#البارت ١٥
#حب بالصدفة
مريم...سديت الموبايل من علي وبعد ما اتفقنه ع كلشي واني الخايفة من هاي الفكرة ومرعوبه شنو راح اتكون النهاية وراح انجح بهروب كل هاي صارت ادور بتفكري لاسف هم جبروني اوصل لهاي الدرجه فكرت ابطل وما اهرب بس راح اخسر علي لابد وازوج حيدر ما ردت اضعف واتراجع عن قراري بعد هذا طريق اني اختاريته ولازم اكمله لاخر لحظة..
علي...بعد ما سمعت الجواب من مريم ارتاحيت وأخيرا راح اسوي شي مقتنع بيه وراح يتحقق حلمي ايجوز اهلي راح يوكفون ضدي بس بعد هاي هي هذا قراري الأخير ما راح أتراجع عنا ردت واحد يريحني خابرت ع عمار
الووو.هلاو عمار اشلونك
عمار..هلا بخوي زين انته اشلونك صدك باجر خطوبتك وما ادري
علي..هي صدك خطوبتي بس راح اعقد ع مريم مو ع منال
عمار...اشلون يعني مافهمت انته شتحجي شنو ع مريم علي فهمني
علي..اي ع مريم اعقد بس راح تهرب وياي ونروح بحظرة الامام نعقد وبعد محد يحاجيها لان راح اكون زوجها
عمار...انته تحجي صدك تعرف شنو راح تشرد من بيت اهلها علي بهذا قراراك راح اصير مشاكل عشائرية اهلها ما راح يسكتون
علي...يعني شيريدون يسون فصل خلي يفصلون مايسون شي لاتخاف
عمار...والله يخوي اني خايف عليك اخاف يسولك شي وعلي اذا مسو منك شعراية راح احرك عشيرتهم
علي..لاتخاف ع اخوك اني ذيب لاتخاف عليه بس ع امي اريدك ماتقصر وياها اعرفها راح تزعل عليه بس شسوي احاول هسة اقنعها
عمار...اخليها بعيوني بس انته انتبه ع نفسك واني وياك بكلشي ولو اعرف تسويه خطا بس انته حتى لو حجيت وياك راح اسويه البراسك اعرفك اعنودي
علي..يلا عمار راح ارجع لبيت اخذ مستمسكات واروح اطلع لكربلاء
عمار..الله وياك خليك ع تواصل وياي اعرف اخابرك خوش اي شي تحتاجه اني يمك علي..ماتقصر يلا مع سلامة
رجعت لبيت تلكتني امي
ام محمد..ها يمه وين رحت ضل بالي عليك وابوك ليش عصبي ومايتحاجه
علي...يمه راح اكون صريح وياج ابوية راح يزوجوني منال واني ما أحبها وما اريدها وباجر اعقد ع مريم راح تجي وياي ونعقد
ام محمد...😲صخام الصخمني ولك اعليوان اتريد تفضحنه واهلها ماراح يسكتون ولك اتريد اتموت
علي...يمه لاتخافين عليه بس ادع لي واني راح اكون بخير
ام محمد...يمه اشلون ما اخاف اوليدي هذا شي تسويه أكبر خطأ بس انته اعنودي مثل ابوك ماتسمع لواحد
علي...يمه اني مريم نفسي من دونها اختنك اموت فدوة يمه ارضي عليه وادعلي الله يسهل عليه اني اذا ازوجت مريم اكتله واكتل نفسي واخلص ورحت لغرفتي ما اخذت شي بس مستمسكات مفتاح شقة مال بغداد عندي شقة اشتريتها من جنت اداوم كليه اشتروها الي اخذت فلوس كم غرض الي وطلعت شفت امي كاعدة ودموع بعيونها ماكدر ابقى اشوف دموعها من طلعت ذبت بورايه ماي مشيت بكل سرعة علمود الحك اوصل من وقت لكربلاء
