_ يخربييت سنينك أنت تاني
= وتالت وعاشر .. أنا حالا عايز أعرف أنا إترفضت ليه
_ وأنت مالك أنت .. أنا عايزة أرفضك انا حرة
= أنا من حقي أعرف اترفضت ليه
_ وسع يا جدع أنت خليني أروح شغلي
= طب عظيم بيمين مانتي متحركة الا أما أعرف
_ مصطفى !!!
= عليا
_ مصطفي !!
= هنفضل نحفظ في أسامي بعض كتير
_ متقول لنفسك .. عديني خليني امشي
= بتضيعي وقتك يا جارتي العزيزة مش هتمشي من هنا الا أما أعرف
_ بني أدم عنيد
= امممم
_ وبارد
= امممم
_ انا هقول لأمك
= أمي عارفة ... قلتلها خارج أرخم على عليا قالتلي خد الباب وراك
_ كدا !!! طب وربنا لاوريك
= الساعة كام معاكي
_ يا نهر مش فايت انا اتأخرت
= طااااب الحمدلله
_ سيب ايدي يا مصطفي ... يخربيتك عالصبح ... هتفضحنا
= إتنين كشري يا شوقي
_ كشري !!! يوم ما تتنطط تجيب كشري
= بتتريقي على كشري عمو شوقي ؟؟!! دا انتي مش هتخشي الشارع إنهردا
_ عايز ايه يا مصطفي
= عايز أعرف سبب رفضك يا عليا
_ عشان عنيد و دماغك ناشفة
= مش حقيقة
_ بتتقمص و بتغير من ضلك
= مش حقيقة
_ فلاتي و بتاع بنات
= حقيقة جدا
_ مصطفى !!!
= خديني ربيني و إكسبي فيا ثواب
_ وانا ذنبي ايه اتبلى بيك طول العمر
= ذنبك أني بحبك
_ ما شاء الله عليك و على الي جابوك بتحب كل البنات حوا
= دا لأوني راجل قلبه كبير
_ يا حنين
= وفيها ايه اما أحبك و أكلم اتناشر بنت غيرك مش حوار يعني
_ يا ربي ... انت عايز ايه دلوقت
= هاتي شوية شطة
_ انت حطيت يا ما على طبقك هتتعب
= خايفة عليا يا روحي
_ يا شيخ طلعت روحك .. اما تخلص مني و انت قاعد ألبس أنا فيك سجن بقا مش كدا
= عنيفة .. بس نينجا
_ انا عايزة أروح
= خلصي الطبق دا عشان غالي
_ جايبلي طبق كشري ب عشرة و يقولي غالي ابن المقشفة
= سمعتك
_ طب انا هعمل ايه دلوقت اخرتني علي شغلي
= مش عارف شغل ايه الي بتشتغليه دا .. اصلا هتحتاجيه في ايه اما نتجوز
_ اولا انا مش هتجوزك .. ثانية و انت مال أهلك انا يا سيدي بايرة و بحب اخرج من البيت ليك فيه
= لأ دي إسمها قلة آدب .. وانا كدا أزعل
_ متزعل
= مبلاش
_ هتعمل ايه يعني
= لا دي هقلهالك بعدين
_ قليل الادب
= دماغك راحت فين .. انا كنت هقلك بعد الكشري
_ انا عايزة أمشي
= وانا عايز اجوزك
_ أنت مبتزهقش
= أنا بحبك
_ مصطفي !!
= عليا
_ انت بتبص على ايه
= اوووف .. كان في حته صاروخ معدي من شوية
_ ايه !!! .. بتقول ايه
= مقلتش حاجة
_ لا قلت .. قلت صاروخ و انا شفتك بتبص على البت العدت من شوية
= محصلش
_ متقلش محصلش انا شفتك بعيني دول
= طب نفترض بصيت و انتي مالك مش انتي مش بتحبيني و مش عايزة تتجوزيني
_ انا مقلتش مش بحبك
= ايه دا .. دا معناه أنك ...
_ لأ
= طب وربنا انتي ولية نكد
_ ولية !!! انا ولية يا مصطفى
= اه يا عليا .. ولية و نكدية و بتكدبي على نفسك
_ لأ مش بكدب أنا
= انت بتحبيني بس عارفة مشكلتك ايه
_ ايه
= فكراني بتاع بنات و دي للأسف حقيقة
_ مصطفي !!!
= عليا
_ انت مش بس بتاع بنات يا اخويا انت بتعرف تلاتة في نفس الدقيقة و معرفش بتعجبهم علي ايه
= عشان انا واد جامد جدا و مفيش مني
_ صبرني يا رب
= منا قلتلك وحلفت اني من ساعة مشفتك و انا بطلت
_ مصطفى !!
= طااايب ... خففت الحمولة شوية
_ ........
= طيب اجوزيني و انا اوعدك اني أغير النشاط
_ ايه اغير النشاط دي هتتعرف على رجالة
= لا أستغفر الله ... دا حراام
_ لا يا شيخ !!
= اه وربنا
_ ........
= عليا ... أنا هجيلكوا انهردا و دي هتكون علبة الجاتوه رقم ٨ وربنا لو اترفض تانية لاخد الجاتوه معايا و انا ماشي
_ وتبقي مصطفى أبو جاتوه
= مهو انا مش هترفض تمن مرات ورا بعض بقا انا الناس كلت وشي
_ ...........
= عليا
_ كلم بابا
* وفعلا كلمت الحاج الوالد و الحمدلله كلنا الجاتوه و بعدها باسبوع اتخطبنا و يا دبلة الخطوبة بقا والكلام الجميل دا كله .. وهوووب الفرح *
_ ايه دا !!!
= ايه
_ الفستان ضيق
= نعم يا اخويا مش انت الي مختارة يا فالح يا ابن الفالحة
_ وانا اعرف منين انك هتتخني وتبقي زي البقرة في اسبوعين
= اتخن ! وزي البقرة ... دا انت ليلة أهلك مش معدية انهردا
_ عدي ليلتك على خير يا عليا و قولي يا مسا
= مصطفى !!!
_ عليا
*يلا يا جماعة الناس مستنياكوا في القاعة*
* وعدا على الفترة دي .. فترة تانية سنة كاملة بأحداثها و يوم جميل هادي في أجازتي الي بطلب فيها شوية هدوء .. شوية بس و ربنا مطلبت أكتر من كدا *
_ ااااااااااااااااه
= ايه !!! .. ايه في ايه
_ الحقني يا مصطفى بولد
= بت إيه ؟!!! ... الساعة أربعة الفجر
_ بقلك بولد قوم كلم الدكتور بسرعاااااه
= ط.. طيب .. فين الموبايل ... استنى
_ اااااااه ... طلقني يا مصطفى طلقناااي
= اما تولدي هنفكر سوا
_ يعني كمان بتفكر .. يلاااهواااي
= بقلك ايه يا دكتور متزود جرعة المخدر خليها تتخمد يومين
_ انت السبب في الي انا فيه
= وانا يعني جبته لوحدي يا اختي ولا ايه
_ ااااااااه
* مبروك يا بشمهندس ... ولد *
_ عليا هنسميه يوسف
= لأ هنسميه سليم
_ أيه دا لأ انا أبوه الي جبته
= وانا أمه الي خلفته
_ هنسميه يوسف
= مصطفى !!
_ عليا
#نانسي_أشرف
#مصطفى_وعايا
#فقرة_quick
يلا قولولي رأيكوا 💜💜
إعملولي متابعة 🙈❤❤
