_ يوسف يا يوسف
= امممممم
_ قوم اصحي عشان تودي علي الحضانة
= انا وديته امبارح وديه أنتي
_ امبارح ؟!!! .. امبارح كان اجازة
= ايه دا بجد ؟ .. قصدي وديته الخميس
_ الخميس كان ستة أكتوبر
= انا مش هخلص منك انهردا
_ تخلص مني ؟!!!
= نكد... نكد ..كل يوم نكد
_ نكد ؟!! انا نكد تعالي هنا بكلمك
= وبعدين بقا في هرمونات الحمل الي جاية على دماغ الي جابوني دي
_ يعني ايه يعني انا مجنونة
= لا ازاي ست العاقلين
_ تعالى هنا
= دااااخل الحمام ايه هتخشي ورايا ؟؟!
_ هتبات عندك
= مش عارف على حسب
_ ماشي والله لوريك
__________________________
_ مامي .. بابي فين
= دخل ينام في الحمام
_ في حد ينام في الحمام يا ماما
= اه المتخلفين عقليا شبه أبوك كدا
_ سمعتك
= امسك يا علي سندوتشاتك اهي ومتخليش حد ياكلها منك
_ حاضر
* وطلع يجري علي العربية .. اما هي بتلف لقيته قدامها بيبتسم بسخرية *
_ قال ياكلوها منه قال .. اومال لو مكنتش جبنة دومتي و خيار كنت هتعملي ايه
= انت رخم .. وسع من قدامي
_ حد يتعامل كدا مع جوزه حبيبه
= امشي يلا من هنا بدل مطلع الهرمونات عليك
_ لا وعلى ايه دا احنا لسه يومنا طويل في الشغل سلام
= ... يوسف .. يوسف استنا
_ ايه
= نسيت سندوتشاتك
_ سندوتشاتي ؟!!!
= خد
*وابتسمت بخبث وهي بتغمز *
_ مش جبنة بخيار على فكرة
= بجد .. شكرا يا حياتي
____________________________
* طيب اخر التطورات اني اشتغلت تبع شركة استيراد وتصدير ... دخلت المكتب بتاعي و الي انا مشترك فيه مع زميلي وقعدت طلعت الساندوتشات لقيتلك عادل صاحبي بيتكلم *
_ زي كل يوم ؟
= لا .. مفيش جبنة بالخيار
_ اما نشوف .... ايه مال وشك قلب كدا ليه طلعت جبنة بالخيار بردو ؟
= لأ ... جبنة بأوطة ؟!!!!!!
____________________________
_ يوسف انهردا ايه
= ايه
_ انهردا كام في الشهر
= عشىرين
_ مش بيفكرك بحاجة اليوم المشؤوم دا
= واما هو مشؤوم عايزاني افتكره ليه يا نكد أنتي
_ اخلص يا يوسف
_ ............ اممممم
_ وكمان مش فاكر أول يوم اتكلمنا فيه
= يا نهر ابوكي مش فايت عايزاني أكتب تاريخ اول مرة اتكلمنا فيها يا ملك ؟!
_ لو كنت مهتم كنت عملت كدا
= ايوااااا .. فيلم الاهتمام مبيطلبش هيشتغل أهو
_ اه مهو أصل الاهتمام مبيطلبش .. لو كنت بتحبني كنت فضلت فاكر...انما انت معدتش بتحبني زي زمان .. انا عارفة. . انا عارفة انك مبقتش تحبني زي زمان .. قول قول انك مبقتش تحبني زي زمان
= خلااااص .. يا ساتر عليكي .. بتجيبي صحة للنكد دا كله ازاي
_ نكد .. نكد تاني وربنا لنكد عليك ايامك الجاية يا يوسف .. اااه .. اااه يا بختك المايل في جوزك يا ملك
= ايوه ايوه اقعدي اندبي يا اختي
_ اندب ؟ .. كدا ؟! .. طب مفيش غدا
= أحسن بردو .. مش عايز منك حاجة اساسا
_ ايه الي انا قلته دا ؟!! .. لا مفيش غدا ايه ..استني يا لوكي يا حببتي يا روح قلبي تعالي بس ..
