد لما حس بأحد طقه على ظهره وهو يسمع رهام تقول : الحين ليه ما قلتي لي انك هنا خرعتني على بالي رجال
محمد جمد جدياً وهو يبي يتاكد اذا هي غلطانه ولا لا
رهام وهي اللي بعد الفطور قامت تبي تمسح غربة المجلس وسمعت صوت على بالها نواف وتكلمت وهي تمسح الباب ورا محمد : تكفى نواف خلنا نكلم ثنيان يقنع ابوي ونطلع كلنا بالاجازه لمخيم مليت وانا جالسه كذا لا شغل ولا مشغله
نواف اللي جاء وهو يقول : محمد خلصت اتسعت عيون رهام وشهقت برعب وبسرعه البرق سحبها محمد وهو يدخلها الحمام وسكره وقف وهو يحاول يهداء
نواف عطاه المويه : تعبت حيل والله
محمد : ايه
اخذ المويه وهو يشربها بربكه نواف : اجل يلا تعال الفطور جاهز
محمد : يلا يلا
طلع وهو عقله مع رهام وهو يحس ظهره انشل من لمستها
جلس وهو يسمع سوالف عمه ولا يفهم شي وابوه اللي يسولف بعد بس محمد ابد مو معهم ابد
نواف : محمد فيك شي
محمد : هاه لا والله مافيني شي
ابو ثنيان : روح روح نام بالمجلس شكلك تعبان
محمد : لا نايم يا عمي
نواف : وين نايم شوف عيونك كيف حمرا تعال بس
راح نواف وهو يدور رهام وحصلها جالسه وهي تشرب مويه وجهها احمر اسرع لها: رهام فيك شي
رهام لفت بخوف : لا مافيني شي ليه
نواف : وجهك ليش احمر
رهام : عادي
نواف : لا يكون تعبانه
رهام: لا لا بس كنت امسح غبار شكلي تحسست
نواف : الله يهديك بس قومي غسلي تروشي سوي شي
دلال؛ وش فيكم
نواف : ولا شي بس بالله عطيني لحاف لمحمد بينام بالمجلس لا احد يروح هناك
دلال : غريبه وش عنده
نواف : والله اني راحمه عمي متعبه حيل ومع ذلك ما يقول شي غير الحمدلله عمي يبي يجي هنا وسوا هوليله
نواف : هذا لحاف مييين اللي بكيس
رهام : لحافي تو جابه صاحب المغسله
نواف : اجل هاتيه دامه نظيف
اخذه نواف قبل تلحق رهام تعترض ورهام اللي جمدت وهي منفجعه ................••............
نواف اخذ اللحاف وفرشه وما انتبه انه فيه ورقه
دخل محمد وانسدح بهدوء لكن انزعج من ورقه مد يده وهو يقطعها وكانت فاتوره بتفاصيل المغسله وكان مكتوب عليها اسم اللي سلمها رهام
فز وجلس وهو يناظر الورقه ويناظر اللحاف بصدمه ( وش ذا يا ربي كذا كثييييير والله )
انسدح وهو يحس قلبه بيطلع من كثر ما دق
................••............
وفي بيت ابو الترف
وعند الترف اللي صحت وهي تحس احد يناظرها شهقت وهي تقول :وجع يا نوره وش بلاتس تناظريني كذا
نوره: انتظرتس تقومين طولتي
الترف : قوميني زين مب لازم تدخلين في عيني
نوره: يلا شوفي صلحت لتس فطور
الترف : كم الساعه
نوره: خلاص قيلت القايله
الترف : يلا
غسلت الترف وجلست وهي تفطر
نوره: يوجعتس الجرح بالحيل
الترف : يعني والله ما نمت امس
نوره: الله ياخذه منييير يا رب
الترف : امين
نوره : تخيلي ام نوير اخذه رجال الجماعه وجت هنا لابوتس تقول بنعطيكم فلوس تنازلوا
الترف : تخسييي
نوره : ما عليتس ابوتس طردهم
الترف: ايه كفو ابوي كفو
................••............
وفي مكان ثاني عند البقاله كانت سلوى واقفه وهي تاخذ اغراضها من عند ابو عايض شافت صالح اللي جاي وقف وهو يمد ورقه : عايض عطني ذا الاغراض
اخذها عايض وقف صالح بجنب سلوى : مانتس جايه اليوم لبيتنا
ابتسمت سلوى : مدري بشوف
صالح وهو يتلفت ما يبي احد يشوفه : وش بتشوفين تعالي بس
سلوى: اي اجي عشان تهاوشني قدام الكل
صالح : افاا متى هاوشتس
سلوى : بتنكر كلامك لي امس
صالح : كنت معصب يا بنت الناس بتزعلين عشان كذا افا سلوى هذا قدري عندتس
سلوى: تعرف قدرك يا صالح لو تقول طبي فالنار طبيت
ابتسم صالح وهو يسحب ايسكريم وعطاها بدون محد يشوفه : اجل انتظرتس وخذي ذا بردي فيه قلبتس لين شوي
ضحكت سلوى وهي تاخذ الايسكريم وراحت وجاء عايض وهو يعطي صالح الاغراض واخذ نصها
صالح: هات الاغراض
عايض : لا بساعدك
صالح: يا رجال جيب مب ثقيله
عايض : لا معليك
صالح : بتخلي دكان ابوك فاضي
عايض : ايه معليه
صالح : بكيفك
عايض : وشلون اختك اليوم
صالح لف بغضب : وش تبي تسال عنها
عايض تلخبط : امي امي قالت اسالكم لانها ما تقدر تجيكم
صالح : اييه معليها بخير
ترك عايض الاغراض عند الباب ورجع وليته ما رجع غسل ابوه شراعه قدام الكل عشانه طلع من البقاله واخذوا البزران الحلاوه وهجوا
.................••............