مريم...كاعدة بغرفتي وافكر اشلون اترك اهلي وامي شراح اسوي شنو راح يكون موقفهم دخلت بصراع مابين عقلي وكلبي كلبي هو الانتصر شفتهم نامو وادري نومهم ثكيل حظرت مستمسكات لان يسويلي عقد محكمه وعبايتي احس جسمي يرجف ما اسيطر عليه ضليت اكل باضافيري هاي حاله من اتوتر كلبي يدك سريع ما اسيطر عليه خليت موبايل امي يمي لان كليتله من توصل خابرني اطلعلك شفته اتصل
مريم...بصوت هامس ها علي وصلت
علي...اي وصلت واني بسيارة شويه بعيد عن بيتكم هسة اكدرين اطلعين انتظرج راح مريم ..اي هسة شوي
نزلت من الغرفه ع درج انزل ع كيف علمود محد يحس وصلت لغرفه اهلي شخيرهم واصل لسابع جار ما اعرف من وصلت ليش اختنكت دموعي كامت اتصب بوحدهن ردت اسيطر ع نفسي ماكدر رحت خاف يسمعوني كل المشاعر اجتمعت عندي خوف ع حزن ع فرح ما اعرف شنو احس بظبط طلعت بسرعة لان خاف واحد يكعد وشوفني وصلت لطرمة باوعت آخر مرة ع بيت لان يجوز بعد ما ادخله طلعت واني ادري رايحة برجلي لمجهول ما اعرف شنو راح يصير وياي راح اتحمل كلشي اني لان هذا طريقي اني اختاريته
فتحت باب طلعت سديته ع كيف همزين محد كعد من طلعت حسيت روحي هسة يلا اتنفست شفته واكف بسيارة وصلت يمه واني هاي ثاني مرة اكون قريبه منه صح نتخابر واراسله بس مو مثل هسة
مريم..وبصوت هامس ع خجل وخوف هلو علي حمد الله السلامه من وصلت
علي..وهو مجرد القرب منها يخلي متوتر
هلا ياروح علي يلا تعالي اصعدي قبل لا أحد يجي
مريم..صعدت بسيارة يمه وسكوت جان سيد موقف وصلنه لضريح لان احنا مسافه قريبه ع الإمام طبكها سيارة قبل لاننزل
علي...مريم انتي مقتنعه بتسويه لو لا ما اريد اجبرج ع شي ولازم احنا نتحمل كل نتائج
مريم..ما طول اني وياك وما تتركني عندي كامل قناعه وثقة بيك ايجوز راح نتحارب من أهلنا بس بعد انجبرنا نسويه هيج
علي...كوني ع ثقة ما راح اتركج بس الموت راح يفرقنا يلا هسة خلينا ننزل نعقد يم سيد صاحبي
بس عدلي عبايتج
مريم..عدلت عبايتي لان مالابستها بعداله من خوفي نزلنه وصلنه لسيد اليعقدنه
علي..بعد ما وصلت لسيد صاحبي شفتها متوترة حاولت ما اخليها تتوتر لزمت اديها اني متفق وياه بسرعه نعقد اثنين ولد همين يشهدون من العتبه
بدء السيد يقرأ الآيات العقد
مريم...حسيت بتوتر جسمي كله يرجف احس فصلت عن العالم من بدء يقرأ السيد اتمنيت لو امي وياي يمكن ما احس هيج توتر كال هل تقبلين بعلي ع مهر مسمى حتى مامنتبه ع مهر ضليت صافنه لحد ماشفت علي ياشرلي انو اقبل
مريم.. نعم قبلت وانته وكيلي كلتها اباوع ع علي واشوف عيونه اشلون تلمع حسسني بلامان
علي...بعد ماوافقت مريم ماي بارد ونزل ع كلبي حاس بسعادة ما حاس بيها من قبل كمل العقد بعد ما اخذ موافقتي باركنه وراح شفتها مدنجة راسها رفعته الها صارت عيني بعينها
واخيرا صرتي مرتي ما راح اخليج ابد تتندمين لان ازوجتني وراح اخليج اسعد وحدة بدنيا وبستها بكصتها مريم..بعد ماحجه وياي وباسني حسيت بانفاسه الحارة ع وجهي باوعت بعيونه ونسيت العالم كلها 😍
علي...وهسة شوي ونروح نعقد محكمة علمود نروح لبيتنه البغداد😉😉
#يتبع