_____________________________
_ جوووووووووول
= العيب في الحكم
_ هو انتو كدا يا زمالكوية تجيبوا العيب عالحكم مهما كان غلط الفريق
= بقلك ايه يا بت انتي ...... قومي اعملي شاي
_ لا يا باشا مفيش الكلام دا الأهلي هو الي متقدم يعني تقوم انت تعملي عصير
= شوفت بقا يا مرتضي دايما جايبلنا الكلام من عيلة شبه دي
_ عيلة في عينك .. يلا يلا يا زملكاوي هاتلي عصير
= عصير ايه يا هانم
_ اي حاجة ... بس خليه لونه أحمر زي التيشيرت القمر دا
= اه طبعا اومال ايه
* دخلت وجبت عصير .. والعصير فعلا كان أحمر ... بس مش عشان التيشيرت خالص *
_ ايه دا ؟!!!
= دي فراولة
* بصينا لبعض وبدأنا نضحك بهستيرية وذكريات أول يوم لقا لحد الماتش الي بنشوفه في اللحظة دي بتتعاد قدامنا *
____________________________
_ ااااااااااااه
= ايه ؟! ... ايه في ايه
_ الحقني يا يوسف انا بولد
= بت ايه .. لا الساعة اربعة الفجر رجعيه تاني
_ هو ايه الي ارجعه يخربيت سنينك
= طب ..طب اهدي .. يا نهر اسود اعمل ايه انا
_ كلم الدكتور يا موكوس يا ابن الموكوسة
= لا حرام تلاقيه نايم
_ اه فعلا عندك حق خليه نايم و اموت انا عادي
= يااااه وارتاح من النكد
_ ترتاح ؟!! .. وربنا اما افوقلك لوريك النكد على اصوله
= لا و على ايه
____________________________
* دخلت معاها اوضة العمليات لان دا كان طلبها و حتى لو مكنتش طلبت انا رخم وهدخل عادي *
_ اااه انا بكرهك ... انت السبب في الي انا فيه دا انت
= وانا يعني جبته لوحدي يا هطلة أنتي
_ طلقني يا يوسف طلقنااااااي
= اه حاضر اما تخرجي هنفكر في الموضوع دة
_ تفكر ؟! وكمان عايز تفكر
= يا ولية عيب انتي بتولدي
_ ولية ؟
= بقلك ايه يا دكتور مفيش مخدر ينيمها شهرين
_ مبروك يا بشمهندس يوسف ... بنت
* دخلت عليها ولقتها مرهقة جدا .. وطيت بست راسها بهدوء و ابتسمت ... رحت بصيت علي بنتي لقيتها نايمة باستسلام وش ملائكي حمل ملامح ملك أكتر مني .. في اللحظة دي اتحقق حلم جديد من احلامي .. انا عندي بنوته شايلة تفاصيل كتير من مامتها .. بعد ما كبرت في ودنها شلتها لمامتها *
_ هتسميها ايه يا يوسف
= عواطف
_ عواطف ؟!!
= ايوه عشان تبقي كلها عواطف
_ انت بتقول ايه يالا .. انت عايز بنتي تتعقد
= تتعقد .. انا ابوها و عارف مصلحتها فين
_ لأ انا مامتها و تعبت فيها .. هنسميها ليلى
= عواطف
_ ليلى
= عواطف
_ ليلى
= خلااص ليلى ليلى .. كان يوم أسود اما طلبت فراولة
_ بتقول حاجة
= بقول نازل أجيبلنا عصير فراولة
#نطلب_فراولة
#نانسي_أشرف
رأيكوا يهمني جدا جدا و شكرا جدا جدا على التفاعل في الجزء الاول 🌼💜
تابعوني 😊💛
