رواية السر الدامي
البارت الاول
للكاتب المصري محمد مالك
سلوي .. معقول يا ماما !! انتي بتكلمي بجد ؟!! في عريس قاعد دلوقتي في الصالة مع بابا ؟!!
الام .. ايوا
سلوي .. جاي يتقدملي انا .. انتي متأكدة ؟!! لأحسن يكون جاي ل نشوي بنت الاستاذ نفادي اللي في الشقة اللي جمبنا
الام .. يابنتي جايلك انتي والله .. مالك مش مصدقة ليه ؟!!
سلوي .. اعذريني يا ماما .. انا كنت فاكرة اني عمري ما هتجوز ابدا !!
الام .. ليه بقي ان شاء الله ؟!! فيكي ايه يتعيب ؟! دا انتي ست البنات جمال ودلال وحسب ونسب
سلوي .. يعني من كتر البوستات اللي بقراها ع الفيسبوك حاسستني ان نص البنات عنست والنص التاني هيعنس برضوا!!
الام .. يابنتي كل واحدة بتاخد نصيبها والجواز دا رزق من عند ربنا.. المهم بقي غيري هدومك خليكي تطلعي تشوفي عريسك
سلوي .. حاضر يا ماما
الام .. ربنا يتمملك علي خير يا بنتي ولو خير يجعله من نصيبك ولو شر يصرفه عنك يا قادر يا كريم
ونذهب الي والد سلوي الذي بجلس مع منير العريس ويدعي مصطفي
مصطفي .. اهلا وسهلا يابني شرفتنا
منير .. اهلا بحضرتك يا عمي
مصطفي .. وحضرتك بتشتغل ايه؟
منير .. انا محاسب في شركة استيراد وتصدير بالسعودية .. مرتبي كويس جدا وعندي شقة في وسط البلد هي شقة المرحوم بابا وبما اني ابنه الوحيد فأنا ورثتها طبعا عنه وعندي عربية موديل حديث
مصطفي .. ما شاء الله .. طب ووالدتك ما جاتش معاك ليه ؟!!
منير .. والدتي تعيش انت .. اتوفت السنة اللي فاتت
مصطفي .. الله يرحمها ويرحم والدك ان شاء الله..
منير .. ولو اتفقنا ان شاء الله الزيارة الجاية هيكون معايا عمي وخالي
مصطفي .. ان شاء الله .. ربنا يريد بالخير. طب لو حصل نصيب ان شاء الله هتسافر ب سلوي السعودية ؟!!
مصطفي .. لا ما الشركة فتحت فرع ليها هنا وانا همسك المدير المالي للفرع
مصطفي .. بالتوفيق ان شاء الله
منير .. شكرا يا عمي
مصطفي .. طب عدم لا مؤاخذة يابني .. انت شفت سلوي فين ؟
منير .. شفتها كذا مره عند الاستاذ كمال . ما هي صحبة بنته فريدة
مصطفي .. ايوا .. ايوا .. فعلا سلوي صحبة فريدة بنت الاستاذ كمال ودايما بتروح تزورها .. هو حضرتك تعرف الاستاذ كمال ؟!!
منير .. انا اعرف هيثم ابنه .. ما هو دفعتي وصحبي في نفس الوقت
مصطفي .. تمام .. تمام .. شرفت ونورت
منير .. منور بأصحابه يا عمي
ثم تدخل سلوي وهي تحمل صينية الشاي والكيك.. تختلس النظرات ويبدوا انها مكسوفة ومتوتره
مصطفي .. حطي الشاي هنا يا سلوي
سلوي ..حاضر يا بابا
صينية الشاي تهتز من شدة التوتر والجميع يلاحظ ذلك
سلوي .. اي خدمة تانيه
مصطفي .. لا يا حبيتي
منير يبتسم ل سلوي ويبدوا عليه الفرح والسرور
مصطفي يلاحظ ذلك فينادي علي سلوي
مصطفي .. سلوي
سلوي .. نعم يا بابا
مصطفي .. الاستاذ منير محاسب في السعودية وجاي طالب ايدك .. موافقة يا بنتي ؟
سلوي مكسوفة.. اللي تشوفه حضرتك .. بعد ازنكم
مصطفي .. اللي اشوفه حضرتي !! واضح ان في قبول .. طب الحمد لله خير ان شاء الله
منير .. ان شاء الله
ثم تاتي رسالة علي المحمول الخاص ب منير فيقرأها فينزعج بشدة ويبدوا عليه ذلك
مصطفي .. اشرب الشاي يابني
منير مرتبك .. حاضر
تأتي رسالة اخري ل منير يقرأها فيزداد توتره.. يمسك فنجان الشاي ويداه ترتعش فينسكب الفنحان علي ملابسة
مصطفي .. خير ان شاء يابني نجيب غيره
منير .. لا ياعمي مالوش لزوم .. انا مضطر امشي دلوقتي حالا .. دا حضرتك عنواني ونمرة تليفوني .. اسأل عني براحتك وانا هنتظر تليفون حضرتك
مصطفي .. اللي فيه الخير يقدمه ربنا يابني
منير .. طب استأذن انا
مصطفي .. مع السلامه يابني نورت
منير .. شكرا
منير اثناء خروجه يتكعبل في الطربيزة ويكاد يسقط علي الارض
مصطفي .. علي مهلك يابني
منير .. اسف يا عمي .. سلاموا عليكم
مصطفي .. وعليكم السلام ورحمة الله وبركاته ..
