منى:"قعدت تبكي ومصدومه" تبصري انتي؟!بسمة:واللهِ بجد منيوه
منى:لكن اني مش قادره نشوفهم حاسه روحي نبيهم لكن كارهتهم هيا عايشه حياتها تمام واني قاعده هنا زي البنقله مع مرت بوي
بسمة:عارفه حبيبتي بس هيا وخيتك شن دنبها؟
منى:اني مش قادره نفكر فيها بحنيه حاسه روحي حاقده عليها اكتر من ماما ؛لانه لو هي ماكانتش موجوده را قعدت ايام عند ماما وايام عند بابا مش هكي حياتي.
بسمة:ماتحطيش اللوم عليها حتى هيا عاشت بدون اب
منى:اني عشت بدون ام واب واخت ،اني نبكي ونرقد بروحي وهيا ترقد في حضن امها ،اني بوي ومرت بوي يعاملوا في زي الخدامه في الوقت اللي هيا امها كانت تخلي فيها تتريح وتعامل فيها في معامله كويسه
بسمة:باهي ديري اللي يريحك بس فكري في الموضوع
منى:مانبيش انفكر
بسمة:"اضايقت" باهي خلي نطلعوا بحداهم توا وبعدين ساهل
منى:"مسحت ادموعها" هي
نعيمة:"بخبت"هادا كله تعطي فيها في الكتاب؟!
بسمة:اي ماهو قعدنا اندوروا فيه
مرام:تي فوتيها ياماما
نعيمة:حتى اني فايتتها اصلا
بسمة:كيف حال عمي؟
ميار:الحمد لله
نعيمة:خير امك ماجتش يابسمة؟
بسمة:"ضحكت" والله ماقتلها بكل ،قلت لبابا بنمشي قالي اهو محمد طالع اركبي معاه
ميار:"ضحكت"مليح ،فايتها صار
وقعدوا يهدرزوا ومع الساعة 11 روحت بسمة
في السيارة:
محمد:دويتيلها؟!
بسمة:دويتلها ومسكره راسها وبصراحه عندها الحق والله وجعتني لما قعدت تحكيلي
محمد:شن قتلك؟
بسمة:قتلي اني اللي تعدبت وقعدت بروحي ما معاي حد قتلها حتى هيا عايشه بلا اب قتلي اني بلا اب وام ومافي حد حاس بيا وهيا عايشه معززه مكرمه واني زي الخدامه
محمد:صدقت ،لكن لازم تصفي نيتها وماتخليش قلبها اسود هكي
بسمة:قلتلها ،انشاء الله خير
محمد:بنسألك؟
بسمة:هاا اسأل
محمد:مريم ماقتلكش انها معجبه بحد وله في حد في حياتها
بسمة:لالا ،خيره؟
محمد:لا شئ نطمن علي بنت عمي بس
بسمة:"ضحكت"فوتها علي غيري ،عجباتك وله شني؟
محمد:"ابتسم"شويه هكي
بسمة:"ضحكت"انشاء الله خير ياميدو
محمد:انشاء الله يابيسو
____________________
عند مريم:
فاطمة:باهي قتله ياخد البنت معاي وله لا؟
عمر:اي قتله والراجل موافق ،اصلا هوا عقيم ومايجيبش في صغار قال مادابيا تملى عليا الحوش ونديرها زي بنتي ونحطها في عيوني
فاطمة:باهي انشاء الله خير عموره
عمر:فكري وردي عليا
فاطمة:تمام
"ركبت فاطمة لمريم لقتها تقرا"
فاطمة:مريومه شن اديري؟
مريم:نقرا عندي امتحان
فاطمة:باهي ربي يعاونك بنيتي
مريم:انشاء الله
فاطمة:نبيك في موضوع حطي كتاباتك واسمعيني
مريم:تمام
فاطمة:انتي عارفه انه اني من يوم اطلقت شرطت انه مانتجوزش الا وانتي معاي واللي ياخدني يربيك ويديرك زي بنته
مريم:اي عارفه
فاطمة:في راجل ولد ناس وكويس تقدملي وخالك عمر عاجبه وهوا عقيم يعني مايجيبش في صغار ويبيك تجي معاي اصلا وبيحطك في عيونه
مريم:بجد تدوي
فاطمة:اي
مريم:"فرحت"مش مصدقه انه وأخيرا في حد رضي ياخدك وياخدني معاك
فاطمة:"تريحت لما لقت بنتها متقبله الموضوع"اي الحمد لله
مريم:انشاء الله خير ياماما
فاطمة:انشاء الله حبيبتي ،هي كملي قرايتك اني بنمشي لداري
مريم:تمام
أنت تقرأ
تباً للذاكرة🖤!
General Fictionشكراً ع المتابعة ،هادي حتكون روايتي الأولى ونتمنى تعجبكم حبيباتي🙂وماتبخلوش عليا بدعمكم وكونوا سبب في تطور كتابتي ورواياتي💛. روايتي تحكي علي بنتين كانوا ضحية طلاق امهم وبوهم ،وكل وحده فيهم عاشت ظروف مختلفة 180 درجة علي اللي عاشتهم اختها ،وحده انحرم...
