دراهم

الحلقة -9-

✍️// فراقد

((((دراهم))))

البارت التاسع ...(9)

اني عجبتني الفكره اذا كان ايجار او شراء اخلص من سالفه السكن بالاقسام الداخليه..

عاد رحت لبيتنه وبعد ماارتاحيت وكعدت ويه اهلي سولفت لامي عن اقتراح مصطفى

وهي كالت خلي افكر واشور عمج ..

أصلا هو عمي ساكن بغير محافظه نشوفه فقط بالاعياد والمناسبات امي تخاف متصرف من حالها تكول خاف يكول تصرفت بكيفها

فصدك خابر مصطفى وسولف وياها وكاللها بالحالتين اني اساعدكم ومااعوفكم شنو تقررون انطيني خبر وتدللين

امي خابرت عمي وحجتله الموضوع فقترح عليها كاللها بيعي بيتج واشتري هناك بغداد احسلج من الايجار

فعرضنه بيتنه للبيع يم الدلال وامي انطت خبر لمصطفى يدورلنه بيت مناسب شراء وعاد صدك بده مصطفى يشتغل ويدور ويبحث لكانه بيت اصغر مساحه من هذا بيتنه ويرادله شويه ترميم
فبسلامه بمرور الوقت نعدل بي

وبعد 20 يوم من البيع والشراء شلنه لبغداد وانتقلنه البيتنه الجديد الف الحمد لله والشكر

واهم شي اخلص من ضيم السكن بالاقسام الداخليه وارتاح بيتي ماابقى غريبه وروحتي وجيتي للجامعه وللشغل اروحلي واحسلي

وبيوم استلام النتائج كنت كلش خايفه خابرت هند نلقتي بالجامعه وكتلها هي تشوف نتيجتي لان صدك خايفه كنت مامجاوبه بكم امتحان

شويه اشوفها عاطت وبدت تصفك وتكمز

دراهم ...هااااا شبيج دحجي قلبي وكف

هند ...ولج اطيرين عيون ،،عيني مانحسدج .ناجحه وبتقدير جيد

دراهم ...صدك تحجين !!

هند ...مبروك حياتي ان شاء الله يوم التخرج

دراهم ....اللة يبارك بيج ياعمري يوم نتخرج سويه ،،وانتي بشريني

هند...ناجحه بتقدير مقبول مو مثل هذولك الناس يبجون بوجه الكريم وتقديرهم جيد

طلعت فرحانه اريد اروح للجريده
وصلت الباب الجامعه ودنكت دافتح بجنطتي اريد اطلع تلفوني ...

محمد ...السلام عليكم شلونج دراهم

يمه فزيت ،،لان صوت قريب كلش عليه
رفعت راسي واشوف الطول الحلوو نعمة الله كدامي واكف
يمه يمه قلبي راح يوكف والنجوم 3يلمعن فوك الكتف يمه راح اموووع

((سوال هذا اكو من عنده نسخه ثانيه ))

دراهم... وعليكم السلام اخ محمد اهلا وسهلا الحمد لله انت شلونك ؟؟

محمد ...عقج حواجبه وحجى بااستغراب !! اخ محمد

دراهم ...اي نعم كلت اخ محمد ليش بيها شي !!