دراهم

الحلقة -12-

✍️//فراقد

((((دراهم))))

الحلقه الثانيه عشر (12)

محمد هم ردد بعد السيد ،،،والحمد لله تم عقد قرآنه؛؛ والهلاهل والجكليت ترس الغرفه.

واني كلشي مااشوف بس اسمع ،،،البركع خنكني ماكو هواء ،،وتم كلشي على خير وسلامه..

وكل الحاضرين هنونا وباركولنا ومحمد باركلي

محمد ....مبروك عليج اني ياعمري

دراهم...الله يبارك بعمرك ويحفظك اليه من كل سوء ربي يسعدنه

شاورني كال ؛؛((ابقي ساتره روحج من ترحين للكوشه عهود كالت الفستان مفضوح حيجون خوالج الباقين يطبون ويايه يباركون ))

اشرتله براسي بمعنى اي ،،،واني اريد الحاضرين بس يطلعون اختنكت اريد ارفع البركع،،

والهلاهل طرشت اذاني والجكليت تكول حصوا فشخنه تفشخ ،،
عاد طلع السيد وبعده محمد وكل الحاضرين من الغرفه ...

واختي رفعت البركع،، باستني امي وباركتلي ،،
واختي ،،وام مصطفى ،،،وام محمد باستني من وره خشمها مبروك عليج ابني !!!!!

دراهم ....الله يبارك بيج خاله

اشرت لأختي وشاورتها على الي كاله محمد ،،،
هي افتهمت ماشالت البركع من عندي ،،بقته على جتفي ورتبته بطريقه حلوه خلتله بروش حلو من يم الصدر مغطي جميع جسمي بس وجهي وشعري طالع ،،

رجعتني كعدت بالكوشه سويناها بالهول بسيطه نازكه وحلوه والاحلى لمة الاهل ،،،لان الاستقبال كعدوا بي الزلم

بس طول الكعده ام محمد تخزر بيه وهي وخوات محمد كاعدات وحدهن عازلات نفسهن،،،،،

عكس ام مصطفى وام براء مختلطات ويه اهلي وخواتي وامي تكول خالاتي مو غريبات

شويه وصاحوا سوا طريق راح يطب العريس ،،،،

كل البنات طفرن الي تلبس حجاب والي تلبس جبه يسترون نفسهم ؛؛
طبوا خوالي الباقين اثنين ومحمد وياهم وتلكوهم النسوان بالهلاهل والجكليت

وخالات محمد وبناتهم وعماته وبناتهم كاموا يهوسله هوسات مال اعراس والافراح...

هو رجع مره ثانيه سلم على امه وباس راسها ودنك باس ايديها،، وخواته حضننه وبواسنه،، كلهم باركوله ...ودنك على امي وباس راسها وايدها وخوالي باركولي وطلعوا

بقى بس محمد كعد بصفي بالكوشه وكلشي مااسمع،،، صوت (الدي جي )والهلاهل والهوسه فقدت حاسه السمع

حسيته ضرب على كف ايدي بخفه التفت عليه بااهتمام
لان كنت اسولف ويه اختي جابتلي تلفوني خطيه هند مخابره تريد تباركلي
كتلها ردي عليها وكوليها بعد الحفله ارجع اخابرها