"ميار نزلت لقت امها مقعمزه ع الصالون تراجي فيها"
ميار:هي بدي عاركي
نعيمة:شنو انتي بتكسريلي كلامي عقاب الوقت وله شني؟
ميار:اني لا كسرت كلامك لا شي لكن غلط اللي اديروا فيه مع البنت
نعيمة:تعرفي مزال نلقاك تعاوني فيها وله تهدرزي معاها تشوفي ياميار
ميار:اختي هيا مادرتش حاجه غلط اني
نعيمة:"بصوت عالي" معاش تردي عليا وامشي لدارك تو يجي بوك يتفاهم معاك
ميار:واللهِ ديري اللي تبيه اني معاش بنشوف الظلم ونسكت ،وكان بتضربوني زيها اضروبوا
نعيمة:"كانت تسمع في بنتها ومصدومه كيف ادافع علي منى هكي" باهي سكري فمك وانتلفي لدارك
ميار:حاضر
"اما منى قعدت فوق الحوش وتشبح للجيهة اللي فيها حوش خوالها وتفكر..زعما شن اديري يامريم؟ اكيده راقده في حضن ماما واطبطب عليك ياريتني كنت مكانك يامريم ياريتني ،زعما كيف حالك انتي وماما وكيف قعد شكلكم ،اني حتى ماما ندكر فيها بس مش زين مانزبطش ملامحها نتخايل فيها زي الحلم وانتي مانعرفكش حتى شكلك معاش ندكره ،ياربي استاحشت ماما محتاجتها معاي توقف جنبي وتحضني وتمسح دموعي وترقدني جنبها ياربي تعبت صبرني يارب"
____________________
تاني يوم:
"عمر ومريم في السيارة رافعها للمدرسه"
عمر:مريومه احكيلي
مريم:شني خالو!
عمر:شن هدرزتلك بسمة علي اهلك؟
مريم:حكتلي هلبا ياخالي ماكنتش نحساب حياتهم هكي
عمر:كيف ترا؟!
مريم:نعمية مرت بوي تعامل في منى زي الخدامة ،وبابا ديما يضرب فيها
عمر:هادا علاش ديما لما تقولي ياريتني اني اللي بابا خداني نقولولك قولي الحمد لله اللي عطاك لامك
مريم:قصدك انتم تعلموا ب منى كيف عايشه؟
عمر:اي
مريم:وعلاش ساكتين؟ علاش ماخديتوهاش منه؟
عمر:لانه المحكمة لما امك وبوك اطلقوا حكمت انه انتي عند امك ومنى عند بوك نين انتم تكبروا وكل وحده تختار بروحها مع مني تبي تقعد ،واللي يمشي يحاول ياخد وحده منكم من التاني بيتعاقب وبياخدو منه حتى البنت اللي عنده
مريم:كيف مافهمتش؟!
عمر:يعني لو بوك جي وقال نبي مريم ياخدو منه منى ويعطوها لأمك
مريم:اهاا
عمر:لكن هادا مش معناه مايسألش عليك وله مايصرفش عليك ،شكله ماصدق السي سالم خديناك منه
مريم:"اضايقت شويه" ربي يهديه
عمر:هي انزلي مريومتي وصلنا
مريم:صحيت خالو
ومشي خالها وهيا جت بتخش للمدرسه سمعت حد ينادي فيها
محمد:يامريم مريم
مريم:"تلفتت لقاته محمد مشتله هوا وبسمة"
صباح الخير
محمد:صباح النور ،كيف حالك؟
مريم:بخير الحمد لله
بسمة:صباحوو مريومه
مريم:صباحو ورد
محمد:مريم بنقولك حاجه
مريم:"باستغراب" نعم!
محمد:باللهِ لو احتجتي حاجه وله تبي شي ماتتردديش اني ولد عمك ولو كنت نعرفك من زمان ماكنتش قصرت
مريم:"ابتسمت" يسلمو محمد بس اني مش ناقصني شئ
محمد:اني قتلك ومانبيكش تتحشمي مني
مريم:ان شاء الله
بسمة:شني ميرومه نخشوا
مريم:هي "وكانت تفكر ليش مهتم بيها وشن خطرله توا يقوللها كان ناقصاتك حاجه قولي ،وين كان قبل سنين؟ ،بس هوا كان صغير مش دنبه ،ولما كبر بالصدفه عرفني ،ان شاء الله خير وخلاص"
أنت تقرأ
تباً للذاكرة🖤!
Genel Kurguشكراً ع المتابعة ،هادي حتكون روايتي الأولى ونتمنى تعجبكم حبيباتي🙂وماتبخلوش عليا بدعمكم وكونوا سبب في تطور كتابتي ورواياتي💛. روايتي تحكي علي بنتين كانوا ضحية طلاق امهم وبوهم ،وكل وحده فيهم عاشت ظروف مختلفة 180 درجة علي اللي عاشتهم اختها ،وحده انحرم...
