بارت14
#هسة حبنة ذكريات
الو منو
خيتي اني ممرض بمستشفى علة طريق قضاء الحمزة الشرقي
اي تفضل
هاذة مريض هنانة ﻻكي لناس واكع بلشارع وجابو ضغطة كوولش مرتفع صارلى 3 ايام فاقد الوعي وهستوة صحة تلفونة ماهوة اضاهر من واكع مبيوك منة نطاني رقمين اﻻول مغلق والثاني رقمج كلي هاي اختي صحيح انتي اختة ؟
اي اي اسمة سﻻم مو
اكفي
اي يكول اسمة سﻻم
شلونة هسة زين هوة
اي صار زين تكدرون تجون تطلعو
ماشي هسة جايين
سديتى من الرجال وكمت ابجي من الفرح
ربي احمدك واشكرك ماقصرت
نزلت علكاع سجدت سجدة شكر الي عدهة مثل اخوي سﻻم تحمد الله الف مرة بليوم
سويت الدرج شبختين وركض علة امي وابوي
دكيت الباب همة كاعدين
بابا سﻻم عايش عايش
شنو وينة
احجي ويا وابجي امي وكعت بلكاع من الفرح
بابا بلمستشفى علة طريق قضاء الحمزة الشرقي خابرني هسة مضمد من المستشفى سﻻم منطي رقمي
كومو بدلو خل نروح نجيبة
راح يطلع لصبح مابقة شي بنيتي هسة لدنية تخوف شلون نطلع اهم شي طمأنينة علي كلهة ساعتين ونروحلة
خوما بي شي هوة ؟
ﻻ يكول مابي شي زين
رحت توضيت وصليت ركعتين شكر
الف حمد وشكر الك ياربي هسة لو تاخذ امانتي بهاي الحضة هم عادي عندي ماطول طمأنيت علة سﻻم
جريت تلفوني خابرت سمى من لرقم الي دكت علية منة
الو
الو
صوت ولد
هاذ لؤي اي والله لؤي
سويت نفسي ماعرفتة
مرحبا هاذ مو رقم سمى
ﻻ اني اخوهة منو حضرتج
حقك ماتعرفني اذا انتة مافد يوم كلفت روحك تسأل علية
منو ديما
اي ديما
شلونج دم دم
عايشة لحمد لله
ﻻ سألتو ﻻكلتو بيت عمنة نجي نوكف وياهم بمحنتهم
والله ياديما اني ردت اجي بس الوالد ماقبل ومنعني
الله ﻻيعوزنة ﻻحد عود انتو بيت عمنة وشادين لضهر بيكم لحمد لله الله ماقصر سﻻم لكينا وبخير
وهسة اني اريد سمى اريد احجي وياهة
ماكدر انطيج سمى اعتذر منج الوالد محلفني
ليش راح اكلهة
ﻻ موهيج كتلج لوالد محلفني ماكدر
تنتهي سعادتي علة ايدة هاذ موتي هاذ عزرائيل بلنسبة الي
شكد مغرور ومتعجرف
المستشفى الي بيهى سﻻم علة طريق بيت عمي اهل سمى همة كاعدين بقضاء الحمزة الشرقي معناهة سﻻم جان رايح لسمى
سودة علية يبعد اختك اكيد شتاقلهة
اااوف منين اجيب مثل حنيتك
كمت اريد اطلع مﻻبس البسهن مابقة شي ويطلع الفجر من راح سﻻم لليوم مانمنة ليلنة ونهارنة صارن واحد
بس فتحت الكنتور كعدت مريوم
رحت عليهة حضنتهة وبوستهة
مريوم نروح لبابا
تكلي اي بابا بابا وتأشر بديهة
يبعد عماتي وماما ترديهة
تكلي ماما ماما ولزكت بماما اريد اسكتهة بعد ماكدر
فدوة لكلبهة تخبل نسخة من سﻻم عيون زرك والبياض مال تركيات ولبرائة لبيهة ماموجودة بطفل
اباوعلهة واحجي وية روحي شلون ردت احرمهة من امهة شكد كلبي قاسي
طز بية وبكلبي هلمﻻك هاي ماألهة ذنب تعيش معلعلة هية واهلهة واخوي ادري بي يموت اذا عافتة سمى
بدلتلهة وبدلت بدة لفجر يطلع
كمت سويت بيض سلك ريكت مريم وتانيت امي وابوية علما خلصو
صعدنة لسيارة ورحنة علمستشفى الي نطاني الولد عنوانهة امي الطريق كلة تسبح وتبجي وتندعي تكول كون مابي شي
وصلنة للمستشفى طب بابا كدامنة سأل دلو علة لغرفة
طبينة سﻻم متمدد وصافن
اول ماشافتة مريم من بعيد صاحت بابا كل المرضى نتبهو عليهة
هوة ندار شافنة سودة علية كام يبجي رأسن
كام علة حيلة باس ايد ابوي وحضنة وكامو يبجون ثنينهم منضرهم يفزع لكلب خو بابا يبجي بصوت عالي وجسمة كلة يختض ويكلة
ولك بوية ياشمعى بيتي نهد حيلي عليك ولك افتر بلشوارع مثل المخبل وادور عليك ماضل بية حيل حتة ثﻻجات الموتة هم رحتلهة
امي كعدت بلكاع وتبجي
احة سﻻم عليهة بوس رجليهة ثنيناتهن العالم المرضة الي ويا بلصالة كلهم يباوعون علينة ويبجون
حضنتى امي وضلت تشهك وهوة حط راسة علة رجليهة ويبجي وكلسا يجر ايدهة يبوسهة
اني شايلة مريم وابجي فرفحت
باوعلي فتح ادي ثنينهن
نطيت مريم ﻻبوي واجيتة شمرت روحي بحضنة
محتاجة هاذ الحضن كلش محتاجة ايد تمسح علة راسي وتطبطب علة ضهري الحمل الي بداخلي يهد جبال محد يدري بية اكابر واني الدمعة بطرف عيني والهموم الي فوك راسي الله وحدة يعلم بيهة
