دراهم

الحلقة -2-

✍️//فراقد

((((دراهم))))

البارت الثاني...(2)

والملابس كل بنيه تغسل ملابسها عدنه بالحمام غسالتين وكلشي متوفر،،

بيوم العطل لايختلف النظام شويه تفقل ابواب المجمع الساعه ب(8)بليل

خاف وحده عاجبها تطلع تشتري شي تفتر تروح مطعم تشوف اقاربها هيج شي ،،

ويسمحون نشغل تلفزيون (بلازمه)كبيره موجوده بالصاله مشتركه للجميع

أما التلفونات عادي موجوده عدنه بس ماكو انترنيت فقط للاتصال ،،،،

وكل بنيه وعدها حياتها الخاصه بيها الي عدها حبيب والي عدها صديق والي حبت بالجامعه والي حبيبها من منطقتها والي مخطوبه والي متزوجه يوووو اشكال الوان الشخصيات الموجوده ،،،

بس اني وصديقتي هند ،،صديقه مقربه واخت الي ماجابتها امي كلش حلوه وحبابه وطيوبه تعرفت عليها اول مادخلت الجامعه ،،
مرحله اولى وكلشي مااندل بالجامعه وهي هم نفسي كلشي ماتندل

اني كنت من غير محافظه وهي هم من غير محافظه فتعرفت عليها ومن هذاك الوكت هي صديقتي واختي وصارلنه 3سنوات سويه

ماعدنه سوالف البنات من حب وهاي الخرابيط مو معقدات او شي لا لا بس مالكينه الشخص المناسب لحد هسه ننتظر فارس الاحلام  كل الي ويانه من الشباب زملاء دراسه واخوه وكت نحتاجهم بشي

وشي ثاني تفكيري وتفكيرها نفس الشي منريد حب وسوالف الحب لا لا نريد نطبق المثل الي يكول
((الحب يأتي بعد الزواج)) نصبر ونشوف

صدك نسيت اعرفكم عن نفسي اخذتنه السوالف هههه والله احنه نسوان مصيبه نحب الحجي والسوالف

**اني ..دراهم عمري 22سنه مرحله 3قسم اللغه العربيه من سكنه محافظه (...) طلع قبولي بغداد

ابويه الله يرحمه توفى قبل 6سنوات خطيه أتمرض وماعرفنه شنو مرضه ركضنه بي للاطباء وكل واحد يحجي شكل وحالتنه الماديه متساعد نطلعه للخارج نعالجه خطيه بقى شهرين مريض وتوفى الله يرحمه برحمته الواسعه والله كسر ظهورنه بفكده هواي تعبنه من بقينه وحدنه ،،

امي موجوده الحمد لله والشكر صوتها بالدنيا يسوى كلشي هي شبه مقعده خطيه حركتها على كد روحتها للحمام تمشي على عكازه من قبل سنوات كلش هوايه صار عدها انزلاق غضروفي بظهرها
سوت عمليه بس مانجحت فبقت تمشي على عكازه الحمد لله على كل حال

عندي 3خوات اني ثاني وحده ،
اختي اكبر مني اسمها(دره)

واني (دراهم) اسمي غريب موو

من سالت اهلي عن معنى اسمي ابويه الله يرحمه
كال /من كنت بالعسكريه عندي صديقي مسيحي
حلفني اذا صار عندي بنيه اسميها دراهم
كتله /عود ليش
كال /لان الدراهم ذهب وفضه
وهو ميصير عنده اطفال ويحب البنات كلش هووايه
ويكول هنه ذهب هاي الحياة وفضوه القلب من قهر وضيم الدنيا ..