انا اسمي إشراق عمري 25 سنة عطاني ربي الزين و الرزانة و الزهر كي كانو يمدو فيه كنت غايبة...و كيما يقولو لي غاب غاب حقو.....بابا توفى كي كان في عمري 6 سنين يما عام مور موت بابا عاودت الزواج و جابت مع راجلها 2 بنات ... و انا خلاتني عند جدة ...كنت نروح عندها مرة على مرة و صراحة مانلقاش راحتي و هي ماعدتش تحوس عليا.... مع االوقت وليت مانروحش عندها قعدت عند جدة كنت راسي وراسها ...وجدة مسكينة كانت تحبني و تصيب تنحي من لحمها و تعطيني...كنت نخدم و نقرأ المهم قيس مصروفي و لبستي كل مرة وين تصحلي مرة في بوتيكة مرة في بيتزيريا.....وحد النهار قاتلي جدة بلي خطبني واحد من ولاد جيران منكذبش عليكم قبل مانعرف شكون قررت نقبل ماشي راني نرمي في روحي و لا مهبولة و لا مقطعة روحي على الزواج بصح الله غالب تمرمدت على صغري...و حبيت نتهنا...المهم ظهر لي خطبني نعرفو وليد ناس قاري و عاقل تعرفت عليه و رتحتلو..وكل حاجة جات على بعضاها...الخطبة ..الفاتحة و العقد و حددنا لادات نتاع العرس..وكان ولي أمري عمي دايرني وحدة من بناتو... يحبني الحق منلي تزوجت يما وهو يحاول فيا نسكن عندو و انا لي ما حبيتش بحجة جدة وحدها و هي اولى...
