و في هذيك الفترة لاحظت بلي محمد ماشي طبيعي مرانيش نقصد مريض لالا بالعكس ذكي و عاقل قصدت بلي عندو بلاك عقدة نفسية حسيتو ناقص حنان شفت روحي فيه على خاطر انا تان مجربة و نعرف هذا الإحساس مسكين تعلق بيا و انا تان وليت حساتو وليدي وليت كي نجوز في الطريق على حوايج الصغار و لا الألعاب نتفكر محمد... نقول في قلبي هذي يحبها هذي تجيه مليحة....بالمختصر المفيد محمد سكن قلبي و تفكيري...وليت كي نرجع للدار نبقى نخمم فيه اذا رقد ...إذا كلا.....و لاحظت بلي مكانش علاقة بينو بين سي قاسم عمري ماشفتو رفد وليدو و لا عنقو و لا حتى يضحك معاه.... كانت حياتهم كي اللغز لي كان شاغل تفكيري و حبيت نفهم الحكاية...
وحد النهار كي العادة رحت لخدمتي تلاقيت بسي قاسم خارج...طلعت لمحمد نوضتو مسكين فشلااان ماشي كيما العادة كي مسيتو كان يغلي...بقيت معاه نهار طول و انا نديرلو في الكمادات على راسو و نهبطلو في الحمة....وصل الوقت باش نروح و سي قاسم ماجاش...عيطتلو تليفون مغلوق....جيت راح نوض من قدام محمد نطل من تاقة و هو قالي ماما اشراق و عنقني... و انا قريب ذبت...يا عمري ماما اشراق.....عنقتو و الله غير الدمعة جاتني...واش حكايتو..وين راهي يماه...زعمة مطلقة و لا متوفية.
