لمهم انا بديت نرتاح لطفي هذا هو اسمو... سمحت في الجامعة على جالو...على خاطر العام لي تخطبت فيه جبت الباك و هو ماحبش يخليني نكمل ... و انا قبلت...المهم نتهنى
قرب عرسي بقالو شهر و راكو تعرفو الجري ...وحد النهار نضت الصباح زعما رايحة للخياطة انا نلبس في حجابي و هي جات عجوزتي دخلتها جدة و انا كي شفتها وجهي صفار ماشي موالفة تجي بلا ماتقول و زيد صباح لله.....و الخزرة نتاعها ماتبشرش بالخير حطتني قدامها و قاتلي يا بنتي سامحيني ...
قلت في قلبي اوووو سامحيني على واش؟؟؟ قاتلي لطفي حرق لسبانيا ولاد الحرام لعبو بعقلو.....
انا فشلت فمي ماقدرتش نحركو جدة خبطت في صدرها و قالت .... اووو لالة يما على طفلة طلقوها بلا زواج و بقات تمجد...... خزرت في عجوزتي...ههه قصدي لي كانت عجوزتي قتلها و انا ...هبطت راسها و قاتلي مراهش معول يرجع غير شوفي حياتك يا بنتي ربي يسهل.....يا جماعة اتخايلو برك حالتي ..... انا مرضت وليت مطلقة بلا زواج وجدة مسكينة مرضت من هذيك الضربة زادت موراها شهرين و توفات..... انا حياتي تخربطت...مور الجنازة جا عمي داني لعندو ماكاش كيفاه نقعد في الدار وحدي .. و اصلا اذا حبيت نقعد في دار جدة منقدرش راكو تعرفو الواحد يموت من يجي واحد عمرك إلا شفتو يقولك حقي في الورث..دار جدة داروها للبيع باش كل واحد يدي نصيبو..
