*"كلنا بنمر بانكسارات وبنحاول نصلح من نفسنا بس كوننا م ح نرجع زي اول دي حاجة كويسة عشان لو اتختينا ف نفس الموقف مرة تانية م ح ننكسر لانو ح نكون أقوى.. لم نحول مساؤنا لمحاسن وقدرنا نتعلم من اغلاطنا حياتنا كانت زمان بقت أحسن..وفي ألم بخليك توعي لحاجات كنت ناسيها وم كنا واخدين بالنا منها ،مرات بتخت في موافق ولا بنقدر نمسك العصاية من النص ولا من الطرف ف بنضطر اننا نفكها مرة وحدة ح تتعذب وتتوجع وتمر عليك لحظات صعبة شديد بس في النهاية بكون لمصلحتك اكيد..💛*
صراحة حسيت لساني اتربط وعقلي وقف تفكير كانت مفاجأة بالنسبة لي ..بس شفت لمعة عيون امو واختو وهم بتكلمو وحماس إسراء ..بس فجأة حسيت انو مصعب قاعد جمبي وماسك يدي وبقول لي وافقي..اصلا دايما بحس بروحو معاي بس الليلة كان غير💛
عاينت لأمي ولقيتها مبتسمة والقبول ظاهر عليها بدون م أفكر قلت ليهم *موافقة*..
مع اني اصلا م بعرف الولد بس وافقت فرحو شديد وأمي كانت مخلوعة مني ومن تصرفي بس كانت برضو فرحانة..
_أمي: أنا م اتوقعت كنت مفتكرة تقولي خلوني افكر ولا حاجة
_الأم: يازولة دا قرارها براها والحمدلله انها وافقت😍😍ربنا يتم ليكم ع خير ان شاءالله ي بتي ويسعدكم ح يفرح شديد😭💛
_الأخت: اي والله ح يفرح شديد ربنا يتم ليكم ع خير ..
وطبعا هو م عندو خطوبة تعدي زمن وكدا عرس طوالي..
_أسراء: ي هيام دا م وقتو هسي بعد نمشي يتفقو هم براهم ع العرس وكدا وكلها ايام ومهاد تتخرج ف م اظن يكون عندها مشكلة صح ي مهاد?
انا م اتكلمت بس قلت ليها براسي ااي..
صراحة م كنت عايزة افكر ف الموضوع كتير عشان ح اتجهجه خليت اي حاجة تاخد مجراها وكلو لخير ان شااءالله.. ويمكن يطلع الولد كويس فعلا ويعوضني ع كل الفات..
خليتهم برا ودخلت جوة اتوضيت وصليت ركعتين واستخرت💛
مهاد لم م فكرت حست بأنها غلطت بس تاني عرفت انو لو فكرت كتير م كان الموضوع تمّ ..ختت الأمل قدامها وحبت تخوض التجربة وتتقبل كل العواقب الممكن تحصل ليها ..مهاد اتفائلت بمصطفى وحست انو ممكن يكون هو الراجل الح يسعدها ويعضوها كل الحرمان بعد مصعب..
_أمي: مهاد انتي متأكدة موافقة? ولا قلتي كدا عشان م يتكلمو معاك كتير
_أنا: لالا ي أمي انا موافقة صح انا م بعرف الولد بس حسيت من كلامهم انو زول كويس وربنا يكتب الفيهو الخير ..أنتي شايفة انو قراري غلط?
_أمي: لالا بالعكس والله قرارك عين العقل ومصطفى فعلا زول كويس وربنا يتم عليكم ع خير ي بتي ويسعدكم💛
_أنا: اللهم امين ..كلمتي أبوي وفارس?
_أمي: اي كلمتهم بس قايلنك نايمة عشان كدا م جوك..
_أنا: م مشكلة بلاقيهم الصباح ..
_أمي: خلاص تمام تصبحي ع خير..
_أنا: وانتي من اهلو💛
"وبستها في راسها"
امي طلعت وعشان اتفادى دوامة التفكير بقيت بقلب ف تلفوني لحدي م نمت..
___
