_ ياسين .. يايسن اصحى كلم الصايع صاحبك
= ماجد!!! جه ؟!!
_ من بدري اصحى ياض شوفه عايز ايه برا انا خايفة على اخواتك البنات منه
= حاضر حاضر ممكن توطي صوتك بس عشان الفضايح الي عالصبح دي
_ طب اصحى يا اخويا و اما تخلص معاه انزل هات الفطار
= لا مهو انا مش صاحي .. انا كنت اساسا عايز اقلك مشي الواد الي برا دا و خافي على بناتك يا سهير
_ قوم يا ياسين و بطل دلع
= حاضر يا ماما ممكن بس عشان عايز اغير و ارجوكي مش عايز اسمع جملة كنت بغيرلك البامبرز دي عشان بتقرفني
_ ماشي يا لمض .. اخلص
* شوية كدا و خرجت للباشا الي مستني برا *
_ صباحو يا ياسو باشا
= صباح النور يا اخويا .. ايه سبب الزيارة الكريمة
_ جرا ايه ياسو و احنا لازم يكون في سبب عشان نزور بعض و نسأل عن بعض و ....
= ماااجد !!! اخلص يا حبيبي عشان في فطار هيتجاب
_ اخوك مزنوق في قرشين
= تاني يا ماجد اتزنقت في فلوس تاني و قرشين ايه يا ماجد دا انت بتتزنق كل مرة في متين جنيه
_ لا المرادى في خمسمية
= يخربيت الي جابوك .. و جايلي ليه دلوقت
_ ايه يا اخي مش انت صاحبي و لازم تقف جمبي
= لا لا انا اصلا كنت ناوي اكلمك و اقلك انك نحس عليا و لازم ننهي الصداقة الي كلها زنقة دي
_ دي اخرتها يا ياسو .. طب راعي الجيرة طاب
= اه حاضر هرعيها و هنزلكوا طبق بسبوسة من عندنا
_ كدااا !!! طب على فكرة كل مرة طبق البسبوسة بيبقا ناقص سكر
= السكر غلي يا حيوان
* قفلت الباب وراه و انا متنرفز جدا... و قعدت افكر في حوار ماجد دا فترة عالباب لحد ما سمعت ماما بتنادي *
_ يا ياااسين
= يانهر اسود .. الفطااار !!!!
*بليل كنت مقرر اني لازم أديله الفلوس عشان افك زنقته .. ماجد بردو صاحبي و جران من سنين .. خبطت الباب و وقفت بعيد شوية و الباب اتفتح *
*بنوته زي القمر .. زي الحوريات بالظبط .. ولابسة اسدال صلاة .. تنحت جدا قدامها لحد ملقتها كشرت باستغراب *
_ في حاجة حضرتك ؟
= هاه
_ حضرتك خبطت
= اه ايوه ايوه .. منير موجود
_ منير ؟!؛ منير مين
= اقصد عادل
_ لا حضرتك العنوان غلط
= استني استني ماجد
_ ماجد اخويا
= ايوه ماجد اخويا
_ اه .. ثواني هناديه
= اتفضلي
*وقفت متكتف بتأمل المكان الي كانت واقفة فيه .. خالية تماما من أي الوان طيف على وشها .. كانت جميلة و ملامحها مريحة .. فضلت مسهم كدا علي نفسي لحد مسمعت ماجد بيتكلم *
_ ايه يا عم مالك في ايه
= ايه مش هتقولي اتفضل
_ لا اصل احنا بنضف مش فاضيين
= الخمسمية جنيه معايا
_ تقعد في الصالة و لا الصالون
*بعد فترة مش طويلة كنت قررت أنزل الكلية يعني مرة من نفسها ... طبعا واحد زيي ميعرفش شكل الكتب عاملة ازاي و امتحناته على الابواب لازم يتصرف ... الكلام كان على شوية ملازم هتشتريها وربنا يقدم الي فيه الخير .. المكتبة الي بتبيع الملازم كانت قريبة نسبيا من كليتنا فنزلت .. و انا هناك .. لمحت نفس البنت .. اخت ماجد .. كانت واقفة لوحدها وحاضنة الكشكول بتاعها وواقفة في جمب .. قربت منها بس مكلمتهاش .. طبعا لازم اساعدها مش اخت صاحبي .. هاه؟؟*