في بيت ثنيان والعصر
عند ثنيان اللي كان جالس بالصاله وقدامه محمد اللي يحكي له عن المدرسه وعمر اللي منسدح عنده
مشاعل جات وهي تقول : عمر مسخن يا امي
عمر: لا بس كذا
ثنيان : شوفي مسخن عشان اوديه للمستشفى
مشاعل : لا ما فيه سخونه
محمد : يبه متى نروح بيت جدي
ثنيان تضايق لما تذكر سيف : تبي تروح روح هذا هو البيت قدامك
محمد : لا مابي اروح لحالي روح معنا انت
ثنيان : ليييه
عمر : يبه بندر كل ماشافنا يهاوشنا
ثنيان اعتدل : كييف
محمد: يطقنا بعد
ثنيان غمض بضيق وهو مايدري وش يسوي في ذا البندر : خلاص لا عاد تروحون الا معي
وعند مي اللي كانت جالسه في غرفتها وهي مصدومه من ثنيان واللي سواه معاها خافت صدق ورفعت راسها لما دخلت منيره: مي قومي تغدي
مي وقفت ونزلت بهدوء وهي تشوفهم حول السفره والكل يطالع فيها بإستثناء ثنيان اللي كان متجاهلها ومختصر كلامه مع عياله او مع منيره ومشاعل
وقف ثنيان وطلع متجهه لحارة عجاج وهو يبي يكون عندهم ويرتاح معهم
................••............
عند عجاج اللي كان فرحان فرحة الدنيا لما حصل وظيفه كان ينتظر ثنيان على باب بيتهم ونط اول ماشافه جاي من اخر الحاره ونزل له من الطلعه وهو يركض : توظفنا يا حضرة الضابط
ضحك ثنيان بفرح وهو يحضنه : بالله عليييك مبرووك مبرووووك
عجاج : يبارك فيك
ثنيان : وييين
عجاج : في شركة نقل ما نقل
ثنيان: زين زين اهم شي وظيفه
عجاج : اول راتب لك مني بخاري يوجع قلبك
ثنيان: اوووه الخير جاء
عجاج :ايه ايييه
ثنيان : اسمع طلبتك
عجاج :جاك
ثنيان : تعال نبي نروح لديرة الترف
عجاج : رجعنا على طير اللي
ثنيان : تكفى يا عجاج ضايق وابي اي شي اتسلى
عجاج : الحين تروح وش تبي وش بتقول
ثنيان :مدري نروح نقول اي شي ولا تدري بنقول جاء واحد يدفع تعويض عن المساجين لاخصامهم ويطلعهم فاعل خير يعني وبنشوف اذا بتطلعون منير
عجاج : الله واكبر وبتطلع منير ومن بيدفع التعويض
ثنيان: انا
عجاج :ثنيان وراك صاير رخمه وانا اخوك
ثنيان : يوووه يا عجاج انا وش اقول وانت وش تقول
عجاج : اقول اسمع العلم اللي يجمد على الشارب الترف شلها من راسك وبعدين تعال وش حجتك عشان تتزوج هااه علمني وش حجتك
ثنيان :بتزوج ياخي تطلبني شي
عجاج: الحين يوم كنت انسان طبيعي تزوجت منيره بنت عمك وعشت انسان طبيعي ومنيره تعبت معاد تقدر تجيب عيال قلت ابي عيال و قلنا معك حق تزوج وتزوجت مشاعل جابت لك عمر واستكنيت 9 سنين وبعدها انضربت على راسك وقلت مشاعل بعد مدري وش علتها وقلت بتزوج وتزوجت خلاااص الحين كلهم حوامل وكل انواع الحريم عندك وش تبي الحيييين
ثنيان : افهم انك جالس تقيم حريمي وانا جالس اناظرك
عجاج: كل تبببن من زينك انت وحريمك حبيبي انا اعلمك بس وين وصلت فالدمار
ثنيان : ما عليك من دماري واسمعني انا خلاص متزوجها متزوجها
عجاج اللي فقد صبره : زين يا ثنيان تزوجها روح تزوجها وقبل مر لابوك وقله يبه انا بتزوج سمراء وشف وش بيقولك
ثنيان: الحين وش دخل ذا في ذا
عجاج اللي كانت نفسيه متدمره من العنصريه اللي جالسين يضغطون عليهم بها : ثنيان لا تضحك على نفسك وتضحك علي كلنا ندري انك لو تموت ابوك ما يخيلك تزوج سمراء هذا واحد واثنين اذا انت تحبنا وكل الحاره تحبك وانت عندك الناس واحد مايفرق معك جنسه ولونه عند اهلك يفرق وعند الباقين يفرق خلني اقولك على بلاطه ما بيزوجك ابوي بمسماكم ( عبده ) عرفت المشكله الحين
