دراهم

الحلقة -6-

✍️//فراقد

((((دراهم))))

البارت السادس (6)

دراهم ....رجعت للسكن وهند تلكتني وبدت تحقق ليش رجعتي بسرعه؟؟وشنو ؟؟وشكوو؟؟وشصار؟؟

عاد سولفتلها الموقف باأختصار ورحت للحمام بدلت ملابسي شفت مكان الضربه صاير ازرك على بنفسجي بشكل دائري مسطح

يطلع حجمها بكبر فتحت دائره استكان الجاي خفت كلش من شفتها عفتها يم الله بعد ماكو شي بيدي اسوي هو احسن الكل ...

مر اليوم مابي احداث جديده بس اكو وجع خفيف ونغزات تروح وتجي وبالذات من اتحرك ..

واجى الليل وعساه ماأجى صخنت صرت جمره وصدري يون عليه والوجع كام ينهش بيه نهش

حرت شسوي ادفي مايفيد نزعت الملابس الداخليه مايفيد ،،لبست فانيله رياضي جوه الملابس مايفيد.

بقيت الليل كله مثل السمجه المزوهره وهند خطيه بقت ويايه شايله همي وبراء هم تلوج ويايه اخذ الغرفه روحه رجعه

من كد التعب والوجع الهاج عليه والصخونه مااعرف شلون نمت وغفيت ...

فزيت شفتها ساعه ب(8)الصبح ولكيت هند كاعده قبلي مسويتلنه ريوك

هند ...صباح الخير ،،بشريني شلون صرتي؟؟

دراهم ...صباح النور ،،بعدني روحي مفرفحه والله مااعرف شلون غفت عيوني

هند ...كومي اكلي لكمه وبدلي نروح للمستشفى

دراهم...اليوم سبت عطله وين اكو مستشفى ؟؟

هند...امشي نروح للطوارئ اذا ماكو استشاريه قلبي انمرد عليج الليل كله تلوبين ومابيدي شي اكدر اسوي

دراهم..الحمد لله تعبتج ويايه هنوده حبي

هند ..ياتعب هذا انتي اعز من اختي الله شاهد

دراهم...ربي يدم خوتنه للدوم

هند ...امين ربي،،هسه خفي ايدج خلي نروح بسرعه

دراهم ..اي ماعندي شي بس ابدل ...

والله كمت غسلت وبدلت واكلتلي لكمه بس شنو روحي مفرفحه ،،

رحنه لمستشفى (.....) قريبه على السكن مالتنه ،،
دخلنه على الدكتوره يبووو شايفه نفسها ماتتحاجه ترد من وره خشمها شبيج ؟؟

سولفتلها الصار وهي ايديها تكول بلايس مابيها رحمه لزمتني بقوه اني صرخت واحس روحي ماعت

بقت تفحص بيه احس روحي راح تطلع بسبب قسوة ايديها ،،

كالت صاير عندج تكتل بالالياف (غده او جغده)متجمعه ومتكوره مو زين تبقى
هذا مسكن للعصر ضرورري ترحين لدكتور اختصاص ..

رجعنه للسكن وصار العصر سنه مو تكولون كم ساعه

رحت لدكتور اختصاص جراح وتخصص بالثدي
واجتي ويانه براء الظاهر مصطفى موصيها لان مبلغته بحالتي...