نعيمة:"بِغُل وبصوت عالي"صار ماتبيش تموتي ياكلبه"ودفتها بالقوة وجت طايحة من الدروج"
منى:"تعيط بصوت عالي"ااااااه ااه اااه
نعيمة:"خافت تكون صارتلها حاجه نزلت تجري وفاتت من فوق منى ولا كأنها صارتلها حاجه ومشت لدارها ودارت روحها راقده"
منى:"تعيط وايدها توجع فيها لانها انكسرت وجسمها كله يوجع فيها"اه ياربي اه حسبي الله ونعم الوكيل فيك
"ميار ومرام ،كانوا عند خالتهم يعني مافي حد في الحوش الا منى ونعيمة"
منى:"بدون تفكير حاولت تقيم روحها ومشت لباب الحوش بتطلع وتمشي في الشارع وتبكي جت بتمشي لحوش عمها بس ادكرت انهم انتقلوا من بحداهم قعدت تفكر وين تمشي وادكرت خوالها هيا عارفه انهم يسكنوا في الشارع اللي جنبهم بس ماتعرفش اما حوش بالزبط"اه ياربي ماعنديش حل كان نمشي لحوش خوالي اه يدي توجع فياا اه ياربي اه
"وهيا في الطريق وقفت سيارة ،وكان فيها شاب نحا نظاراته وقعد يكلم فيها وهيا ماتردش"
سراج:باسم اللهِ ،خيرك وخيتي شن صاير معاك؟
منى:"ساكته"
سراج:غير ردي عليا بس باهي وين بتمشي؟
منى:"ساكته وتبكي وحاطه ايدها علي يدها اللي توجع فيها ووتوجع"
سراج:"خاف عليها"باهي غير ردي عليا وين بتمشي بس؟
منى:"بعد تفكير قررت تسأله"تعرف حوش عمر .....؟
سراج:اي نعرفه ،اركبي نوصلك
منى:"زادت تبكي"مانيش راكبه بس قولي وين؟
سراج:الشارع التاني رابع حوش
منى:"كملت طريقها وهيا تبكي"
سراج:"قعد يراقب فيها نين وصلت علي خاطر يطمن عليها ويمشي"
نعرفكم علي سراج:
"شاب حليوه مواليد 1989 متخرج من كلية الهندسة ،كان عنده صاحب اسمه وليد يسكن جنب حوش عمر خال "منى ومريم" ،هادا علاش عرف حوش عمر لانه يسمع بيه من صاحبه وليد"
منى:"وصلت لحوش خالها وهيا داهشه من البكي والوجع وقعدت ادق علي الباب وترن في الجرس وحيلها مهدود"اه ياربي افتحوا هيا بالله افتحوا معاش قادره نتحمل
سناء:"خافت من صوت الدق لانه كان قوي هلباا ،ومشت تنوض في عمر"عمر عمر نووض اشبح مني يدق علي الباب!
عمر:"ناض مستغرب"من بيجيني في هالليل؟
سناء:غير نوض شوف شكله اشبح شن في!
عمر:"لبس سوريته"هي هاني جاي
عمر:"طلع من الحوش وفتح الباب لقي بنت بدون وشاح وتبكي وحالتها حاله ومش قادره تقعد واقفه"ياساتر ياساتر ،خيرك يابنيتي؟
منى:"زادت تبكي وقدمت حضناته"اه ياربي اه
عمر:"استغرب كيف تحضنه"باهي غير بنت مني انتي؟
منى:"تشهق وتبكي"بنت اختك
عمر:"انصدم"منى؟!
منى:"زادت تبكي وتحضن فيه"اي
عمر:"قعد يهدي فيها"باهي اهدي يابنيتي اهدي
منى:يدي توجع فيا
عمر:"شد يدها"ترا نشوفها!
منى:"تعيط"اه مش قادره مش قادره نمدها
عمر:"خاف عليها وعرف انها مكسوره"باهي غير اركبي في السيارة نجيب المفتاح ونرفعك للمستشفى
منى:"مشت للسيارة ،وشبحت لقت سراج قاعد واقف يراقب فيها"خيره هادا قاعد يشبحلي ناقصني هم اني!
عمر:"جي وفي يده مفتاح السيارة ،فتحلها الباب وقعد يساعد فيها باش تركب"هيا بنيتي بشوي عليك
منى:"تبكي وساكته"
عمر:"ركب في السيارة ومشوا للمستشفى"احكيلي يامنى شن صاير معاك؟
منى:"تبكي"طحت من الدروج
عمر:كيف طحتي؟
منى:ااءء ااء طحت وخلاص
عمر:احكي منى ماتخافيش
منى:مرت بوي دفتني
عمر:"انصدم وحمق"نعم دفاتك خير عمها ادف فيك؟
منى:تعاركت اني وياها
عمر:وعلاش تعاركتوا؟
منى:"قعدت تبكي" بيزوجوني غصباً عني لواحد مدين واني مانبيشي تعاركت اني وياها علي الموضوع هادا مشي دفتني
عمر:حسبي الله ونعم الوكيل فيهم ،ماتخافيش يامنى والله معاد موليتيها لحوش بوك
منى:"اطمنت"حاضر
"وصلوا للمستشفى وطلعت منى فعلا مكسوره جبسوها وهما طالعين من المستشفى"
سراج:"دار روحه تلاقى صدفه مع عمر ؛يبي يفهم شن صار مع منى"خير ياعمي عمر لاباس لاباس
عمر:"استغرب"اهلين ياشاب ،مني والله ماعرفتك سامحني!
سراج:واللهِ ،اني صاحب وليد ولد الحاج مفتاح جارك ديما نتلاقى اني وياك ونعرفك لكن شكلك نسيتني
عمر:اه سراج اهلين اهلين سامحني وليدي والله مادكرتك
سراج:عادي ياعمي ولايهمك خيركم انشاء الله خير؟
عمر:لاخير خير ،بنيت اختي طايحه من الدروج ايدها انكسرت
سراج:لاحول ولاقوة الا بالله ،انشاء الله بسيطه بس
عمر:لا بسيطه بسيطه
سراج:باهي نستادن اني ياعمي انشاء الله لاباس
عمر:ادنك معاك وليدي ،لايوريك باس
منى:"حضرت الهدرزه كلها وعجبها سراج كيف استغل الموقف ودار روحه تلاقى معاهم صدفه ،وعجبها اكتر لانه كان يبي يطمن عليها"هيا خالي
عمر:هيا اركبي
"ركبوا في السيارة وروحوا لحوش عمر"
أنت تقرأ
تباً للذاكرة🖤!
General Fictionشكراً ع المتابعة ،هادي حتكون روايتي الأولى ونتمنى تعجبكم حبيباتي🙂وماتبخلوش عليا بدعمكم وكونوا سبب في تطور كتابتي ورواياتي💛. روايتي تحكي علي بنتين كانوا ضحية طلاق امهم وبوهم ،وكل وحده فيهم عاشت ظروف مختلفة 180 درجة علي اللي عاشتهم اختها ،وحده انحرم...