انزعج ثنيان وقف : وش ذا الحكي يا عجاج كلنا عبيد لله ما فيه فرق بينا الا بالتقوى
عجاج: ايه صح كلهم يقولونه لكن الفعل ولا شي
ثنيان : الحين انت قلبت الموضوع بشي ماله دخل
عجاج : انا ما قلبت انا اصحيك على واقعك
ضاق ثنييييان من ضيق عجاج وهو مايدري وش يسوي عشان يقطع هالعنصريه اللي مالها معنى
جلس وهو يقول : والله واقعي اني احبكم يالخوال وبتزوج الترف
عجاج : اعنبوك انت ما تفهم اقولك تيس تقول احلبه
ضحك ثنيان : والله من زمان استيعابي صاير صفر
عجاج : حسبي للله ربي قم قم اذلف
ثنيان : وش تعطيني اذا اقنعت ابوي
رفع عجاج نعاله( وانتم بكرامه ): بعطيك ذا النعال على خشتك
ثنيان : افا
عجاج : ابد انت مدمن انتهى امرك خلاص مهما قلت حمار
ثنيان : ما علينا بس قم دور لنا شي نسويه
عجاج : اسمع تعرف طحطح
ثنيان :طحطح ما غيره حق مغسلة الملابس
عجاج :ايه
ثنيان: وش فيه
عجاج :محمووووس منه بأنتقم منه شر انتقام بس كيف
ثنيان :وش سوى
عجاج : حطيت ثيابي عنده واحرقها لعانه فيني كلها راحت حسيبه الله
.( البارت مو عنصري)
ثنيان : اما عاد
عجاج : وش اسوي به
ثنيان : يخسى والله ما يقهرك قوم قوم
عجاج : وش نسوي
ثنيان: شوف انا بجلس اكلمه وألهيه وكذا طيب وانت ادخل بدون ما يشوفك وكل شي تطيح عينك عليه قطعه احرقه سوي اللي تبي
عجاج : واذا بلغ الشرطه
ثنيان :عجاج حبيبي ترا اللي معك ضابط على هالحواري ومن ضمنها حارتكم وبعدين وش يدريه انه انت
عجاج : يلا اجل
راح ثنيان يمسك طحطح ويسولف معه ويحاول يلهيه ودخل طبعا عجاج وبرد قلبه في طحطح
وطلع بسرعه واختفى وانسحب ثنيان وجاء عجاج وابتدا يسوي مشكله انه احرق ملابسهه وابتدا وقال ثنيان بصوت عالي : اصلا شوف عيني اغلب الثياب محرقه وش ذا الشغل يا طحطح
انتبهوا الناس وابتدوا يتجمعون واحد واحد وطحطح مصدوم والناس مصدومه من اللي صاير
انسحبوا عجاج وثنيان وجلسوا وهم مبتسمين لكن فز ثنيان وهو يقول :دقيقه
ركض ثنيان ووقف وهو يشوف مرزوقه نازله : سلام عليكم انتي مرزوقه
مرزوقه :اي نعم وش تبي
ثنيان: اخوك سالم صح ؟! مرزوقه : ايييه
ثنيان : تعرفين طحطح
مرزوقه : اخلص علي
ثنيان: طحطح كفخ اخوك مرزوق لين قال امين مع ان سالم ما سوى شي بس صفقه تصفيق
مرزوقه : وشووو
نزلت مرزوقه ورجع ثنيان وهو يضحك ويطق رقبه : ليتنا من زمان جايبين مرزوقه
عجاج:وش قلت لها راحت وين
ثنيان: قلت لها ان طحطح مكفخ اخوها
عجاج : ياااااااااا للله يا خبل تبيها تذبحه
ثنيان: احسن هذا كفو يضيق صدرك
عجاج: اي والله ماهو كفو خلها ترنه
ابو حمود جاء : يا عيال قوموا افزعوا لطحطح من ذا الجنيه
عجاج : والله معليش انت تعرفني مرزوقه لو تكفخني ما فزعت لنفسي
ثنيان: وانا بعد
ابو حمود: يا خسارة الشباب
ثنيان :ابو حمود ليه ما تروح انت
ابو حمود : تبيها تذبحني مريضه ذي
عجاج: حتى حنا نبي الحياة يا عم
ضحك ثنيان وهو يقول: بتخاويني ولا اروح اقنع ابوي واروح معه
عجاج: عليت قلبي الله يعل قلبك روح روح مع ابوك خله يربيك من جديد
ثنيان : اجل يلا
راح ثنيان وهو يشوف الهوشه قايمه وضحك وهو يركب سيارته وطار ..
.
.
انتهى البارت✨