"شيري أرجوكي اهدي كده شوية واسمعيني" همس يوسف بجدية وهو يحاول أن يناقشها
"متقوليش اهدى ولا اسمع!! عايزني ازاي اهدا بعد اللي أنا سمعته! أنت عايزني أشتغل مع واحد زي ده.. ده براحة كده يبقا قواد.. إنسان تافه ومفيش غير البنات التافهة الصغيرة هي اللي بتشجعه وبتشوف أفلامه، كل جمهوره بيبقوا مستنين يشوفوه بيبوس واحدة سافلة ولا يتحرش بيها في فيلم من أفلامه.. ده كفاية اللي سمعناه عنه.. طب بذمتك عايزني أشتغل مع واحد حقير أغتصب خطيبته؟ طب شوفت كام ممثلة تانية قالوا إنه بيتحرش بيهم؟ أنت مصدق يا يوسف الكلام ده؟ عايزني اهدى ازاي؟" صاحت به وعسليتاها تكاد تنفجر من الغضب
"خلصتي؟" صاح سائلاً اياها وهو يتفقد تلك العسليتان بينما سكتت شيرين ونظرت ليوسف بغضب وتعجب بآن واحد، أمّا حبيبة لم تتجرأ على الحديث أو النطق بحرف.
"أنتي عارفة كويس إنك بالنسبالي أختي وصاحبتي ومش هارضى حد يقول عليكي كلمة وسمعتك بالنسبالي مهمة وعمري ما هاقبل أسمع عليكي حرف" نظر لها بحنان أخوى وخوف عليها "أول حاجة لازم تعرفيها إن التصريحات دي بتاعت الإغتصاب والتحرش كلها غلط وهتتكذب قريب.. وتاني حاجة هو مكنش ليه مدير أعمال قبل كده غير مراد رأفت.. عارفاه؟!" تفقدها وهو يحاول أن يستشعر انتباهها وتقبلها لمجرد المناقشة بالأمر
"آه عارفاه.. سمعت عنه كده مرة ولا مرتين" أجابته على مضض
"طيب.. آدم رأفت بعد كل اللي بيتقال عليه ده هو إنسان غامض، لا بيصرح بحاجة ولا بيعمل مقابلات حتى ولا حتى مهتم بالـ Social Media، أظنك أنتي عارفة ده كويس، وبالرغم بقا من كل الحاجات ديه أفلامه لسه لغاية دلوقتي إيرادتها كبيرة، أياً كان محتواها إيه بس لسه بتنافس والناس مبتبطلش تتفرج عليها، يعني هو كممثل لسه مشهور وشاطر وناجح" أخبرها ليحاول إقناعها
"اللي هي أفلام قذرة وحقيرة ومفيهاش غير رومانسية تافهة بتشد البنات مش كده؟!!" ردت بسخرية
"شيري يا حبيبتي متقلقيش، محدش هيقدر يتعرضلك ولا يأذيكي ولا يهوب ناحيتك، أنا جنبك وكمان حبيبة جنبك وعمرنا ما هنسيبك لو حاجة حصلت" حاول أن يطمئنها
"لو حاجة حصلت؟! وأنا لسه هستنى حاجة تحصل؟! لا أنا مش هستنى لما حاجة تحصل ولا يلزمني أصلاً أشتغل مع واحد زيه" صاحت بإصرار قاطع
"حاول بردو يا شيري تعرفي إننا بنتكلم عن شغل مش عن Relationship بين اتنين بيحبوا بعض" أردف يوسف لتتعجب شيرين مما يقول
"تقصد ايه؟" عقدت حاجباها بإستغراب
"بصي" أخذ نفسا عميقاً وأمسك يدها في ود أخوي "أنا من أكتر الناس اللي يعرفوا أنتي حبيتي كريم ازاي ووقفتي جنبه وتعبتي علشان تشوفيه حد كويس، وعارف بردو كان نفسك تشوفيه ازاي والناس يشوفوه ازاي، وعارف إنك عافرتي عشان الناس تعتبره حد موهوب ويبصوله بإحترام ويعتبروه ممثل ناجح وشاطر بالرغم من أن سنه صغير.. بس آدم حاجة تانية، آدم رأفت جمهوره أكتر من جمهور كريم لطفي بكتير والكل في المجال وحتى الجمهور يعرفوا كده، وأنتي مش هتتعبي مع آدم كده، وكل اللي عليكي بس إنك تركزي في شغلك طول مدة العقد ما بينكم وبعد ما العقد يخلص نبقا نشوف هيحصل ايه!" حاول إقناعها بأسباب رآها منطقية من وجهة نظره وستستطيع هي تفهمها نظراً لخبرتها بالمجال
أنت تقرأ
ترويض آدم - كاملة (بالعامية المصرية)
Romance"مين؟! آدم رآفت؟ استحالة أشتغل معاه.. أنتو مسمعتوش الناس بتقول عليه ايه وسمعته عاملة ازاي؟ لو مكناش في بلد شرقي كان زمانه ممثل إباحي.. طب مسمعتوش إدعاءات الإغتصاب والتحرش اللي نازلة ترف عليه؟ لا لأ.. ما تقولوليش إني لازم أشتغل معاه.. يعني أنا بعد ما...
